9 تاۋلىك جانىپ تۇرعان حالىقارالىق اسكەرلەر سپورت جارىسىنىڭ قاسيەتتى الاۋى 11-قازان كەشتە وڭتۇستىك كورەيانىڭ ورتا وڭتۇستىك بولەگىندەگى قالا مۇڭيەوڭداعى وڭتۇستىك كورەيا اسكەري دەنە تاربيە قوسىنىنىڭ نەگىزگى دەنە تاربيە الاڭىندا باياۋ ءوشىرىلىپ، 6-كەزەكتى دۇنيە جۇزىلىك اسكەرلەر سپورت جارىسى اياقتادى.
وسى كەزەكتى اسكەرلەر سپورت جارىسىندا 246 التىن مەدالدى قامتىعان جيىنى 798 مەدال تاراتىلدى. ەلىمىز ۋاكىلدەر ۇيىرمەسى 32 التىن، 31 كۇمىس، 35 قولا مەدال ەنشىلەۋدەي ناتيجەمەن التىن مەدال تاقتاسىنان 3- ورىندى يەلەدى. رەسەي ۋاكىلدەر ۇيىرمەسى 59 التىن، 43 كۇمىس، 33 قولا مەدالدىق ناتيجەمەن التىن مەدال تاقتاسىنان 1-ورىندى يەلەسە، 34 التىن، 26 كۇمىس، 24 قولا مەدال العان برازيليا ۋاكىلدەر ۇيىرمەسى 2-ورىندى، وتاعاسى ەل وڭتۇستىك كورەيا ۋاكىلدەر ۇيىرمەسى 4-ورىندى يەلەدى.
بۇل اسكەرلەر سپورت جارىسى تاريحىنداعى قاتىناسقان ادام سانى مەن جارىس ءتۇرى ەڭ كوپ ورنالاستىرىلعان ءبىر كەزەك جارىس ەسەپتەلەدى. 105 ۋاكىلدەر ۇيىرمەسىندەگى 8 مىڭنان استام اسكەري سپورتشى 24 ءىرى تۇردەگى جارىسقا ءتۇسىپ، 15 مەملەكەت جارىستى تاماشالاۋعا ادام جىبەردى.
حالىقارالىق اسكەري دەنە تاربيە القالار كەڭەسىنىڭ ءتوراعاسى حاكيم ەلسەنور پولكوۆنيك ەلىمىزدىڭ تىلشىلەرىن قابىلداعاندا: «وسى كەزەكتى جارىستا وليمپيادا سپورت جارىسىنىڭ، دۇنيە جۇزىلىك جۇلدەلى جارىستىڭ كوپتەگەن اعا جۇلدەگەرلەرى جينالىپ، جارىستىڭ دەڭگەيى وتە جوعارى بولدى. ولاردىڭ ىشىندەگى 172 ادام ريو-دە-جانە-يرودا وتكىزىلەتىن وليمپيادا سپورت جارىسى مايدانىندا بوي كورسەتەتىن بولادى» دەدى.
ەكى جۇزدەن استام ەلىمىز سپورتشىسى 16 ءىرى تۇردەگى جارىسقا قاتىناستى. ەلىمىزدىڭ ايگىلى سۋدا مالتاۋ شەبەرى نيڭ زىتاۋ ەكى التىن مەدال العاننان كەيىن جارالانىپ قالعاندىعى سەبەپتى قالعان 5 تۇردەگى جارىسقا قاتىناسۋدان باس تارتقان بولسادا، ەلىمىز ۇيىرمەسى مالتاۋ تۇرىنەن 11 التىن مەدال ەنشىلەدى. مۇنان تىس، جەڭىل اتلەتيكا، پاراشوتپەن سەكىرۋ، تايكۋوندو تۇرىنەن 4 التىن، نىسانا اتۋدان 3 التىن، اسكەري بەس تۇردەن 2 التىن، بوكس، سەمسەر ويىنى، دزيۋ-دو كۇرەسى، وسى زامانعى بەس سايىس تۇرىنەن بىردەن التىن مەدال ەنشىلەدى. 20 جاستاعى سۋدا مالتاۋ شەبەرى جاڭ يۇيحان 3 التىن، 2 كۇمىس مەدالدىق ناتيجەمەن التىن مەدال تاقتاسىنان 5-ورىندى يەلەدى.
