ەەڭ جاڭا مازمۇندار
كۇزگى تەڭەلۋ كەزىندە جەر -جەر مول ءونىم الۋدىڭ قاربالاستىعىنا ءتۇستى
كۇزگى تەڭەلۋ كەزىندە جەر -جەر مول ءونىم الۋدىڭ قاربالاستىعىنا ءتۇستى
اۆتونوميالى رايوندىق پارتكوم تۇراقتى كوميتەتى كەڭەيتىلگەن ءماجىلىس اشتى كەزەكتەگى ىندەتتەن ساقتانۋ - تىزگىندەۋ قىزمەتىن ارناۋلى تاقىرىپتا اقىلداستى، ورنالاستىرۋ جاسادى
اۆتونوميالى رايوندىق ساۋدا - ونەركاسىپشىلەر بىرلەستىگىنىڭ (باس ساۋدا قوعامى) 12 - قۇرىلتايى وتكىزىلدى
شينجياڭ سۋ يگىلىگىن دامىتۋعا قارجى قوسۋ (توبى) شەكتى سەرىكتەستىگى قۇرىلدى
2022-جىلى 9-ايدىڭ 27- كۇنى 215-سان
شاۋەشەك قالاسىندا تۇڭعىش قارتتارعا قامقورلىق جاساۋ جاعىنان قوعامدىق قىزمەت وتەۋ ورتالىعى قۇرىلدى
ساۋانداعى ساقشىلار مەن حالىق قارا دەگەلەكتى قۇتقاردى
شاۋەشەك كەدەنى دالمە -ءدال شارا قولدانىپ، اۋىل شارۋاشىلىق قوسىمشا ونىمدەرىن يمپورت -ەكسپورت ەتۋدىڭ”جەدەل ارناسىن“ اشتى
ۇلگىلەردىڭ كۇش -قۋاتىن سەزىنىپ، ءداۋىردىڭ اتويشىسى بولۋعا قۇلشىنامىز
ەسىك اشۋ ورايىنان بىرگە يگىلىكتەنىپ، كوركەم بولاشاقتى بىرگە جاراتايىق
شي جينپيڭ بۇكىل ەلدەگى قالىڭ شارۋالاردىڭ جانە اۋىل شارۋاشىلىعى، اۋىل - قىستاق، شارۋالار شەبىندە قىزمەت ىستەپ جاتقان جولداستاردىڭ مەرەكەسىن قۇتتىقتادى جانە ولاردان شىنايى حال سۇرادى
ەرەكشەلىككە، باسىمدىققا يە كاسىپ سالالارى شوعىرىن جوعارى ولشەممەن، جوعارى ساپامەن جەتىلدىرۋگە، زورايتۋعا تاباندى بولۋ كەرەك
قول قويىلعان سوما ءبىر تريلليون يۋاننان استى، كوپتەگەن ەڭ جوعارى ورە جاراتىلدى
جىبەك جولى رۋحىن اسقاقتاتىپ، ازيا مەن ەۆروپانىڭ سەلبەستىگىن تەرەڭدەتەمىز
رەفورمانىڭ تابىستى تاجىريبەلەرىن مۇقيات قورىتىندىلاپ، پايدالانىپ، ارميانى رەفورما ارقىلى قۇدىرەتتەندىرۋدىڭ جاڭا جاعدايىن قۇلشىنا اشۋ كەرەك
باس شۋجي شي جينپيڭنىڭ ماڭىزدى ءسوزىنىڭ، ماڭىزدى بەكىتۋىنىڭ رۋحىن جەتكىزدى، دايەكتىلەندىردى
2022-جىلى 9-ايدىڭ 26- كۇنى 214-سان
2022-جىلى 9-ايدىڭ 24- كۇنى 213-سان
2022-جىلى 9-ايدىڭ 23- كۇنى 212-سان
تارباعاتايدىڭ ەرەكشە ونىمدەرىن تانىستىرىپ، باۋراۋ قۋاتىن ايگىلەدى
شي جينپيڭ 7 - كەزەكتى جۇڭگو − ازيا - ەۆروپا كورمەسىنە قۇتتىقتاۋ حات جولدادى
​7 - كەزەكتى جۇڭگو − ازيا - ەۆروپا كورمەسى اشىلدى
ءبىر نيەتپەن سەلبەسىپ، جىبەك جولىنىڭ تىڭ شۇعىلاسىن جازايىق
جىبەك جولى رۋحىن اسقاقتاتىپ، قول ۇستاسىپ، بولاشاقتا تەڭ يگىلىككە كەنەلەمىز
ەسىك اشىپ، سەلبەسىپ، بولاشاققا اتتانايىق
2022-جىلى 9-ايدىڭ 22- كۇنى 211-سان
ايماقتىق اكىمشىلىك مەكەمەسى شانشي يانچاڭ مۇناي توبىمەن، شينجياڭ تيانيە توبىمەن سەلبەستىك جۇلگەلىك كەلىسىمىنە قول قويىستى
ايماعىمىزدىڭ ۋاكىلدەر ۇيىرمەسى از ۇلتتاردىڭ اۆتونوميالى رايوندىق 10 -كەزەكتى ءداستۇرلى سپورت جارىسىندا سۇبەلى تابىسقا قول جەتكىزدى
قىزمەت ورنىن تياناق ەتىپ، كورىكتى تارباعاتايدى بىرگە قۇرامىز

