جەتپىستەگى جولاۋشى

 

   لاۋ پان الىس ساپارعا جولاۋشىلاۋ بەكىمىنە كەلگەندە،الدەقاشان جەتپىستى جەلكەلەگەن ەدى.

   بۇل جان ءومىر بويى ۇيدەن ۇزاپ شىققان ەمەس،جاس شاعىندا ءۇپى-ءتاپى تۇرمىس كەشكەن ودا ارتىق-اۋىس اقشا بولمادى، ال،قارتايعاندا،تۇرمىس كۇيى كوتەرىلگەنىمەن،ءوزى ساپارلاۋدى نيەت قىلمادى. كەمپىرى بايقۇس كوزى تىرىسىندە بەيجيڭ، شاڭحاي جاقتى اينالىپ كەلۋدى ءسوز سىرالعىسى ەتىپ ايتقان ەدى،ول قارتتىقتان قاۋساعان شاقتا قاي-جايداعىنى ايتپاي تىنىش وتىر دەپ ءبىر-اق اۋىز سوزبەن تيىپ تاستاعان. سوسىن كەمپىرى دە بۇل تۋرالى قايتا اۋىز اشقان ەمەس. دەگەنمەن،كەمپىرى ورالماس ساپارعا كەتكەن سوڭ،ونى سەرىك ەتىپ ەل تانىپ،جەر كورىپ،بىرلىكتە ساياحاتتاماعانىنا،شىنىندا،وكىنىپ ءجۇردى. ەندى سوپا باسى سوپيىپ ءوزى جالعىز جولاۋشىلاعالى تۇرعان سۇرقى مىناۋ!

    دەسەدە،بۇكىلدەي جالعىز دەۋگە دە كەلە قويماس،ويتكەنى قاسىندا اپپاق ءجۇنى كۇمىستەي جىلتىراعان،ۇلىنداي كورەتىن سۇيكىمدى كۇشىگى پيڭ پيڭ بار عوي.

   لاۋ پان بۇرىن كۇشىك، مىسىق دەگەندەردى ۇناتپايتىن، قاندەن قۇشاقتاپ، ءيت جەتەلەگەن قىزداردى كورگەندە زىعىردانى قايناپ سالا بەرەتىن. كەمپىرى كوزى تىرىسىندە باسقالاردىڭ كۇشىك، مىسىق باققانىنا قىزىعىپ، ءوز اۋەسىن ايتقانىمەن، ول پا-پا اۋىز اشا كورمە، ونى باعىپ قايتپەكسىڭ، تازا ۇستاماساڭ وزىڭە اۋرۋ جۇقتىرادى دەپ ەكى قولىن توبەسىنە قويىپ قوسىلماعان. سول باياعىسىنداي كەمپىرى قايتىپ بۇل تۋرالى ءسوز قوزعاماعان. كەمپىرى ءومىر بويى ونى تىڭداۋمەن، ونىڭ ايتقانىنا كونۋمەن، ونى كۇتۋمەن وتكەن، ءارقانداي ىستە ەرىن باسا كوكتەپ شەشىم جاساۋدى بىلمەيتىن ساباز مىنەزدى، جارالماعان جان. لاۋ پان دەمالىسقا شىققاننان كەيىن دە ونىمەن بىرگە كەشكى سەيىلگە شىعىپ، باقشا ارالاپ، بىرگە تەلەۆيزور كورىپ، جان قيىسپاس جاقسى سەرىگى، جۇرەگى جالعاس سىڭارى بولا ءبىلدى. بالالارى ۇنەمى كەلىپ تۇرماسا دا قاسىندا كەمپىرى بولعان سوڭ ەشقاشان قۇلازىپ كورگەن ەمەس، كەمپىرى ءاردايىم ۇل-قىزدارىن، نەمەرەلەرىن ساعىنىپ، ولار كەلمەگەلى قاشان، ەندى قاشان كەلەر دەپ اۋزىنان تاستاماي وتىرادى. لاۋ پان عوي بۇل تاقىرىپقا كوپ سوقپايدى، قايتا كەمپىرىنىڭ مۇنداي سوزدەرىن ەستىگەندە، قاراداي ىزالانىپ، بالالاردىڭ ءبارى قاربالاس، تەك امان ءجۇرىپ، ادامشا كۇن كورسە بولدى دەپ وعان كەڭەس بەرەتىن.

