ەەڭ جاڭا مازمۇندار
”جاڭا داۋىردە ەكپىندەي ىلگەرىلەۋ“ نەگىزگى تاقىرىپتىق تابىستار كورمەسىنىڭ شينجياڭ كورمە بولىگى تارتىمدىلىعىمەن كوزگە ءتۇستى
«تاعدىرلاس بولىپ، داڭعىل جولمەن ىلگەرىلەۋ − شي جينپيڭنىڭ ديپلوماتيا يدەياسى ادامزات دامۋىنىڭ، العا باسۋىنىڭ اعىمىن ىلگەرىلەتتى»
بۇقارانىڭ ءىسىن قاشاندا كوكەيىندە ساقتادى
ايماعىمىزدا 610 مىڭ مۋ جەرگە دۇمبە ءبيداي سىڭىرىلە باستادى
ءۇمىت اتىزىنان مول ءونىم جىرى شىعاندادى
تىكە تاراتۋ بولمەسىنەن”ءىرى ەلدىڭ استىق قامباسىن“ تاماشالادى
شاعانتوعاي: ماقسارىنى جىنتىكتەي مانەرلەۋگە جاڭا كۇش قوسىلدى
2022-جىلى 9-ايدىڭ 30- كۇنى 218-سان
قايراتتانا العا ۇمتىلىپ، ەرلىكپەن العا باسىپ، ىنتىماقتاسا كۇرەس جۇرگىزىپ، جۇڭگوشا سوتسياليزمنىڭ تىڭ جەڭىسىنە قول جەتكىزۋ كەرە
پارتيانىڭ بەكىمىن، حالىقتىڭ رايىن ۇيىستىرىپ، گۇلدەنۋ ۇلى ءىسىن ىلگەرىلەتتى
رەفورما شارالارىنىڭ تياناقتانىپ، ونىمدىلىك كورسەتۋىن جەدەل ىلگەرىلەتىپ، ەكونوميكانىڭ، قوعامنىڭ جوعارى ساپالى دامۋىن پارمەندى قولداۋ، قامتاماسىز ەتۋ كەرەك
زەيىن - زەردەنى، كۇش - قۋاتتى ۇيىستىرىپ، بورىشتى ارقالاپ، قايراتتانا العا ۇمتىلىپ، جاڭا تاراۋ جازايىق
قايراتتانا العا ۇمتىلىپ، ەرلىكپەن العا باسىپ، ىنتىماقتاسا كۇرەس جۇرگىزىپ، جۇڭگوشا سوتسياليزمنىڭ تىڭ جەڭىسىنە قول جەتكىزۋ كەرەك
تاريحتى اينا ەتىپ، وتكەندى باعامداپ، بولاشاقتى بولجاپ، گۇلدەنۋ جولىندا تاباندىلىقپەن العا باسۋ كەرەك
ىندەتكە توسقاۋىل قويۋ، ەكونوميكانى ورنىقتىرۋ، دامۋ حاۋىپسىز بولۋ ماڭىزدى تالابىن جاپپاي تياناقتاندىرىپ، پارتيا 20 - قۇرىلتايىنىڭ جەڭىسپەن اشىلۋىنا حاۋىپسىز، ورنىقتى ساياسي، قوعامدىق ورتا جاراتۋ كەرەك
اۆتونوميالى رايوننىڭ وقۋ - اعارتۋدى جوعارى ساپامەن دامىتۋ جينالىسى اشىلدى
بارشا جۇڭگولىقتى تۇگەل اناعۇرلىم جاقسى تۇرمىسقا كەنەلتتى
شينجياڭدى سىرتقا ەسىك اشۋدىڭ الدىڭعى شەبى ەتىپ قۇرىپ شىعامىز
جۇڭگو كوممۋنيستىك پارتياسىنىڭ مەملەكەتتىك 20 - قۇرىلتايىنا قاتىناساتىن ۋاكىلدەر تۇگەل سايلانىپ شىقتى
ۋاكىلدىك بورىشتى ادالدىقپەن اتقارىپ، ۋاكىلدىك رولدى تولىق ساۋلەلەندىرەيىك
مەملەكەتتىك حالىق قۇرىلتايى تۇراقتى كوميتەتىنىڭ زاڭنىڭ اتقارىلۋىن تەكسەرۋ گرۋپپاسى رايونىمىزدا زاڭنىڭ اتقارىلۋىن تەكسەردى
2022-جىلى 9-ايدىڭ 29- كۇنى 217-سان
2022-جىلى 9-ايدىڭ 28- كۇنى 216-سان
اۆتونوميالى رايوندىق پارتكوم تۇراقتى كوميتەتى كەڭەيتىلگەن ءماجىلىس اشتى كەزەكتەگى ىندەتتەن ساقتانۋ - تىزگىندەۋ قىزمەتىن ارناۋلى تاقىرىپتا اقىلداستى، ورنالاستىرۋ جاسادى
اۆتونوميالى رايوندىق ساۋدا - ونەركاسىپشىلەر بىرلەستىگىنىڭ (باس ساۋدا قوعامى) 12 - قۇرىلتايى وتكىزىلدى
شينجياڭ سۋ يگىلىگىن دامىتۋعا قارجى قوسۋ (توبى) شەكتى سەرىكتەستىگى قۇرىلدى
2022-جىلى 9-ايدىڭ 27- كۇنى 215-سان
شاۋەشەك قالاسىندا تۇڭعىش قارتتارعا قامقورلىق جاساۋ جاعىنان قوعامدىق قىزمەت وتەۋ ورتالىعى قۇرىلدى
ساۋانداعى ساقشىلار مەن حالىق قارا دەگەلەكتى قۇتقاردى
شاۋەشەك كەدەنى دالمە -ءدال شارا قولدانىپ، اۋىل شارۋاشىلىق قوسىمشا ونىمدەرىن يمپورت -ەكسپورت ەتۋدىڭ”جەدەل ارناسىن“ اشتى