ەرتەڭ كۇن اشىق بولادى

جولدانعان ۋاقىتى : 2015/9/14 11:50:30

يرايدا پوپوۆا  (ساحا)


تال تۇستە شىجىپ تۇرعان ءشول دالا، كەنەت القىزىل جالىن بوپ لاپ ەتتى. ءورتتىڭ اپتاپ لەبىنە تۇنشىعا، ول قىزىل اراي اراسىنان قىلاڭ ەتكەن   قۇتقارۋشى ىسپەتتى قاراڭعى تۇنەككە ۇمتىلدى. وت اشقاراقتانا كويلەگىن جالمادى، ىسىلداپ، شاشىن جالادى.   ءبىر تاڭعالارلىعى، ول  كۇيىپ تۇرعان قۇمداۋىت جاعالاۋدان وپ-وڭاي قۇتىلدى دا سالقىن سۋعا سۇڭگىدى. شىرق  ۇيىرىلگەن اعىن سۋ ونى تەرەڭ تۇڭعيىققا تارتتى. جانتالاسا قارسىلاسقان ول قولىن سەرمەلەپ، قاتتى شىڭعىرىپ، ويانىپ كەتتى...

كەرەۋەتتىڭ باس جاعىنان كۇن جارقىراي ءتۇسىپ تۇر ەكەن،  ساۋلەسى كۇش-قۋاتى كەتىپ، ابدەن قالجىراعان دەنەسىنە ءتيدى. ول كەرەۋەتكە وتىرىپ، باسىر بولا باستاعان كوزىن جۇمىپ، بۋسانعان ماڭدايىن ءسۇرتتى.

- ۆەستا، - دەپ جارىقشاقتانعان ۇنمەن نەمەرە قىزىن شاقىردى، - شاي اكەلىپ بەرشى، تاماعىم قۇرعاپ كەتتى.

ۆەستا باسىن يزەپ، ۇيقىسىن اشا الماي، شيدەي ساۋساقتارىمەن تارتىپكە كونبەيتىن  قالىڭ شاشىن تاراعىشتادى. ۇندەمەي اس ۇيگە كىرىپ، وشاقتىڭ قاسىنا باردى دا  شىرپىنى شىرت ەتكىزدى. وسى دىبىستان تۇسىندە كورگەن ءورت قايتادان كەمپىردىڭ ميىندا جارق ەتە قالدى.

- مەستا، بالام-اۋ، كۇن بۇگىن دە كۇڭگىرت پە؟ قاراڭعى. كوزىمنىڭ كورۋى ناشار، - ول نۇرى كەتە باستاعان كوزدەرىن جىپىلىقتاتىپ مىڭگىرلەدى.

- ءيا، ءيا، اجەتاي، ەندى كۇن سايىن قاراڭعى، - نەمەرەسى تىنىشتاندىرعانشا اسىقتى. 

