ۇسىنىس ەتىلگەن ءتىلشى سۋ گاڭۋي
جۋىقتا ساۋان اۋدانىنداعى ساقشىلار ەلەكتر سىمدارىن ۇرلاۋ، حابارلاسۋ قۇرىلعىلارىن بۇلدىرۋ دەلوسىن ءساتتى اشكەرەلەپ، 3 قىلمىس كۇماندىسىن قولعا الادى، العاشقى مەجەگە قاراعاندا، وسى دەلوعا قاتىستى ۇرلانعان ەلەكتر سىمىنىڭ قۇنى 270 مىڭ يۋاننان اسقان.
ۇعىسۋعا قاراعاندا، 2014-جىلى قازاننان بەرى ساۋان اۋدانىندا تالاي رەت حابارلاسۋ ەلەكتر سىمدارىن، جول شىراق سىمدارىن ۇرلاۋ، قيۋ دەلوسى ىركەس-تىركەس تۋىلعان.
وسى جولعى ەلەكتر سىمدارىن ۇرلاۋ، قيۋ، حابارلاسۋ قۇرىلعىلارىن ءبۇلدىرۋ جەلىلەس دەلوسى ايماق، اۋدان ەكى دارەجەلى قوعام حاۋىپسىزدىگى ورگانى باسشىلارىنىڭ نازارىن ەرەكشە اۋداردى.
دەلو تۋىلعاننان كەيىن ساۋان اۋداندىق قوعام حاۋىپسىزدىگى مەكەمەسى دەرەۋ تىرەكتى ساقشىلاردى ۇيىمداستىرىپ، ارناۋلى دەلو گرۋپپاسىن قۇرىپ، دەلونى اشكەرەلەۋ قىزمەتىن بار كۇشپەن ورىستەتتى. دەلو تۋىلعان مايدانعا بارىپ، مايداندا قالعان دۇنيە، اياق ىزدەرىن سالىستىرىپ تەكسەرۋ ارقىلى بۇل دەلونىڭ وتە شەبەرلىكپەن ىستەلگەندىگىن بايقايدى.
25-قاڭتاردا ارناۋلى دەلو گرۋپپاسىنداعى حالىق ساقشىلارىنىڭ ءاربىر ءجىپ ۇشىن جيناقتاۋ، تۇجىرىمداۋىنىڭ ارقاسىندا تەز ارادا دەلونىڭ اياق الىسىندا زور ىلگەرىلەۋشىلىكتەر بايقالىپ، وسى دەلوداعى نەگىزگى قىلمىسكەر شى xx تىڭ قىلمىسى بىرتىندەپ ايپاراداي اشىلادى.
30-قاڭتار كەشكى بەيجيڭ ۋاقىتى ساعات 22 مولشەرىندە ايماقتىق قوعام حاۋىپسىزدىگى مەكەمەسىنىڭ تەحنيكالىق بارلاۋ ءبولىمىنىڭ كومەگىندە ساۋان اۋدانىنداعى ساقشىلار وسى اۋداننىڭ سانداۋحىزى قالاشىعىنداعى ءبىر مايعا بەرىلگەن ۇيگە جاسىرىنعان وسى دەلوعا قاتىستى شى xx پەن باي xx تى قولعا الادى.
3-اقپاندا وسى دەلوعا قاتىستى جانە ءبىر قىلمىس كۇماندىسى جاڭ xx ءۇرىمجى قالاسىنىڭ ميدۇڭ رايونىنان ساۋان اۋدانىنىڭ ساقشىلارى جاعىنان قولعا الىنادى.
تەكسەرۋ ارقىلى قىلمىس كۇماندىسى شى xx پەن باي xx تىڭ گانسۋ ولكەسىنىڭ ادامى، جاڭ xx تىڭ چيڭحاي ولكەسىنىڭ ادامى بولىپ، ۇشەۋىنىڭ 2014-جىلى شىلدەدە سانجى وبلىسىنىڭ قۇتىبي اۋدانىندا ۋاقىتتىق قىزمەت ىستەۋ بارىسىندا تانىسقاندىعى، 2014-جىلى قىركۇيەكتىڭ باسىندا شى xx تىڭ ۇسىنىسىمەن ۇشەۋى ساۋان اۋدانىنا جۇمىس ىزدەپ كەلگەندىگى انىقتالادى.
ۇشەۋىنىڭ دە ەشقانداي ونەرلەرى بولماعاندىقتان، قىزمەت تابۋى وڭىنا باسپايدى. سونىمەن شى xx تىڭ ءجون سىلتەۋىندە ۇشەۋى ءتۇننىڭ جارىمىندا حابارلاسۋ قۇرىلعىلارى مەن جول شىراق سىمدارىن ۇرلاپ، مىس بىلتەسىن شىعارىپ الىپ، تومەن باعادا ساتادى.
تەرگەۋ بارىسىندا 3 قىلمىس كۇماندىسى 2014-جىلى قازاننان 2015-جىلى قاڭتارعا دەيىنگى ارالىقتا ساۋان اۋدانى، سونداي-اق ىرگەلەس بيڭتۋان 8-ديۆيزياسى سياقتى جەرلەردە 14 رەت حابارلاسۋ ەلەكتر سىمدارى مەن كوشە شىراق سىمدارىن ۇرلاعان قىلمىستارىن قاز قالپىندا ايتىپ بەرەدى.
كەزەكتە بۇل ءۇش قىلمىس كۇماندىسى قىلمىستى ىستەر بويىنشا قاماۋعا الىنىپ، قاتىستى جاۋاپكەرشىلىكتەرى قۋزاستىرىلۋدا.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.