تۇرسىن، پەرىنىڭ قىزى جانە مەن

جولدانعان ۋاقىتى : 2016/2/14 12:47:47

(قاز-قالپىندا)

راحىمجان وتاربايەۆ  (قازاقستان)


    تۇنىمەن ءۇزىلىپ-جالعانىپ ءتۇس ەنىپ، ۇيقىم قاشادى. كورەتىنىم قوزداپ جانىپ، قولامتاسى قالعان بالالىق شاعىمداعى شىعار كۇننىڭ شۋاعىنا شومىلىپ، باياعى قىزىل التىنداي بالقيتىن يەن شاعىلدىڭ ىشىندە جۇرەمىن. الدىمدى الدەبىر ەلەستەر كەس-كەستەيدى. ءجون تاپپاي اداسامىن كەپ. جوق جەردەن بويىمدى ۇيات بۋادى. القىمىم ىسەدى، داۋىسىم قارلىعادى. قۇلاعىما الىستان تالىپ جەتكەن سىبىزعى ءۇنى كەلەدى. سىڭسىپ جىلاعان قىز ەكەن دەيمىن.
*   *  *
    قىر جايلاپ قونعان ءۇش ءۇي ەدىك. قىرىمىز شاعىر مەن جۋسانعا بوككەن قوڭىرلىق. ارا-اراسىندا شوككەن نارداي بوپ سۇلاپ جاتاتىن اسپا-تۇسپە شاعىلدار. تاڭعى شىق قالىڭ تۇسسە بەتى جول-جول بوپ جەنتەكتەلەدى. وقۋشىنىڭ سيا تامباعان جازۋ داپتەرىندەي ەدى. 

    شاعىلدىڭ ورتا شەنىندەگى تاقىرلاۋ تۇستى كوزدەپ كەپ قۇدىق قازىلاتىن. اسىپ كەتسە كىسى بويى قول سوزىم. تۇس-تۇستان كۇمىس ينەدەي جىلتىراپ اققان سۋدىڭ مولدىرلىگى كەرىم. سىمىرسەڭ كوكىرەگىڭدى اشادى. تاڭعى اۋاسى تىنىسى باردىڭ بارىنە ءدارۋ-تىن. 

