ەەڭ جاڭا مازمۇندار
”جاڭا داۋىردە ەكپىندەي ىلگەرىلەۋ“ نەگىزگى تاقىرىپتىق تابىستار كورمەسىنىڭ شينجياڭ كورمە بولىگى تارتىمدىلىعىمەن كوزگە ءتۇستى
«تاعدىرلاس بولىپ، داڭعىل جولمەن ىلگەرىلەۋ − شي جينپيڭنىڭ ديپلوماتيا يدەياسى ادامزات دامۋىنىڭ، العا باسۋىنىڭ اعىمىن ىلگەرىلەتتى»
بۇقارانىڭ ءىسىن قاشاندا كوكەيىندە ساقتادى
ايماعىمىزدا 610 مىڭ مۋ جەرگە دۇمبە ءبيداي سىڭىرىلە باستادى
ءۇمىت اتىزىنان مول ءونىم جىرى شىعاندادى
تىكە تاراتۋ بولمەسىنەن”ءىرى ەلدىڭ استىق قامباسىن“ تاماشالادى
شاعانتوعاي: ماقسارىنى جىنتىكتەي مانەرلەۋگە جاڭا كۇش قوسىلدى
2022-جىلى 9-ايدىڭ 30- كۇنى 218-سان
قايراتتانا العا ۇمتىلىپ، ەرلىكپەن العا باسىپ، ىنتىماقتاسا كۇرەس جۇرگىزىپ، جۇڭگوشا سوتسياليزمنىڭ تىڭ جەڭىسىنە قول جەتكىزۋ كەرە
پارتيانىڭ بەكىمىن، حالىقتىڭ رايىن ۇيىستىرىپ، گۇلدەنۋ ۇلى ءىسىن ىلگەرىلەتتى
رەفورما شارالارىنىڭ تياناقتانىپ، ونىمدىلىك كورسەتۋىن جەدەل ىلگەرىلەتىپ، ەكونوميكانىڭ، قوعامنىڭ جوعارى ساپالى دامۋىن پارمەندى قولداۋ، قامتاماسىز ەتۋ كەرەك
زەيىن - زەردەنى، كۇش - قۋاتتى ۇيىستىرىپ، بورىشتى ارقالاپ، قايراتتانا العا ۇمتىلىپ، جاڭا تاراۋ جازايىق
قايراتتانا العا ۇمتىلىپ، ەرلىكپەن العا باسىپ، ىنتىماقتاسا كۇرەس جۇرگىزىپ، جۇڭگوشا سوتسياليزمنىڭ تىڭ جەڭىسىنە قول جەتكىزۋ كەرەك
تاريحتى اينا ەتىپ، وتكەندى باعامداپ، بولاشاقتى بولجاپ، گۇلدەنۋ جولىندا تاباندىلىقپەن العا باسۋ كەرەك
ىندەتكە توسقاۋىل قويۋ، ەكونوميكانى ورنىقتىرۋ، دامۋ حاۋىپسىز بولۋ ماڭىزدى تالابىن جاپپاي تياناقتاندىرىپ، پارتيا 20 - قۇرىلتايىنىڭ جەڭىسپەن اشىلۋىنا حاۋىپسىز، ورنىقتى ساياسي، قوعامدىق ورتا جاراتۋ كەرەك
اۆتونوميالى رايوننىڭ وقۋ - اعارتۋدى جوعارى ساپامەن دامىتۋ جينالىسى اشىلدى
بارشا جۇڭگولىقتى تۇگەل اناعۇرلىم جاقسى تۇرمىسقا كەنەلتتى
شينجياڭدى سىرتقا ەسىك اشۋدىڭ الدىڭعى شەبى ەتىپ قۇرىپ شىعامىز
جۇڭگو كوممۋنيستىك پارتياسىنىڭ مەملەكەتتىك 20 - قۇرىلتايىنا قاتىناساتىن ۋاكىلدەر تۇگەل سايلانىپ شىقتى
ۋاكىلدىك بورىشتى ادالدىقپەن اتقارىپ، ۋاكىلدىك رولدى تولىق ساۋلەلەندىرەيىك
مەملەكەتتىك حالىق قۇرىلتايى تۇراقتى كوميتەتىنىڭ زاڭنىڭ اتقارىلۋىن تەكسەرۋ گرۋپپاسى رايونىمىزدا زاڭنىڭ اتقارىلۋىن تەكسەردى
2022-جىلى 9-ايدىڭ 29- كۇنى 217-سان
2022-جىلى 9-ايدىڭ 28- كۇنى 216-سان
اۆتونوميالى رايوندىق پارتكوم تۇراقتى كوميتەتى كەڭەيتىلگەن ءماجىلىس اشتى كەزەكتەگى ىندەتتەن ساقتانۋ - تىزگىندەۋ قىزمەتىن ارناۋلى تاقىرىپتا اقىلداستى، ورنالاستىرۋ جاسادى
اۆتونوميالى رايوندىق ساۋدا - ونەركاسىپشىلەر بىرلەستىگىنىڭ (باس ساۋدا قوعامى) 12 - قۇرىلتايى وتكىزىلدى
شينجياڭ سۋ يگىلىگىن دامىتۋعا قارجى قوسۋ (توبى) شەكتى سەرىكتەستىگى قۇرىلدى
2022-جىلى 9-ايدىڭ 27- كۇنى 215-سان
شاۋەشەك قالاسىندا تۇڭعىش قارتتارعا قامقورلىق جاساۋ جاعىنان قوعامدىق قىزمەت وتەۋ ورتالىعى قۇرىلدى
ساۋانداعى ساقشىلار مەن حالىق قارا دەگەلەكتى قۇتقاردى
شاۋەشەك كەدەنى دالمە -ءدال شارا قولدانىپ، اۋىل شارۋاشىلىق قوسىمشا ونىمدەرىن يمپورت -ەكسپورت ەتۋدىڭ”جەدەل ارناسىن“ اشتى