- ال، ەرتەڭ كۇن اشىق بولا ما؟- كەمپىر ۇمىتتەنگەن ۇنمەن سۇرادى.

- اشىلادى، اشىلماي قايدا كەتەر دەيسىڭ، - قىز تەرەزەنىڭ ارجاعىنداعى شايداي اشىق، بۇلتسىز كوك اسپانعا قاراپ تۇرىپ،  جايباراقات جاۋاپ بەردى.

اجەسى ەندى ءوزىنىڭ  كۇنىنە ءجۇز رەت قايتالايتىن، سوناۋ الىستا قالعان جاستىق  شاعى تۋرالى شەكسىز ەستەلىكتەرىن راقاتتانا ايتا باستاعاندا، بىرەۋ ەسىكتىڭ قوڭىراۋىن باستى.  پاتەرگە   تامپىش تاناۋ قىز زىپ ەتىپ كىرىپ كەلدى.

- سالەم! سەن نە، ءالى  دايىن ەمەسسىڭ بە؟ - كىرەر-كىرمەستەن ويبايعا باستى، -  مەن ساعان قىراتقا بارامىز دەپ ايتقان جوقپىن با؟ ايتتىم، - قۇربىسى ءوزى سۇراپ، ءوزى جاۋاپ بەردى.
- ەگەر كەلمەسەڭ،  ءوزىم كەلىپ اكەتەمىن دەپ ايتتىم با؟ ايتتىم. مىنە، ەندى كەلىپ تۇرمىن. كەتتىك، اندا قانشا توپ جينالعانىن كورسەڭ!

- الينا، اجەمنىڭ قاسىندا قالاتىن ەشكىم جوق،- دەدى ۆەستا.

- كەتتىك! رومكا كۇتىپ تۇر!

- انام بۇگىن ءوزىنىڭ... جىگىتىن شاقىرۋى ءتيىس... تانىسۋعا...

- وي، قويشى، ساعان  ءوز ءومىرىڭدى  ىڭعايلاستىرۋ كەرەك!

- مەستا، مەستا، -  بولمەدەن داۋىس ەستىلدى.

- سەن نە، ءيت ۇستايسىڭ با؟ - الينا تاڭعالدى.

ۆەستا باسىن شايقادى، قۇربىسى ودان ارى تاڭعالدى:

- اجەڭ نەگە «مەستو» دەپ ايعايلايدى؟

- مەنى شاقىرعانى عوي، - ۆەستا  وزىنە ءتان سابىرلى ۇنمەن  تۇسىندىرە جاۋاپ بەردى، - ونىڭ ءتىسى جوق، «ۆ» نى ايتا المايدى.

الينا قارقىلداپ قاتتى كۇلدى دە قايتادان جابىستى:

- كانە، ءجۇر كەتتىك، ۆەستوچكا...

- مەنى ولاي اتاماشى، جەك كورەمىن،- دەدى ۆەستا، ال ءوزى ىشىنەن «ۆەستوچكا...ۆەست... حابار-وشار... قانداي حابار؟ جاقسى حابار دەگەننەن گورى، جامان حابار دەگەن دۇرىس بولار...»

- ساعان نە بولعان؟ - الينا قۇربىسىنىڭ كوزىنە ءۇڭىلىپ، قولىنا جابىسىپ، زىپىلداي جونەلدى، - ال، كانە، تەز جينال، سۇلۋىم، سەن مەنىڭ  - نيەۆەستا - قالىڭدىعىمسىڭ عوي...

- راس ايتاسىڭ، نە ۆەستا - ۆەستا ەمەس، - ۆەستا باسىنا تۇڭعىش رەت كىرگەن ءسوز-ويىنعا تاڭعالدى.

- ارينە، قالىڭدىقسىڭ. ال، كەتتىك ەندى!