ەلىمىز ۋاكىلدەر ۇيىرمەسىنىڭ باستىعى ما كايپيڭ:«ەلىمىز ساڭلاقتارىنىڭ جارىستاعى قايسارلىعى ادامدى اسەرلەندىرەدى. پاراشوتپەن سەكىرۋ كومانداسى 4 التىن، 4 كۇمىس، ءبىر قولا مەدال الىپ، ەلىمىزدىڭ وسى جارىس تۇرىندەگى ەڭ جاقسى ناتيجەسىن جاراتسا؛ حۋاڭ جياننان يىق بۋىنى 2 رەت تايسا دا تاباندىلىقپەن جارىستى جالعاستىرىپ، ەڭ سوڭىندا ەلىمىز كومانداسىنا ەرلەر تايكۋوندو جارىسىنىڭ تۇڭعىش اعا جۇلدەگەرلىگىن الىپ بەردى» دەدى.
حالىقارالىق اسكەري دەنە تاربيە القالار كەڭەسىنىڭ 134 مۇشەسى بار بولىپ، دۇنيەدەگى ەڭ ءىرى ارميا ارالىق جالپىلىق دەنە تاربيە ۇيىمى سانالادى. وسى القالار كەڭەسى ۇيىمداستىرىپ وتكىزگەن دۇنيە جۇزىلىك اسكەرلەر سپورت جارىسى 1995-جىلدان باستاپ ءار 4 جىلدا ءبىر رەت وتكىزىلىپ، «اسكەرلەردىڭ وليمپيادا سپورت جارىسى» دەپ اتالعان.
ەلىمىز ۋاكىلدەر ۇيىرمەسى ءار كەزەكتى اسكەرلەر سپورت جارىسىنىڭ سيلىق تاقتاسىنىڭ الدىڭعى 3 ورنىن ساقتاپ كەلدى. 4 جىلدىڭ الدىندا وتكىزىلگەن 5-كەزەكتى اسكەرلەر سپورت جارىسىندا رەسەي كومانداسى جارىسقا قاتىناسا الماعاندىقتان، ەلىمىز كومانداسى وتاعاسى ەل برازيليا كومانداسىمەن يىق تالاسىپ،سيلىق تاقتاسىنان 2-ورىندى يەلەدى. الدىڭعى كەزەكتى جارىستا سيلىق تاقتاسىندا 7-ورىندى يەلەگەن سولتۇستىك كورەيا كومانداسى وڭتۇستىك كورەيا دا وتكىزىلگەن وسى كەزەكتى جارىسقا قاتىناسپادى.
7-كەزەكتى دۇنيە جۇزىلىك اسكەرلەر سپورت جارىسى 2019-جىلى ەلىمىزدىڭ ۋحان قالاسىندا وتكىزىلەدى. 11-قازان كەشتە وتكىزىلگەن جابىلۋ سالتىندا ەلىمىز ۋاكىلدەر ۇيىرمەسىنىڭ باستىعى ما كايپيڭ، ۋحان قالاسىنىڭ باستىعى ۋان يۇڭ حالىقارالىق اسكەري دەنە تاربيە القالار كەڭەسى جانە وڭتۇستىك كورەيا ۇيىمداستىرۋ كوميتەتى ءمانساپتىسىنىڭ قولىنان سپورت جارىسىنىڭ تۋى مەن الاۋدى تاپسىرىپ الدى.
ەلسەنور: « جۇڭگو حالىقارالىق اسكەري دەنە تاربيە القالار كەڭەسىنىڭ ماڭىزدى مۇشە ەلى رەتىندە حالىقارالىق اسكەري دەنە تاربيە ىستەرىنىڭ دامۋىن جەبەۋ، دۇنيە ءجۇزىنىڭ بەيبىتشىلىگىن قورعاۋ جونىنەن ەلەۋلى ۇلەستەر قوستى. كەلەسى كەزەكتى اسكەرلەر سپورت جارىسى، ءسوزسىز، ءتىپتى دە تابىستى بولادى» دەدى.
ەلسەنور سونىمەن بىرگە، اسكەري دەنە تاربيە القالار كەڭەسىنىڭ 2019-جىلعى اسكەرلەر سپورت جارىسىن 2020-جىلعى وليمپيادا سپورت جارىسىنىڭ تولىمدىلىق الۋ جارىسىنا اينالدىرىپ، اسكەرلەر سپورت جارىسىنىڭ دەڭگەيىن اناعۇرلىم جوعارىلاتۋعا كۇش سالىپ جاتقاندىعىن ايتتى.
رەداكتورى: پارزانا عادىلبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.