   مۇنداي تاربيەدەن سوڭ كەمپىرى ۇيرەنشىكتى ادەتىمەن تىنىشتىققا وتەتىن،سالعىلاسپايتىن. بۇل ومىرلىك ۇستانىمى. لاۋ پان بولسا قاتىگەزدەۋ جان. بەينە سۇرلانعان سۋىق تەمىردەي دەۋگە بولار. جاس كۇنىندە قىزمەتتەن ءتۇسىپ، ۇيگە كەلگەندە ۇيدەگىلەرمەن شۇيىركەلەسۋ دەگەندى بىلمەيتىن. بالكىم،بۇل مىنەز ىستەگەن جۇمىسىمەن تىكە قاتىستى بولسا كەرەك. لاۋ پاننىڭ ءبىر ءومىرى ماشينا جاساۋ زاۆودىندا ستانوكشى بولىپ قارا تەمىرمەن   ارالاس-قۇرالاس ءوتتى. تەمىر-تەرسەكپەن سويلەسۋگە قايدان بولسىن،زاۆود ىشىندە باسقالارمەن دە اڭگىمە شەرتىسۋ مۇمكىن    ەمەس،تەك قۇلاق تۇندىرار اۋىر زىركىلمەن، مازاسىز داڭعازادان وزگە داۋىس ەستىلمەس تە ەدى. مىنە،وسىنداي ورتانىڭ اسەرىنەن ونىڭ ءسوزى دە بارا-بارا تابيعي ازايىپ كەتكەن. سىرتى سۇر، ءىشى بىتەۋ مۇنداي ۇنسىزدىكتى ۇيدەگىلەرىنە دە ىستەتەتىن ول ۇنەمى توماعا-تۇيىق قالپىندا سىزداپ وتىراتىن. بۇل بەينەسىنەن كەمپىرى مەن بالالارى ازداپ جاسقاناتىن، جانىنا كوپ جۋي بەرمەيتىن. ول ۇيدەگى كەزىندە كەمپىرى وت باسى،وشاق قاسىندا ءوز الەگىمەن بولسا،بالالارى دا ارتىق-اۋىس سوزگە بارماي،تاپسىرمالارىن ورىنداپ دەگەندەي اركىم ءۇن-ءتۇنسىز ءوز جۇمىسىمەن شۇعىلداناتىن. ونىڭ  ويىنشا  سول  كەزدە  وسىنداي قاتاڭ ۇستاعانى اعات بولمادى، وقۋدى ۇزدىك وقىپ،ويداعىداي قىزمەتكە شىققان  بالالارى شەتىنەن ەستى،جارامدى  ازامات بولدى، ارينە، ءبارى دە ءوزىنىڭ  ولارعا قاتال بولعانىنىڭ ارقاسى.

