2014-جىلعى دەنە تاربيە سالاسىنداعى ەگەيلەرگە سيلىق تاراتۋ سالتى 1-اقپاندا بەيجيڭ ۋانشىدا ورتالىعىندا وتكىزىلدى، ەلىمىزدىڭ ۆولەيبول كومانداسى جىلدىق ەڭ ۇزدىك جاتتىقتىرۋشى، ەڭ ۇزدىك جاس سپورتشى جانە ەڭ ۇزدىك كوماندا سىندى ءۇش ءىرى سيلىقتى قانجىعاسىنا بايلادى. ينچون ازيا سپورت جارىسىندا ءتورت التىن مەدال العان نيڭ زىتاۋ مەن اۆستراليا تور دوپ جارىسىنىڭ اعا جۇلدەگەرى لي نا جەكە-جەكە ەڭ ۇزدىك ەر سپورتشى جانە ەڭ ۇزدىك ايەل سپورتشى سيلىعىنا يە بولدى.
جۇرت نازارىن اۋدارعان جىلدىق ەڭ ۇزدىك ەر سپورتشىنى سارالاۋدا مالتاۋ جارىسىنىڭ جاس ساڭلاعى نيڭ زىتاۋ لين دان مەن جاڭ جيكى قاتارلى ايگىلى سپورتشىلاردى باسىپ وزىپ « التىن ادام » سيلىعىن ەنشىلەدى. ينچون ازيا سپورت جارىسىندا نيڭ زىتاۋ ەرلەردىڭ 50 مەتر ارالىققا ەركىن مالتاۋ، 100 مەتر ارالىققا ەركىن مالتاۋ، 4×100 مەتر ارالىققا كۇش جالعاپ ەركىن مالتاۋ جانە 4× 100 مەتر ارالىققا كۇش جالعاپ ارالاسپا مالتاۋ جارىستارىنان 4 التىن مەدال الۋمەن بىرگە، 100 مەتر ارالىققا ەركىن مالتاۋ جارىسىن 48 سەكۋندتا تامامداعان تۇڭعىش ازيالىققا اينالدى.
نيڭ زىتاۋ كىشى پەيىلدىكپەن: « ەڭ ۇزدىك ەر سپورتشى سيلىعىنا يە بولامىن دەپ ويلاماعان ەكەنمىن، الايدا، الداعى جەردە مالتاۋ كاسىبىنەن ءتىپتى دە جاقسى ناتيجە جاراتىپ، ناعىز جەڭىمپازعا اينالۋدى ارماندايمىن » دەدى.
نيڭ زىتاۋ ورتالىق تەلەۆيزيانىڭ ۇسىنىسىمەن شاعان مەرەكەسىنە ارنالعان كونسەرتكە شىعاتىندىعىن، الايدا، قانداي ءنومىر ورىندايتىندىعىن قازىرشە قۇپيا ۇستاماقشى ەكەندىگىن ايتتى.
لي نا ەڭ ۇزدىك ايەل سپورتشى سيلىعىنا يە بولۋدان تىس، باعالاۋ كوميتەتىنىڭ زور سيلىعىنا دا يە بولدى. بىلتىرعى اۆستراليا تور دوپ جارىسىنىڭ شەشۋشى جارىسىندا لي نا ەرەكشە باسىمدىلىقپەن قارسىلاسىن جەڭىپ اعا جۇلدەگەر بولىپ، كاسىپتىك ومىرىندە ەكىنشى رەت ءتۇرلى دارەجەدەگى جارىستاردىڭ اعا جۇلدەگەرلىگىن ەنشىلەدى. وسىدان كەيىن لي نا تىزەسى جارالانعاندىقتان جارىس مايدانىنان شەگىنەتىندىگىن جاريالادى.
بيىل اۆستراليا تور دوپ جارىسى مەزگىلىندە لي نا ءوزىنىڭ جۇكتى بولعاندىعىن ايتتى. بالانىڭ بولاشاقتاعى كاسىپ تاڭداۋى جونىندە ونى تور دوپ ويناۋعا زورلامايتىندىعىن، الايدا، سپورتپەن شۇعىلدانۋعا ۇسىنىس ەتەتىندىگىن ءبىلدىردى.
