جاستار سپورت جارىسىنىڭ اعا جۇلدەگەرى چيڭ ۋىن-ي 17 جاسىندا تۇتقيىل قايتىس بولدى

    9-قاراشا تاڭ سارىدە نەبارى 17 جاستاعى تۇڭعىش كەزەكتى جاستار سپورت جارىسىندا باقاشا مالتاۋ تۇرىنەن ەكى التىن مەدالدى ەنشىلەگەن بەيجيڭنىڭ سۋدا مالتاۋ شولپانى چيڭ ۋىن-ي بەيجيڭ مەملەكەت  كومانداسىنىڭ جاتاعىندا تۇتقيىل قايتىس بولدى.

  چيڭ ۋىن-ي قازاننىڭ سوڭىندا عانا اقىرلاسقان ءبىرىنشى كەزەكتى جاستار دەنە تاربيە جارىسىندا بەيجيڭ شۇن-ي كومانداسى اتىنان ايەلدەردىڭ 100 مەتر جانە 200 مەترگە باقاشا مالتاۋدىڭ اعا جۇلدەگەرلىگىن يەلەۋمەن بىرگە، كۇش جالعاپ ارالاس مالتاۋدىڭ  كۇمىس مەدالىن ەنشىلەگەن. ءتىلشىنىڭ ۇعىسۋىنا قاراعاندا، چيڭ ۋىن-ي 28-قازاندا بارلىق ساپتاستارىمەن بىرلىكتە دەنساۋلىق تەكسەرتكەندە تەكسەرۋ ناتيجەسى تۇگەلدەي قالىپتى شىققان.

  2-قاراشادا جۇڭگو مالتاۋ كومانداسى بەيجيڭدە جينالعاندا چيڭ ۋىن-ي مەملەكەت كومانداسىندا جاتتىعۋعا قاتىناسقان. داعدى بويىنشا ەندى عانا دەمالىستان ورالعان ول جەڭىل تۇردەگى  كۇشەمەلىلىگى تومەن دەنە قۋاتىن قالپىنا كەلتىرۋ جاتتىعۋىن جاساعان. ءبىرىنشى اپتانىڭ دەمالىس كۇنىن وتكىزگەننەن كەيىن چيڭ ۋىن-ي  8-قاراشا (جەكسەنبى) تۇستەن كەيىن كومانداعا قايتىپ، ساپتاستارىمەن بىرگە مالتاۋ سارايىنا بارىپ مىڭ مەترگە دە جەتپەيتىن جەرگە ەركىن مالتاعان. بەيجيڭ ۋاقىتى كەشكى ساعات 9 دا ول شەشەسىمەن تەلەفوندا جوعارى   مەكتەپ  وقۋ  ءىسى  جونىندە اقىلداسىپ، بەيجيڭ ۋاقىتى ساعات 10 جارىمدا ۋيچاتتا دوستارىمەن حابارلاسقان.

  9-قاراشا تاڭ ءسارى بەيجيڭ ۋاقىتى ساعات 4،3 تەردە جاتاقتاستارى چيڭ ۋىن-يدىڭ شىڭعىرعان داۋىسىنان شوشىپ ويانىپ، دەرەۋ  شىراقتى جاعىپ ونى وياتقاندا ونىڭ ءتىل-اۋىزسىز قالعاندىعىن بايقاعان.

  جاتاقتاستارى كوماندا شيپاگەرىن شاقىرىپ،ونىڭ ناۋقاسىنا دياگنوز قويدىرتقان. كوماندا شيپاگەرى جاعدايدىڭ ناشارلىعىن، دەرەۋ 120 شۇعىل قۇتقارۋ ورتالىعىنا تەلەفون شالىپ ماشينا شاقىرۋدى ايتقان. شۇعىل قۇتقارۋ ماشيناسىنداعى شيپاگەرلەر ءبىر جاقتان، وعان شۇعىل قۇتقارۋ الىپ بارسا، ەندى ءبىر جاقتان، تيانتان شيپاحاناسىنا جەتكىزىپ جالعاستى شۇعىل قۇتقارۋ جۇرگىزگەن. بۇل حابار چيڭ ۋىن-يدىڭ اكە-شەشەسىنە، مەملەكەت كومانداسى، بەيجيڭ كومانداسى، بەيجيڭ قالالىق دەنە تاربيە مەكەمەسىنىڭ قاتىستى باسشىلارى مەن جاۋاپتى ادامدارعا جەتكىزىلگەننەن كەيىن ولار جان-جاقتان دەرەۋ تيانتان شيپاحاناسىنا جەتكەن. ءبىر ساعاتقا تاياۋ ۋاقىت شۇعىل قۇتقارۋ جۇرگىزىلگەننەن كەيىن تيانتان شيپاحاناسى چيڭ ۋىن-يدىڭ قايتىس بولعاندىعىن جاريالاعان.

  چيڭ ۋىن-ي ءبىر ءۇيدىڭ جالعىز قىزى ەدى. ونىڭ ءولىمى اتا-اناسىنا قاتتى  باتقاندىقتان، چيڭ ۋىن-يدىڭ اتا-اناسى مۇردەنى تەكسەرتپەيتىندىگىن،بالاسىن جاقسىلاپ جەرلەۋدى ايتقان.
تۇتقيىل قايتىس بولۋ جۇڭگو مالتاۋ سالاسىندا ىلۋدە ءبىر كەزدەسەدى.

  حالىقارادا 2012-جىلى 30-ساۋىردە نورۆەگيانىڭ ەرلەر باقاشا مالتاۋ ءتۇرىنىڭ الەمدىك جۇلدەگەرى الەكساندر.دالە.ۆەن لوندون وليمپيادا سپورت جارىسىنا قاتىناسۋعا دايىندالىپ جاتقان كەزدە تۇتقيىل قايتىس بولعان. ول ا ق ش-تىڭ اريزونا شتاتىنىڭ فلاگستاف قالاسىنداعى ءبىر مالتاۋ سارايىنىڭ كيىم الماستىرۋ  ۇيىندە تۇتقيىل بۇل دۇنيەمەن قوشتاسقان.

       
رەداكتورى: پارزانا عادىلبەك قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.