حالىقارالىق نىسانا اتۋ بىرلەستىگىنىڭ حابارىنا نەگىزدەلگەندە، 2016-جىلعى جارىس ماۋسىمىندا نىسانا اتۋدان الەمدىك جۇلدەگە تالاسۋ جارىسىنىڭ العاشقى بەكەتىندەگى جارىسى تايلانتتىڭ بانگكوك قالاسىندا اياقتالىپ، ەلىمىز كومانداسى 5 التىن مەدال، 3 كۇمىس مەدال جانە 4 قولا مەدالدى قانجىعاسىنا بايلاپ،مەدال تاقتاسىندا ءبىرىنشى ورىندى يەلەسە، ا ق ش كومانداسى ءبىر التىن، ءبىر كۇمىس مەدالمەن ەكىنشى ورىندى يەلەگەن.
ەلىمىز كومانداسىنىڭ العاشقى كۇنگى سايىستا اسىعى الشىسىنان ءتۇسپ، ياڭ حاۋران ەرلەردىڭ 10 مەتردەن گاز مىلتىقپەن نىسانا اتۋ شەشۋشى جارىسىندا 209.8 ۇپايلىق ناتيجەمەن اعا جۇلدەگەرلىكتى ەنشىلەپ، 2014-جىلعى ينچون ازيا سپورت جارىسىندا ءوزى جاراتقان 209.6 ۇپايلىق جاستاردىڭ وسى تۇردەگى دۇنيە جۇزىلىك رەكوردىن جاڭالادى، حالىقارالىق نىسانا اتۋ بىرلەستىگىنىڭ تورابى دا وليمپيادا سپورت جارىسىنىڭ التىن مەدالىن عانا الماعان 20 جاستاعى ياڭ حاۋراننىڭ ەڭبەگىن بيىكتەن باعالادى.
لوندون وليمپيادا سپورت جارىسىنىڭ اعا جۇلدەگەرى، دۇنيە جۇزىلىك رەكوردتى ساقتاۋشى ي-سىليڭ سول كۇنگى جارىستا 207.7 ۇپايلىق ناتيجەمەن ايەلدەردىڭ 10 مەتردەن گاز مىلتىقپەن نىسانا اتۋ شەشۋشى جارىسىندا اعا جۇلدەگەرلىكتى قانجىعاسىنا بايلادى.
وتكەن ەكى جارىس ماۋسىمىندا ناتيجەسى ايتارلىقتاي بولعان جاڭ جيڭجيڭ ەكىنشى كۇنگى ايەلدەردىڭ 25 مەتردەن ناگانمەن جىلجىمالى نىسانا اتۋ جارىسىندا ەلدەن ەرەك تەز اتۋ ونەرىمەن ەلىمىز كومانداسىنا جانە ءبىر التىن مەدال الىپ بەردى.
6-ناۋرىز كۇنگى جارىستا بەيجيڭ وليمپيادا سپورت جارىسى مەن لوندون وليمپيادا سپورت جارىسىنداعى ايەلدەردىڭ 10 مەتردەن گاز ناگانمەن نىسانا اتۋ جارىسىنىڭ التىن مەدال يەگەرى گو ۋىنجۇن اراعا 21 اي سالىپ، دۇنيە جۇزىلىك اعا جۇلدەگەرلىكتى قانجىعاسىنا تاعى دا بايلادى،7-ناۋرىزدا جاڭ فۋشىڭ ەرلەردىڭ 25 مەتردەن ناگانمەن تەز اتۋ تۇرىنەن اعا جۇلدەگەرلىكتى ەنشىلەپ، ەلىمىز كومانداسىنا بەسىنشى التىن مەدالدى الىپ بەردى.
8- ناۋرىز كۇنگى ەڭ سوڭعى شەشۋشى جارىستا ا ق ش ساڭلاعى يمونس بانگكوكتاعى قاتتى بوراندا ەرلەردىڭ 50 مەتردەن مىلتىقپەن وتىرىپ، تۇرىپ جانە جاتىپ نىسانا اتۋ شەشۋشى جارىسىندا اعا جۇلدەگەرلىكتى ەنشىلەدى، سونىمەن ا ق ش كومانداسى ءبىر التىن، ءبىر كۇمىس مەدالمەن مەدال تاقتاسىندا ەكىنشى ورىندى يەلەدى. برازيليا، دانيا، گەرمانيا جانە ءۇندىستان سياقتى ەلدەردىڭ ءارقايسىسى ءبىر التىن مەدالمەن ءۇشىنشى ورىندى يەلەدى.
جالپى 49 ەل مەن رايوننان كەلگەن 330 سپورتشى وسى رەتكى نىسانا اتۋدان الەمدىك جۇلدەگە تالاسۋ جارىسىنىڭ تايلانتتىڭ بانگكوك بەكەتىندەگى جارىسىنا قاتىناستى.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.