53-كەزەكتى دۇنيە جۇزىلىك تاق-تۇق دوپ جۇلدەلى جارىسىنىڭ جەكە تۇردەگى جارىسى 3-مامىردا ەڭ سوڭعى جارىسىن وتكىزىپ، «تاق-تۇق دوپ سالاسىنىڭ ەكى ايتۋلى اعا بۋىنى» شۇي يىنشىڭ مەن لي فۋرۇڭ ءدال وسى كۇنى وزدەرىنە تيەسىلى داڭقتارىنا يە بولدى. ەرلەردىڭ جەكە ادامدىق شەشۋشى جارىسى باستالاردان بۇرىن جۇڭگو تاق-تۇق دوپ قوعامى شۇي يىنشىڭ مەن لي فۋرۇڭعا جۇڭگو تاق-تۇق دوبىنىڭ ومىرلىك تابىس سيلىعىن تاراتتى.
بۇل جۇڭگو تاق-تۇق دوپ قوعامىنىڭ ومىرلىك تابىس سيلىعىن تۇڭعىش رەت تاراتۋى.
سول كۇنگى سيلىق تاراتۋ سالتىندا جۇڭگو دەنە تاربيە باس مەكەمەسىنىڭ ورىنباسار باستىعى، جۇڭگو تاق-تۇق دوپ قوعامىنىڭ ءتوراعاسى ساي جىڭحۋا جۇڭگو تاق-تۇق دوپ سالاسىنداعى وسى ەكى ەگەيگە سيلىق تاراتتى. ساي جىڭحۋا ولاردىڭ جۇڭگو دەنە تاربيە سالاسىنا ەلەۋلى ۇلەس قوسقاندىعىن، جۇڭگو تاق-تۇق دوبىنىڭ نەشە ون جىلدان بەرگى دامۋىن ول ەكەۋىنىڭ ۇلەسىنەن بولە قاراۋعا بولمايتىندىعىن، ولار تەك جۇڭگو تاق-تۇق دوبىنىڭ ەگەيلەرى عانا ەمەس، دۇنيە ءجۇزى تاق-تۇق دوبىنىڭ ەگەيلەرى ەكەندىگىن ايتتى.
شۇي يىنشىڭ سپورتشى بولعان كەزدەردە 4 رەت جۇڭگو كومانداسىمەن بىرگە دۇنيە جۇزىلىك تاق-تۇق دوپ جارىسىنىڭ كوللەكتيۆ اعا جۇلدەگەرلىگىن ەنشىلەپ، «تاق-تۇق دوپ سالاسىنداعى ايلاكەر» دەگەن داڭقتى اتاققا يە بولدى. شۇي يىنشىڭ 20-عاسىردىڭ 70-جىلدارىندا «تاق-تۇق دوپ ديپلوماتياسىنا» قاتىناسقان بەلسەندى. بۇرىنعى جۇڭگو تاق-تۇق دوپ قوعامىنىڭ ءتوراعاسى مەن حالىقارالىق تاق-تۇق دوپ بىرلەستىگىنىڭ ومىرلىك قۇرمەتتى ءتوراعاسى بولعان ول تاق-تۇق دوپ سپورتىن جالپىلاستىرۋعا وراسان زور ۇلەستەر قوسقان.
لي فۋرۇڭ سپورتشى بولعان كەزدەرىندە ول دا 4 رەت دۇنيە جۇزىلىك تاق-تۇق دوپ جارىسىنىڭ كوللەكتيۆ اعا جۇلدەگەرلىگىن، سونداي-اق 1961-جىلدان 1965-جىلعا دەيىن ءۇرتىس 3 كەزەك دۇنيە جۇزىلىك تاق-تۇق دوپ جارىسى ەرلەر جەكە ادامدىق جارىسىنىڭ جۇلدەگەرلىگىن ەنشىلەدى.
جاتتىقتىرۋشى قىزمەتىنە قادام باسقان ول 1981-جىلى دۇنيە جۇزىلىك تاق-تۇق دوپ جارىسىندا جۇڭگو تاق-تۇق دوپ كومانداسىن باستاپ، كوللەكتيۆ جانە جەكە ءتۇردىڭ بارلىق 7 ءتۇرىنىڭ اعا جۇلدەگەرلىگىن قانجىعاسىنا بايلادى.
سيلىققا يە بولعاننان كەيىن توتەنشە تەبىرەنگەن ول كوللەكتيۆ اتىنان، سونداي-اق جۋاڭ زىدۇڭ مەن رۇڭ گوتۋان اتىنان سيلىق العالى كەلگەندىگىن ءبىلدىردى.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.