    ءيا، بار-جوعى ءۇش ءۇي ەدىك. دايىر شال مەن ۋاسيلا كەمپىر جانە بويجەتكەن  قىزى تۇرسىن. شال مومىندىقتان شوككەن تۇيەگە مىنە الماس. باسىنداعى جيەگى اقجەم تاقياسىنا قوس قۇلاعىنىڭ ۇشىن قىستىرا كيىپ وتىراتىن. ۋاسيلا ادۋىن قارا كەمپىر. سەكپىل بەت سارى قىز وعان وگەي. شالدىڭ بۇرىنعى كەمپىرىنەن قالعان قارعا.

    ادۋىن قارا كەمپىردى دولىلىق قىسسا تۇرسىنعا كۇن جوق. قاشان كورسەڭ دە نان جاباردا ۇن ەلەپ، ەلەك كوزىنەن وتپەي قالعان اقباس قۇرتتى دومالاتىپ وتىرعانى. ال قولتىعىنا قاپ قىستىرىپ، تەزەك تەرە شىقسا، ءوز-وزىنەن نۇرلانىپ قايتاتىن. 

    اكە-شەشەم ىلعي دا الىس ساپاردا. ەرىك وزىمدە. ەرتەڭدى-كەش ەكى كورشىنى ەركىن جاعالايمىن، اسىرەسە زايداش شەشەمە ءۇيىرمىن. كىندىگىنەن جارىلعان تولىق كەيۋانا. تەڭسەلە باسىپ جۇرگەندە كىشكەنە كيىز ءۇيى قالشىلداپ كەتەتىندەي كورىنەتىن. ونىڭ دا ۇكىلەپ وتىرعانى جالعىز قىز. ايدار تاققىش جۇرت پەرۋشا دەسەتىن. شىن اتىن ۇمىتىپپىن. قيىلعان قاسى، ادەمى قىر مۇرىنى، جاڭا جاۋعان جاس قارداي اقتىعى. ال، دوڭگەلەنە بىتكەن قارا كوزدە ۇنەمى بالقىپ، مازداپ جاتار ءبىر ءتىلسىم بار-دى. ءاي، بۇل ادام ءناسىلى ەمەس دەگەن قاڭقۋ راس تا شىعار.

    زايداش شەشەم قىزىنىڭ توبەسىنەن قۇس ۇشىرمايدى. 

    - ءوزىم تاپتىم. سەمىز قاتىننىڭ بويىنا بالا بىتكەنى بىلىنە مە؟ ءارى تولعاعىم جوق. وسى جۇرت تا... - دەپ ءسوز اياعىن جۇتا قوياتىن.

    جۇرت كوڭىلى تارازى، ەسە جىبەرە مە؟

    - بايدان جاستاي قالعان. وسى ماڭدا ۇشقان قارعادان باسقا جان يەسى جوق. ەركەك مەكىرەنبەگەن بايقۇس قايدان جەرىك بولا قويسىن. پەرىنىڭ  قىزى دا، - دەگەن ءسوز اينالانى جەلدى كۇندەي ۇيتقىتادى. 

    دەسە دەگەندەي. قانشاما سۇلۋ بولسا دا ءتىلسىز ءارى قۇلاقسىز ەدى. تەك اندا-ساندا قىلداي نازىك داۋىسپەن ۋىلدەپ قانا جىلايدى دەسەتىن. سول كەمىستىگىن ءوزى دە ەلەڭ قىلمايتىن سىندى. جۇزدەسكەن جەردە الدىمەن جىمياتىن. سوسىن باسىن وڭ يىعىنا سال قۇلاتىپ، كوزىن اشىپ-جۇمار-دى. ۇنەمى بالقىپ، مازداپ جاتار الگى ءتىلسىم كۇللى سۇراعىڭا ءۇنسىز جاۋاپ بەرەتىن. 

