مايۆەزەر «عاسىرلىق سايىستىڭ» جەڭىسىنە قول جەتكىزدى

   دۇنيە جۇزىندەگى بوكس جان    كۇيەرلەرى اسىعا كۇتكەن مايۆەزەر مەن پاككۇياۋدىڭ «عاسىرلىق سايىسى» 2-مامىردا ا ق ش-تىڭ لاس-ۆەگاس قالاسىنداعى مەگاۋمي مەيمانحاناسىندا اياقتالدى. « سۇلۋ جىگىت » مايۆەزەر قارسىلاسىن ۇپايلىق پارىقپەن جەڭىپ، سوڭعى جەڭىسكە قول جەتكىزدى.

  وسى رەتكى جارىستان بۇرىن پاككۇياۋ الەمدىك بوكس ۇيىمىنىڭ ورتاشا سالماقتاعىلاردىڭ التىن بەلبەۋىنە، مايۆەزەر الەمدىك بوكس القالار كەڭەسى مەن الەمدىك بوكس قوعامىنىڭ ەكى التىن بەلبەۋىنە يە بولعان بولىپ،    الەمدەگى ءۇش ءىرى كاسىپتىك بوكس ۇيىمىن مويىنداتقان ەكى الىپ اراسىنداعى بەلدەسۋ بولعاندىقتان، بۇل رەتكى جارىستىڭ ىقپال كۇشى 1997-جىلعى تايسون مەن حوليفيەلدتىڭ  الەمدىك دوداسىنان دا اسىپ ءتۇستى.

  بۇل رەتكى جارىس نايزا مەن قالقاننىڭ بەلدەسۋى دەپ تە اتالدى. پاككۇياۋ الەمدەگى ەڭ مىقتى شابۋىلداۋ ونەرىنە يە بولىپ، جۇدىرىق سىلتەۋى تەز ءارى سالماقتى. مايۆەزەر قورعانىستا الدىنا جان سالمايدى، ورايىن كۇتىپ ءبىر جۇدىرىقپەن قارسىلاسىن جەر قاپتىراتىن دوكەيدىڭ ءوزى. جارىس باستالاردا پاككۇياۋ مايدانعا جايدارى شىعىپ، جۇرتشىلىقپەن كۇلىمسىرەي جۇزدەستى، ءتىپتى جاتتىقتىرۋشىسىمەن قولفوندا سۋرەتكە ءتۇسىپ ەستەلىك قالدىردى. ال مايۆەزەر تىم سالماقتىلىق بايقاتىپ، جابىرقاڭقى كورىندى.

  ەكەۋى 12 مايدان جارىستى اياقتاتىپ، سوڭعى دابىل قاعىلعانعا 10 سەكۋند قالعاندا مايۆەزەر قوس قولىن كوتەرىپ، جەڭىسكە جەتكەندىگىن جاريالاعانداي بولدى، سونىمەن سوڭعى دابىل قاعىلعاندا، ەكەۋى بىردەي قولدارىن كوتەرىپ جۇرتشىلىققا قۇرمەت ءبىلدىردى. بۇل رەتكى جارىس تىم قيان–كەسكى بولىپ، ءبىرىن-ءبىرى جىعا المادى، ەڭ سوڭىندا مايۆەزەر بولماشى ۇپايلىق پارىقپەن ( 110 عا قارسى 118 ۇپاي، 112 گە قارسى 116 ۇپاي جانە 112 گە قارسى 116 ۇپاي ) پاككۇياۋدى جەڭىپ، كاسىپتىك ومىرىندەگى 48 – مايدانعى جەڭىسىنە قول جەتكىزدى، ال پاككۇياۋ 6-رەتكى ساتسىزدىگىنە تاپ بولدى. جارىستان كەيىن ەكەۋى قۇشاقتاسىپ قوشتاستى.

  جارىستان كەيىن مايۆەزەر « جاراتۋشىما جانە دۇنيەنىڭ جەر-جەرىنەن كەلىپ جارىسىمىزدى تاماشالاعان بوكس جان كۇيەرلەرىنە العىس ايتامىن، ءبىز بار كۇشىمىزدى سالدىق، ول ( پاككۇياۋ ) كەرەمەت جاۋىنگەر، مەن وعان قۇرمەت بىلدىرەمىن» دەدى.

  پاككۇياۋ مەن مايۆەزەر بۇگىنگى تاڭدا دۇنيە جۇزىلىك بوكس سالاسىنداعى ەڭ ۇزدىك بوكسشى. « فيليپپيننىڭ مەملەكەتتىك ارداگەرى » پاككۇياۋ تاريحتاعى بىردەن - ءبىر سەگىز ۇقساماعان دارەجەدەگى دۇنيە جۇزىلىك بوكس پاتشاسى التىن بەلبەۋىن ەنشىلەگەن بوكسشى، وسىدان بۇرىن ول 57 رەت جەڭىپ، ەكى رەت تەڭ ءتۇسىپ، بەس رەت جەڭىلگەن، مۇنىڭ ىشىندە 38 رەت قارسىلاسىن ۇرىپ جىققان.    ا ق ش-تىق مايۆەزەر جەڭىستى قولدان بەرمەي كەلگەن، وسىدان بۇرىن ول 47 مايدان جارىستا 26 رەت قارسىلاسىن ۇرىپ جىققان. 2012-جىلدان 2014-جىلعا دەيىن مايۆەزەر ءۇرتىس ءۇش جىل فوربىس جۋرنالىنداعى دۇنيە جۇزىندەگى كىرىسى ەڭ جوعارى    سپورتشىلار قاتارىنان ورىن العان.

  2009-جىلى پاككۇياۋ مەن مايۆەزەر « عاسىرلىق سايىسقا » تۇسپەكشى بولعان، الايدا پايدا بولىسىندەگى      الاۋىزدىق سەبەبىنەن جۇزەگە اسىرا  الماعان. بەس جىلدان ارتىق ۋاقىت قۇلشىنىس جاساۋ ارقىلى تاريحتاعى دۇنيەنى ءدۇر سىلكىندىرگەن بوكس جارىسى جۇرتشىلىقپەن جۇزدەستى.   

  سول كۇنى 17 مىڭعا جۋىق ادام ناق مايدانعا بارىپ جارىستى تاماشالادى،   الىپ شولپاندار توبىنان تەاتر مەن مۋزيكانىڭ ءپىرى Jay-z جانە ونىڭ جۇبايى بەيونس، تور دوپ شولپانى     اگاسسيز، كينو-تەلەۆيزيا شولپانى مارك ۋاحلبەرگ، تەاتر شولپانى سەان كومبس قاتارلىلار ناق مايدانعا بارىپ جارىستى تاماشالادى.



رەداكتورى: ارداق كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.