تىلشىمىز سۇڭ جيانلياڭ، ەرىكتى ءتىلشى حۋ يۇيلان
2-قىركۇيەكتە ساۋان اۋدانى كونە ساۋان ساقشى بولىمشەسى قاراستىلىعىنداعى رايونداعى تيان xx تىڭ ەگىستىگىندەگى قۇنى 3 مىڭ يۋاندىق 8 ورام تامشىلاتىپ سۋارۋ تۇتىكشەسىنىڭ جوعالىپ كەتكەندىگى جونىندەگى دەلو مالىمدەۋىن قابىلدايدى.
دەلونى قابىلداعاننان كەيىن كونە ساۋان ساقشى بولىمشەسىنىڭ ساقشىلارى كونە ساۋان قالاشىعى چۇيشي قىستاعىنداعى تيان xx تىڭ ەگىستىگىنە بارىپ تەكسەرۋ جۇرگىزىپ، ماڭىنداعى تۇرعىنداردان جاعداي ۇعىسادى.
حالىق ساقشىسى جىڭ ۋىنجيە: « جەرگىلىكتى ورىنداعى تۇرعىنداردىڭ ايتۋىنشا، سول كەزدە اق ءتۇستى ءبىر اۆتوكولىكتىڭ تيان xx تىڭ ەگىستىك جەرىندە تۇرعاندىعىن كورگەن، الايدا ارالىق الىس بولعاندىقتان، اۆتوكولىكتىڭ ماركاسى مەن ءنومىرىن كورە الماعان، سوندىقتان وسى اۆتوكولىكتىڭ يەسى ۇرلاعان-ۇرلاماعاندىعىن تۇراقتاندىرا الماعان ەكەن. ءبىز وسى جاعدايعا نەگىزدەلە وتىرىپ، دەرەۋ ورنالاستىرۋ جاساپ، ءارقايسى تەكسەرۋ تۇيىندەرىنىڭ كۇماندى اق ءتۇستى اۆتوكولىكتەرگە تەكسەرۋ جۇرگىزۋى جونىندە حابارلاندىرۋ شىعاردىق» دەدى.
كەشكى ساعات 10 مولشەرىندە تەكسەرۋ تۇيىنىندەگى ساقشىلار تامشىلاتىپ سۋارۋ تۇتىكشەسى تيەلگەن اق ءتۇستى اۆتوكولىكتى بايقاپ، تامشىلاتىپ سۋارۋ تۇتىكشەسىن قايدان العاندىعىن سۇراستىرادى، اۆتوكولىكتىڭ يەسى ياڭ xx ساسقالاقتاپ دۇرىس جاۋاپ بەرە الماي، ساقشىلاردىڭ كۇمانىن قوزعايدى. سونىمەن ساقشىلار ونى ساقشى بولىمشەسىنە اپارىپ، تيان xx تى اۆتوكولىكتەگى زاتتى تانۋعا شاقىرتادى.
تيان xx تىڭ كورىپ تانۋىندا اۆتوكولىككە تيەلگەنى ءدال ءوزىنىڭ جوعالتقان 8 ورام تامشىلاتىپ سۋارۋ تۇتىگى بولىپ شىعادى.
ياڭ xx ءوزىنىڭ ءىس-ارەكەتىنە ەرەكشە وكىنىپ، ەجەلدەن مۇنداي ءىس ىستەپ كورمەگەندىگىن، سول كۇنى تيان xx تىڭ ەگىستىگىنەن ءوتىپ بارا جاتىپ، ەگىستىگىندە تۇرعان تامشىلاتىپ سۋارۋ تۇتىكشەسىن كورىپ، ماردىمسىز پايداعا كوز قىزارتىپ، بۇراڭ جولعا تۇسكەندىگىن، ماڭىندا ادام بولماعان سوڭ، ەشكىمدە بايقامايتىن شىعار دەگەن ارام ويمەن،اقىماقتىق ىستەگەندىگىن ايتادى.
ياڭ xx تىڭ قاتەلىگىن ىرىقتىلىقپەن مويىنداپ، سىن ايتىپ، تاربيە بەرۋدى قابىلداۋ پوزيتسياسىنىڭ جاقسى بولۋى جانە داۋگەر تيان xx تىڭ كەشىرىم ەتۋىنە يە بولعاندىعىنا نەگىزدەلە وتىرىپ، كونە ساۋان ساقشى بولىمشەسىنىڭ جاراستىرۋىندا ياڭ xx تيان xx تىڭ تامشىلاتىپ سۋارۋ تۇتىكشەسىن وزىنە قايتارىپ بەردى ءارى ودان كەشىرىم سۇرادى.
ياڭ xx بۇل رەتكى اشتى ساباقتى دۇرىس قابىلداپ، ەندىگارى مۇنداي قاتەلىك وتكىزبەيتىندىگىن ايتتى.
رەداكتورى: پارزانا عادىلبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.