38 جاستاعى جاۋ جين ( بالاما اتى) كەزىندە قوعامدىق قامتاماسىزداندىرۋ مەكەمەسىنىڭ كادرى بولاتىن، كەيىنتىننەن ول ءبىرتالاي كۇن سەبەپسىز قىزمەت قالدىرعاندىقتان قىزمەتتەن بوساتىلادى، كاسىپسىز قالعان ول بۇرىنعى سالاۋاتىنان پايدالانىپ باسقالارعا « ەرتەرەك زەينەتكە شىعۋ، ناۋقاس سەبەبىنەن زەينەتكە شىعۋ جۇمىستارىڭدى ءبىتىرىپ بەرە الامىن »دەگەن سىلتاۋمەن، وتكەن ءۇش جىلدا ىلگەرىندى-كەيىندى 40 نەشە ادامنىڭ ءبىر ميلليون 400 مىڭ يۋاننان استام اقشاسىن الداپ العان.
2015- جىلى 21 - جەلتوقسان كۇنى ءتىلشىنىڭ ءۇرىمجى قالاسى شۇيموگۋ رايوندىق پروكۋراتۋرا مەكەمەسىنەن ۇعىسۋىنشا، 2012- جىلى مامىردا ءۇرىمجى قالالىق قوعامدىق قامتاماسىزداندىرۋ مەكەمەسىنە قاراستى ءمالىم رايونداعى بولىمشە مەكەمەدە ىستەيتىن جاۋ جين ءبىرتالاي كۇن سەبەپسىز قىزمەتكە شىقپاعاندىقتان قىزمەتتەن بوساتىلعان، كاسىپسىز قالىپ سەندەلىپ بوس جۇرگەن كۇندەرىنىڭ بىرىندە، سول جىلى قىركۇيەك ايىنداعى ءبىر رەتكى ساباقتاستار باس قوسۋىندا ونىڭ قىزمەتتەن قالعانىنان حابارى جوق ساباقتاسى شياۋ فەي ودان اكەسىنىڭ اۋرۋ سەبەبىنەن دەمالىسقا شىعۋ جۇمىسىن ءبىتىرىپ بەرە الاتىن - المايتىندىعىن سۇراعاندا، ول ءارى- ءسارى بولماستان ماقۇلدىق بەرەدى.
جاۋ جين شياۋ فەيعا قوعامدىق قامتاماسىزداندىرۋ مەكەمەسىنىڭ ءبىر باسشىسىمەن بايلانىسىنىڭ جاقسى ەكەنىن، تەك قانا وسى باسشىنىڭ كوڭىلىن تاپسا عانا بولعانى، جۇمىستارىنىڭ تەز ارادا بىتەتىندىگىن ايتادى.
شياۋ فەيدىڭ سەنىمىنە يە بولۋدى كوزدەگەن جاۋ جين ونىڭ كوزىنشە الگى باستىققا تەلەفون شالىپ، شياۋ فەيعا « اكەڭنىڭ اۋرۋ سەبەبىنەن دەمالىسقا شىعۋ جۇمىسى بىتەتىن بولدى، تەز ارادا قوعامدىق قامتاماسىزداندىرۋدان يگىلىكتەنىپ،زەينەتاقىسىن الا الادى» دەيدى ءارى ودان اكەسىنىڭ ەمدەلۋىن قامسىزداندىرۋ كارتۋچكاسى، سۋرەتىمەن قوسا، 40 مىڭ يۋان جۇمىس ءبىتىرۋ اقىسىن الداپ الادى. شياۋ فەيدى كۇدىكتەندىرمەۋ ءۇشىن، جاۋ جين جالعان اۋرۋ تاريحى كەستەسى مەن جالعان تاڭبانى توراپتان ساتىپ الىپ، جالعان تاڭبا باسىلعان جالعان اۋرۋ تاريحى كەستەسىن ۇنەمى وعان تولتىرتىپ وتىرادى. اكەسىنىڭ جۇمىستارىنىڭ وڭىنا ايلانا باستاعاندىعىن كورگەن شياۋ فەي جاۋ جيننىڭ ىسكەرلىگىنە ءتانتى بولىپ، وعان يمانداي ۇييدى.