ءمايىتحانا سۋرەتشىسى

جولدانعان ۋاقىتى : 2015/1/26 10:52:19

ءدىلدار مامىربايەۆا   (قازاقستان)

  -مارقۇم وتە اتاقتى ءانشى. ەل-جۇرتپەن قوشتاسۋعا اپاراردا ونىڭ بەتىن جاقسىلاپ ارلەڭىز. ومىردە بولعانىنداي، ارالاساتىن ادامدارىنىڭ كوزى ۇيرەنگەندەي بولسىن.

  -ەشكىمگە قىلداي قياناتى جوق ەدى، اجال الارىندا ەشنارسەگە قارايلاتپاي، قايدان بولسا دا تاۋىپ الا قويادى ەكەن عوي،-ءانشىنىڭ قۇربىسى وپىرمالى ومىرگە دەگەن وكىنىشىن ءبىلدىرىپ، كۇرسىنىپ قويدى.

  الپەش ءۇنسىز تىڭدادى. سايرانى  ەكەۋىنەن دە جاقسى بىلەتىن ءوزى شىعار. مايەگى ىرىگەن ايرانداي ويىنا قايداعى-جايداعى ورالدى. ءبىر ءسات ءوز ءومىرىنىڭ اڭعارىنا ءتۇسىپ كەتتى.

  الدىنداعى التى بالا بىرىنەن كەيىن ءبىرى شەتىنەي بەرگەن سوڭ الپەشتى اكە-شەشەسى موينىنا بۇرشاق سالىپ ءجۇرىپ، اۋليەدەن اۋليە قويماي تۇنەپ، جالبارىنىپ، تىلەپ العان. بۇل مايتابان بولىپ، ارتىنان ءىنى-ءسىڭلى ەردى. شەشەسى ون ءۇشىنشى بالاسىنا بوسانعاندا، تۋىت ۇستىندە قايتىس بولىپ، ءبىر ءۇيلى جان ارتىندا شىرىلداپ قالا بەرگەن. سوندا الپەش 3-سىنىپتا، تەتە ءىنىسى 2-سىنىپتا، ءۇشىنشىسى التى جاسار، ءتورتىنشىسى ەكى جاسار، سونسوڭ ەتەك استىندا قالعان شاقالاق. شەشەسىنىڭ جەتىسى وتكەنشە اعايىندار ۇيدە بولدى. جەتىسى وتكەن سوڭ اركىمنىڭ ءوز تىرشىلىگى بار، ءۇيدى-ۇيلەرىنە كەتتى.

اكەسى مەن ءبىر تۋىسى نارەستەنى وبلىس ورتالىعىنداعى بالالار ۇيىنە الىپ كەتكەن. ونشاقتى كۇن   ءجۇرىپ، وتكىزە الماي قايتا ورالدى. سونداعى اكەسىنىڭ جىلاعانى-اي. كۇنى بۇگىنگە دەيىن كوز الدىندا.  وعان بەس بالانىڭ مولتىلدەپ، قىستىعىپ وكسىگەنى قوسىلعان. ءالى كۇنگە دەيىن تارامىس-تاعدىرىنىڭ بەتىندەگى سول قارا ويىق ۇڭىرەيىپ تۇر. اناسىنىڭ سوڭعى دەمىنىڭ قالاي شىققانى، جاعىن اق شۇپەرەكپەن تاڭعانى كولبەڭدەپ كۇندە كوز الدىنا كەلەدى.

