ەەڭ جاڭا مازمۇندار
”جاڭا داۋىردە ەكپىندەي ىلگەرىلەۋ“ نەگىزگى تاقىرىپتىق تابىستار كورمەسىنىڭ شينجياڭ كورمە بولىگى تارتىمدىلىعىمەن كوزگە ءتۇستى
«تاعدىرلاس بولىپ، داڭعىل جولمەن ىلگەرىلەۋ − شي جينپيڭنىڭ ديپلوماتيا يدەياسى ادامزات دامۋىنىڭ، العا باسۋىنىڭ اعىمىن ىلگەرىلەتتى»
بۇقارانىڭ ءىسىن قاشاندا كوكەيىندە ساقتادى
ايماعىمىزدا 610 مىڭ مۋ جەرگە دۇمبە ءبيداي سىڭىرىلە باستادى
ءۇمىت اتىزىنان مول ءونىم جىرى شىعاندادى
تىكە تاراتۋ بولمەسىنەن”ءىرى ەلدىڭ استىق قامباسىن“ تاماشالادى
شاعانتوعاي: ماقسارىنى جىنتىكتەي مانەرلەۋگە جاڭا كۇش قوسىلدى
2022-جىلى 9-ايدىڭ 30- كۇنى 218-سان
قايراتتانا العا ۇمتىلىپ، ەرلىكپەن العا باسىپ، ىنتىماقتاسا كۇرەس جۇرگىزىپ، جۇڭگوشا سوتسياليزمنىڭ تىڭ جەڭىسىنە قول جەتكىزۋ كەرە
پارتيانىڭ بەكىمىن، حالىقتىڭ رايىن ۇيىستىرىپ، گۇلدەنۋ ۇلى ءىسىن ىلگەرىلەتتى
رەفورما شارالارىنىڭ تياناقتانىپ، ونىمدىلىك كورسەتۋىن جەدەل ىلگەرىلەتىپ، ەكونوميكانىڭ، قوعامنىڭ جوعارى ساپالى دامۋىن پارمەندى قولداۋ، قامتاماسىز ەتۋ كەرەك
زەيىن - زەردەنى، كۇش - قۋاتتى ۇيىستىرىپ، بورىشتى ارقالاپ، قايراتتانا العا ۇمتىلىپ، جاڭا تاراۋ جازايىق
قايراتتانا العا ۇمتىلىپ، ەرلىكپەن العا باسىپ، ىنتىماقتاسا كۇرەس جۇرگىزىپ، جۇڭگوشا سوتسياليزمنىڭ تىڭ جەڭىسىنە قول جەتكىزۋ كەرەك
تاريحتى اينا ەتىپ، وتكەندى باعامداپ، بولاشاقتى بولجاپ، گۇلدەنۋ جولىندا تاباندىلىقپەن العا باسۋ كەرەك
ىندەتكە توسقاۋىل قويۋ، ەكونوميكانى ورنىقتىرۋ، دامۋ حاۋىپسىز بولۋ ماڭىزدى تالابىن جاپپاي تياناقتاندىرىپ، پارتيا 20 - قۇرىلتايىنىڭ جەڭىسپەن اشىلۋىنا حاۋىپسىز، ورنىقتى ساياسي، قوعامدىق ورتا جاراتۋ كەرەك
اۆتونوميالى رايوننىڭ وقۋ - اعارتۋدى جوعارى ساپامەن دامىتۋ جينالىسى اشىلدى
بارشا جۇڭگولىقتى تۇگەل اناعۇرلىم جاقسى تۇرمىسقا كەنەلتتى
شينجياڭدى سىرتقا ەسىك اشۋدىڭ الدىڭعى شەبى ەتىپ قۇرىپ شىعامىز
جۇڭگو كوممۋنيستىك پارتياسىنىڭ مەملەكەتتىك 20 - قۇرىلتايىنا قاتىناساتىن ۋاكىلدەر تۇگەل سايلانىپ شىقتى
ۋاكىلدىك بورىشتى ادالدىقپەن اتقارىپ، ۋاكىلدىك رولدى تولىق ساۋلەلەندىرەيىك
مەملەكەتتىك حالىق قۇرىلتايى تۇراقتى كوميتەتىنىڭ زاڭنىڭ اتقارىلۋىن تەكسەرۋ گرۋپپاسى رايونىمىزدا زاڭنىڭ اتقارىلۋىن تەكسەردى
2022-جىلى 9-ايدىڭ 29- كۇنى 217-سان
2022-جىلى 9-ايدىڭ 28- كۇنى 216-سان
اۆتونوميالى رايوندىق پارتكوم تۇراقتى كوميتەتى كەڭەيتىلگەن ءماجىلىس اشتى كەزەكتەگى ىندەتتەن ساقتانۋ - تىزگىندەۋ قىزمەتىن ارناۋلى تاقىرىپتا اقىلداستى، ورنالاستىرۋ جاسادى
اۆتونوميالى رايوندىق ساۋدا - ونەركاسىپشىلەر بىرلەستىگىنىڭ (باس ساۋدا قوعامى) 12 - قۇرىلتايى وتكىزىلدى
شينجياڭ سۋ يگىلىگىن دامىتۋعا قارجى قوسۋ (توبى) شەكتى سەرىكتەستىگى قۇرىلدى
2022-جىلى 9-ايدىڭ 27- كۇنى 215-سان
شاۋەشەك قالاسىندا تۇڭعىش قارتتارعا قامقورلىق جاساۋ جاعىنان قوعامدىق قىزمەت وتەۋ ورتالىعى قۇرىلدى
ساۋانداعى ساقشىلار مەن حالىق قارا دەگەلەكتى قۇتقاردى
شاۋەشەك كەدەنى دالمە -ءدال شارا قولدانىپ، اۋىل شارۋاشىلىق قوسىمشا ونىمدەرىن يمپورت -ەكسپورت ەتۋدىڭ”جەدەل ارناسىن“ اشتى

