داۆيت نەستور
اياق ىزدەرى ادامنىڭ نىق باسقان قادامىنان قالىپتاسادى. ول الاڭداۋلى كۇيدە ەدى. كولدەنەڭ سىرىق 5.18 مەتر بيىكتىككە بەكىتىلدى. بۇل ونىڭ جەكە ادامدىق ەڭ جوعارى ناتيجەسىنەن 0.07 مەتر جوعارىلادى. ميتچەل ستون سىرىققا سۇيەنىپ بيىككە سەكىرۋ بارىسىنداعى باسەكەگە تولى سىن ساعاتقا ءدوپ كەلدى.
ميتچەل ەجەلدەن بيىككە سامعاۋدى ارماندايتىن. 14 جاسىندا وسى ارمانى ءۇشىن قۇلشىنا باستادى. ميتچەلگە جاتتىقتىرۋشى بولعان اكەسى بالاسىنا كەمەلدى دە قۇنتتى جاتتىعۋ جوسپارىن ازىرلەدى. ميتچەلدىڭ تاباندىلىعىن،قاجىرىن جانە جاتتىعۋعا بولعان قاتاڭ پوزيتسياسىن اكەسى ءوز قولىمەن باۋلىپ باپتاعان.
اناسى ۇلىنىڭ جاتتىعۋىنىڭ جەڭىل بولۋىن، بالاسىنىڭ بۇرىنعىداي ەركىندىك پەن ارمان قۇشاعىندا ءجۇرۋىن تىلەدى. وسى جايىندا ميتچەل جانە كۇيەۋىمەن اڭگىمەلەستى. كۇيەۋى ونىڭ ءسوزىن شورت ءۇزدى: بالانىڭ بولاشاعى نۇرلى بولسىن دەسەڭ، جاپاعا شىداۋى كەرەك.
ميتچەل تابىسقا جەتۋ ءۇشىن قينالا جاتتىقتى. سەنىمى مەن جىگەرىنە سۇيەندى. كۇنى بۇگىنگە دەيىن ميتچەلدىڭ سىرىقپەن بيىككە سەكىرۋدە قول جەتكىزگەن تابىستارى ونىڭ قۇلشىنا جاتتىعۋىنىڭ بوداۋىنا كەلگەن.
ميتچەل جانە دە ءوزى ۇناتاتىن سىناق رەتىندە سەكىرۋگە دايىندالدى. الگىندە عانا 0.03 مەترلىك ەرەن ناتيجەمەن ءوزىنىڭ ەڭ جوعارى رەكوردىن جاڭالاعانىن، وسى رەتكى سىرىقپەن بيىككە سەكىرۋ جارىسىندا جۇلدەدەن ۇمىتكەر سوڭعى باسەكەلەس ەكى ادامنىڭ ءبىرى بولعانىن ۇمىتقان ءتارىزدى.
5.23 مەتر، 5.28 مەترلىك بيىكتەن ءساتتى سەكىرىپ وتكەندە ول قالىپتان تىس سابىرلىلىق كورسەتتى. توسەنىشكە قۇلاپ تۇسكەننەن كەيىن كورەرمەندەردىڭ مۇسىركەگەن داۋىستارىنان ارىپتەسىنىڭ سوڭعى سەكىرۋىنىڭ ساتسىزدىككە ۇشىراعانىن ءبىلدى. ول شەشۋشى ءساتتىڭ كەلىپ جەتكەنىن سەزدى. وسى بيىكتەن سەكىرىپ وتسە بولعانى باس جۇلدەگەرلىكتى الدى دەگەن ءسوز. انتەك اۋساي كەتسە باس جۇلدەدەن قۇر قالعانى. باس جۇلدەگە ىلىنبەي قالسا دا ەشتەڭە بۇلىنبەس ەدى. الايدا، ميتچەل ساتسىزدىككە جول بەرگىسى كەلمەدى.
ميتچەل كوگالدا ءبىر توڭقالاڭ اسىپ، ساۋساعىن جوعارى كوتەرىپ ءۇش رەت قۇدايعا ءمىناجات جاسادى. سىرىقتى قولىنا ۇستاپ، ءوزىنىڭ سپورت تاريحىنداعى تارتىستى باسەكەگە تولى جارىس جولىنا اياڭدادى.
وسى رەت جارىس جولىن بۇرىنعىدان بوتەن سەزىندى. كوڭىلى قوبالجىپ قالدى. كولدەنەڭ قۇرىق ونىڭ ەڭ جاقسى ناتيجەسىنەن 0.45 مەتر بيىككە كوتەرىلدى. بۇكىل مەملەكەتتىك رەكوردقا تەك 0.02 مەتر عانا جەتپەدى. ميتچەل مازاسىزدانىپ دەگبىرى كەتە باستادى. جايبىراقات بولايىن دەگەن سايىن ساسقالاقتادى. ەجەلدەن بۇنداي كۇي كەشپەگەن ەدى. اناسى ەسىنە تۇسە بەردى. قازىر وزىنە نە جەتكەن؟ بۇنىڭ جاۋابى وتە قاراپايىم. اناسى وسىندايدا تەرەڭ تىنىستا دەيتىن.