   «ۇلىن ۇياعا،قىزىن قيانعا قوندىرىپ»، ۇيدە كەمپىرى ەكەۋى قالسا دا ەشقانداي جالعىزسىرامادى. ەكەۋى سول باياعىداي ءبىر-بىرىنە سەرىك بوپ مامىراجاي كۇن وتكىزىپ جاتتى. قارنى اشسا تاماق دايىن،نەشە ونداعان جىلدان بەرى تاماقتىڭ اشتى-تۇشتىسىن تەڭشەپ،ءدام-تاتۋىن كەلتىرۋگە باپانداي جەتىلگەن بايبىشەسى ءار كەز ونىڭ تابەتىن ءدال تابادى،ول ءۇشىن باس اۋىرتۋىنىڭ قاجەتى شامالى. شولدەسە،شاينەگىندە شايى دايىن، تەلەۆيزور كورگىسى كەلسە،ەمەۋرىن بىلدىرسە بولدى، نە ىستەۋ كەرەگىن كەمپىرى اڭعارا قويادى. ەكەۋ ارا مۇنداي ايتقىزباي ۇعىساتىن قۇپيا شارتتى بەلگى بىلايعى كولدەنەڭ كوزدەردىڭ اۋزىنىڭ سۋىن قۇرتپاي قويماس ەدى. وعان اپارىپ وپالى بوپ ەرجەتكەن بالالارىن قوسىڭىز. ارينە،بۇنداي وتباسى باقىتىنا كىم قىزىعا قاراماسىن. قىزى ءبىر شەتەل سەرىكتىگىندە باسقارۋشى بولىپ ىستەيدى،تابىسى دا از ەمەس. ۇلى بولسا ۇكىمەت سالاسىندا ءبولىم باستىعى،ۇقىعى بار. بالالارى ولارعا اي سايىن اقساتپاي تۇرمىس قاراجاتىن بەرىپ تۇرادى. جاڭادان ءۇي الىپ،ءىشىن ادەمىلەپ اشەكەيلەپ بەردى. ءار كەز تەلەفون سوعىپ،نە قاجەت بولسا دا ايتىڭدار جەتكىزىپ بەرەمىز دەپ بايەك بولىپ جاتادى. تەك وزدەرىنىڭ توبەسىن كورسەتۋى تىم سيرەك. كەمپىرى نەمەرەلەرىن ساعىنىپ شىداماعاندا،بارىپ  كەلەيىك دەپ قولقالاعانىمەن،لاۋ پان بالالاردىڭ قىزمەتى قاربالاس،نەمەرەلەرىمىزدىڭ وقۋى اۋىر،ولاردىڭ مازاسىن الا بەرگەنىمىز ءجون ەمەس دەپ اتتاپ باسپايدى. 

   لاۋ پان بالالارىنا رەنجىگەن ەمەس،كورشى-قولاڭدار ۇنەمى جيىلىپ الىپ ۇل-قىزدارىنىڭ وپالى بولماعانىن،كۇيەۋ-كەلىندەرىنىڭ ويداعىداي بولماعانىن ايتىپ جامپىلدەسىپ جاتادى. ال،ونىڭ ويىنشا بۇل دۇرىس شارۋا ەمەس. ءوزى بولسا ءومىرى وزگەلەرگە يەك سۇيەپ كورمەدى،بالالارىنا دا اۋىرتپالىق سالعىسى جوق. بۇنىڭ بىردەن-ءبىر ارقا سۇيەرى كەمپىرى. دەگەنمەن،ونىڭ ويىنشا بۇل ماسىل بولۋ ەمەس،قايتا تابيعي وسىلاي بولۋعا ءتيىستى جازمىش. ءبىر كۇنى اياق استىنان سىرقاتتانىپ قالدى. ءبىراق بالالارىنا ايتقىزبادى، شيپاحاناعا دا بارمادى، بار بولعانى كەمپىرىنىڭ كۇتىمىندە بولدى. اكەتىپ بارا جاتقان ۇلكەن اۋرۋ دا ەمەس، تەك قاتتى تيگەن تۇماۋ دەنەسىن قىزدىرىپ، مۇرنىنان سۋىن سورعالاتىپ زىقىن كەتىرگەنى. ءومىرى تۇماۋ-سۇماۋعا بولا شيپاحانانىڭ ەسىگىن توزدىرىپ، دارىدەن باس المايتىن جان بۇل ەمەس، دەنساۋلىعى مىقتى. الايدا، وسى جولى سىرقاتتىڭ جايى باسقاشا بولدى. ءبىر عانا تۇماۋ مۇرتتاي ۇشىرىپ، توسەككە تاڭىپ تىندى، جاس قۇرعىردىڭ سىر بەرگەنى دە… كەمپىرىنىڭ استى-ۇستىنە ءتۇسىپ كۇتىمدەۋىنىڭ ارقاسىندا ازداپ جاقسارعانداي بولعان سوڭ،ورنىنان تۇرماق بولىپ ەدى،باسى  اينالىپ، ونە بويى دىرىلدەپ، ءالى قۇرىپ، اتتاپ باسا المادى. مۇنى كورگەن كەمپىرى  الاڭداپ، ونىڭ دەنە قۋاتىن تولىقتاۋدىڭ قامىمەن، بازاردان سورپالىق اكەلۋگە اۆتوبۋزعا وتىرىپ اتتانىپ كەتتى. كىم ويلاعان؟سول كەتكەننەن ماڭگى ورالمادى. سول كۇنى كۇن ىستىق،ونىڭ ۇستىنە اۆتوبۋزدىڭ ىشىندە سىعىلىسقان ادام كوپ بولعاندىقتان،اياق استىنان ميىنا قان قۇيىلىپ،قۇلاپ تۇسەدى. كوپ ىشىنەن سارايى داڭعىل ادامدار ورتاعا شىعىپ، دەرەۋ شيپاحاناعا جەتكىزگەنىمەن، قۇتقارۋعا ۇلگىرمەيدى. لاۋ پان تەلەفوندى الا سالىپ شيپاحاناعا جەتكەندە، كەمپىرى الدەقاشان تىرلىك بەكەتىنەن اتتانىپ كەتكەن ەدى. 