قاراڭعىلىق

جولدانعان ۋاقىتى : 2015/2/2 10:46:14

(اڭگىمە)

ا.پ.چەحوۆ   (رەسەي)


  ۇستىندەگى تونى قىرىق جاماۋ، اياعىنداعى بايپاعى قولپ-قولپ ەتىپ، قارا سانىن قاجاعان تىعىرشىقتاي ۇرپەك سارى جىگىت زەمستۆو دوكتور قابىلداۋىن اياقتاپ، اۋرۋحانادان ۇيىنە قاراي بەتتەي بەرگەندە، ونىڭ جانىنا جاسقانا باسىپ جاقىندادى.

  -قۇزىرىڭىزعا قۇلدىق، سىزگە كەپ ەدىم،-دەدى ول.

  -ءيا، نە كەرەك؟

  جىگىت تايقى تاناۋىن الاقانىمەن جوعارى قاراي جاپىرا ءبىر ءسۇرتىپ، اسپانعا قاراپ الدى دا سونان سوڭ بارىپ جاۋاپقا   كوشتى:

  -ءسىزدىڭ قۇزىرىڭىزعا كەپ... ءوزىڭنىڭ قارماعىڭدا،   ارەستانتتار پالاتاسىندا، مارتەبەلى تاقسىر، مەنىڭ اعام ۆاسكا، ياعني ۆارۆريندىك ۇستا جاتىر ەدى...

  -ال، جاتسا قايتەمىز؟

  -مەن، ياعني ايتقاندا، ۆاسكانىڭ ءىنىسى بولامىن... ءبىر  اكەدەن ەكۋىمىز - ۆاسكا، ونان سوڭ مەن - كيريلا. بىزدەن باسقا ءۇش قىز بار، ال ۆاسكا بولسا ۇيلەنگەن، كىشكەنتاي بوپە دە سۇيگەن. جۇرت دەگەن قۇمىرىسقاداي قاپتاپ ءجۇر، ءبىراق، جۇمىس ىستەيتىن ادام جوق... ۇستاحانادا، نانساڭىز مىنە، ەكى جىلدان بەرى وت ءبىر جىلت ەتكەن جوق. ءوزىم بولسام شىت فابريكاسىندامىن. ۇستالىقتىڭ ءيىسى مۇرنىما بارمايدى. ال اكەي الدەقاشان جۇمىستان قالدى ەمەس پە؟ جۇمىس ىستەۋ بىلاي تۇرسىن، تاماعىن دا جوندەپ ىشە المايدى، قاسىعى اۋزىنان اداسىپ جۇرگەنى سول.