  سودان كەيىنگى ەستەن كەتپەيتىنى، كورشى ايەلدىڭ:

  -بولدى، جاپ اۋىزدارىڭدى، جىلاي بەرسەڭدەر كوزدەرىڭ اعىپ ءتۇسىپ، انا الپەشتەر سەكىلدى جەتىم بولىپ قالاسىڭدار،-دەپ بالالارىنا ۇرىسقانىن ەستىگەندە شەشەسى قايتا ولگەندەي جىلاعان. جەتىم بولىپ قالاسىڭدار... جاماندىقتارىنان، جىلاعاندارىنان جەتىم بولىپ قالعانداي. شەشە قابىرىنىڭ باسىنا بارىپ، ەستىگەنىنىڭ ءبارىن ايتىپ، پورا-پوراسى شىعا ەگىلگەن.   اناسى جاتقان جەر قوزعالاقتاپ، بۇعان «كەل»، «سەن دە كىر» دەيتىندەي كورىنگەن. ءبىر ساتكە، ءبىر-اق ساتكە تىرىلسە عوي دەپ تىلەگەن. قايدان... كۇندەردى، وقيعالاردى كەرى ورالتاتىن عاجاپ ءبىر تاياقشا بولسا دەپ قيالداعان. شەشەسى ءتىرىلىپ كەلىپ، بۇلاردىڭ ورتاسىندا، ءارقايسىسىنىڭ ماڭدايىنان ءسۇيىپ، باۋىرىنا باسىپ وتىرعانىن كورسە، كورشى نە دەر ەدى... وندايدا الپەش اناسىنىڭ قۇشاعىندا وتىرعانداي ىستىق ءبىر سەزىمگە بولەنەتىن.

  سودان كەيىنگى ءومىرى اعىن سۋداي جايىمەن سىرعىپ وتە بەردى. كورشىنىڭ جىلاڭقى قىزى دا بويجەتكەن.   اۋىلعا كەلگەن دارىگەر جىگىتتەن ەكىقابات بولىپ قالىپ، اۋىل ءىشى قاتتى دۇرلىككەن. قىزدىڭ اعالارى اناسىنا تەپسىنىپ:

  -تاربيەڭىز وسال بولدى. ەل بەتىنە قاراي الماي قالدىق، ەندى نە ىستەيمىز؟- دەگەن.

  اكەسى شەشەسىنە كۇن كورسەتپەۋگە اينالعان. شەشەسى ءبىر كۇنى قىزىن وڭاشا اپارىپ، اياق-قولىن بايلاپ،   قاسىنا وتىن ءۇيىپ، ورتەپ جىبەرەدى. ءوزىن-ءوزى ورتەدى دەگەن اڭگىمە  تاراتادى. جامان ءسوز جەردە جاتۋشى ما ەدى، ەل-جۇرت سول جەردە پىش-پىشتاپ، قوياسىن قازىپ جىبەرگەن.

  كۇيىك ءيىسى مۇڭكىگەن مۇردەنى سىرتقا قويىپتى. داربازاعا جاقىن جەردەگى ءبىر ەلەۋسىز تۇستا تۇر. تىرىسىندە قالاي كوزتۇرتكى بولسا، ولگەندە دە جابىرلەنىپ، قورلانعان. الپەشتىڭ قاتار وسكەن قۇربىسى عوي.

جۇرەگى شايلىعىپ تۇرسا دا بارىپ، بەتىن جاپقان شۇپەرەكتى اشىپ قالعان. قارا كومىردەي قاپ-قارا ولىك كۇلگەندەي، ىرجيعانداي بولدى. مۇنىڭ دەنەسى شىمىرلاپ، شوشىنا، ءمايىتتىڭ بەتىن جىلدام جابا قويدى. شارت جۇگىنىپ وتىرعان مولدا باسىن كوتەرىپ، كوزىمەن اتىپ جىبەرەردەي بولىپ شاپىراشتانعان. سودان كەيىن قاپ-قارا كۇيەلەش-كۇيەلەش بەت-ءجۇزدىڭ ىرجيعان كەيپى كوز الدىنا ءجيى-ءجيى كورىنىپ، كۇرسىندىرەتىن،   ويلاندىراتىن. قينالىپ ولگەن ادامنىڭ بەت-جۇزىندە كۇلكى نىشانى بولا ما؟

  و دۇنيەنى بۇل دۇنيەدەن جاقسى   ەكەن دەگەنى مە... مازاق پەن قورلاۋدان ءوستىپ قۇتىلعانىم دۇرىس قوي دەپ ايتقىسى كەلدى مە... الدە، جاس، تىپتەن جاس ادامنىڭ بەت-جۇزىندە ۇيىپ قالعان ءومىر ساۋلەسى مە...

  كوزىندەگى جاسىن ساۋساق ۇشىمەن سىپىرىپ وتىرعان كورشى ايەلگە   قاراعان.

  -قىزىڭىز جەتىمدىك كورمەيتىن بولدى،-دەگىسى كەلگەن. جاۋىعۋسىز، وشىگۋسىز ايتا سالعىسى كەلگەن.   ءوزىن ىركىپ قالدى.

