2016-جىلعى جيڭمىن حالىقارالىق مارافون جارىسى 2-مامىردا حۋبەي ولكەسى جيڭمىن قالاسىنىڭ ەكولوگيالىق سپورت باقشاسىندا باستالىپ، كەنيا سپورتشىلارى تولىق ارالىقتى مارافون جارىسىنىڭ ەر-ايەلدەر جارىس تۇرىنەن الدىڭعى ءۇش ورىندى يەلەدى.
جيڭمىن حالىقارالىق مارافون جارىسى جۇڭگو جەڭىل اتلەتيكا قوعامى،حۋبەي ولكەلىك دەنە تاربيە مەكەمەسى،جيڭمىن قالالىق حالىق ۇكىمەتى بىرلەسىپ وتكىزگەن، ۋحان مارافون جارىسىنان كەيىنگى حۋبەي ولكەسىندە ەكىنشى رەتكى وتكىزىلگەن مارافون جارىسى بولىپ، بۇل جارىسقا 7 مەملەكەت پەن رايوننان كەلگەن شەتەل سپورتشىلارى قاتىناسادى ەكەن.
وسى كەزەكتى جيڭمىن مارافون جارىسىنا قاتىناساتىن ادام سانى 15 مىڭنان اسىپ،تولىق ارالىقتى مارافون جارىسى، جارىم ارالىقتى مارافون جارىسى جانە 5 كيلومەترلىك ارالىققا جۇگىرۋ سىندى ءۇش تۇرگە بولىنگەن،مۇنىڭ ىشىندە تولىق ارالىقتى مارافون جارىسىنا 2 مىڭ 200 ادام، جارىم ارالىقتى مارافون جارىسىنا 3 مىڭ 800 ادام قاتىناسادى ەكەن.
7 دەن 30 مينۋت وتكەندە جارىس باستالىپ، جارىسقا قاتىناسۋشىلار جيڭمىن ەكولوگيالىق سپورت باقشاسىنىڭ دەنە تاربيە الاڭىنان باستاپ جۇگىردى. قيان-كەسكى جارىستا كەنيا سپورتشىلارى تولىق ارالىقتى مارافون جارىسىنىڭ ەر- ايەلدەر جارىس تۇرىنەن الدىڭعى ءۇش ورىندى يەلەدى، مۇنىڭ ىشىندە ەكيرو 2 ساعات 19 مينۋت 50 سەكۋندتىق ناتيجەمەن ەرلەردىڭ تولىق ارالىقتى مارافون جارىسىنىڭ اعا جۇلدەگەرلىگىن ەنشىلەسە، جەروپ 2 ساعات 43 مينۋت 17 سەكۋندتىق ناتيجەمەن ايەلدەر جارىس تۇرىنەن اعا جۇلدەگەرلىكتى قانجىعاسىنا بايلادى. ءبىرىنشى، ەكىنشى، ءۇشىنشى بولعان جۇلدەگەرلەر جەكە-جەكە 10 مىڭ دوللار، 5 مىڭ دوللار جانە 3 مىڭ دوللار سيلىققا يە بولادى.
بۇل رەتكى جارىستا مارافون سپورتى مەن جەرگىلىكتى ەرەكشەلىككە يە مادەنيەت ءوزارا توعىسىپ،قاتىناس مادەنيەتىنەن جاڭالىق جاراتۋدان ۇلگى كورسەتۋ رايونى بولعان ايفيكى قالاشىعى،ەلىمىزدەگى جاساندى جولمەن سالىنعان سەگىز ءىرى سۋ قويماسىنىڭ ءبىرى بولعان جاڭحى سۋ قويماسى،ەگىنشىلىك مادەنيەتىن جەتكىزۋشى جيڭناڭ بايىرعى جولى سياقتىلار جارىستىڭ سالتاناتىن اسىرعان.
مەملەكەتتىك دەنە تاربيە باس مەكەمەسى جەڭىل اتلەتيكا قيمىلىن باسقارۋ ورتالىعىنىڭ مەڭگەرۋشىسى دۋ جاۋساي: «جيڭمىن حالىقارالىق مارافون جارىس جولى قالا مەن اۋىل اراسىن جالعاپ، جارىسقا قاتىناسۋشىلار جاڭحى سۋ قويماسى مەن فىڭحۋاڭحۋ كولىنىڭ كوركەم كورىنىسىنەن ەستەتيكالىق ءلاززات الىپ،ەگىنشىلىك مادەنيەتىنىڭ وزگەشە قۋاتىن سەزىندى» دەدى.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.