  -سوندا ماعان نە عىل   دەيسىڭ؟

  -ءبىر قايىرىمدىلىق جاساپ ۆاسكانى بوساتىپ بەر.

  دوكتور كيريلاعا اڭىرايىپ  ءبىراز قاراپ تۇردى دا ءلام دەمەستەن ىلگەرى قاراي جۇرە بەردى. جىگىت ونىڭ الدىنا جۇگىرىپ شىعىپ اياعىنا قۇلاي كەتتى.

  -دوكتور، قۇتقارۋشى مىرزا!- دەپ ول كوزى جىپىلىقتاپ، الاقانىمەن تاناۋىن تاعى ءبىر تاپتاي ءسۇرتىپ، جالبارىنۋعا كوشتى،- قۇدايدىڭ راقىمى جاۋسىن، ۆاسكانى ۇيگە قايتارشى! ءومىر بويى تاڭىردەن تىلەۋىڭدى تىلەپ وتەيىن! قۇزىرىڭا باس ۇرايىن، جىبەرشى اعامدى! ءبارىنىڭ اشتان قىرىلاتىن ءتۇرى بار. شەشەم كۇنى-ءتۇنى جىلاۋدا، ۆاسكانىڭ قاتىنىنىڭ كوزىنەن جاس ەمەس، قان تامىپ ول وتىر... قاراڭ قالدىق تۋرا! جارىق دۇنيەدەن ءتۇڭىلىپ كەتكىڭ كەلەدى! قايىرىمدى مىرزا، جاقسىدان شاپاعات دەگەن، بوساتا كورشى ونى.
 
  -سەنىڭ ءوزىڭ اقىماقپىسىڭ الدە جىندىمىسىڭ؟-دەدى دوكتور وعان اشۋلانىپ،-مەن ونى قايتىپ بوساتپاقپىن؟ ول قاماۋداعى ادام عوي!

  كيريلا جىلاپ جىبەردى.

  -جىبەرشى ونى!

  -ءتفۋ، كەڭكەلەس! مەنىڭ قانداي قاقىم بار؟ مەن تۇرمە قىزمەتكەرى ەمەسپىن عوي. ونى اۋرۋحاناعا اكەلسە، ەمدە دەپ اكەلدى، مەن ەمدەپ جاتىرمىن، سەنى تۇرمەگە جابۋ قالاي قولىمنان كەلمەسە، ونى بوساتۋ دا سولاي قولىمنان كەلمەيدى.

  -ونى تەكتەن-تەككە قاماپ وتىر. سوتى بولام دەگەنشە، بىلەسىڭ بە، ءبىر جىل تەرگەۋدە جاتتى، ەندى كەپ قاراساق، نەگە جاتقانىن وزىمىزدە بىلمەيدى   ەكەنبىز. ەگەر كىسى ولتىرسە نەمەسە جىلقى ۇرلاسا ءبىر ءسارى عوي، جازىقسىزدان-جازىقسىز كۇيىپ بارادى.

  -سولاي، سولاي شىعار، ءبىراق مەنىڭ بۇل ارادا قاتىسىم قانشا؟

  -ادامدى نە ءۇشىن قاماعاندارىن وزدەرى دە بىلمەيدى. ول ءىشىپ العان بولاتىن، قۇرمەتتى مىرزا، ەس-ءتۇسى جوق ماس بوپ كەپ اكەمدى قۇلاق شەكەدەن قۇنجيتقانىن، ءوزى شەكەسىن جارىپ العانىن بىلمەيدى، ال   ءبىزدىڭ تاعى ءبىر-ەكى جىگىت كەپ، الدەرىنە قاراماي، قاراساڭىزشى، تۇرىك تەمەكىسىنە قۇمارتا قاپتى، سول ەكەۋى ونىڭ باسىن اينالدىرىپ تۇندە ارميان ايەلدىڭ دۇكەنىنەن تەمەكى ۇرلاۋعا الىپ كەتەدى. ول اقىماق ماستىقپەن كونە كەتكەن. ولار كەلەدى دە الگىنى، قالاي ەدى، ءيا، قۇلىپتى سىندىرادى دا ال كەپ ويراندايدى عوي. ءبارىن اۋدار-ساۋدار عىپ، تەرەزەنى قيراتادى، ۇندى شاشادى.