  ءولى مەن ءتىرىنىڭ قاسىرەتىنەن بىردەي قۇتىلعىسى كەلىپ، قىزدىڭ شەشەسى جۇيتكىپ كەلە جاتقان پويەز استىنا تۇسكەن. جىلانشا جانشىلعانىمەن، اجال كەۋدەسىنەن يتەرىپ جىبەرگەن-اۋ دەيمىن. جانى كەۋدەسىنە ءىلىنىپ، امان قالىپتى. شىتىناعان كوز، قيسايعان بەت، سىلەكەيى اققان اۋىزدىڭ سۋرەتى دىرىلدەپ، بەتىن باسقا جاققا بۇرىپ العىسى كەلسە دە قويماي، كوڭىلىن الاڭداتىپ تۇراتىن.

  كەنەت اينالاسى جاڭعىرىپ كەتكەندەي بولىپ، بۇل الدىندا جاتقان سايراعا قارادى. ەرسى ويلار ۋاقىت تاڭداماي كەلە بەرەدى ەكەن-اۋ. ءبىراز زورلانىپ، اۋرەلەنىپ بارىپ امان ويلاردى تاسقا سوققانداي بىت-شىت ەتىپ، ويىن سالقىنداتىپ الدى.

  كوڭىلى ءبارىبىر كۇزدەي بولىپ كۇڭگىرت تارتىپ تۇر. زادى مەن قول سوزىمدى عانا پايىمداي الاتىن، الىستى باعامداۋىم جوق ادام شىعارمىن دەپ ويلادى. وسى سايرا مەن ءوز كۇيەۋى  بولەگەن بىرگە جۇمىس ىستەي باستاعاندا قاتتى قۋانعان. اتاقتى ءانشىنىڭ كوڭىلىنەن شىعىپ، كەرەگىنە جاراعانىنا مارقايعان. ونەر قونعاندار شىنىندا، اق كوڭىل، ادال نيەتتى عوي. الپەشتىڭ ىقىلاسى سايراعا قاتتى اۋعان. ون جىل وتاسقاندا ازەر كورگەن ۇلدارى قاسىم دا سايرا تاتەيىن جاقسى كورەدى. تومپاڭداپ، اكەسىنەن قالماي ءانشىنىڭ ەلدىڭ تۇكپىر-تۇكپىرىندەگى كونسەرتىن ۇيىمداستىرۋعا بىرگە كەتە بەرەتىن. سول بالا ءبىر كۇنى تومپيىپ   وتىرىپ، جاتتاپ العان اڭگىمەدەي ەتىپ ءسوز باستاعان.

  -ماماتاي، مەن، پاپا، سايرا تاتە ۇشەۋىمىز پاپام ساتىپ العان ۇلكەن ۇيدە تۇراتىن بولدىق. ول ءۇي سونداي كەرەمەت، مەنىڭ ەكى بولمەم بار. مىنانداي ۇلكەنىندە وينايمىن،-دەپ ەكى قولىن ەكى جاعىنا جايىپ، ۇرتىن بۇرتيتىپ، كوزىنە ءۇيدى قايتا ءبىر ەلەستەتىپ، قۋانىپ تۇر.

  -ونى كىم ايتتى؟

  -پاپام. سايرا تاتە دە سولاي دەدى.

  الپەش ەسىن جيا الماي قالدى. ءبىر ىزعارلى لەپ تاعدىرىن جانشىپ جىبەردى. كوڭىلىن، نيەتىن، جۇرەگىن بىرەۋ باياعىدا-اق ۇرلاپ العان ەكەن عوي.

  - ماما، ءبىز ساعان كەلىپ تۇرامىز. كەيدە مەن سەنىڭ قاسىڭدا بولامىن. پاپام سولاي دەگەن.

  الپەش ومىرىنەن ءتۇڭىلىپ كەتتى. نەدەگەن بىتپەيتىن ازاپ، نەدەگەن تاۋسىلمايتىن قورلىق. ءزابىر ءومىرىنىڭ الدى-ارتى كوز الدىنا دوڭگەلەنىپ كەلە قالدى. كىلەڭ ءبىر تايتالاسقان، استان-كەستەڭى شىققان، الاس ۇرعان، تەڭسەلىپ، اۋىتقىعان ساتتەر. ەندى دۇرىستالدى-اۋ دەگەندە، اپاتتى ءبىر نارسە زارەڭدى الىپ، ەسىڭدى كەتىرىپ الدىڭنان شىعا كەلەدى.

  -سوندا سەن دە مەنى تاستاپ كەتپەكشىمىسىڭ؟-الپەش قۇرتاقانداي قاسىمعا جاۋتەڭدەي قارادى.

  -ءبىز ەشقايدا كەتپەيمىز. تەك باسقا ۇيدە تۇرامىز. سايرا تاتە مەنىڭ مامام عوي.

  -مەن شە؟

  -سەن دە.