   نارسە العالى شىققان ادامنىڭ قايتىپ ورالماي كەتە بارعانى،العاشىندا لاۋ پاندى سەندىرە قويمادى. ادەتتە باسىم اۋىردى دەپ ايتىپ كورمەگەن،قالايشا اياق استىنان ميىنا قان قۇيىلادى. بالالارى دا انالارىندا اۋرۋ بار دەگەندى ويلاپ كورمەگەن. ءبارى دە انالارىنىڭ ولىمىنە اكەلەرى سەبەپكەر دەپ جازعىرىندى كوزقاراسپەن  قوڭسى  قوندى.  لاۋ پاننىڭ ويىنشا بالالارىنىڭ كىنالاۋى دا قاتە ەمەس،راسىندا،ونىڭ ولىمىنە سەبەشى بولعان ءوزى. مەنى كۇتەم دەپ شارشاماعان بولسا،ماعان سورپالىق اكەلۋ ءۇشىن سىرتقا شىقپاعان بولسا،وسى قايعىلى ىستەر تۋىلار ما ەدى؟! نەگە وعان كوزى تىرىسىندە كوبىرەك كوڭىل بولمەگەم، نەگە ونى شيپاحاناعا اپارىپ تەكسەرتىپ تۇرماعام دەپ ءوزىن-ءوزى كۇستانالاۋمەن  بولدى.

   ول-ول ما؟.. كەمپىرىنىڭ ارتقى جۇمىستارىن ىڭعايلاپ بولعان سوڭ،بالالارى، تۋىس-تۋعان،دوس-جاراندارى ءبارى اتتانىپ كەتكەندە، تۇڭعىش رەت قۇلازۋدىڭ، جالعىزدىقتىڭ نە ەكەنىن سەزىندى.  ءۇيدىڭ ءىشى اڭىراپ تۇر. بەيمالىم، مازاسىز ءبىر  ىزىڭ بەينە جاس كۇنىندەگى ستانوك ۇنىندەي ميعا شانشىلىپ،قۇلاق ەتىن جەيدى.  ءبىراق ول كەزدە جۇمىستان شارشاپ ورالعاندا، كەمپىرى ۇيدەن-ۇيگە كىرىپ-شىعىپ،كوز الدىندا كولبەڭدەپ جۇرەتىن،ەكەۋ ارا شۇيىركەلەسىپ كەتپەگەنىمەن،ايتەۋ ونىڭ  بار ەكەنى جانىنا مەدەۋ بولىپ،كوڭىلى ورنىعىپ قالاتىن-دى. قازىرشى،كەمپىرىنىڭ  كولەڭكەسى دە جوق،ەمگە تاپپايدى. اس ۇيدە، جاتىن ۇيدە، قوناق ۇيدە… ءبارى-بارىنەن كوزگە كورىنبەيدى. تىسقا شىعىپ  قارايلادى وندا دا جوق. شىدامادى،ەسىنە  بازارعا كەتكەنى ءتۇستى. دۇرىس اۆتوبۋزدا بولار دەگەن سارپالداڭ قيالمەن اۆتوبۋزعا شىقتى…