نەسىن ايتاسىڭ، ماستىڭ اتى ماس. سو كەزدە ۆريادنيك تە كەپ قالادى... ۇشەۋىن جەلكەلەپ وتىرىپ تەرگەۋشىگە جەتكىزەدى عوي. ءبىر جىل قاماۋدا ۇستاپ-ۇستاپ كەلدى دە وسىدان ءبىر جەتى بۇرىن قالادا سوت بولدى. مىلتىعىن كەزەپ جەلكەسىندە سولدات تۇرادى ەكەن... حالىق تا قارا قۇرىم. ولاردىڭ ىشىندە قىلمىسى ەڭ ازى ۆاسكا ەدى عوي. ءبىراق، سوت مىرزالار بالەنىڭ ءبارىن باستاۋشى سول دەپ تاپتى. انا ەكەۋىن اباقتىعا جاۋىپ، ۆاسكانى ءۇش جىلعا ارەستانتتار روتاسىنا جىبەردى. سوندا نە ءۇشىن؟ قۇدايشىلىعىن ءوزىڭ ايتشى!

  -بۇل اراعا دا مەنىڭ قاتىسىم جوق. باستىقتارعا بار.

  -مەن ولاردا دا بولىپ شىقتىم. سوتقا دا بارعام، ارىز بەرەيىن دەپ ەدىم، ارىزىمدى العان دا جوق اۋەلى. سودان ستانوۆويعا، ودان ءوتىپ تەرگەۋشىگە باردىم، ءبارىنىڭ ايتاتىنى: «وندا مەنىڭ ءىسىم جوق» دەگەن ءبىر-اق ءسوز. سوندا كىمنىڭ ءىسى؟ بۇل اۋرۋحانادا سەنەن ۇلكەن ەشكىم جوق. نە ىستەيمىن دەسەڭ، قۇرمەتتى تاقسىر، سونى ورىنداي الاسىڭ.

  -اقىماق!-دەدى دوكتور كۇرسىنىپ،-سوت ۇكىم شىعاردى ەكەن، وعان گۋبەرناتوردىڭ دا، ءتىپتى مينيسترىڭ دە تۇك ىستەي المايدى، بۇ كەپ قاي-قايداعى ستانوۆويدى ايتادى عوي ماعان بارىپ، بوسقا اۋرە بوپ ءجۇرسىڭ!

  -ال، سوتتاعان كىم سوندا؟

  -زاسەداتەل مىرزالار.

  -قايداعى مىرزالار! ءوزىمىزدىڭ-اق مۇجىقتار ەدى عوي. اندرەي گۋريەۆ بولعان، الەشكا حۇك بولعان.

  -ءاي، سەنىمەن بوسقا باس قاتىرىپ تۇراتىن جايىم جوق...

  دوكتور قولىن ءبىر سىلتەپ ەسىككە قولىن سوزدى. كيريلا  ونىڭ سوڭىنان ىلەسپەك بوپ ورنىنان قوزعالا بەرىپ ەدى. ەسىكتىڭ سارت ەتە قالعانىن كورىپ مەلشيىپ تۇرىپ قالدى. قۇلاقشىنىن قولىنا ۇستاعان بويى ول اۋرۋحانا اۋلاسىندا ون مينۋتتاي قيمىلسىز تۇردى دا دوكتوردىڭ پاتىرىنە قاراپ تەرەڭ كۇرسىندى، ءسويتتى دە جەلكەسىن اسىقپاي ءبىر قاسىپ الىپ، قاقپاعا قاراي جىلجىدى.