  توبەدەن ۇرۋ دەگەن وسى شىعار. كۇندە جاڭجال، كۇندە شۋ شىقپايتىن وتباسىنا بۇلىك قايدان كەلگەن؟ ءتىپ-تيتتەي قاسىم نە ايتىپ وتىر؟ ۇيىنە جارقىلداپ، ەركىن كەلىپ، داستارقانى ورتاق بولىپ جۇرگەن جاننىڭ مىنا قىلىعى نە؟ ىشتەگى وكىنىش دەمنىڭ اراسىندا ۇڭگىپ جەپ جىبەردى. قازىر بولەگەندى شاقىرىپ سويلەسسە، «مىناۋ نە اڭگىمە؟» دەپ سۇراسا قالاي بولار   ەكەن؟ «بالانىڭ سوزىنە سەنىپ» دەپ  وزىنە دۇرسە قويا بەرەرى حاق. كۇبىرلەپ، مىڭگىرلەپ، نە ايتىپ، نە قويعانىن بىلمەي، ءبىر ءسوزى ءبىر سوزىمەن قابىسپاي، ايتەۋىر قاسىندا جوق بىرەۋدى كىنالاپ شىعارى انىق. ەندى نە ىستەمەكشى. جانعان وتتىڭ ۇستىنە جانىن لاقتىرىپ جىبەرسە شە... كۇيەدى دە قالادى. وعان بولەگەننىڭ دە، سايرانىڭ دا قىلشىعى قيسايمايدى، قايتا قۋانار. قاسىمعا وبال بولادى دا. كوكىرەگى مۇزداي بولىپ كەتتى. تىنىسى تارىلىپ، مونشاقتاپ جاسى سورعالادى.

  ... كونسەرتتەن سوڭ قوشەمەتشىل قاۋىمنىڭ الدىنا سايرا شىعاتىن. سودان كەيىن ونىڭ قاسىنا بولەگەن بارىپ تۇراتىن. الپەش زالدا وتىرىپ قىزىعاتىن.

  -ونەرىمدى سيلاپ كەلگەن حالىققا، ونىڭ ىشىندە مەنىڭ قايناعالارىم پالەنشە، تۇگەنشەگە ەرەكشە سالەم بەرەمىن،-دەپ يىلەتىن. سوندا الپەش بۇل بولەگەننىڭ تۋىستارىنا ساحنادان نەگە سالەم بەرەدى دەپ تىپتەن ويلانباپتى دا. كۇلىپ، قول سوعىپ وتىرا بەرەتىن.  اقىلدى ايەلدەن اقىماق ايەلگە دەيىن ايلاكەر دەگەنى قايدا. ايەلدەردىڭ باسقانىڭ جىلپوستىعىن، ساتقىندىعىن كورە قويعىش دەگەنى دە وتىرىك بولعانى عوي. الپەش نە ءوزىن، نە بولەگەندى، نە سايرانى كىنالارىن بىلمەي دال بولدى. الدە، ماماندىعى كىنالى ما؟ ۆيزاجيست دەگەن كاسىپتى يگەرىپ، كوسمەتولوگيا سالاسىندا جۇمىس ىستەيتىن. سودان كەيىن...

قارا كومىردەي بولىپ كۇيگەن كورشى قىز ەسىنە تۇسكەن. تىرىلەرمەن ۇرسىپ-تالاسقانشا، بۇل ومىردەن وتكەندەرگە قىزمەت كورسەتسەم، ساۋاپتىڭ ۇلكەنى سول بولار دەگەن شەشىمگە كەلىپ، ءمايىتحانانىڭ تابالدىرىعىن اتتاعان. ونداعىلار «ولگەن ادامعا سەنىڭ بۇل قىزمەتىڭنىڭ بەس تيىنعا قاجەتى جوق» دەپ كەۋدەسىنەن يتەرگەندەي بولىپ شىعارىپ سالعان. «دىنىمىزگە مۇلدە جات» دەپ مۇسىلماندار ات- تونىن الا قاشقان. سول جەرگە تۇز سەۋىپ قويعانداي، ءمايىتحانا مۇنىڭ كۇنىنە ءبىر سوعىپ كەتەتىن جەرىنە اينالدى.

  -جەر استىنا كەتەتىن ادامنىڭ بەت-ءجۇزىن ارلەۋ نە ءۇشىن كەرەك ساعان؟-دەپ تاڭدانا سۇرايتىندار كوبەيدى.

  -سوڭعى ساپارعا ءوڭى نۇرلانىپ  اتتانسىن دەيمىن.

  -ءتىرى كەزىندە وپا بەرمەگەن ءوڭ، ولگەن سوڭ نەمەنەمە كەرەك؟-ەرىندەر سىلپ-سىلپ ەتىپ، يىقتار قيقاڭدايتىن. دەنساۋلىعىندا كىنارات بار شىعار دەپ، بۇدان الىس جۇرۋگە، كەزدەسپەۋگە تىرىساتىن. بۇل سول جۇمىستىڭ سوڭىندا جۇرگەندە قاسىم كوبىنە-كوپ اكەسى مەن سايرانىڭ جانىندا قالاتىن.

