ەرىكتى ءتىلشى لي چيانيۋان
ادەتتەگى جاعدايدا « اراق ءىشىپ اۆتوكولىك ايداۋعا، اۆتوكولىك ايداعاندا اراق ىشۋگە » بولمايدى. كەيدە جاقىن دوستارمەن باس قوسىپ قالعاندا دوستاردىڭ زورلاۋىمەن اۆتوكولىك ايداپ جۇرگەندەردىڭ ءوزى ءبىر- ەكى رۋمكا قاعىپ الاتىن جايتتەر دە كەزدەسەدى. الايدا، ماس بولىپ اۆتوكولىك جۇرگىزىپ شىرعالاڭ تۋدىرسا، بىرگە اراق ىشكەندەردىڭ دە جاۋاپكەرلىك ارقالايتىندىعىن بىلە بەرمەيتىن شىعارسىز.
جۋىقتا شاعانتوعاي اۋداندىق حالىق سوتى مەكەمەسى ءومىر ءسۇرۋ ۇقىعى داۋ-شارى دەلوسىن تەكسەرىپ ءبىر جاقتىلى ەتتى.
2014-جىلى 30-قاراشادا ايىپكەر جۋ xx تىڭ ورنالاستىرۋىمەن داۋگەر گو xx تىڭ جولداسى ليۋ xx جانە ءۇش ايىپكەر باس قوسىپ، 4 كيلوگرام اراق ءىشىپ شىلقا ماس بولادى. تۇستەن كەيىن ساعات 6 مولشەرىندە ليۋ xx اۆتوكولىگىن ايداپ ۇيىنە قايتپاقشى بولادى، الايدا جول ورتادا اۆتوكولىگى جولدان شىعىپ، اۋىر قاتىناس شىرعالاڭىنا ۇشىراپ، قازا بولادى. داۋگەر ايىپكەرلەردىڭ ءتۇرلى شىعىندى ۇستىلەرىنە الۋىن تالاپ ەتەدى.
الايدا، ءۇش ايىپكەر « بىرلىكتە اراق ىشكەنىمىز راس، ءبىراق، اراق ءىشۋ زاڭعا قايشى بولماسا، ءبىز نەلىكتەن تولەم تولەيمىز » دەپ تولەم بەرۋدەن باس تارتادى.
شاعانتوعاي اۋداندىق قوعام حاۋىپسىزدىگى مەكەمەسى قاتىناس ساقشى باس اترەتى تەكسەرۋ ارقىلى ليۋ xx اراق ءىشىپ اۆتوكولىك جۇرگىزىپ، جىلدامدىعى شەكتەمەدەن اسىپ كەتكەندىكتەن قاتىناس شىرعالاڭى تۋىلعان، سوندىقتان شىرعالاڭداعى بارلىق جاۋاپكەرلىكتى ءوزى ارقالايدى دەپ قارايدى.
شاعانتوعاي اۋداندىق حالىق سوتى مەكەمەسى تەكسەرۋ ارقىلى داۋگەر مەن ايىپكەر بىرگە اراق ءىشۋ بارىسىندا ءناسيحات ايتۋ، حابارلاۋ، كومەكتەسۋ، قارايلاسۋ سياقتى بورىشى بار دەپ قارايدى.
ءۇش ايىپكەر ليۋ xx پەن اراق ىشكەندە وعان ءناسيحات ايتۋ مىندەتىن وتەمەگەندىكتەن، ليۋ xx تىڭ ماس بولۋىنان تۋىنداعان زارداپقا قاتىستى ازاماتتىق ىستەر جاۋاپكەرلىگىن ارقالايدى. سوندىقتان سوت مەكەمەسى ءۇش ايىپكەردىڭ «بىرلىكتە اراق ءىشۋ زاڭعا قايشى ەمەس،تولەم جاۋاپكەرلىگىن ارقالايمىز» دەگەن سىلتاۋلارىن قۋاتتامادى.
ازاماتتاردا اقاۋسىز ءومىر ءسۇرۋ ۇقىعى بولادى. زياندالۋشى جاعدايدىڭ تۋىلۋىنا نەمەسە ۇلعايۋىنا دەربەس ءوزى سەبەپشى بولسا، تولەم بەرۋشىلەردىڭ جاۋاپكەرشىلىگىن جەڭىلدەتۋگە نەمەسە كەشىرىم ەتۋگە بولادى. بۇل دەلودا ليۋ xx تىڭ اراق ءىشىپ اۆتوكولىك جۇرگىزىپ، شىرعالاڭعا ۇشىراۋى ءوزىن-ءوزى مەڭگەرە الماعاندىعىمەن تىكە قاتىستى بولعاندىقتان، وزىنەن كەتكەن اعاتتىق سانالادى دا، ۇقىعىنا قۇل سۇققانداردىڭ جاۋاپكەرلىگىن جەڭىلدەتۋگە بولادى.
جوعارىداعى تۇيىندەرگە ساي، سوت مەكەمەسى ءۇش ايىپكەردىڭ قاتەلىك وتكىزۋ دارەجەسىنە نەگىزدەلە وتىرىپ، ليۋ xx جاۋاپكەرلىكتىڭ 70 پايىزىن، ءۇش ايىپكەردىڭ ءارقايسىسى 10 پايىزدان ازاماتتىق ىستەر جاۋاپكەرلىگىن ارقالاۋى كەرەك دەپ ۇكىم شىعاردى.
رەداكتورى: پارزانا عادىلبەك قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.