الينا، اۋزىنان شىعىپ كەتكەن ءسوز-ويىندى ءوزى دە تۇسىنبەگەن كۇيى، كيىم ىلگىشتەن قولىنا ىلىنگەن  ءبىر كۇرتەشەنى قۇربىسىنىڭ يىعىنا كوڭىلدەنە جاۋىپ، قولىنان تاس قىپ ۇستاپ، باسپالداقپەن تومەن قاراي تارتا جونەلدى. «ەندى ولسە دە جىبەرمەس، - ۆەستا ويلادى. - جارايدى، ەڭ بولماسا رومكامەن ارا قاتىناسىمدى انىقتارمىن».

ساياجايعا بارۋشىلار لىق تولعان اۆتوبۋز ايالداماعا كەلدى. تاپ ءبىر توپىرلاي جۇگىرىپ كەلە جاتقانداردان قورىققانداي تەمىر دەنە تۇتاسىمەن دىرىلدەپ كەتتى دە تاعدىرعا مويىن ۇسىنا، ەسىگىن   ايقارا  اشتى.

الينا قۋاتتى قولدارىمەن ۆەستانى اۆتوبۋزدىڭ ىشىنە يتەرە كىرگىزىپ، ءتىپتى وعان بوس ورىن دا  تاۋىپ  بەردى.  «ارت جاققا وتىڭىزدەر، جىلجىڭىزدار، جىلجىڭىز!»  سىرتتاعىلار تالاپ ەتۋدە، ال ىشكە كىرگەندەر: «بۇدان ارى قايدا جىلجيمىز؟ نەمەسە، جۇرتتىڭ باسىنا شىعامىز با؟» دەپ كەرىلدەسىپ جاتتى. اۆتوبۋز ۋ-شۋمەن  ەسىگىن ارەڭ جاپتى دا ارمەن قاراي ءجۇرىپ كەتتى.  قالىڭ توپتىڭ اراسىنان قىزدارعا قاراي تاياق ۇستاعان جانكەشتى كەمپىر جانتالاسا جاقىندادى.

- كانە، تۇر، بالاقاي، وتىرايىن،-دەپ بۇيىردى ول.

- كوڭىل اۋدارما، وتىر، - دەدى الينا بۇيرىقتى ۇنمەن، ورنىنان تۇرماق بولعان ۆەستانى ۇستاپ تۇرىپ، - انا جەردە ەركەكتەر وتىر، ورىندى سولار بەرسىن.

كەمپىر قىزدىڭ ءسوزىن ەستىمەدى مە، الدە ءمان بەرمەدى مە، جىلجي جاقىندادى.

- سەن نە، ەستىمەيسىڭ بە؟

كوزىن تومەن سالىپ، ىڭعايسىزدانا يىعىن قيقاڭ ەتكىزدى.

- ءسىز نەگە وعان بايلانىپ  قالدىڭىز؟ - الينا ايبارلانا سۇرادى.

- توقتاي تۇر، بويجەتكەن، - كەمپىر تاياعىن زىلدەنە سىلكىپ، قورقىتا  سويلەدى، - سەن دە ءبىر كەزدە  قارتايارسىڭ،  تەك  سوعان امان-ساۋ جەتسەڭ...

ۆەستانىڭ كوزى جاسقا تولدى، باسى تاپ ءبىر سۋعا تولعانداي، اۋىر تارتتى. ول مەڭ-زەڭ بوپ  اقىرعى ايالداماعا دەيىن جەتتى.

الينا كوڭىلدەنە  جاستار توبىنا قو سىلىپ كەتتى. روما، ۇزىن بويلى، مىعىم،  دەنەلى جىگىت شىلىمىن اياق استىنا لاقتىرا ساپ، قۇشاق جايا ۆەستاعا قاراي ءجۇردى:
- ال، كەتتىك!

- جوق، روما،- ۆەستا ونىڭ قولىن كەرى قاقتى، - مەن تەك ساعان جاعدايدى ءتۇسىندىرۋ ءۇشىن كەلگەم....

- نە  جاعداي  تاعى؟ - ونىڭ اۋزى اشىلىپ قالدى،- بۇگىن جورىق، ەرتەڭ بىزدىكىنە بارامىز.

- مەن بارمايمىن.

- نەگە؟

- اجەمدى تاستاپ كەتە المايمىن، - دەدى قىز سەزىم-كۇيى تاماعىنا ءتۇيىن بوپ جينالعانىن سەزىنە تۇرىپ.

