ۇسىنىس ەتىلگەن ءتىلشى سۋ گاڭۋي، ەرىكتى ءتىلشى لي شينرۇي
ءتۇرلى قاتىناس قاعيداسىنا قايشى ارەكەتتەردىڭ قاتىناس ساقشىلارىنىڭ باقىلاۋ كامەراسىنا ءتۇسىپ قالۋىنان ساقتانۋ ءۇشىن، كەيبىر ەسەرسوق شوفەرلەر ءنومىر تاقتاسىن قالقالاپ الۋ سياقتى زاڭعا قايشى ارەكەتتەردەن پايدالانىپ كوز جازدىرىپ كەتۋدى ويلايدى. الايدا، قاتىناس ساقشىلارىنىڭ كوزىنشە ولارمەن «جاسىرىنباق ويناپ»، ءنومىر تاقتاسىن الىپ تاستاپ، كوزىن كولەگەيلەمەكشى بولعانداردى كوپ كەزدەستىرە قويمايمىز.
ساۋان اۋداندىق قوعام حاۋىپسىزدىگى مەكەمەسىنىڭ ساقشىسى مىندەت وتەۋ بارىسىندا مىنە وسىنداي جاعدايعا تاپ بولعان.
4-قاڭتار ساعات 23 مولشەرىندە ساۋان اۋداندىق قوعام حاۋىپسىزدىگى مەكەمەسىنىڭ شاڭحۋدي ساقشى بولىمشەسىندەگى حالىق ساقشىلارى قاراستىلىعىنداعى ساۋان-ليۋماۋۋان تاس جولىنىڭ يۇنحى قىزمەت وتەۋ تۇيىنىندە مىندەت وتەپ جۇرگەنىندە الىستان ءبىر كىرە اۆتوموبيلىنىڭ توقتاعاندىعىن ءارى شوفەردىڭ جالما-جان اۆتوموبيلدىڭ الدىڭعى-ارتقى ءنومىر تاقتاسىن الىپ تاستاپ،ماشيناسىنىڭ باسىن بۇرىپ كەتىپ قالعاندىعىن بايقاپ قالادى.
الايدا، 10 مينۋتتان كەيىن الگى كىرە اۆتوموبيل قايتادان قايتىپ كەلەدى. قاتىناس ساقشىلارى اۆتوموبيلدى توسىپ تەكسەرۋ جۇرگىزىپ، اۆتوموبيل ءنومىر تاقتاسىنىڭ قايدا كەتكەنىن سۇراعاندا، ا xx بىرەسە،«ۇيدە قالعان» دەسە، بىرەسە،«دوستارىم قالجىڭداپ الىپ تاستاپتى» دەپ كىبىرتىكتەيدى. سوڭىندا ساقشىلار ءتىنتۋ جۇرگىزىپ، اۆتوموبيلدىڭ ارتقى جۇك ساندىعىنان الىپ تاستاعان ءنومىر تاقتاسىن تاۋىپ الادى.
ا xx تىڭ تاپسىرۋىنشا، ساۋان اۋداندىق قوعام حاۋىپسىزدىگى مەكەمەسى تۇتاس اۋدان كولەمىندە قانىقتىق دارەجەسى جوعارى زەردەلى باقىلاۋ كامەراسى مەن ەلەكتر ساقشى سياقتى باقىلاۋ اسپاپتارىن جاپپاي ىسكە قوسىپ، قاتىناس قاعيداسىنا قايشىلىق جاساعانداردى ەستەلىككە الىپ، اۆتوموبيل جىلدامدىعىنا قاتاڭ باقىلاۋ جۇرگىزەتىندىكتەرىن جاريالاعاننان كەيىن كامەراعا ءتۇسىپ قالۋدان قالاي ساقتانۋ جونىندە باس قاتىرعان ەكەن.
سول كۇنى كەشتە ول اۋداننان ءبىر جولاۋشىنى شاڭحۋدي اۋىلىنا اپارماقشى بولىپ، ساۋان-ليۋماۋۋان تاس جولىنىڭ يۇنحى قىزمەت وتەۋ تۇيىنىنە تاياي بەرگەنىندە كەنەتتەن بۇل جول بولەگىنىڭ باسىنان-اياعىنا دەيىن اۆتوموبيل جىلدامدىعىن باقىلاۋ كامەراسى ورناتىلعاندىعى،ال ءوزىنىڭ جولى بويى جوعارى قارقىنمەن ءجۇرىپ كەلگەندىگى ەسىنە ءتۇسىپ، كامەراعا ءتۇسىپ قالسا ءنومىرى تارتىلىپ، اقشالاي ايىپ سالىناتىندىعىن سەزگەن.
سونىمەن ول قىزمەت وتەۋ تۇيىنىنە 30 مەتر قالعاندا اۆتوموبيلىن توقتاتىپ، ءنومىر تاقتاسىن الىپ تاستايدى ءارى مىنا تۇندە ءبىر ايلانىپ قايتا كەلسەم بايقاماي قالار دەپ ويلايدى. الايدا، ونىڭ وسى ىستەگەندەرىن سول كۇنگى قاراۋىلدا تۇرعان حالىق ساقشىلارى باستان –اياق باقىلاپ وتىرعان ەكەن.
ا xx: « بۇرىن قاتىناس ەرەجەسىن جاقسى بىلمەيتىن ەدىم، كەيىن بىلسەم دە بىلمەستىككە سالىنىپ كەلدىم، الايدا، قازىر وسى ىستەگەنىمە قاتتى وكىنىپ وتىرمىن، باسقا شوفەرلەردىڭ مەنەن ۇيرەنبەۋىن ءۇمىت ەتەمىن » دەدى.
ساۋان اۋداندىق قوعام حاۋىپسىزدىگى مەكەمەسىنىڭ قاتىناس ساقشى تاراۋى « جول قاتىناسى حاۋىپسىزدىگى زاڭى » مەن « شوفەرلىك كۋالىكتى الۋعا ءوتىنىش بەرۋ جانە پايدالانۋ ەرەجەسىنىڭ » قاتىستى بەلگىلەمەسىنە نەگىزدەلىپ، ا xx تىڭ شوفەرلىك كۋالىگىنىڭ 12 ءنومىرىن بۇكىلدەي تارتۋ جانە قوسىمشا 200 يۋان اقشالاي ايىپ سالۋدى ۇيعاردى.
رەداكتورى: پارزانا عادىلبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.