    - زايداش كەشكى اق پەن قىزىلدىڭ اراسىندا قۇدىقتان سۋ تارتىپتى. قاراسا جانىنداعى شاعىلدىڭ ەتەگىندە وسى قىز شاشى جالبىراپ ويناپ ءجۇر دەيدى. ءتىلىن كاليماعا كەلتىرىپ، شەلەگىن تاستاي قاشقان ەكەن. ىزىنەن ەرىپ، سوڭىنان قالماپتى. ۇيىنە بىرگە كەلىپتى. پەرى كوشەتىن كەز عوي. ۇيىرىنەن اداسىپ قالعان دا، - دەپ وتىراتىن دايىر شال اۋەس كورگەن كەلىم-كەتىمگە.

    - تازا پەرىنىكى ەمەس، - دەر ەدى ۋاسيلا كەمپىر شالىنا كوزىن وقتاپ، - اكەسى قازاق شىعار. پەرىنىڭ قىز-قاتىنى ءبىزدىڭ ەركەكتەردەن تۇقىم الۋعا قۇمار دەسەتىن. سودان تۋعان دا. باعا الماعان سوڭ تاستاپ كەتكەن.
    - پالەسىنەن اۋلاق! - دەيدى وسى اڭگىمە ايتىلعان سايىن مومىن بايقۇس ءوزىنىڭ ول ىسكە قاتىسى جوقتىعىن قايتا-قايتا سەزدىرىپ.

      ەكى بويجەتكەن جاقىن قۇربى دا ەمەس، ءبىر-ءبىرىن جات تا كورمەيتىن. تۇرسىن قولى قالت ەتسە ەسكى ماتانىڭ ءجىبىن ساباقتاپ سۋىرىپ، كەستە توقىر. كەستەنى قولعا السا باياۋ ءان باستايتىن. وندايدا پەرۋشا جانىنا كەپ الدىمەن جىمياتىن. سوسىن باسىن وڭ يىعىنا ءسال قۇلاتىپ، كوزىن اشىپ-جۇمار-دى. 

    كورە قالسا ۋاسيلا كەمپىر:

     - ونبەس ءىستى ونەگە قىلۋىن! وسىلار قاتىن بوپ، قازان ۇستاپ جارىتپاس. كەشە تەزەك قورانىڭ اۋزىن جاپپاپتى. بۇگىن بۇزاۋدى جامىراتتى. ساۋۋعا بارسام ەنەسىن قاقتاپ ەمىپ تۇر. قوي، بۇل قانشىقتى، قوي، - دەپ قارالاي تۇلان تۇتار. سونى كۇتكەندەي كىشكەنە كيىز ءۇيىن قالشىلداتىپ زايداش شەشەم دە شىعار.

    - ءاي، قارعانبا! شاي قاتىقسىز قالعان كۇنىڭ بار ما وسى؟ ەرتەڭدى-كەش ءسۇتتى بۇلاقتاي اعىزىپ وتىرسىڭ. كىم ءىشىپ جاتىر سونى؟ بۇزاۋ ەمسە، نەسىبەسى. و، نەسى-اي! - دەپ قايىرار. كورشى كەمپىردىڭ كوڭىلىنە كەلەر دەمەيدى. تەڭسەلە باسىپ سول ۇيگە بەتتەيدى،- قۋىرداعىڭ پىستى ما؟ تاڭ اتقالى ءنار سىزبادىم. ىستىقتاي اكەلە عوي. الگى دايىر قايدا؟

    كەشكى شاي باپپەن ۇزاق ىشىلەدى. تاس قۇمان جىڭعىل شوعىنا باۋىر توسەپ، تۇكىرىك اتىپ تۇرار. قوينى-قونىشتارىن قۋالاعان اعىل-تەگىل تەر الۋان اڭگىمەنى ايداپ شىعارار. كۇندىزگى توماعا-تۇيىقتىق جايىنا قالار. ايتەۋىر ءبىر اتالارى ون ەكى قانات كيىز ءۇي تىگىپتى. ۋىعىن ات ۇستىندە ءجۇرىپ بايلاپتى. ايتەۋىر ءبىر اتالارى باستەسىپ ساماۋرىندى قاعاز اقشامەن قايناتىپتى. ايتەۋىر ءبىر اتالارى... شىعانداپ كەتكەن اۋەزە اقىرى بىلتىر قايىماي قالعان سارى ىنگەنگە دە جەتىپ ارەڭدەپ جىعىلار. وندايدا دايىر شال:

     - باياعى زامان بولسا، ورىنبور مەن تۇزتوبەنىڭ جىلقىسىن ۇيىرلەپ ايداپ اكەلەتىن. جەرى شۇيگىن، كوك مايسا. سويسا قازىسى تابان شىعار ما ەدى؟ - دەپ ءبىر جەلپىنىپ قالار. 
 
