تۇرگەنوۆ (رەسەي)
تامىز ايىنىڭ سوڭى،قوڭىر كۇز دە جەتىپ كەلدى.
كۇن ۇياسىنا باتقان كەز ەدى،كەنەتتەن سىركىرەپ نوسەر قۇيدى،اينالا تىنىشتىققا شومعان، نايزاعايدىڭ ءوزى دە كورىنبەدى،شارتىلى دا ەستىلمەدى. نوسەرلى جاڭبىر ءاپ-ساتتە-اق وسىناۋ كەڭ-بايتاق القاپتى جاڭبىر سۋىنا بوكتىردى.
سىركىرەپ جاۋعان جاڭبىردان كەيىن ەسىك الدىنداعى گۇل باقشاداعى گۇلدەر كەشكى شاپاقتىڭ نۇرىنا شومىپ،جاۋىپ وتكەن جاڭبىردىڭ ءنارىن ءوز بويىنا ءسىمىرىپ،كوزدىڭ جاۋىن الارداي قۇلپىرا اشىلىپتى.
ول قوناق بولمەدەگى ۇستەلدىڭ باسىندا جارتىلاي اشىلعان ەسىكتىڭ جاپسارىنان سىرتتاعى گۇل باقشاعا كۇماندى ويمەن نازارىن اۋداردى.
قازىر ونىڭ قانداي ويدىڭ جەتەگىندە وتىرعانى ماعان ءمالىم.ءبىر مەزەتتىك ازاپتى ارپالىستان كەيىن،ءدال وسى ارالىقتا ول سەزىمنىڭ شۇڭەتىنە شوگىپ كەتكەندەي بولدى.
كەنەت ورنىنان قوزعالىپ،ءجىتي باسىپ گۇل باقشاعا قاراي اياڭدادى.ءاپ-ساتتە ونىڭ سۇلباسى عايىپ بولدى.
ارادا ءبىر ساعات ءوتتى... ەكى ساعات ءوتتى... ول ءالى قايتىپ كەلمەدى.
مەن تاعاتسىزدانا ورنىمنان قوزعالىپ تىسقا شىقتىم دا ەكى جاعى تالمەن كومكەرىلگەن تار سوقپاقتى جولعا ءتۇستىم،ونىڭ وسى جولدى بويلاپ كەتكەنىنە ەش كۇمانىم جوق.
ءتۇن شىمىلدىعىن جامىلىپ، اينالانى قاراڭعىلىق كومكەردى. وسىناۋ كوزگە تۇرتسە كورىنبەيتىن مەڭىرەۋ تۇندە قۇمداۋىت جولدا انادايدا دوڭگەلەكتەۋ كەلگەن ءبىر زات قىزىل نۇر شاشىپ تۇر.
ءسال ەڭكەيىپ ءۇڭىلدىم. اسىلىندە ول كوزدىڭ جاۋىن الارداي،اشىلعانىنا ۇزاق بولماعان ءبىر شوق راۋشان گۇلى ەكەن. وسىدان ەكى ساعات بۇرىن مەن بۇل راۋشان گۇلىن كەۋدەسىنە تاعىپ جۇرگەنىن كورگەن ەدىم.
اسا ءبىر ەپتىلىكپەن بالشىقتا جاتقان راۋشان گۇلىن قولىما الدىم. قوناق بولمەسىنە كەلە سالا گۇلدى ونىڭ ۇستەلىنىڭ ۇستىنە قويدىم.
مىنە،ول اقىرى قايتا ورالدى. اياعىن جەڭىل باسىپ ۇستەلدىڭ باسىنا كەلىپ جايعاستى.
ونىڭ ءوڭى قۋارىپ كەتكەن ءارى كوڭىلىندە ءبىر تولقۋ بار. اناۋ قاراقات كوزدەرى كىرپىكتەرىنىڭ قۇرساۋىندا قالعانداي.كوزدەرىنەن قۋانىش پەن قىمسىنعاندىقتىڭ بەلگىسى بايقالادى.
ونىڭ كوزى ۇستەل ۇستىندەگى مىجىلىپ،بىلعانىپ قالعان گۇل جاپىراقشاسىنا ءتۇستى، كەنەتتەن قوس جانارىنا مولتىلدەپ جاس مونشاقتارى ىركىلە قالدى.
_ نەسىنە جىلادىڭ؟-دەدىم.
_ قاراشى مىناۋ راۋشان گۇلىنە،نە عىپ مۇنشاما بىلعانىپ قالعان؟-دەدى ول.
ونىڭ مىنا ءسوزىن ەستىپ مەنىڭ ويىما مىناداي ءپالساپا ساپ ەتە ءتۇستى دە:
_ سەنىڭ كوز جاسىڭ وسىناۋ بىلعانعان راۋشان گۇلىن جۋىپ-شايىپ كەتەدى،-دەدىم وعان ءبىر ءماندى اڭعارتقانداي بەينەمەن.
_ كوزدىڭ جاسىنان گورى، ماحابباتتىڭ دەرتى جانىڭا قاتتى باتادى ەكەن-اۋ،-دەپ اۋىر كۇرسىنىپ الدى دا مولدىرەگەن جانارىن جاسقا شىلاپ زورلانا كۇلدى.
ونىڭ ماحابباتتىڭ وتىنا كۇيىپ جاتقانىن ىشتەي سەزىپ تۇردىم.
اۋدارعان _ بەگزات مۇقيات قىزى
رەداكتورى:جازيرا قاجىكەن قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.