ول وسىلاي ىستەدى. قاتىپ قالعان اياعى جەڭىلدەگەندەي سەزىندى. ول سىرىقتى اياق تۇسىنا قاداپ،ەكى بىلەگىن جازىپ دەنەسىن جوعارى كوتەرە باستادى. اينالا جىم-جىرت. ول كورەمەندەردە تىنا قالعان بولدى دەپ تۇسپالدادى. كەنەت قۇلاعىنا قىزىل توبەل بۇلبۇلدىڭ سايراعان ءۇنى ەستىلدى. ونىڭ بيىككە سامعايتىن شاعى جەتتى.
ول بار كۇشىمەن جۇگىردى. جارىس جولى ءارى تانىس، ءارى بوتەن سياقتى. جەر بەتى ول ءدايىم ارمانداعان ساحاراداعى سوقپاق، جارتاس،توپىراق، التىن ءبيداي اتىزى بولىپ ەلەستەدى. تەرەڭ تىنىستاپ، ادىمىن كەرە اشىپ زىمىراپ كەلەدى. ميتچەل قىران بۇركىتشە بيىككە كوتەرىلدى.
الاڭ شەتىندە تۇرعان كورەرمەندەردىڭ ايعاي-شۋى ما، الدە جەرگە قۇلاپ تۇسكەننەن سوڭ با، ميتچەل ەسىن قايتا جيدى. ءجۇزىن جارىق تا جىلى كۇن نۇرى شارپىدى. ول تەك اناسىنىڭ كۇلىمسىرەگەن ءجۇزىن عانا ەلەستەتە الاتىن. اكەسى دە كۇلىمسىرەپ تۇرعان بولار. ءتىپتى قارقىلداپ كۇلگەن شىعار. الايدا ميتچەل اكەسىنىڭ ايەلىن قۇشاقتاپ،كوز جاسىن كولدەتكەنىنەن بەيحابار بولاتىن. « ويعا العان ماقسات جولىندا قۇلشىنا بەرۋ كەرەك» دەيتىن قاعيدادان بۇلجىمايتىن اكەسى ەندى بالا قۇساپ ايەلىنىڭ قۇشاعىنا تىعىلا جىلاپ تۇر. ايەلى كۇيەۋىنىڭ مۇنداي كوڭىلى بوساعانىن بۇرىن كورگەن ەمەس. ول ماقتانىشتىڭ،ءسۇيىنىشتىڭ كوز جاسى ەكەنىن ايەلى انىق بىلەتىن. ميتچەلدى ەل دەرەۋ قورشاپ الدى. جۇرت ونىڭ شۇعىلالى تابىسىن قۇتتىقتادى. ميتچەل 5.34 مەترلىك بيىكتەن سەكىرىپ، مەملەكەتتىك، ءتىپتى دۇنيە جۇزىلىك جاستاردىڭ جۇلدەگەرلىك جارىسىنىڭ جاڭا رەكوردتىن جاراتتى.
گۇل-بايشەشەك،سيلىق اقشا، احپارات مەديالارىنىڭ نازار اۋدارۋى ميتچەلدىڭ كەيىنگى تۇرمىسىن تۇبەگەيلى وزگەرتتى. مۇنداي ماراپات پەن قۇرمەت ونىڭ جاستاردىڭ مەملەكەتتىك جۇلدەگەرلىك جارىسىندا جاڭا دۇنيە جۇزىلىك رەكورد جاراتقانى ءۇشىن عانا ەمەس، ءوزىنىڭ ەڭ جوعارى ناتيجەسىنەن 0.24 مەتر جوعارى بيىككە سەكىرە العانى ءۇشىن عانا ەمەس، بۇدان سىرت، ميتچەل ستوننىڭ كوزى كورمەيتىن سوقىر بولعانى ءۇشىن دە بەرىلگەن ەدى.
ءتۇيىن: ميتچەل ەجەلدەن كوكىرەگىندەگى ارمان مەن سەنىم وتىن سوندىرگەن ەمەس. سوڭىندا ارىپتەستەرىن دە، ءوزىن دە جەڭە ءبىلدى. توككەن تەرى تەككە كەتكەن جوق. سوندىقتان سەنىمگە تاباندى بولعاندا عانا ارماننىڭ شىنعا اينالاتىنى كۇمانسىز اقيقات.
اۋدارعان _ قۋات جۇماش ۇلى
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.