    - يباي، بارىمتا نەڭدى العان. بىلتىر سيىردىڭ شيكى جاپاسىنا تايىپ جىعىلىپ، توبىعىڭدى شىعارىپ العانسىڭ. قوي، تىنىش وتىر، - دەگەن كەمپىرى تۇسكىردىڭ ءسوزىن ەستىپ بارىپ ەسىن جيار.

    اي تاباعى اسپاندا دوڭگەلەنىپ، تاس توبەدە تۇرىپ الار. سۋىق ساۋلەسىن سەبەلەر. وندايدا شوككەن نارداي بوپ سۇلاپ جاتاتىن اسپا-تۇسپە شاعىلدار دا بايىز تابار. ءلۇپ ەتكەن جەل دە تىنشىپ، اينالانى ۇيىعان جىم-جىرت تىنىشتىق باسار. اننان-مۇننان سەكەك قاعىپ قوساياق قانا جۇگىرەتىن. تۇنگى سالقىنمەن ەكى بويجەتكەن شاعىل باسىنا كوتەرىلەدى. قوساياق قۋىپ جارىسادى. جاي ەرمەك ءۇشىن. سەكەك قاققان نەمە جەتكىزە قويا ما؟

    سىنىق سۇيەم قۇيرىعىمەن الداپ جوڭكيدى كەپ. بورپىلداق قۇمعا توبىقتان باتىپ الدىمەن تۇرسىن القىنادى. قيقۋلاپ شاۋىپ مەن دە بولدىرامىن. تەك پەرۋشا عانا تابانى قۇم باسپاي كوز الدىمىزدا ەسىپ بارا جاتادى. كورىنىپ-جوعالىپ تۇڭعيىققا باتا بەرەدى. سودان ىزىم-قايىم! ءۇمىت ءۇزدىرىپ بارىپ اي استىندا ەركىن قالقىپ، قاناتسىز قالىقتاپ ورالاتىن.
ءبىر كۇنى تاڭەرتەڭ:

    - يباي، مىناۋ الگى ساندىبايدىڭ جۇگىرمەگى مە؟ كادىمگى سيىرشى، - دەگەن زايداش شەشەمنىڭ سامبىرلاعان داۋىسىنان وياندىم،- ارميدەن كەلدىم دەيسىڭ بە؟ كيىمىن قاراي گور. سىمداي تارتىلىپ تۇر. اسكەر مۇندايلاردى ادام قىلماي جىبەرە مە؟ 

    الدەكىم قىمسىنا كۇلەدى. ەسىك كوزىنە جۇگىرە شىقتىم. كادىمگى جىگەر. وڭىرىندەگى وڭشەڭ جەز كوز ۇيالتادى، ءتىپتى، جەز تۇيمەسى دە جارقىراپ تۇر. ەكى بويجەتكەن دە سولاردى قىزىقتاپ الەك. قىر ادامىنا ءبارى تاڭسىق. الاقان جۇگىرتىپ سيپاي ما-اۋ. جۇرتتىڭ سوڭىنان باسىنداعى جيەگى اق جەم تاقياسىنا قوس قۇلاعىنىڭ ۇشىن قىستىرا كيىپ دايىر شال دا جەتەدى.

    - بالاما باتامدى بەرەم، - دەپ جەتە بەرە الاقانىن كەڭ جايادى. 

    - قايداعى باتا؟ جۇرت كەتەردە بەرەر ەدى. بۇل اسكەردەن كەلىپ تۇر. الجىماساڭ ىشكەن اسىڭ بويىڭا جۇقپاي ما؟ - دەپ ۋاسيلا كەمپىر قارالاي شارشاپ قالادى. 

    - ە، امان-ەسەن ءجۇرسىن دە... 