  -ەندى كىمگە بارسام ەكەن؟-دەدى ول جولعا تۇسكەن سوڭ وزىنە-ءوزى كۇبىرلەپ،-بىرەۋى، بۇل مەنىڭ ءىسىم ەمەس دەيدى، ەكىنشىسى، مۇندا مەنىڭ شارۋام جوق دەيدى. سوندا بۇل كىمنىڭ شارۋاسى؟ استە، بىرەۋىنىڭ شەكەسىن مايلاماساڭ ءىس بىتپەس-اۋ. دوكتور سويلەپ تۇرعاندا ەكى كوزىن جۇدىرىعىمنان ءبىر المادى عوي، سالىپ الىپ سايدان ءبىر-اق شىعارار ما ەكەن دەپ قورىقتى بىلەم. ال، بالەم، كوردە تۇر، گۋبەرناتوردىڭ تۋرا وزىنەن شىقپاسا، نە عىل دەگەن ەكەنسىڭ.

  ول اياقتارىن ارەڭ دەگەندە ءىلبي باسىپ، قاجەتى بولماسا دا جان-جاعىنا اۋىق-اۋىق قاراپ قويىپ، جولمەن ىلگەرى جىلجي بەردى، شاماسى، قايدا بارۋ كەرەكتىگىن ويلاپ كەلە جاتسا كەرەك. قارسى الدىندا جارتى شاقىرىمداي جەردەگى توبەدە وسىدان ازعانا  بۇرىن اعاسىن سوتتاعان دەرەۆينالىق شاعىن قالاشىق شاشىراي كورىنىپ تۇر. وڭ جاعىندا بۇرىش-بۇرىشىنا قاراۋىل بۋدكاسى قويىلعان قىزىل شاتىرلى اباقتى كوزگە ۇرادى. ال سول جاعىن قىراۋ كومگەن قالالىق توعاي قورشاپ اپتى. ماڭاي جىم-جىرت، تەك الدىڭعى جاقتاعى كەۋدەسىنە نىمشا، باسىنا ەلدەن ەرەك ۇلكەن كارتۋز كيگەن شالدىڭ جەتەلەگەنى مەن ايداپ بارا جاتقان سيىرىنا الدەنە دەپ ايعايلاعانى عانا ەستىلەدى.

  -حال جاقسى ما، اتاي،-دەدى كيريلا ونىمەن قاتارلاسا بەرىپ.

  -جاقسى، جاقسى...

  -ساتقالى ايداپ باراسىڭ با؟

  -جوق، ەرىگىپ...-شال سامارقاۋ جاۋاپ بەردى.

  -ماقاۋسىڭ با، نەمەنە، ءوزىڭ ازەر ءتىل قاتاسىڭ عوي؟

  ءسوز تيەگى اعىتىلدى. كيريلا اۋرۋحاناعا بارعانىن، دوكتورمەن سويلەسكەنىن ايتىپ بەردى.

  -ونىڭ راسى راس، دوكتوردىڭ بۇل ىسكە قاتىسى جوق،-دەدى شال ەكەۋى قالاعا ەنە بەرگەندە،- ول قانشا قۇزىرلى بولسا دا تەك ءار ءتۇرلى امالىمەن ادامدارعا ەم-دوم جاساۋدى عانا وقىعان، ال ساعان پالەندەي اقىل-كەڭەس بەرۋگە نەمەسە ايتالىق، پراتوكول تولتىرۋعا كەلگەندە، جوق، ونىڭ شاماسى جەتپەيدى. ونىڭ ءوز الدىنا باستىقتارى بار. ءبىتىرۋشى سوت پەن ستانوۆويدا بولىپ كەپسىڭ. سەنىڭ ىسىڭدە بۇلاردىڭ ءوزى دارمەنسىز.

  -سوندا قايدا بارۋ كەرەك؟

  -سەندەردىڭ كرەستياندىق ماسەلەلەرىڭە باس-كوز بولسىن دەپ ارنايى مۇشە ەتىپ قويعان ەڭ ءداۋ بار. سوعان جولىق. سينەوكوۆ دەگەن مىرزا.

