شياۋ ميڭ ۋنيۆەرسيتەت تابالدىرىعىن ەندى عانا اتتاعان،جاسى 19 دا، ونىڭ قىز دوسى شياۋ جۋان ورتا مەكتەپ 3-كلاس وقۋشىسى،جاسى 18 دە،ولاردىڭ نەكەلەنۋىنە بولا ما؟
ولاردىڭ قازىرگى مەزگىلدە نەكەلەنۋىنە بولمايدى. ەلىمىز زاڭىندا نەكەلەنۋگە جاس شەكتەمەسى قويىلعان: ەرلەردىڭ 22 جاستان بۇرىن، ايەلدەردىڭ 20 جاستان بۇرىن نەكەلەنۋىنە بولمايدى.
زاڭدا قانداي جاعدايدا نەكەلەنۋگە تيىم سالىنادى؟
ەلىمىز زاڭىندا تومەندەگى جاعدايدا نەكەلەنۋگە تيىم سالىنادى: 1. تىكە تۋىستار جانە ءۇش اتا ارالاماعان تۋىستار؛ 2. مەديتسينادا نەكەلەنۋگە بولمايدى دەپ قارالعان اۋرۋى بولسا (مىسالى جۇقپالى كەزەڭدەگى B تيپتى باۋىر قابىنۋ اۋرۋى بار ادام، ايدس، اقىل-ەسى كەم، سالماقتى رۋحاني اۋرۋى بار ادامدار).
قانداي جاعدايدا نەكە يناۋاتسىز ەسەپتەلەدى؟
1. قوس نەكە؛ 2. نەكەلەنۋگە تيىم سالىنعان تۋىستىق قاتىناسى بولعان بولسا؛ 3. نەكەلەنۋدەن بۇرىن مەديتسينادا نەكەلەنۋگە بولمايدى دەپ قارالعان اۋرۋى بار، نەكەلەنگەننەن كەيىن ساۋىقپاعان؛ 4. زاڭدا بەلگىلەنگەن نەكەلەنۋ جاسىنا تولماعان (قاراعان كەزدە زاڭدا بەلگىلەنگەن نەكەلەنۋ جاسىنا تولعان بولسا، يناۋاتسىز دەپ ەسەپتەمەۋگە بولادى).
جاڭا نەكە زاڭىندا نەكەنى كۇشىنەن قالدىرۋ دەگەن بار ما؟
بار. قوقانلوقى جاسالىپ نەكەلەنگەن بولسا، قوقانلوقىعا ۇشىراعان جاقتىڭ نەكەگە تىركەۋ ورگانىنان نەمەسە حالىق سوتىنان سول نەكەنى كۇشىنەن قالدىرۋدى تالاپ ەتۋىنە بولادى. قوقانلوقىعا ۇشىراعان جاق نەكەنى كۇشىنەن قالدىرۋ ءوتىنىشىن نەكەگە تىركەلگەن كۇننەن تارتىپ ءبىر جىل ىشىندە بەرۋى ءتيىس. باس ەركىندىگى زاڭسىز شەكتەلگەن داۋلى ادام نەكەنى كۇشىنەن قالدىرۋدى تالاپ ەتەتىن بولسا، باس ەركىندىگى قالپىنا كەلگەن كۇننەن تارتىپ ءبىر جىل ىشىندە تالاپ ەتۋى ءتيىس.
زاڭدا ەرلى-زايىپتى اراسىندا قانداي ۇقىقتارى مەن بورىشتارى بار دەپ بەلگىلەنگەن؟
1. ەرلى-زايىپتى ەكى جاقتىڭ وتباسىنداعى تەرەزەسى تەڭ؛ 2. ەرلى-زايىپتى ەكى جاق ءوز اتىن قولدانۋعا ۇقىقتى؛ 3. ەرلى-زايىپتى ەكى جاقتىڭ ءوندىرىس، قىزمەت، ۇيرەنۋ جانە قوعامدىق قيمىلدارعا قاتىناسۋ ەركىندىگى بار، ءبىر جاقتىڭ ونى شەكتەۋىنە نەمەسە كيلىگۋىنە بولمايدى؛ 4. ەرلى-زايىپتى ەكى جاق جوسپارلى تۋىت ساياساتىن اتقارۋعا بورىشتى؛ 5. ەرلى- زايىپتى ەكى جاق ورتاق مۇلىكتى تەڭ دارەجەدە ءبىر جايلى ەتۋگە ۇقىقتى، كىرىسىنىڭ از-كوپتىگىنىڭ ىقپالىنا ۇشىرامايدى؛ 6. ەرلى-زايىپتى ەكى جاق ءبىر-ءبىرىن كۇتۋگە بورىشتى؛ 7. ەرلى- زايىپتى ەكى جاق ءبىرى-ءبىرىنىڭ مۇراسىنا مۇراگەرلىك ەتۋگە ۇقىقتى.