- ال اناڭ شە؟

- ول كۇيەۋگە شىققالى ءجۇر...

- ءتىپتى جاقسى، - روما قۋانىپ كەتتى، - سەن كەتەسىڭ، شەشەڭنىڭ كۇيەۋسىماعى قولىنا كىرەدى. مىنە، ءسويتىپ، ۇشەۋى بىرگە تۇرادى.

- ولار بولەك كەتپەكشى. اجەممەن مەن قالۋعا ءتيىسپىن...

- جارايدى، بولدى، كەتتىك، - روما ءسوزدى ءبولىپ، ۆەستانىڭ شىنتاعىن اۋىرتا قىستى. 
 
- جوق، - قىز جۇلقىندى، كەنەت، - قالشى، رومكا، مەنىڭ قاسىمدا قالشى، بارماشى! - دەپ جالىنىپ قويا بەردى.

- قالاي سەن سياقتى بولامىن؟ - ول رەنجي قولىن سىلتەدى، -  ۇنەمى تۇيتكىلدى جاڭا ماسەلەلەر! ءيا، سەن تۇسىنسەڭشى، مەن رومانتيكپىن، تابيعاتتىڭ بەل بالاسى، مەن ءوزىمدى ءتورت قابىرعاعا قاماپ قويا المايمىن، ماعان كەڭىستىك، ورمان، بالىق اۋلاۋ، اڭشىلىق كەرەك! - روما ىشىندەگى شاڭنىڭ ءبارىن شىعارىپ بولعاسىن،   جالىنىشتى ۇنمەن،  - ءتۇسىنشى، مەن انامنىڭ جالعىزىمىن. ال مەن... ونى جالعىز قالدىرۋعا قاقىم جوق،   ءوزىڭ دە كورەرسىڭ، سەن ەكەۋىڭ ءتىل تابىسىپ كەتەسىڭدەر.

ءبارى باس تارتقان اجەسى كوزىنە ەلەستەگەندە ۆەستانىڭ تاماعىنا وكسىك تىرەلدى.

- ولاي بولسا،  وندا ساعان كۇيەۋگە شىققىم كەلمەيدى.

-  سەن نە دەدىڭ؟ - روما باسىن قيسايتىپ، كوزىن سىعىرايتتى، - ساعان نە بوپ ءجۇر ءوزى؟  مەنىڭ ءسابيىم دە ءوزىم  سەكىلدى اكەسىز وسەدى دەپ ايتقىڭ كەلە مە؟

ۆەستا  بىرەسە  ىسىپ، بىرەسە سۋىندى.

- جوق، قايداعى ءسابي؟! - ول تىستەرى اقسيا كۇلىمدەدى، - بۇل قاتە.

- سونى ماعان نەگە ايتپادىڭ؟

- مىنە، ايتتىم عوي.

- نەسى بار، مەن ءبارىن ءتۇسىندىم، - دەدى دە ول بۇرىلىپ، ۋازيككە قاراي بەتتەدى.

ۆەستانىڭ بويىن ۇساق ءدىرىل بيلەپ، كوزىنەن جاس ىرشىپ كەتتى دە ءجۇرىپ بارا جاتقان اۆتوبۋزدىڭ  سوڭىنان جۇگىردى. ارتىنان: «نە بولدى، رومكا؟» دەگەن داۋىس، سوسىن: «ۆەستا! ۆەستا!» دەگەن الينانىڭ ءۇنى ەستىلدى.

اناسى ونى جاقتىرماي قارسى الدى.

