ا ق ش – تىڭ ايگىلى مالتاۋ سپورتشىسى پەلپس جۋىقتا وتكىزىلگەن ا ق ش مالتاۋ جۇلدەلى جارىسىندا ءتورت تۇردەگى جارىسقا قاتىناسىپ، ءۇش تۇردەن اعا جۇلدەگەر بولدى. ونىڭ ۇستىنە، ونىڭ بارلىق ناتيجەسى قازان قالاسىندا وتكىزىلگەن دۇنيە جۇزىلىك مالتاۋ جارىسىنداعى ءبىرىنشى بولعانداردىڭ ناتيجەسىنەن دە جوعارى بولدى.
پەلپس: « قازىرگى جاعدايىم وتە جاقسى، بۇل كۇندى توسقانىما كوپ ۋاقىت بولعان ەدى، وسىدان بۇرىنعى قۇلشىنىستارىمنىڭ قارىمجىسى وتەلدى» دەدى.
وسى كەزەكتى ا ق ش مالتاۋ جۇلدەلى جارىسىندا وليمپيادا سپورت جارىسىنىڭ 18 التىن مەدالىن يەلەگەن پەلپس 100 مەتر ارالىققا، 200 مەتر ارالىققا كەۋدەمەن مالتاۋ، 200 مەتر ارالىققا ارالاسپا مالتاۋ جانە 200 مەتر ارالىققا باقاشا مالتاۋ سياقتى ءتورت ءتۇرلى جارىسقا تىزىمدەلدى. 200 مەتر ارالىققا كەۋدەمەن مالتاۋ جارىسىندا پەلپس 1 مينۋت 52 سەكۋند 94 تاقىلدىق ناتيجەمەن اعا جۇلدەگەر بولدى. قازان قالاسىندا وتكىزىلگەن دۇنيە جۇزىلىك مالتاۋ جۇلدەلى جارىسىندا ۆەنگريا سپورتشىسى چەحتىڭ التىن مەدال العانداعى ناتيجەسى 1 مينۋت 53 سەكۋند 48 تاقىل بولعان. وسىدان كەيىنگى 100 مەتر ارالىققا كەۋدەمەن مالتاۋ جارىسىندا پەلپس 50 سەكۋند 45 تاقىلدىق ناتيجە جاراتىپ، قازان قالاسىندا وتكىزىلگەن دۇنيە جۇزىلىك مالتاۋ جۇلدەلى جارىسىنىڭ اعا جۇلدەگەرى، لوندون وليمپيادا سپورت جارىسىندا التىن مەدال العان لەكلوس جاراتقان 50 سەكۋند 56 تاقىلدىق ناتيجەدەن دە تەز بولدى. 200 مەتر ارالىققا ارالاس مالتاۋ جارىسىندا ول 1 مينۋت 54 سەكۋند 75 تاقىلدىق تاماشا ناتيجە جاراتتى، ال ونىڭ ساپتاسى قازان قالاسىندا وتكىزىلگەن جارىستا 1 مينۋت 55 سەكۋند 81 تاقىلدىق ناتيجەمەن اعا جۇلدەگەر بولعان ەدى. ءۇش كۇندە ءۇش التىن مەدال الىپ، پەلپس كەزىندە بەيجيڭ وليمپيادا سپورت جارىسىندا 8 التىن مەدال العانداعى كەرەمەتىن ايگىلەگەندەي بولدى. ەڭ سوڭعى كۇنگى 200 مەتر ارالىققا باقاشا مالتاۋ جارىسى پەلپستىڭ سىناق رەتىندە قاتىناسقان جارىسى بولعاندىقتان، 2 مينۋت 11 سەكۋند 30 تاقىلدىق ناتيجەمەن بەسىنشى بولدى.
30 جاسقا كەلگەن پەلپس 2012-جىلعى لوندون وليمپيادا سپورت جارىسىنان كەيىن جارىستان شەگىنەتىندىگىن جاريالاعان، ول ءتورت كەزەكتى وليمپيادا سپورت جارىسىنا قاتىناسىپ، 18 التىن مەدالدى قامتىعان جيىنى 22 مەدالعا يە بولدى. بىلتىر پەلپس مالتاۋ جارىسىنا قايتا قاتىناساتىندىعىن جاريالادى. الايدا، ونىڭ جارىس مايدانىنا قايتا ورالۋى ويلاماعان سوققىعا ۇشىرادى، ويتكەنى بىلتىر قىركۇيەكتە ول اراق ءىشىپ اۆتوكولىك جۇرگىزگەندىگى سەبەپتى ا ق ش مالتاۋ قوعامى ونىڭ 6 اي جارىسقا قاتىناسۋىنا تيىم سالدى، سوندىقتان قازاندا وتكىزىلگەن دۇنيە جۇزىلىك مالتاۋ جۇدەلى جارىسىنا قاتىناسا المادى.
جارىسقا قاتىناسۋىنا تيىم سالۋ بۇيرىعى كۇشىنەن قالعاننان كەيىن پەلپس 2016-جىلعى ريو-دە-جانە-يرو وليمپيادا سپورت جارىسىنا قاتىناسۋعا دايىندىق كورەتىندىگىن جاريالادى. پەلپس الداعى ءبىر جىلدىڭ قىزىققا تولى بولاتىندىعىن ايتتى.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.