2015-جىلى بەيجيڭ جەڭىل اتلەتيكا دۇنيە جۇزىلىك جۇلدەلى جارىسى 22-تامىزدان 30-تامىزعا دەيىن «قۇس ۇياسى» مەملەكەتتىك دەنە تاربيە الاڭىندا وتكىزىلمەكشى. 10-اقپاندا حالىقارالىق جەڭىل اتلەتيكا بىرلەستىگىنىڭ سايكەستىرۋ كوميتەتى ءۇشىنشى رەت بەيجيڭگە كەلىپ تەكسەرۋىن تابىسپەن اياقتاتتى. حالىقارالىق جەڭىل اتلەتيكا بىرلەستىگىنىڭ ۋاكىلدەرى ۇيىمداستىرۋ كوميتەتىنىڭ دايىندىق قىزمەتىنە رازى ەكەندىكتەرىن ءبىلدىردى ءارى بولت پەن يسنبايەۆا سىندى ەكى شولپاننىڭ بەيجيڭ دۇنيە جۇزىلىك جۇلدەلى جارىسىن جالپىلاستىرۋ ەلشىسى قوسىنىنا قوسىلاتىندىعىن ايتتى.
جارىس ىستەرىن ۇيىمداستىرۋ كوميتەتى مەن حالىقارالىق جەڭىل اتلەتيكا بىرلەستىگىنىڭ سايكەستىرۋ كوميتەتىنىڭ تەكسەرۋ ۇيىرمەسى 10-اقپاندا بەيجيڭدە بىرلەسىپ احپار جاريالاۋ ءماجىلىسىن اشىپ، وسى رەتكى تەكسەرۋدىڭ ناتيجەسىن تانىستىردى. تانىستىرۋعا قاراعاندا، ەكى جاق 8-اقپاننان 10-اقپانعا دەيىن ەكى جارىم كۇندىك ۋاقىتپەن جارىستى ۇيىمداستىرۋ، بازار اشۋ، جارىس ىستەرىن جالپىلاستىرۋ، قوناقتارعا قىزمەت وتەۋ سياقتى 12 ءىرى جارىس، 40 نەشە ۇساق جارىس قىزمەتى جونىندە ىشكەرىلەي تالقى جۇرگىزگەن.
حالىقارالىق جەڭىل اتلەتيكا بىرلەستىگىنىڭ القاسى حەلمۋد.ديگ احپار جاريالاۋ ماجىلىسىندە ۇيىمداستىرۋ كوميتەتىنىڭ قىزمەت اياق الىسىنا رازى ەكەندىگىن بىلدىرۋمەن بىرگە، بەلەتكە الدىن الا كەلىسۋ قىزمەتىنىڭ 3-اقپاندا باستالعاندىعىن، ناۋرىزدىڭ اياق شەنىندە بەلەتتى رەسمي ساتۋ كەزەڭىنە وتەتىندىگىن، وسىدان كەيىن ۇيىمداستىرۋ كوميتەتى مەن حالىقارالىق جەڭىل اتلەتيكا بىرلەستىگى ءبىر قىدىرۋ جارىستى ۇگىتتەۋ جانە جالپىلاستىرۋ قيمىلدارىن ورىستەتەتىندىگىن ايتتى.
ديگتىڭ تانىستىرۋىنشا، يامايكانىڭ «جەلاياق» سپورتشىسى بولت پەن رەسەيدىڭ سىرىقپەن بيىككە سەكىرۋ سپورتشىسى يسنبايەۆا وسى كەزەكتى جەڭىل اتلەتيكا دۇنيە جۇزىلىك جۇلدەلى جارىستىڭ جالپىلاستىرۋ ەلشىسى مىندەتىن اتقارادى ەكەن. ونىڭ ۇستىنە 3-اقپاندا جارىستىڭ باستالعانىنا 200 كۇن قالعاندىعى بايلانىسىمەن ۋاقىتتى كەرى ساناۋ باستالعان كۇنى ۇيىمداستىرۋ كوميتەتى جانە ليۋ شياڭدى قامتىعان ەل ىشىندەگى 7 سپورتشىنىڭ بەيجيڭ دۇنيە جۇزىلىك جۇلدەلى جارىسىنىڭ جالپىلاستىرۋ ەلشىسى بولعاندىعىن جاريالادى.
جارىستىڭ جالپىلاستىرۋ ەلشىسى بولعان بۇل 7 سپورتشىنىڭ ىشىندە ليۋ شياڭنان سىرت، 2012-جىلعى لوندون وليمپيادا سپورت جارىسىنداعى ەرلەردىڭ 20 كيلومەترلىك جۇردەك جارىسى التىن مەدالىنىڭ يەگەرى چىن ديڭ، الىسقا سەكىرۋ مايتالمانى لي جينجى، جۇڭگونىڭ «ءجۇز مەترگە جۇگىرۋ جەلاياعى» جاڭ پەيمىڭ، بيىككە سەكىرۋ شەبەرى ۋاڭ يۇي، وليمپيادا سپورت جارىسىندا ايەلدەردىڭ شويىن دوپ تۇرىنەن قولا مەدال العان كۇڭ ليجياۋ، سونداي-اق ايەلدەر جۇردەك جارىسىنىڭ مايتالمانى ليۋ حۇڭدار بار.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.