مال-مۇلىكتەردىڭ قايسىلارى ەرلى-زايىپتى ەكى جاقتىڭ ورتاق مۇلكىنە جاتادى؟
نەكەلەرى جالعاسقان مەزگىلدەگى (ايىرىم كەلىسىم بۇدان تىسقارى): 1. ەڭبەكاقى، قارجى؛ 2. ءوندىرىس، تيجارات كىرىسى؛ 3. ءبىلىم مۇلىك ۇقىعىنىڭ كىرىسى؛ 4. مۇراگەرلىك ەتكەن نەمەسە تارتۋ ەتىپ بەرىلگەن مال-مۇلىك. الايدا، وسيەتتە نەمەسە تارتۋ ەتىپ بەرۋ توقتامىندا تەك ەر ادام جاققا نەمەسە ايەل ادام جاققا عانا ءتان دەلىنگەن مال-مۇلىك بۇدان تىسقارى بولادى؛ 5. باسقا دا ورتاق مەنشىكتەنۋگە ءتيىس مال-مۇلىكتەر. ەرلى-زايىپتى ەكى جاق ورتاق مەنشىكتەگى مال-مۇلىكتى تەڭدىك نەگىزدە ءبىر جايلى ەتۋگە ۇقىقتى.
مال-مۇلىكتەردىڭ قايسىلارى ەرلى-زايىپتىنىڭ ءبىر جاعىنا ءتان؟
1. ءبىر جاقتىڭ نەكەدەن بۇرىنعى مال-مۇلكى؛ 2. ءبىر جاقتىڭ دەنساۋلىعى زاقىمدانۋ سەبەبىنەن العان ەمدەۋ قاراجاتى، مۇگەدەكتەر تۇرمىس كومەك قاراجاتى سياقتى قاراجاتتار. 3. وسيەت نەمەسە تارتۋ ەتۋ توقتامىندا ەرلى-زايىپتىنىڭ بىرەۋى عانا ءتان دەلىنگەن مال-مۇلىك؛ 4. ءبىر جاقتىڭ جەكەلىك تۇرمىس بۇيىمدارى؛5. باسقا دا ءبىر جاققا ءتان بولۋى ءتيىس بولعان مال-مۇلىك.
ەرلى-زايىپتى اراسىندا ورتاق مال-مۇلىكتى ءبولىسۋدى شارتتاسۋعا بولاما؟
ەرلى-زايىپتى نەكەلى كەزدە العان مال-مۇلىكتى جانە نەكەلەنۋدەن بۇرىنعى مال-مۇلىكتى اركىم ءوزى مەنشىكتەنۋ، ورتاق مەنشىكتەنۋ نەمەسە ءبىر ءبولىمىن جەكە ءوزى مەنشىكتەنۋ، ءبىر ءبولىمىن ورتاق مەنشىكتەنۋگە كەلىسۋگە بولادى. كەلىسىم جازباشا بولۋى ءتيىس، ەرلى- زايىپتى نەكەلى كەزىندە يە بولعان مال-مۇلىك اركىمنىڭ وزىنە ءتان دەپ كەلىسگەن بولسا، ەرلى-زايىپتىنىڭ بىرەۋىنىڭ قارىزى، ءۇشىنشى ءبىر ادام وسى كەلىسىمدى بىلەتىن جاعدايدا، ەرلى-زايىپتىنىڭ بىرەۋىنىڭ مال-مۇلكىمەن قايتارىلادى.
اۋدارعان-باقىتبەك جانابىل ۇلى
رەداكتورى:جازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.