- اجەڭدى نەگە جالعىز تاستاپ كەتتىڭ؟
*   *   *
...ولار تاعى رەنجىسۋدە. ودان دا جۋىناتىن بولمەدە جالعىز ءوزى وڭاشا وتىرعانى جاقسى عوي.  كەيۋانا كوز قيىعىمەن قول جۋعىشتىڭ ىشىنەن  الدەبىر جاندىكتى كورىپ قالدى دا ونى اعىزىپ جىبەرۋ ءۇشىن  سۋدى اشتى. زەيىن سالا قاراپ، ول بۇنىڭ ورمەكشى ەكەنىن كوردى ءارى ۆەستاعا: «ورمەكشىنى ولتىرۋگە بولمايدى، ول ۇيگە باقىت اكەلەدى» دەپ ءوزىنىڭ ۇيرەتكەنى ەسىنە ءتۇستى.  ول ونى سۋدان ۇستاپ الماق بولدى، الايدا ورمەكشى  شىرق ۇيىرىلگەن سۋدىڭ ىشىندە اينالىپ ءجۇر ەدى، يكەمسىز ساۋساقتارىنىڭ اراسىنان ءوتىپ كەتتى. 

ولار وسى ۇيگە كوشىپ كەلگەندە بارىنەن بۇرىن  تۇرمىسقا جايلى بولعانىنا قۋانعان. جۋىناتىن بولمە مەن دارەتحانانى جاپ-جاڭا قىشتاقتامەن قاپتادى. قازىر سول قىشتاقتا بۇرىنعىداي جارقىرامايدى.  كوپ  ۇزاماي ۇگىتىلىپ تۇسە باستار. كەمپىردىڭ دە كوزى قىشتاقتا سياقتى كۇڭگىرت تارتتى... جارقىراپ تۇرعان سول قابىرعانى  ۋاقىت  ايداق-سويداق جىرىمداپتى، سۋ بۇراندالارى تاتتانىپ تەسىلىپ كەتكەن.

  ۋاقىت ەشتەڭەنى ايامايدى. ونىڭ بۇرىنعى سۇلۋلىعى مەن جاستىعىن دا، مىزعىماس قابىرعالاردى دا.  ادامدار نەگە سونشا كارىلىكتى  مۇقيات كۇتەدى؟ وعان نەگە وزدەرىن ساقتايدى؟ كارىلىكتەن سوڭ اجال باستالادى. ول جۇرتتىڭ ءبارىن كۇتەدى، ءتىپتى وزدەرىن ولمەستەي سەزىنەتىن بالالاردى دا، ءتىپتى ءالى دۇنيەگە كەلمەگەندەردى دە كۇتەدى...


كەيۋانا ەسىكتى اشتى، ار جاعىندا  قىزى ءوز قىزىن جەردەن الىپ، جەرگە سالىپ شىجعىرىپ جاتىر ەدى:
- اجەڭ سەنى كىشكەنە كەزىڭدە باعىپ-قاقتى، ۇستىڭە شاڭ جۋىتقان جوق، ال ەندى ول قارتايعان كەزدە، سەنىڭ وعان جانىڭ اشىمايدى. بار قامقورلىق  -  ساعان، تەك قانا ساعان، مىنە ەندى اقىر سوڭىندا ەركەلىكتەن باسىمىزعا شىقتىڭ!

- نەمەنە؟ - ۆەستا بەتى قىزارىپ، اشۋلانا تاڭعالدى، - وراسان زور  قامقورلىعىڭدى كورسەم كوزىم شىقسىن!؟ ءيا، سەن ءوزىمشىلسىڭ، تەك ءوزىڭدى عانا ويلايسىڭ، ال مەن سەنىڭ ءومىرىڭ ءۇشىن ءوزىمدى قۇرباندىققا شالدىم! 

- ءماسساعان! باعىپ-قاققانىم باسىما پالە بولدى-اۋ! ۇنەمى قىزىم دەپ تىنىم تاپپادىم، جاقسىلىق جاساۋعا تىرىستىم، ال ەندى ءوزىمشىل  مەن بوپ شىقتىم، - اناسى ورامالمەن بەتىن جاپتى.
ۆەستا جۇرەگىنەن جۇلىنىپ شىققان ءسوزى ءۇشىن  ۇيالىپ قالدى: دۇرىس بولسىن-بۇرىس بولسىن، قالاي دەسەدە اناسى عوي. قاسىنا جاقىنداي بەرگەنى سول ەدى، ول ونى يتەرىپ جىبەردى.
- ەسىڭنەن مۇلدە اداستىڭ با، - اجەي ىڭىرسىپ قويا بەردى، - بالانى نەگە يتەرەسىڭ؟