  ءمايىت، ءولى دەنە، ءمايىتحانا دەگەن سوزدەر ادام بويىندا قورقىنىش ۇيالاتادى. ول سەزىمدەردى جەڭۋ ءۇشىن وزىنە دە ءبىرشاما ۋاقىت كەرەك بولىپ ەدى. بولەگەن دە، سايرا دا، قاسىم دا مۇنىڭ ءمايىتحانادا ىستەيتىنىنەن قورقا ما؟ وزگەشە جەردە جۇمىس ىستەگەندىكتەن ءولىم مەن ءومىر دەگەن كاتەگوريالارعا وزگەشە كوزقاراسپەن قارايدى. ادامدارمەن قارىم-قاتىناسىن دا باسقاشا باعالايدى. قاسىنداعى ادامداردىڭ ءتىرى كەزىندە كەرەك ەكەنىن سەزىنۋگە   ۇمتىلاتىنى ءدال قازىر تۇككە العىسىز بولىپ قالعانداي.

  -وندا يماندىلىق ۇيىپ تۇرادى،- دەگەندە، بولەگەن مىرس ەتىپ كۇلىپ، ورنىنان تۇرىپ كەتكەن. كوز الدىنا، شاماسى، ءۇيىلىپ جاتقان ءولى دەنەلەر مەن اۋىزدارىنان اراق ءيىسى بۇرقىراعان سانيتارلار ەلەستەدى-اۋ.

  ولگەندەردىڭ سونشالىقتى قورقىنىشتى ەمەس ەكەنىن تاۋسىلا ايتىپ، تۇسىندىرە الماي-اق قويعان.

  -بىلگەنىڭدى ىستە،-دەگەن بۇعان بولەگەن.

  -سەن دە!-الپەش قولىن ءبىر سىلتەپ باسقا بولمەگە كەتىپ قالعان. ويلاپ وتىرسا، بۇل ءۇش-ءتورت جىل بۇرىن بولعان اڭگىمە ەدى. سودان بەرى بۇلار ءبىر جاستىقتا باستارى قوسىلىپ جاتىپ كورمەپتى، ءبىر داستارقاننىڭ باسىندا شۇيىركەلەسىپ اڭگىمەلەسپەپتى دە. كىرىپ-شىعىپ، كىرىپ-شىعىپ قانا ءومىر ءسۇرىپتى. التى قىردىڭ استىندا قالعان وتكەنىنە ۇڭىلە ىزدەگەندە بايقاعانى، دولى كۇزدىڭ جەلى ەرتە كىرىپ، بەرەكەلەرىن سىپىرىپتى. ۇيدەگى زاتتاردىڭ ءبارىنىڭ ءوڭى قاشىپ، ۇيپا-تۇيپاسى شىعىپتى. كۇيىگىن سىرتقا شىعارعىسى كەلىپ كۇرسىنىپ ەدى، ىشىنەن جالىن اتقىلادى. بارىنە ءمايىتحانادا ىستەگەنى كىنالى.

ءبىر جولى الپەش سايرانىڭ كونسەرتىنە بارا الماي قالعان. اۋرۋحانادا ءبىر اتاقتى ادام قايتىس بولىپ، بۇل تاپسىرىس   الىپ قويعان. اتقاراتىن جۇمىسى دا سونشالىقتى كۇردەلى ەدى. ولگەن    ادامنىڭ ىشكى اعزالارىنىڭ اۋرۋىنان بەت-ءجۇزى ادام تانىماستاي وزگەرىپ كەتكەن. ەكى كۇن قاتارىنان ءمايىتحانادا قونا جاتىپ، بارىن سالىپ، حالىقارالىق بايگەگە قاتىساتىن ادامداي جۇمىس ىستەگەن. ىستەگەن جۇمىسىنا كوڭىلى تولا بەرمەيتىن الپەش سوندا ءبىر ريزا بولىپ، قۋانعانىن ايتپاڭىز. سول كوڭىل كۇيمەن ۇيىنە كەلگەن. بولەگەنمەن بولىسكىسى كەلگەن. ول ۇيدە جوق بولىپ شىقتى. حابارلاسىپ ەدى، «باسقا قالادا گاسترولدە ءجۇرمىز» دەدى. قاسىم كۇتۋشىسىمەن قالىپتى.

  سوندا كورشىسى بولەگەن مەن  سايرانىڭ ەرلى-زايىپتى ادامدارداي بولىپ جۇرگەنىن جەتكىزگەن.

  -كوشكەن ەلدەي، ەسكەن جەلدەي گۋىلدەگەن وسەك كىمنىڭ ارتىنان ەرمەيدى. ەل الدىندا جۇرگەندەردىڭ  ءبارىن ءىلىپ-شالماسا تاماقتارىنان اس وتپەيتىندەر بار عوي.

