شينجياڭ تيانشان ايەلدەر كاسىپتىك باسكەتبول كومانداسى قۇرىلدى

  ناۋرىز ايىندا WCBAدىڭ سۇرىپتاۋ جارىسىنا قاتىناسادى

    شينجياڭ تيانشان ايەلدەر كاسىپتىك باسكەتبول كومانداسى تاياۋدا رەسمي قۇرىلدى. قازىر كومانداداعى 15 مۇشە بەيجيڭدە ناۋرىز ايىندا وتەتىن WCBAدىڭ (جۇڭگو ايەلدەر باسكەتبول كوماندالارىنىڭ كاسىپتىك بىرىككەن جارىسى) سۇرىپتاۋ جارىسىنا قاتىناسۋ ءۇشىن، بەيجيڭدەگى جاتتىعۋ بازاسىندا جاتتىعۋدا.

　　«سپورتشىلاردىڭ بويىنىڭ ورتاشا   بيىكتىگى ورتا ەسەپپەن 1.85 مەتر، ورتاشا جاسى 26، كوماندامىزدىڭ     ومىرشەڭدىك كۇشى مەن كومەسكى كۇشى مول»، - دەدى شينجياڭ تيانشان ايەلدەر كاسىپتىك باسكەتبول كومانداسىنىڭ باستىعى، مەملەكەتتىك باسكەتبول كومانداسىنىڭ بۇرىنعى مۇشەسى چيۋ سى - يۋە. كومانداداعى ما زىڭيۇي مەن جاڭ شياۋني دا مەملەكەتتىك باسكەتبول كومانداسىنىڭ بۇرىنعى مۇشەلەرى. ال باسقا سپورتشىلاردىڭ باسىم كوبىنىڭ WCBA جارىسىنا قاتىناسۋ جاعىندا مول    تاجىريبەسى بار.

　　«سپورتشىلار بىلتىر 15 - جەلتوقساننان باستاپ تىزىمگە الىنعان بولاتىن، بيىل 2 - اقپاندا تىزىمگە الىنعان ەڭ سوڭعى ءبىر سپورتشىمەن كوماندا مۇشەلەرى تولىقتاندى، 40 نەشە كۇننىڭ ىشىندە وسىنداي كوماندانى قۇرىپ شىعۋ وڭايعا تۇسكەن جوق»، - دەدى جاتتىقتىرۋشى سۇن يۇڭچيان.

　　2014 - جىلى تامىزدا اۆتونوميالى رايوندىق پارتكوم شينجياڭ ايەلدەر كاسىپتىك باسكەتبول كومانداسىن قۇرۋدى ۇيعارىپ، شينجياڭ ايەلدەر كاسىپتىك باسكەتبول كلۋبىن قۇرۋعا اۆتونوميالى رايوندىق دەنە تاربيە مەكەمەسى جاۋاپتى بولدى، اۆتونوميالى رايون قارجى جاعىنان قولداۋ كورسەتتى، بىلتىر 5 -قاراشادا كلۋب ونەركاسىپ - ساۋدا اكىمشىلىك باسقارۋ، باجى، حالىق ىستەرى تاراۋلارىنا تىركەلدى؛ 30 -قاراشادا جۇڭگو باسكەتبول    قوعامىنا تىزىمدەلۋگە ءوتىنىش بەرۋ جانە بەكىتۋ جۇمىستارىن اياقتاتتى.

　　ۇعىسۋعا قاراعاندا، الدىڭعى جارىس ماۋسىمىندا WCBA دا 17 كوماندا بار ەكەن، بيىل شينجياڭ، شانشي، تيانجين كوماندالارى قوسىلىپ، 20 كومانداعا جەتكەن. WCBAدىڭ   2015 − 2016 - جىلدىق جارىس ماۋسىمىن، جارىس ءتۇزىمىن رەتتەپ 20 كوماندا الدىمەن ناۋرىز ايىندا وتكىزىلەتىن سۇرىپتاۋ جارىسىنا قاتىناسادى، الدىڭعى 12 كوماندا قاتارىنا كىرگەننەن كەيىن بارىپ، جىل سوڭىندا وتكىزىلەتىن WCBAدىڭ بىرىككەن      جارىسىنا قاتىناسۋىنا بولادى.

　　10 - اقپان تۇستەن كەيىن  بەيجيڭدەگى جاتتىعۋ بازاسىندا    باسكەتبول كومانداسىنداعىلاردىڭ جاتتىعۋ جارىسىن كورگەننەن كەيىن   اۆتونوميالى رايوندىق دەنە تاربيە مەكەمەسى پارتگرۋپپاسىنىڭ شۋجيى لي گۋاڭميڭ تىلشىگە: اۆتونوميالى رايونىمىزداعى نەگىزگى باسشىلاردىڭ كوڭىل ءبولۋى مەن قولداۋىندا، شينجياڭ تيانشان ايەلدەر كاسىپتىك باسكەتبول كومانداسى ءساتتى قۇرىلدى، وسىنداي قىسقا ۋاقىتتىڭ ىشىندە جاپا-ماشاقاتتان قورىقپايتىن، تالىقپاي تالپىناتىن قوسىننىڭ قۇرىلۋى، شىنىندا، كىسىنى اسەرلەندىرەدى، − دەدى.

　　لي گۋاڭميڭ: شينجياڭ ايەلدەر باسكەتبول كومانداسىن قايتادان قۇرىپ شىعۋ، شينجياڭ دەنە تاربيە ىستەرى دامۋىنىڭ قاجەتى عانا ەمەس، سونداي-اق دەنە تاربيەنىڭ ءدىني ۇشقارىلىققا توتەپ بەرىپ، اقاۋسىز، ءورشىل سپورت قيمىلدارىنا جەتەكشىلىك  ەتۋدىڭ جاندى امالياتى، -دەدى. ول سپورتشىلاردىڭ الداعى جارىستاردا ءوز ەرەكشەلىكتەرى مەن ورەلەرىن ايگىلەپ، مەملەكەتتىك جارىستا جاقسى وبراز سومداۋىن ءۇمىت ەتتى. شينجياڭ    ايەلدەر باسكەتبول كومانداسىنىڭ ەرلەر باسكەتبول كومانداسى سياقتى شينجياڭنىڭ جارقىن ماركاسىنا اينالاتىندىعى مۇندا تۇر.


«شينجياڭ گازەتىنەن»



رەداكتورى: ارداق كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.