وسىدان بىلايعى جەردە شياۋ فەي ءوزىنىڭ تۋىس-تۋعاندارى مەن دوس- جاراندارىن جاۋ جينعا تانىستىرىپ،ولاردىڭ زەينەتكە شىعۋ جۇمىسىن دا بىرگە ءبىتىرىپ بەرۋدى ايتادى. جاۋ جين وسى ادامداردىڭ ءار بىرىنەن 40- 50 مىڭ يۋان جۇمىس ءبىتىرۋ اقىسىن الا بەرەدى. كوپ وتپەي ونىڭ ىسكەرلىگى ەلگە جايىلىپ، 40 تان استام ادام جاۋ جيندى ىزدەپ كەلىپ ودان ەرتەرەك زەينەتكە شىعۋ جۇمىستارىن ءبىتىرىپ بەرۋىن وتىنەدى.
جۇمىسىنىڭ كەشەۋىلدەپ بىتپەي جاتقاندىعىن كورگەن شياۋ فەي الدانىپ قالدىم با دەپ الاڭداپ، جاۋ جيندى قۋزاي باستايدى، جاۋ جين «تاياۋدان بەرى تەكسەرۋ قاتاڭ بولىپ جاتىر،باسشى جوق...» دەگەن سەكىلدى سىلتاۋلارمەن كەشەۋىلدەتە بەرەدى.
وسىلايشا ءۇش جىل وتەدى. 2015 -جىلعا كەلگەنگە دەيىن شياۋ فەيدىڭ اكەسىنىڭ زەينەتكە شىعۋ جۇمىسى بىتپەيدى،سونىمەن شياۋ فەي جاۋ جيندى اقشانى قايتارۋعا قۋزايدى، باستابىندا جاۋ جين جۇمىستى ءبىتىرىپ جاتىرمىن دەپ تاعى دا سوزا تۇسكىسى كەلگەنىمەن، شياۋ فەي قايتا-قايتا قۋزاي بەرگەن سوڭ ونىڭ اقشاسىن قايتارىپ بەرەدى.
وسىدان بىلايعى جەردە جاۋ جيننىڭ الدام قالتاسىنا تۇسكەن ءبىرتالاي ادام ونىڭ سوڭىنا ءتۇسىپ اقشالارىن قايتارىپ بەرۋىن ايتادى، جاۋ جين قورقا باستايدى، ويتكەنى ول الداپ العان اقشالاردىڭ كوبىن ىستەتىپ تۇگەتكەندىكتەن، بارلىعىنىڭ اقشالارىن قايتارىپ بەرۋى مۇمكىن ەمەس ەدى. سونىمەن ول جانىندا قالعان ءجۇز مىڭ يۋانداي اقشامەن ءبىر ءبولىم زياندالۋشىلاردان العان اقشانى قايتارادى دا، كورىنگەن جەردە بوي تاسالاي ءجۇرىپ، اقشا تاۋىپ باسقالاردىڭ اقشاسىن قايتارۋدىڭ جولىن قاراستىرادى.
تىعىرىققا تىرەلگەن جاۋ جين باق سىناۋ ويىنا كەلىپ،سيلىقتى بەلەت ارقىلى ەڭسەسىن كوتەرمەكشى بولادى دا، قولىندا بار 300 مىڭ يۋانعا تۇگەلدەي سيلىقتى بەلەت ساتىپ الادى،الايدا قوماقتى سيلىققا يە بولا الماعان ونىڭ وزەگىن وكىنىش ورتەيدى.
ەڭ سوڭىندا جاۋ جينعا الدانعان 40 نەشە ادام ارت ارتىنان قوعام حاۋىپسىزدىگى ورگاندارىنا دەلو مالىمدەيدى، ساقشىلاردىڭ قولىنا تۇسكەن ول « مەن وتە قاناعاتسىز،اشكوز جان بولدىم عوي» دەيدى كۇرسىنىپ.
تاياۋدا ءۇرىمجى قالاسى شۇيموگۋ رايوندىق پروكۋراتۋرا مەكەمەسى الدامشىلىق قىلمىسىمەن جاۋ جيندى زاڭ بويىنشا قولعا الۋدى بەكىتەدى.
اۋدارعان ـ وماربەك قىزىرقان ۇلى
رەداكتورى: جازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.