  الپەش وسىلاي دەگەنىمەن، جۇرەگى بۇلقىنىپ، جان دۇنيەسىنىڭ استان-كەستەڭى شىققان. ءمايىتحانانى «تىنىشتىق بەسىگى» دەسە دەگەندەي-اق، ەرتەسى جۇمىسقا كىرىسكەندە بۇل اڭگىمەنى ۇمىتىپ تا كەتكەن. ۇمىتپاۋى كەرەك ەكەن. بارماعىن تىستەپ قالدى.

*     *     *

    سايرا مۇنى شاقىرتىپ شابارمان جىبەرىپتى. بولەگەن تۋىستارىمەن سونىڭ اۋىلىنا بارماقشى ەكەن.

  -ىستەرىن ىستەدىك. كورىنۋگە بەت جوق. كەشىرسىن. قالاسا، ۇلكەن وتاۋ بولىپ، بۇرىنعى ارالاس-قۇرالاستىعىمىزدى ۇزبەيىك،-دەگەن سارىندا اڭگىمە ايتىپتى.

  باياعىدا شەشەسى قايتىس بولىپ، شيەتتەي بولىپ جەتىم قالعاندارىندا «بۇدان وتكەن ازاپ بولمايتىن شىعار» دەپ ويلاعان. سول وي باسىنا تاعى اينالىپ كەلىپ وتىر. «بۇدان وتكەن قورلاۋ بولمايتىن شىعار».

  سوندا وسى ۋاقىتقا دەيىن بولەگەن ەكەۋى ءبىر    ادامعا اينالا الماعانى عوي. جۇرەكتەرى بولەك، ويلارى بولەك، جۇرىستەرى بولەك. نە دەسە ەكەن، بارا بەرسىن دەي مە، جوق قولىنداعىسىن بىرەۋگە بەرىپ قويىپ وتىرا بەرمەي، كۇرەسە مە. قالاي؟ سايرا تانىمال ءانشى. ەل الدىندا ادامگەرشىلىك، يماندىلىق تۋرالى سويلەگەندە، اۋزى اشىلىپ تىڭدامايتىن ادام كەمدە-كەم شىعار. ال، بۇل كىم؟ جەتىمدىكپەن كوزىن اشىپ، «كەت-كەت!» دەپ كەكىرەيگەندەردەن ابدەن زارەزاپ بولعان جان. ۋاقىتتىڭ ءوزى الپەشتى مازاقتاعانداي راديودا دا، تەلەديدار دا ونى كۇندە سويلەتىپ، كۇندە كونسەرتىن بەرەتىن بولىپ ءجۇر. «ال كور، ال تىڭدا، ال شىدا!» دەيتىندەي. الپەش شيدەي بوپ جۇدەپ كەتتى.

  بۇگىن الدىندا جاتقان قىزعا قاراپ، كوزىنىڭ جاسىن تيا الماعان. قۇيىلىپ جاتىر، قۇيىلىپ جاتىر. جاقىندا تويى بولماقشى ەكەن. شىرعالاڭدا تىلگە كەلمەي كەتىپتى. بەت سۇيەگى قۇمداي بولىپ ۇگىتىلگەن. ءار سۇيەگىن قولىمەن ايالاي وتىرىپ جيناپ شىقتى. سوندا ءولى دەنەنى تاس قىلىپ قۇشاقتاپ، ۋىزداي جۇرەگى ەلجىرەگەن جىگىتتى وڭاشا قالدىرىپ، ءوزىن سابىرعا شاقىرۋ ءۇشىن سىرتقا شىققان.

  سول جەردە بولەگەندى كوردى. قالانىڭ اتاقتىلارىنىڭ بىرازىمەن بىرگە ءجۇر. وڭدەرى سۇپ-سۋىق، بەتتەرى دومبىققان. شىكىرەيەتىندەردىڭ وزدەرى ءسال ساتكە بولسا دا كىشىرەيىپ قالىپتى.

  -سايرادان ايرىلدىق. قالادان شىعا بەرەر جەردە ماشيناعا ءبىر سيىر سوقتىعىپ، تاس-تالقان بولدى.

  -اعايىن، تۋىستى تويعا شاقىرىپ قويىپ ەدى.

  -بۇرسىگۇنى جەرلەۋ. بەت-ءجۇزىن قولىڭىزدان كەلگەنشە دۇرىستاڭىز.

  قالا اكىمىنىڭ ءوزى ءوتىنىپ تۇر. الپەش ءۇنسىز كەلىسكەن.

  داۋىلدى كۇنگى جاپىراقتاي قالباڭ قاقتى. سانا-سەزىمى جۇلما-جۇلما. ميىنداعى ويلار ءبىرىن-ءبىرى تەز    اۋىستىرا باستادى. دەنەسى شىمىركەندى. كوزى تۇماندانىپ بارىپ، قايتا قالپىنا كەلدى. سىرەسكەن ساۋساقتارىنا دۋىلداپ ەندى-ەندى جان كىرگەندەي، اۋىتقىپ كەتكەن كوڭىل كۇيى اقىرىنداپ ساباسىنا ءتۇسىپ كەلەدى.