  -زولوتوۆوداعى ما؟

  -ءيا، زولوتوۆوداعى. ەڭ داۋلەرىڭ سول. ماسەلە سەندەردىڭ ىستەرىڭ جايلى بولعاندا، وعان يسپراۆنيگىڭ دە قارسى كەلە   المايدى.

  -ە، جەردىڭ تۇبىنە باراسىڭ دەسەيشى!... ون بەس شاقىرىمنان كوپ بولماسا، از بولماس، ءسىرا.

  -قاجەت بولسا ءجۇز شاقىرىمعا دا جۇگىرىپ كەتەرسىڭ.

  -ول راس قوي...سوندا، ءوتىنىش بەرەم بە، قايتەم؟

  -بارعاسىن بىلەرسىڭ. ءوتىنىش بەرگىڭ كەلسە، پيسار لىپ ەتكىزىپ جازىپ بەرە قويادى. تۇراقتى وكىلدەرىنىڭ جازىپ وتىراتىن ارنايى ادامى بار.

  شالمەن ايرىلىسقاننان كەيىن كيريلا الاڭ ورتاسىندا ويلانىپ  ءبىرشاما ءۇنسىز تۇردى دا قالادان شىعىپ ءجۇرىپ كەتتى. نە بولسا دا زولوتوۆوعا بارىپ قايتۋعا بەل بايلادى.

  ارادا بەس كۇن وتكەندە، اۋرۋحانادان ۇيىنە قايتىپ كەلە جاتقان دوكتور ءوزىنىڭ اۋلاسىندا تۇرعان كيريلانى تاعى كوردى. بۇل جولى جىگىت جالعىز ءوزى ەمەس، جانىنا باسى قالتاڭداعان، ەكى ەرنى تىنىمسىز جىبىرلاپ تۇراتىن، ءوڭى بوپ-بوز تىرتيعان   ارىق شالدى ەرتىپ اپتى.

  -قۇرمەتتى تاقسىر، سەنىڭ الدىڭا تاعى كەلىپ تۇرمىن،-دەپ باستادى كيريلا،-مىنا اكەمدى دە ەرتە كەلدىم، راقىم جاساپ ۆاسكانى بوساتىپ بەر! تۇراقتى وكىلىمىز سويلەسپەي دە قويدى. «جوعال ارمەن!» دەدى. بار ايتقانى وسى.

  -قۇزىرىڭىزعا قۇلدىق!-دەدى شال كومەيىنەن ىسىلداي سويلەپ، ءدىر-ءدىر ەتكەن قولىن كوتەرىپ،-راقىم ەتە كورىڭىز! ءسىڭىرى شىققان كەدەي ادامدار ەدىك، قايىرىمىڭىزدى قايتارا الار جايىمىز دا جوق، ءبىراق جاقسىلىعىڭىزدى اتاۋسىز قالدىرماسپىن. كيريۋشكا نەمەسە ۆاسكا جانىن سالىپ جالدانار، بوساتساڭىز ايانباس.

  -ايانبايمىز!-دەدى كيريلا انت بەرىپ تۇرعانداي قولىن  جوعارى كوتەرىپ،-تەك بوساتا گور! ۇيدەگىلەردىڭ اشتان ولەتىن ءتۇرى بار، ەڭىرەگەندە ەتەكتەرى جاسقا تولىپ وتىر.

  جانارى جىلت ەتىپ جىگىت اكەسىنە قارادى دا ونىڭ جەڭىنەن ءتۇرتىپ قالدى. سول-اق ەكەن، ەكەۋى اپىر-توپىر دوكتوردىڭ  اياعىن قۇشىپ، قاتارلاسا قۇلاي كەتتى. دوكتور قولىن ءبىر سىلتەدى دە ارتىنا دا قاراماستان تەز-تەز  باسىپ  ەسىككە  قاراي  بەتتەدى.

دايىنداعان-ابزالبەك ءمادىبىتوۆ




رەداكتورى: ارداق كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.


 
powered by IlgharCMS 3.2 www.ilghar.cn