ا ق ش-تىق ايەلدىڭ 15 جىل ىزدەستىرگەن شەشەسى سوڭىندا ءوزىنىڭ بۇرىنعى كاسىپتەسى بولىپ شىققان

    شەتەل احپارات دانەكەرلەرىنىڭ حابارىنا نەگىزدەلگەندە، نيۋ-يورك شتاتىندا تۇراتىن 40  جاستاعى ءبىر ايەل كىشكەنتايىنان باستاپ، ءوزىنىڭ اسىراپ الىنعان بالا  ەكەنىن بىلەدى ەكەن، ول 15 جىلدان بەرى  تۋعان شەشەسىن ىزدەستىرۋىن توقتاتپاعان، ءبىراق ەشقانداي ناتيجەسى بولماعان. جۋىقتا ول  TLC ساياحات تۇرمىسى ارناسىنداعى تۋىس ىزدەۋ باعدارلاماسىن  جۇرگىزەتىن ورىننىڭ DNA  ساراپتاۋىن جۇرگىزۋ جانە انىقتاۋىندا شەشەسىن تاۋىپ الىپ قالماستان، شەشەسىمەن بۇرىن كاسىپتەس ەكەندىگىن بايقاعان.

حابارعا نەگىزدەلگەندە، نيۋ-يورك شتاتىنىڭ روچەستەر قالاسىندا تۇراتىن 40 جاستاعى جەنني توماس ەسىمدى بۇل ايەل 4 جاسىنان باستاپ، ءوزىنىڭ اسىراپ الىنعانىن بىلەدى ەكەن. ءبىراق تۋعان اكە-شەشەسىنە قاتىستى ينفورماتسيانى يەلەۋى شەكتى بولعان.

وتكەن 15 جىلدان بەرى جەنني توماس توراپتان  پايدالانىپ  جانە  ءتۇرلى ماتەريالداردى اقتارۋ ارقىلى تۋعان شەشەسىن ىزدەستىرىپ كەلگەن، ءبىراق شەشەسىنىڭ دەرەگىن تابا الماعان. ال TLC ساياحات تۇرمىسى  ارناسىنىڭ  جاڭادان  شىعارعان «ءبولىنىپ كەتكەنىنەن ۇزاق ۋاقىت بولعان ءبىر ءۇيلى جاندار» اتتى باعدارلاماسى ونىڭ ءۇمىت وتىن قايتا تۇتاندىرعان ءارى وسى باعدارلاماعا تىزىمدەلگەن.

ۇعىسۋعا قاراعاندا، « ءبولىنىپ كەتكەنىنە ۇزاق ۋاقىت بولعان ءبىر ءۇيلى جاندار» اتتى باعدارلامانى جۇرگىزەتىن ورىن  DNA  ساراپتاۋىن جاساۋ جانە نوپوس داپتەرى سياقتى ءتۇرلى ماتەريالداردى تەكسەرۋ ارقىلى  اسىراپ الىنعان ادامداردىڭ تۋعان اكە-شەشەسىمەن قاۋىشۋىنا كومەكتەسەدى ەكەن.

بۇل باعدارلامانى جۇرگىزەتىن ورىن ادام ىزدەۋ مىندەتىن ورىنداپ بولىپ، تۋعان شەشەسىنىڭ سۋرەتىن جەنني توماسقا بەرگەن كەزدە :«و،ءتاڭىرىم، مەن ونى  تانيمىن»  دەپ اڭىرىپ قالعان.

ءاسىلى  بۇرىن جەنني توماس پەن تۋعان شەشەسى ۆالدەس روچەستەر قالاسىنداعى ءبىر شيپاحانادا ەكى جىل كاسىپتەس بولىپ، قانداستىق قاتىناستارىنىڭ بارلىعىن مۇلدە بىلمەگەن.

جەنني توماس: « سول كەزدە مەن شيپاحانادا ەمدەۋ  مامانى مىندەتىن وتەيمىن، ال ۆالدەس ناۋقاس ادامداردىڭ دياگنوزىنا قاراي وتىرىپ ەمدەتۋگە جاۋاپتى بولاتىن، ءار رەت ناۋقاس ادامداردى ارناۋلى ەمدەۋ بولىمىنە اكەلگەن كەزدە كەزدەسىپ قالامىز ءارى ءوزارا امانداساتىنبىز. ءبىز كاسىپتەس بولۋدان باسقا جاعىن مۇلدە  ويلاپ كورمەپپىز» دەدى.



رەداكتورى: ارداق  كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.