   لاۋ پان ەسىك الدىنداعى بەكەتتەن اۆتوبۋزعا وتىرىپ، بازار جاققا باردى. ءبارىبىر كەمپىرى كورىنبەدى. ەسەك دامەمەن ەڭ سوڭعى بەكەتكە دەيىن باردى. وندا دا جوق. سونىمەن ارتقا قايتىپ ۇيىنە ورالعان ول ونى-مۇنى بىردەمە جاساپ جەگەن بولدى دا تورسىعىن سۋعا تولتىرىپ الىپ تاعى دا اۆتوبۋزعا ءتۇستى. وسى كۇننەن باستاپ ءار كۇنى تۇستەن بۇرىن ءبىر، تۇستەن كەيىن ءبىر ۋاق ۇيدەن شىعىپ اۆتوبۋزعا وتىرادى،سوڭعى بەكەتكە بارىپ قايتا ورالادى. بەلەت ساتۋشى مەن شوفەر عاجاپتانىپ،ودان نەگە شاپقىلاپ جۇرگەنىن سۇراعاندا،كەمپىرىمدى ىزدەيمىن دەدى. قايدا كەتكەنىن قايتالاي سۇراعان    ولارعا،اۆتوبۋزعا ءتۇسىپ بازاردان سورپالىق العالى كەتكەن دەدى. شوفەر قاشان كەتكەنىن سۇراپ ەدى،ءبىرتالاي كۇن بولعانىن ايتتى. 

   ول كۇندەردە لاۋپان،راسىندا،قالىپسىز بولىپ قالعان ەدى،تالەيىنە جاراي ءدال وسى كەزدە كەزىگە كەتكەن كونە قىزمەتتەسى لاۋ لياڭ ونى ۇيىنە ەرتىپ اپارىپ،اقىلىن ايتتى. وسىعان دەيىن ىلگەرىندى-كەيىندى ەكى ايەلى باقيعا جول العان لاۋ لياڭنىڭ بۇل جاقتان تاجىريبەسى مول ەدى. ول قايتالاي ءتۇسىندىرىپ، تاپتەشتەي ۇعىندىرعاننان كەيىن بارىپ، لاۋ پان تۇسىنەن ويانعانداي بولىپ، كەمپىرىنىڭ بۇل دۇنيەدەن اتتانعانىنا ەندى عانا سەندى. ءيا،كەمپىرى ونى قالدىرىپ كەتكەن ەكەن،شىنىندا، بۇلاي بولادى دەپ ويلاماعان. ول بار كەزدە ونىڭ تۇرمىسىنا ونشا  كوڭىل ءبولىپ كەتپەپتى،ەندى ويلاسا نازىك بىتكەن، جاپاكەش كەمپىرى ءۇي ىشىندە اياق دىبىرىن دا بىلدىرمەي، نە ىستەسە دە ءۇن-ءتۇنسىز تىندىرىپ جۇرە بەرەدى ەكەن. وسى ءبىر ەپتى دە يكەمدى حاراكەتى ونى كەيدە ۇيدە جوق پا دەگىزىپ تە قالاتىن ەدى،ءبىراق لاۋ پان شاي ىشكىسى كەلسە،شاينەگىن كوتەرىپ جەتىپ كەلەدى؛ توسەكتەن تۇسپەكشى بولسا، شاقايىن الىپ جەتەدى؛ بەتىن جۋماقشى بولسا، جىلى سۋ دايار بولا قالادى. ۇنەمى ول قاجەت ەتكەن كەزدە دەرەۋ پايدا بولا كەتەتىن كەمپىرىن بەينە اڭىزداردا ايتىلاتىن ۇلۋ بويجەتكەن دەرسىڭ. ال، قازىر ونىڭ قاراسى دا جوق، لاۋ پان ءوزىن قۇيرىق-جالسىز جەتىم بالاداي سەزىندى. راس-اۋ، اناسىنان جاستاي جەتىم قالعاندا دا ءوزىن ءدال وسىنداي قورعانسىز سەزىنبەگەن ەدى. 

