2016-جىلعى مەملەكەتتىك جەڭىل اتلەتيكا جۇلدەلى جارىسىنىڭ العاشقى بەكەتىندەگى جارىسى 28-اقپاندا نانجيڭدە باستالدى، ايەلدەردىڭ قىسقا ارالىققا جۇگىرۋ ءتۇرىنىڭ ايگىلى سپورتشىسى ۋي يۇڭلي 7 سەكۋند 17 تاقىلدىق ناتيجەمەن 15 جىل ساقتالىپ كەلگەن ايەلدەردىڭ 60 مەتر ارالىققا جۇگىرۋدىڭ مەملەكەتتىك رەكوردىن جاڭالادى.
بىلتىر بەيجيڭ جەڭىل اتلەتيكا جۇلدەلى جارىسىنىڭ ايەلدەردىڭ 100 مەتر ارالىققا جۇگىرۋ جارتىلاي شەشۋشى جارىسىنا تۇسكەن گۋاڭشيدىڭ ايگىلى سپورتشىسى ۋي يۇڭلي وسى رەتكى جارىستا جۇرتتىڭ نازارىن اۋدارعان سپورتشىعا اينالدى، بىلتىرعى مەملەكەتتىك جۇلدەلى جارىستا ول 3 رەت 7 سەكۋند 19 تاقىلدىق ناتيجە جاراتىپ، لي شۋەميدىڭ 2001-جىلى جاراتقان مەملەكەتتىك رەكوردىمەن تەڭەسكەن بولاتىن. وسى رەتكى جارىستا ۋي يۇڭليدىڭ بەينەسى ايتارلىقتاي بولىپ، دايىندىق جارىستا 7 سەكۋند 27 تاقىلدىق بيىلعى ءوزىنىڭ ەڭ جاقسى ناتيجەسىن جاراتسا، شەشۋشى جارىستاعى بەينەسى ءتىپتى دە تاماشا بولىپ، 7 سەكۋند 17 تاقىلدىق ناتيجەمەن اعا جۇلدەگەرلىكتى ەنشىلەۋمەن بىرگە، مەملەكەتتىك رەكوردى جاڭالادى.
سىچۋاندىق سپورتشى حۋاڭ چاڭجوۋ ەرلەردىڭ الىسقا سەكىرۋ جارىسىندا 8.18 مەترلىك ناتيجەمەن اعا جۇلدەگەر بولدى. ايتا كەتۋگە تاتيتىنى، جارىس ءۇي ىشىندەگى جانە دالالىق جارىس دەپ بولىنگەنىمەن، الايدا بىلتىرعى جەڭىل اتلەتيكا جۇلدەلى جارىسىندا ۋاڭ جياناننىڭ قولا مەدال العانداعى ناتيجەسى دە 8.18 مەتر بولاتىن، ال وسى رەتكى جارىستا ول 8.07 مەترلىك ناتيجەمەن ەكىنشى بولدى.
مۇنان تىس، شاندۇڭ كومانداسى سول كۇنگى جەڭىمپازعا اينالدى، ولار ەرلەردىڭ 60 مەترگە جۇگىرۋ، ەرلەردىڭ سىرىقپەن بيىككە سەكىرۋ، ەرلەردىڭ شويىن دوپ جانە ەرلەر مەن ايەلدەردىڭ 400 مەترگە جۇگىرۋ سياقتى بەس تۇردەن اعا جۇلدەگەرلىكتى ەنشىلەدى. سىچۋان كومانداسى ەكى التىن مەدال، حىنان، ازاتتىق ارميا، انحۇي، شانشي سياقتى كوماندالار دا بىردەن التىن مەدال الدى.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.