- ساعان نە كەرەك، ۆەستا؟ - اناسى مەڭىرەيىپ،  كەيۋاناعا كوڭىل اۋدارماستان، ودان ارى سويلەي بەردى،  - ەكى بولمەلى پاتەر سەنىكى، ءبىز ساعان  جوعارى  ءبىلىم اپەردىك، كۇزدەن باستاپ جاقسى جەردە جۇمىسىڭ بولادى، ال سەن قايداعى ءبىر جەلوكپەگە ىلەسىپ كەتكىڭ كەلەدى. بۇنىڭ اياعى نەمەن تىنارى ءالى بەلگىسىز. سەن جاسسىڭ، ءالى ءجۇز رەت كۇيەۋگە شىعاسىڭ، ال مەنىڭ بۇل ەڭ سوڭعى مۇمكىندىگىم، تۇسىنەسىڭ بە؟ مەنىڭ جالعىز مۇمكىندىگىم!.. جاسىم بولسا ەلۋگە كەلىپ قالدى. بىرەۋ ءۇشىن ەمەس، ءوزىم ءۇشىن ءومىر سۇرەتىن ۋاقىت كەلگەن جوق پا؟!

اناسى   ەشتەڭە   تىڭدار  حالدە ەمەس، سولقىلداپ جىلاپ قويا بەردى.

- كۇيەۋگە تيگىڭ كەلسە، شۋ شىعارماي كەتە بەر، كىم سەنى ۇستاپ تۇر؟  مەستا ەكەۋىمىز سەنسىز دە تىم جاقسى ءومىر سۇرەمىز، - دەدى كەمپىر.

- سەن، كارى قاقپاس، ونى قورعاشتايسىڭ، ال ول سەنى تاستاپ كەتكىسى كەلەدى! - دەپ اناسى ايعاي سالدى دا بولمەدەن اتىپ شىقتى.

- سەندەر كۇل بولماساڭدار، بۇل بولىڭدار! اقىر اياعى ءسابي ءۇشىن دە مەن جاۋاپتىمىن! سەن مەنى اكەسىز قالدىردىڭ، ەڭ بولماسا بۇنىڭ اكەسى بولسىن!  -   ۆەستا الدەبىر جاققا جۇگىرە جونەلدى...
*    *    *
كەيۋانا سۇمدىق جالعىزدىقتى سەزىنە ءۇن-ءتۇنسىز تۇرىپ قالدى. بولمە قاپىرىق ءارى قاراڭعى ەدى، اياعى ءوز-وزىنەن  بالكونعا  الىپ  كەلدى. «ەندى قايتەيىن؟ مەن ەكەۋىڭدى دە جاقسى كورەمىن...» دەپ ول جاقتاۋعا سۇيەنە تۇرىپ، ويلاندى. كارى دەنە بەزگەك تيگەندەي دىرىلدەپ كەتتى. ول الاقانىمەن بەتىن جاپتى دا كەنەت ەمىن-ەركىن ۇشىپ بارا جاتقانىن سەزىندى...
ول باسى اۋىرمايتىنىن، جۇرەگى سىزدامايتىنىن،  جانى ەشتەڭەگە كۇيزەلمەيتىنىن تەك ەندى عانا بايقادى. كوك اسپان  قۇدىرەت نۇرىمەن جارقىراپ كەتىپتى.  «مىنە ەندى، قۇدايعا شۇكىر، كۇن اشىلدى» دەدى  جەپ-جەڭىل جەلگە اينالعان ول، بالكونعا جۇگىرە شىققان  قىزى مەن الدى-ارتىنا قاراماستان، كوشە بويلاپ بەزىپ  بارا جاتقان نەمەرە قىزىنىڭ شاشىن ۇيپالادى دا زەڭگىر كوككە ۇشىپ كەتتى. 
ورىس تىلىنەن اۋدارعان -

                    زاريا جۇمانوۆا


رەداكتورى: ارداق كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.

 
powered by IlgharCMS 3.2 www.ilghar.cn