ول كەدەي وتباسىندا دۇنيەگە كەلدى. اۋزى اسقا، ءيىنى كيىمگە جارىمادى. شاقاي الۋعا كۇيى كەلمەگەندىكتەن جالاڭاياق دوپ تەپتى. ۇزاققا جۇگىرۋگە قاتتى قىزىقتى. 11 جاسىندا وقۋدان قول ءۇزدى.
تۇرمىس تاقسىرەتىنەن كوفەحاناعا بالا داياشى بولىپ جۇمىسقا تۇردى. ءار كۇنى ءتۇن ورتاسىنا دەيىن دامىل تاپپادى. سوندا دا ۇزاققا جۇگىرۋگە ماشىقتاندى. ءار كۇنى تاڭعى ساعات 5 تە ورنىنان تۇرىپ، وكشەسى ويىلىپ قالعانشا ماشىقتانىپ ءجۇردى.
تىرلىك قاجەتى ءۇشىن فرانسيانىڭ جەڭىل اتلەتيكا جۇلدەگەرلىك جارىسىنا تىزىمدەلدى. الدىمەن 10 مىڭ مەترلىك ۇزاققا جۇگىرۋ جۇلدەگەرلىك جارىسىنا قاتىناسىپ 3 - بولدى. سوڭىنان تاعى 5000 مەترلىك جارىسقا قاتىناسۋ بەكىمىنە كەلدى. بۇل جولى 2 - ورىندى يەلەدى. تالەيىنە جاراي، ول «بيو -رات» كلۋبى جاعىنان تاڭدالىپ، لوندون وليمپياداسىنا ىرىكتەلدى. سول شاقتارى ول نەنىڭ وليمپيادا سپورت جارىسى ەكەنىنەن حابارسىز بولاتىن. وليمپيادا سپورت جارىسىنىڭ سونشاما سالتاناتتى ەكەنىن كورگەندە قاتتى تاڭىرقادى. ءوزى فرانسيالىق، وعان قوسا فرانسيا مەملەكەتىنە ۋاكىل رەتىندە جارىسقا قاتىناسقانىمەن، وزگەلەر ونى كاپەرىنە ىلمەدى. جارىس الدىندا سپورتشىلارعا ارناۋلى ماسساج جاسايتىن ماماندى شاقىرىپ ماسساج جاساتپاق بولسا دا، ماسساج جاساۋشىنىڭ تويتارىسىنا ۇشىرادى. ماسساج جاساۋشى كوفەحانا داياشىسىنان كوتەرىلگەن مۇنداي ادامدى مەنسىنبەدى.
سول كۇنى تۇستەن كەيىن ول 10 مىڭ مەترلىك شەشۋشى جارىسقا قاتىناستى. قۇبىلمالى اۋا رايىندا ارىپتەستەرىن بىرتىندەپ باسىپ وزدى. ول 4 - بولىپ جۇگىرىپ كەلەدى. ودان 3 - ورىنعا ءوتتى. كوپ وتپەي ول چەحتىڭ ايگىلى ۇزاققا جۇگىرۋ شەبەرى زاتوپيكتىڭ الدىدا قارا ءۇزىپ بارا جاتقانىن بايقادى. قايراتىن بويىنا جيىپ، بار پارمەنىمەن جۇگىرىپ، سوڭىندا ەكىنشىلىككە يە بولدى. وسىلايشا، فرانسيا ءۇشىن، ءوزى ءۇشىن تۇڭعىش رەتكى وليمپيا سپورت جارىسىنىڭ 10 مىڭ مەترلىك جارىسىندا كۇمىس مەدال الدى. جۇرت جارىس ناتيجەسىن اۋا رايى وزگەرىسىمەن بايلانىستىرىپ، باسقا سپورتشىلار سول سەبەپتى ارتتا قالىپ قويدى دەپ ەسەپتەدى. بۇل جاعداي ونى ۋايىمعا سالدى.
ونىڭ كوڭىلىنە مەدەۋ بولعانى، لوندون وليمپياداسىنان 4 جىل وتكەن سوڭ، ول جانە دە فرانسيا كومانداسىنا قابىلدانىپ، حەلسينكيدەگى 15 - كەزەكتى وليمپياداعا قاتىناستى. سول رەتكى جارىستا ول 10 مىڭ مەترلىك ۇزاققا جۇگىرۋ جارىسىنىڭ فرانسياداعى رەكوردىن جاڭالادى. 5000 مەترلىك ۇزاققا جۇگىرۋ شەشۋشى جارىسىندا فرانسياعا كۇمىس مەدال الىپ بەردى. كەيىن مەلبۋرن وليمپياداسىندا مارافون جارىسىنا ءتۇستى. ءبىر مينۋت 40 سەكۋندتا سوڭعى 400 مەتر ارالىققا جۇگىرىپ، اقىرىندا وليمپيادا چەمپيونىنا اينالدى. سودان باستاپ كوفاحانا داياشىلىعىنان قۇتىلدى.
قيلى كەشۋلەردى وتكەرىپ، قوعامنىڭ تومەنگى جىگىنەن جوعارى ساتىعا قاراي قۇلاش سەرمەگەن فرانسيانىڭ جەلاياق شاباندوزى، 10 مىڭ مەترلىك ۇزاققا جۇگىرۋدىڭ رەكوردىن ساقتاۋشى، 14 - كەزەكتى لوندون وليمپياداسىندا 10 مىڭ مەترلىك ۇزاققا جۇگىرۋ جارىسىنىڭ جۇلدەگەرى، 15 - كەزەكتى حەلسينكي وليمپياداسىندا 5000 مەتر ارالىققا جۇگىرۋ جارىسىنىڭ جۇلدەگەرى، 16-كەزەكتى مەلبۋرن وليمپياداسىندا مارافون جارىسىنىڭ باس جۇلدەگەرى قاتارلى داڭقتاردى ەنشىلەگەن گەرويىمىز-الەمگە تانىمال جەلاياق الان ميمۋ ەدى.
ءتۇيىن: ءوزىڭدى قورسىنباساڭ، وزگەلەر قومسىنبايدى. الان ميمۋدىڭ كەشىرمەسى بىزگە كولدەنەڭ كوزدىڭ قاعاجۋى مەن قاڭقۋ سوزىنە توتەپ بەرۋدىڭ ۇتىمدى ءتاسىلى بۇگەجەكتەۋدە ەمەس، كەرىسىنشە قۇلشىنا العا ۇمتىلىپ، ەلەۋلى تابىستارعا كەنەلۋدە ەكەنىن تولىق دالەلدەدى.
اۋدارعان- قۋات جۇماش ۇلى
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.