شەتەل احپارات دانەكەرلەرىنىڭ حابارىنا نەگىزدەلگەندە، كولورادو شتاتىنىڭ بوردو قالاسىنداعى 18 جاستاعى ازامات تەحنيكالىق زەرتتەۋ جۇرگىزۋ ارقىلى قىلمىستىق ىستەردىڭ تۋىلۋىنان ساقتانباقشى بولعان.
الايدا،ول ءىرى كولەمدى قاندى قاقتىعىسقا توتەپ بەرۋگە شاراسىز بولعانىمەن، تىم بولماعاندا بالالاردىڭ وتباسىنداعى قارۋ-جاراقتى ويناۋىنان تۋىلاتىن جازاتايىم وق شىعارۋ ماسەلەسىنەن ساقتانۋعا بولادى ەكەن.
ا ق ش راديو توراپ بەكەتىنىڭ 26-تامىزداعى حابارىنا نەگىزدەلگەندە، ءۇش جىلدىڭ الدىندا بىرەۋ كولورادو شتاتىنىڭ اۋرورا قالاسىنداعى ءبىر تەاترحانادا وق شىعارىپ كوپتەگەن ادامدى جارالاعان. وسى رەتكى ايانىشتى جاعداي تەحنيكالىق تۋما تالانتى بار 15 جاستاعى كاي كلوفتىڭ مۇنداي جاعدايدىڭ تۋىلۋىنان ساقتانۋ جونىندەگى بەكىمىن كۇشەيتكەن ەكەن.
حاباردا بىلاي دەلىنگەن: كاي كلوف جانقۇرال ساتىپ العان ادامداردىڭ قايسىسىنان حاۋىپ تونەتىندىگىن تۇسپالداۋعا بولمايتىندىعىن سەزگەن. الايدا، جانقۇرالدان تۋىندايتىن توسىن تراگەديالاردان ساقتانۋعا بار كۇشىن سالماقشى بولعان. ونىڭ ايتۋىنشا، ا ق ش-تا ءار جارىم ساعاتتا ءبىر بالا مىلتىق وعىنان جازىم تابادى نەمەسە جارالانادى ەكەن.
سونىمەن كلوف يەسىنەن باسقا بالالار مەن بوتەن ادام ىستەتە المايتىن ءبىر ءتۇرلى جانقۇرال تاپقىرلاۋعا كىرىسكەن. ول بالالاردىڭ جازاتايىم جازىم بولۋىن توسۋدى ويلايدى ەكەن.
حابارعا نەگىزدەلگەندە، 16 جاسىندا كلوف جانقۇرالدىڭ سۋلياۋدان جاسالعان باستاپقى ۇلگىسىن جاساپ شىققان، بۇل جانقۇرال تەك يەسىنىڭ ساۋساق بەدەرى بولعاندا عانا وق شىعارا الادى ەكەن.
ونىڭ تاپقىرلىعى ينتەل حالىقارالىق عىلىم – تەحنيكا جانە ينجەنەريا سيلىعىنىڭ ءبىرىنشى دارەجەسىن ەنشىلەدى. ول تاعى « اقىل-پاراسات جانە تەحنيكاعا سايىس جاريالاۋ قور قوعامىنىڭ » 50 مىڭ دوللارلىق سيلىعىنا يە بولادى. ول وسى سيلىق سوما ارقىلى تەحنيكاسى جونىندە ىشكەرىلەي ىزدەنىس جاساپ كەلگەندىگىن ايتتى.
حابارعا نەگىزدەلگەندە، كلوف بيىل 18 جاسقا كەلگەن، ول وسى تەحنيكاسىن ناعىز مەتالدان جاسالعان جانقۇرالعا پايدالانباقشى ەكەن. ول ساۋساق بەدەرى ارقىلى پايدالانىلاتىن جانقۇرال مەن ادەتتەگى جانقۇرالدى بازارعا قاتار سالۋدى ويلاۋدا. ونىڭ بۇل ويى كوپتەگەن ادامنىڭ نازارىن اۋداردى.
بوردو اۋداندىق ساقشى مەكەمەسىنىڭ ساقشىسى جەفەرس: « كوپتەگەن ادامنىڭ جانقۇرالىن توسەك باسىنداعى ىشكاپقا سالىپ قوياتىندىعىن بىلەمىن، ويتكەنى ولار وزىنە قولايلى بولۋدى ويلايدى. مەنشە، بۇل تاپقىرلىق ولاردىڭ مۇنداي جامان ادەتىن تۇزەتۋىنە سەپتىگىن تيگىزەدى » دەدى.
حابارعا نەگىزدەلگەندە، ساقشى مەكەمەسىنىڭ وسى ورىنباسار باستىعى كلوفتىڭ تاپقىرلاپ شىققان العاشقى جانقۇرالىن الدىمەن پايدالانىپ كورۋدى وتىنگەن. كەلەر جىلى ماسساچۋسەتس ونەركاسىپ ينستيتۋتى وقۋ باستاۋدان بۇرىن، كلوف بۇل تۇردەگى جانقۇرالعا جالعاستى تەحنيكالىق جاقتان زەرتتەۋ جۇرگىزەدى ەكەن.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.