    جىگەر شىجىعان شىلدەدە دە اسكەر كيىمىن تاستار بولمادى. كارتۋزى قوقىرايىپ قۇدىق باسىنان شىقپايدى. اڭدىعانى ەكى اپام. الما-كەزەك سۋ الۋعا كەلگەندە جۇعىسىپ قالۋعا قۇمار. سوسىن ۇلكەندەرگە قاراسىن كورسەتپەي شوككەن نارداي بوپ سۇلاپ جاتقان شاعىلداردىڭ ارا-اراسىنا ءسىڭىپ جوعالار. 

    پەرۋشانىڭ ماعان دەگەندە ىقىلاسى بولەك-تىن. جاپان دالاداعى جالعىزدىعىن مەنىمەن تولتىرعانداي ەدى. ءتىلسىز سويلەسەر ەك. ول دا كوپ سىرىن ايتاتىن. ءۇنسىز جىميىسىمەن. ۇنەمى بالقىپ، مازداپ جاتار كوزقاراسىمەن. مەن دە ءبىراز اڭگىمەنىڭ بۇراۋ باسىن شالاتىنمىن. ويشا. كەي تۇسىن ىممەن. داۋىستاپ ايتسام كەمىستىگىن اشكەرەلەپ تۇرعانداي كورىنەتىن...

    - قاي اپاڭ جاقسى؟ - دەر كەلەسى جولى كەلگەنىندە مەنەن سول ساندىبايدىڭ جۇگىرمەگى. 

    - ەكەۋى دە، - دەيمىن بويىم اتتىڭ تەبىنگىسىنە جەتپەي تۇرىپ.

- سوندا دا.
- پەرۋشا.
سوسىن قولىما ءبىر سوم اقشا قىستىرادى.
- مەنەن سالەم دە!
ايتا المادىم. ءبىراق ول ءبارىن سەزدى. جىميىپ كەپ قۇشاعىنا اپ، بەتىمنەن سۇيگەن. ەرنى تيگەن جەر ورتەنىپ بارا جاتتى. 

    اپتا اينالماي جاتىپ جىگەر قولىما تاعى ءبىر سارىقۇلاقتى قىستىرادى.

    - پەرۋشاعا سالەم ايت. مىنا تاپىشكىنى اپارىپ  بەرشى.  سيلىعىم، - ورالعان قاعازدى قوينىما تىققىشتايدى.

جىلجىپ كىشكەنە كيىز ۇيگە بەتتەيمىن. الدىمنان يناعاشقا ەكى شەلەگىن ءىلىپ تۇرسىن شىعادى. بارىن كورىپ-بىلگەن دە. ءجۇزى قىزارىپ، سەكپىلى بەتىندە قالقىپ تۇر.

- جىگەر نە دەدى؟
- ەشتەڭە.
- شىنىڭدى ايت. قوينىڭا تىققان نە نارسە؟
- تاپىشكى.
- ماعان با؟
- جوق.

- بەرە عوي، پەرۋشا ءبارىبىر وندايدى تۇسىنبەيدى. ءما، مىنانى ال، - دەپ ءبىر ۋىس كامپيت ۇسىنادى، - جەپ كورشى، ءدامى كەرەمەت...

سول كۇنى پەرۋشاعا جولاماي قويدىم. 

    كەلەسى دە تۇرسىنعا دەپ بەرگەن كۇمىس سىرعاسىن پەرۋشاعا ۇسىندىم. ىقىلاسسىز العان. 

    ءسويتىپ، كورشى اپالارىمدى الما-كەزەك ساتا بەردىم. ساندىبايدىڭ جۇگىرمەگى بىرەۋىن الىپ كەتسە، وڭاي ولجادان قاعىلاتىنىمدى ءبىلدىم. ماعان دەگەن ەكى جاقتىڭ دا زارۋلىگى مەكتەپتە ساباق باستالعانشا جالعاسا بەرسە دەيىم. ارعى جاعىن كورەر وزدەرى...

    كۇمىس سىرعانى زايداش شەشەم قۇلاعىنا تاقتى. كۇمىستەلگەن شاشىمەن كەرەمەتتەي ۇيلەسىپ تۇردى. 