جۇڭگو ايەلدەر ۆولەيبول كومانداسىنىڭ تابىسى دا ايتارلىقتاي بولدى، لاڭ پيڭ لي يان مەن كارلوستى باسىپ وزىپ جىلدىق ەڭ ۇزدىك جاتتىقتىرۋشى سيلىعىنا يە بولسا، يۋان شينيۋە جىلدىق ەڭ تاڭداۋلى جاس سپورتشى سيلىعىنا يە بولدى، جىلدىق ەڭ ۇزدىك كوماندا سيلىعى دا جۇڭگو ايەلدەر ۆولەيبول كومانداسىنىڭ قانجىعاسىنا بايلاندى. 2014-جىلى لاڭ پيڭ جۇڭگو ايەلدەر ۆولەيبول كومانداسىنا جەتەكشىلىك ەتىپ، قولدان كەتكەنىنە 16 جىلدىڭ ءجۇزى بولعان دۇنيە جۇزىلىك جۇلدەلى جارىسىنىڭ جۇلدەگەرلىگىن قايتالاي ەنشىلەدى.
جاڭ حۇڭ سول كۇنى كەشكى سيلىق تاراتۋ سالتىندا جۇرت نازارىن اۋدارعان تاعى ءبىر شولپانعا اينالدى. «جىلدام سىرعاناۋدىڭ ايەل شولپانى» بولعان ول جىلدىق ەڭ ۇزدىك ايەل سپورتشى جانە ەڭ ۇزدىك تابىس سيلىعىنا كورسەتىلگەن بولىپ، ەڭ سوڭىندا جىلدىق ەڭ ۇزدىك تابىس سيلىعىن قانجىعاسىنا بايلادى.
سوچي قىسقى وليمپيادا سپورت جارىسىندا جاڭ حۇڭ ايەلدەردىڭ 1000 مەتر ارالىققا جىلدام سىرعاناۋدىڭ التىن مەدالىن ەنشىلەدى، بۇل ەلىمىزدىڭ قىسقى وليمپيادا سپورت جارىسىنا قاتىناسقاننان بەرگى جىلدام سىرعاناۋ تۇرىنەن ەنشىلەگەن تۇڭعىش التىن مەدالى ەسەپتەلەدى.
باسقا سيلىق تۇرىنەن ينچون ازيا سپورت جارىسىندا ەرلەردىڭ 4×100 مەتر ارالىققا كۇش جالعاپ جۇگىرۋ جارىسىنىڭ اعا جۇلدەگەرلىگىن ەنشىلەگەن ءارى ازيا رەكوردىن جاڭالاعان جاڭ پەيمىڭ، سۋ بيڭتيان، شيە جىنيە، چىن شى-ۋي قاتارلىلار جىلدىق ەڭ ۇزدىك قۇراما سيلىعىن ەنشىلەدى؛ ايەلدەر دوڭگەلەكتى ورىندىقتى باسكەتبول كومانداسى جىلدىق ەڭ ۇزدىك مۇگەدەكتەر دەنە تاربيە رۋحى سيلىعىن ەنشىلەسە، ايەلدەردىڭ دوڭگەلەكتى ورىندىق باسكەتبول كومانداسى جىلدىق ەڭ تاڭداۋلى مۇگەدەكتەر سپورت رۋى سيلىعىن يەلەدى. جىلدىق ەڭ ۇزدىك وليمپيادا سپورت جارىسى تۇرىنە جاتپايتىن سپورتشى سيلىعىن دۇنيە جۇزىندەگى جەتى قۇرلىقتىڭ مارافون جارىسىن ءساتتى اياقتاتقان تۇڭعىش سپورتشى چىن پىنبين قانجىعاسىنا بايلادى؛ نەشە ون جىلدى ءبىر كۇنگىدەي وتكىزىپ، ميى سالدانعان اۋرۋشاڭ بالالاردى ەرەكشە وليمپيادا سپورت جارىسىنا قاتىناسۋعا تاربيەلەگەن داي جيانرۇڭ جىلدىق اتسىز قايراتكەر دەنە تاربيە رۋحى سيلىعىن ەنشىلەدى.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.