   لاۋ لياڭ ۇلىڭنىڭ نە قىزىڭنىڭ ۇيىنە  بارىپ ءبىر مەزگىل تۇرىپ كەل دەپ كەڭەس بەرگەن سوڭ، لاۋ پان دا ويلانا قالدى. دەگەنمەن، ءدال وسى كەزدە قىزى سەرىكتىكتىڭ ورنالاستىرۋىمەن فرانسياعا كوشىپ كەتكەن بولاتىن. كەتەرىندە ءبىراز اقشا قالدىرىپ، نە جەگىڭىز كەلسە، سونى الىپ جەڭىز، اقشانىڭ بەتىنە قاراماڭىز، اي سايىن تاعى دا جىبەرىپ تۇرام دەپ قاداعالاي تاپسىرعان. قىزى،شىنىندا، وپالى بالا عوي،الايدا،ءبارىبىر الىستا، ۇيىنە بارام دەسە دە بارا المايدى.  ۇلىنىڭ  ۇيىنە بارايىن دەسە، نەمەرە قىزى جوعارى مەكتەپ ەمتيحانىنا دايىندالىپ جاتىر. مۇنداي كەزدە كەرەگى تىنىشتىق، مازالاۋعا بولماس. سونىمەن ۇلى وعان قارايلاسۋعا كۇتۋشى الىپ بەرۋدى ءجون كوردى،ءبىراق ءوزى قۇپتامادى. 

   بالا-شاعانىڭ ءبارى دە وپالى، تاربيەلى بولدى، تەك قاربالاس، كەلىپ قارايلاسىپ تۇرۋعا ۋاقىتتارى جوق. اسىرەسە، كەمپىرى كەتكەن سوڭ بۇل اۋىلعا اياق باسۋلارى سايابىرلاپ، ءتىپتى، تەلەفون شىرىلى دا ازايىپ كەتتى.