    پەرۋشا سودان باستاپ وزگەرە بەردى.  شاشى  جالبىراپ  ويناپ ءجۇردى دەيتىن شاعىلعا كەپ، باتار كۇننىڭ بوياق ساۋلەسىنە قاراپ مۇڭعا شوماتىن. الدەكىمدەردى كۇتكەندەي... الدەكىمدەردىڭ ەلەسىنە زارىققانداي...
تۇرسىن سول تاپىشكىسى تۇسكىردى تەزەك قورانىڭ تۇكپىرىنە تىققان. ۋاسيلا كەمپىر تاۋىپ الىپتى.

    - قانشىق مۇنى كىم بەردى؟! نەگە جاسىراسىڭ؟ - دەپ قىزىن قۇدىق باسىنا دەيىن قۋىپ ءجۇرىپ ساباعان، - بايعا قاشقالى ءجۇرمىن دە؟ زار كۇيىڭە جەتكەن ەكەنسىڭ. كورسەتەيىن ساعان!

- ءاي، توقتات! جەتىمەكتى نەگە سونشا باسىناسىڭ، - دەپ الدارىنان تەڭسەلە باسىپ ءزايداش شەشەم شىققان، - وسىدان بار عوي...

- ازعىرىپ جۇرگەن الگى ساندىبايدىڭ جۇگىرمەگى. وڭباعان نەمە! قۇتىلا الماي وتىرساڭ بەر ءوز پەرىڭدى!

- ءتىلىڭدى تارتا سويلە! ال، بەرەم. التىن اسىقتاي بالا. و، نەسى-اي!

    قۇدىق باسىنداعى داۋدىڭ ءمانىن ۇقپاعان دايىر شال: 

    - باتامدى بەرەم، - دەپ جاتتى.

    سول ءتۇنى تۇرسىن اپام جىگەردىڭ اتىنىڭ ارتىنا مىنگەسىپ كەتىپتى. كورشى اۋىلعا كەلىن بوپ ءتۇسىپتى. تاقاسى قيسايعان ەسكى توپليىن قۇدىق باسىنا لاقتىرىپ كەتكەن. ىشىنە قۇم تولتىرىپ، قايىق قىپ شاعىلدا ءجۇزدىرىپ ويناپ ءجۇردىم. كەشقۇرىم پەرۋشا سۋ الۋعا شىققان. بوس شەلەگى يىعىندا تەربەلەدى. ادەتتەگىدەي جىميمادى. باسىن وڭ يىعىنا ءسال قۇلاتىپ، كوزىن اشىپ-جۇمبادى دا. تەك ۇنەمى بالقىپ، مازداپ جاتاتىن جانارىن ماعان تىكتەپ از تۇردى دا جانىمنان ءوتىپ جۇرە بەردى. 

    ءتىلى بارلاردىڭ قۋلىق-سۇمدىعىن تۇسىنبەي قويدى-اۋ، جازعان.

*   *   *

    تۇنىمەن ءۇزىلىپ-جالعانىپ ءتۇس ەنىپ، ۇيقىم قاشادى. كورەتىنىم قوزداپ جانىپ، قولامتاسى قالعان بالالىق شاعىمداعى شىعار كۇننىڭ شۋاعىنا شومىلىپ، باياعى قىزىل التىنداي بالقيتىن يەن شاعىلدىڭ ىشىندە جۇرەمىن. الدىمدى الدەبىر ەلەستەر كەس-كەستەيدى. ءجون تاپپاي اداسامىن كەپ. جوق جەردەن بويىمدى ۇيات بۋادى. القىمىم ىسەدى، داۋىسىم قارلىعادى. قۇلاعىما الىستان تالىپ جەتكەن سىبىزعى ۇنى كەلەدى. سىڭسىپ جىلاعان قىز ەكەن دەيمىن... جىلاسا جىلاعان شىعار...


    دايىنداعان - قاجىبەك ايدارحان



رەداكتورى: ارداق  كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.
powered by IlgharCMS 3.2 www.ilghar.cn