  جاڭا قاباعىنا بوياۋ جاققانىندا قولى قاتتى ءتيىپ كەتتى مە، كوزىن باقىرايتىپ اشىپ العان.

  -نە ىستەپ جاتىرسىڭ؟-ونىڭ قۇلاعىنا سولاي ەستىلدى. ەمەرىلگەن ەرىن قوزعالدى. جانسىز ساۋساقتارى جانىندا تۇرعان ونىڭ قولىن قاتتى قىسىپ قالدى. ۇرەيلەنىپ تۇرعانى راس، بۇل ءبىراق قورقىنىشتىڭ ەلەسى ەمەس. وڭىندە بولىپ جاتقانىن انىق، ايقىن ءبىلىپ تۇر. بەتىنە قارادى. شاشى جايىلىپ، قوبىراپ كەتىپتى. ەپپەن جيىپ، قالپىنا كەلتىردى. بۇرىن بايقاماعان با، سونداي سۇلۋ. جاق سۇيەككە جابىسقان تەرىسى عانا بوساڭسىپ،  ءولىم ءالى ءوز بوياۋىمەن بوياپ ۇلگەرە الماپتى. قولى ىشىنە ءتيىپ كەتىپ ەدى، كۇرسىنگەندەي بولدى. مۇنداي جۇمىسقا ەتىم ۇيرەندى دەگەنىمەن، جۇرەگى شوشىپ، ۇركىپ قالدى. ىشكە جينالعان اۋانىڭ سىرتقا شىعىپ، دەم الىپ جاتقانداي سەزىلگەنىن ءبىلىپ تۇرسا دا ءوڭ مەن ءتۇستىڭ اراسىنداي ءبىر حالدەن ارىلا الماۋدا. الدىمەن قان تامىرلارىنداعى ۇيىپ قالعان قانداردى اسىقپاي تازالاپ شىقتى. سودان كەيىن قىزعىلت ءتۇستى ءبالزامدى سۇيىقتىقتى قۇيدى. سوندا عوي، ءبىر نارسە ايتاتىن ادامداي قوزعالىپ مۇنىڭ قولىن قىسقانى. بەتىندەگى كوگەرگەندەردى كەتىرۋ ءۇشىن سپيريت قوسىلعان فورماليندى قوسپالارمەن بىرگە اسىقپاي جىبەردى. ەرنىنىڭ قوزعالعانىن انىق بايقادى. نە ايتقىسى كەلدى ەكەن؟ ەندى ونىڭ ەشقاشان دا جارقىراپ قۋانبايتىنىن، بارىن سالىپ وزىنە قىزمەت ىستەپ جاتقان بۇعان راقىمەت ايتپايتىنىن دا بىلەدى. ماڭگى قارا تۇنەككە، ءتۇپسىز تەرەڭ شىڭىراۋعا تۇسكەن ادام بۇدان نە سۇراۋى مۇمكىن؟ سەنىڭ جۇمىسىڭ ءومىردى ۇزارتۋ تىلەگىنەن تۋىپ وتىر ما دەپ پە... الدە، اجالدىڭ ءومىر سۇلۋلىعىنا كولەڭكە تۇسىرە المايتىندىعىن ۇقتىرۋ تىلەگى مە... الدە، جاننىڭ دەنەمەن قايتا قوسىلۋىنا مۇمكىندىك جاساۋ تىلەگى مە... الپەش دەنەسىن تىكتەپ الدى. ءوز سۇراقتارىنا ءوزى جاۋاپ تابا الماي داعداردى. ويىنا ءبىر اڭىزدىڭ سارىنى   ءتۇستى. الىپ پيراميدالار ءبىر عانا ادام ءۇشىن، ونىڭ وزىنە ەمەس، ءمايىتى  ءۇشىن جاسالىپتى دەيدى. الگى ادامنىڭ جانى تانىمەن قوسىلۋىنا ىڭعايلى بولسىن دەپ.

  الپەش ەرىكسىز مىرس ەتتى. باي مەن كەدەيدى ەكى قۇلاش ءبوز تەڭەستىرەدى دەۋشى ەدى، مارقۇم بولعاننان كەيىنگى تەڭسىزدىك تىرشىلىكتەگى تەڭسىزدىكتى جالعاستىرىپ قانا قويماي، ورنىقتىراتىن دا سياقتى ما؟

  الپەش قولىنا ەڭ قىمبات كوسمەتيكالاردى الا بەرگەنى سول ەدى، سايرانىڭ دەنەسى سەلك ەتكەندەي بولدى.

  «ەندى ماعان ەشنارسەنىڭ كەرەگى جوق» دەگەنى مە؟

  دايىنداعان-قاجىبەك ايدارحان




رەداكتورى: ارداق كامالقان قىزى
 
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.


 
powered by IlgharCMS 3.2 www.ilghar.cn