   لاۋ لياڭ وعان جالعاستى ءجون كورسەتىپ، مىسىق نە كۇشىك باعىپ الساڭ، جالعىزسىراعاندا سەپ بولار ەدى دەپ اقىل ايتتى. لاۋ لياڭ ءوزى دە قۇددى نەمەرەسىن باۋىرىنا باسقانداي-اق ءبىر مىسىقتى قۇشاعىنان تاستامايتىن. جاس كۇنىندە لاۋ لياڭ كەلىسكەن، كەسەك تۇلعالى بولعان، نەشە ءجۇز جىڭ   اۋىرلىقتاعى تەمىر ءتوستى تيتتەي دە اۋىرسىنباي جالعىز ءوزى كوتەرەتىن، بەينە تەمىر مۇناراداي، تەكتى دە تەگەۋرىندى ازاماتتىڭ ساراسى ەدى. قازىر بەلى بۇگىلىپ،سوم تۇلعاسى ءشوجىپ كەتكەن،دەگەنمەن،مىسىق قۇشاقتاپ ءجۇرۋى كورەر كوزگە تىم وعاش؛ ونىڭ ۇستىنە ءجۇنى ۇرپيگەن انالىق مىسىقتى قۇشاقتاعان مىنا ۇسقىنى بالعىن قىزدى باۋىرىنا باسقان قاقسال قاريانىڭ قادىرسىز قىلىعىنداي تىپتەن ۇياتتى سەزىلىپ تۇر. ەبىن كەلتىرىپ، ىڭعايى قۇلاپ تۇرسا ءبىر ءسارى،قوقيعان  ءتۇرى اناۋ، سىرى دا، سىنى دا كەتكەن سىرلى اياقتاي. ول جاس كۇنىندە قىزعا قىرىنداۋدىڭ،سورپا بەتىنە شىعار ارۋلاردى   اينالدىرۋدىڭ شەبەرى ەدى. زاۆودتاعى ەڭ  اجارلى قىزدى دا قولىنا قوندىرعان. ونىڭ مولدىرەگەن سۇلۋلىعىن ايتسايشى، قولعا تۇسسە ەرىپ كەتەر ۇلپا قارداي نازىك تە پاك ەدى عوي! ارينە، مۇنداي ءوپ ەتكەن جەلگە قاۋىرسىنداي قاۋقارسىز سىلقىمدى جۇمىسقا سالۋعا قايدان قيسىن،ءۇيدىڭ بارلىق ۇلكەن-كىشى شارۋالارىن لاۋ لياڭ ءوزى ىستەيتىن،سويتكەن اياۋلى بايبىشەسى ەلۋدەن اسقاندا  اۋىرماي-سىرقاماي-اق،بوران اكەتكەن ءبوز قيقىمىنداي ءومىر مايدانىنان ءىز-توزسىز  اتتانىپ كەتتى. لاۋ لياڭ بىرەر جىل ورنىن كۇزەتىپ وتىردى دا،تاعى دا جان سەرىك ىزدەدى. بۇرىنعى ايەلىنەن اۋماعان، ءۇزىلىپ تۇسەردەي ۇلبىرەگەن ادەمىدەن تاعى ءبىرىن تاپتى. جەتى-سەگىز جىل بىرگە ءومىر وتكىزگەن ول دا لاۋ لياڭدى اداستىرىپ،جالعىزدىق اۋىلىنا تاستاپ،پانيدەن عايىپ بولدى. وقۋدى جاقسى وقىماعان، دۇرىس قىزمەت بۇيىرماعان، ءوز جاندارىن باعۋلارى مۇڭ بوپ جۇرگەن بالالارىنىڭ لاۋ لياڭعا قاراۋعا كۇيى، قايىرىلۋعا مەيىرى جوق. ونى دەيمىز-اۋ؟ ادەتتە اكەلەرىنىڭ قانداي كۇيدە ەكەنىمەن ساناسىپ تا قويمايتىن ولار لاۋ لياڭ سەرىك تاۋىپ،ۇيلەنبەك بولعاندا، اياق استىنان ونىڭ جوقشىسى بولىپ، جوق جەردەن پالە ىزدەپ، باس قۇراۋىنا قارسى شىعىپ، سىلتاۋىن تاۋىپ اكەلەرىنەن ىرگەسىن ونان ارمان اۋاشالاي تۇسەدى. ءبارى دە تاربيەنىڭ دۇرىس بولماعانىنان. «بالانى جاستان، قاتىندى باستان»  دەمەي، اۋەكتەتىپ جىبەرگەن. ونىمەن قويماي،گۇلدەن-گۇلگە قونعان كوبەلەكتەي ءوزىنىڭ دە جەلىگى ءبىر باسىلمادى. ەندى مىنە مىسىق قۇشاقتاپ، ءيت ەرتكەن سيقى مىناۋ، ءوزىن ءتىپتى ەركەك دەۋگە بولا ما؟..
 

(جالعاسى «اپتا مارەسىنىڭ» كەلەر سانىندا)

اۋدارعان - قاجىبەك ايدارقان ۇلى
 

رەداكتورى: ارداق  كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.

مسالى: «تارباعاتاي اقپارات تورابىنان» الىندى.