حالىقارالىق سپورت ساحناسىنىڭ قاعيداسى بويىنشا تاق جىلدارى سپورتتاعى كىشكەنە جىل ەسەپتەلەدى. 2014 - جىلمەن سالىستىرعاندا، 2015 - جىلعى سپورت ساحناسىندا دۇنيە جۇزىلىك فۋتبول ساۋىتىنا تالاسۋ جارىسى سياقتى بۇكىل دۇنيە ءجۇزىنىڭ نازارىن اۋداراتىن سپورت جارىستارى نەكەن - ساياق، الايدا ازيا فۋتبول ساۋىتىنا تالاسۋ جارىسى، حالىقارالىق سۋ ءجۇزۋ جارىسى، جۇڭگودا وتكىزىلەتىن حالىقارالىق جەڭىل اتلەتيكا جارىسى ەل نازارىن اۋدارادى. مۇنان سىرت، 2016 - جىلى وتكىزىلەتىن ريو - دە - جانە - يرو وليمپيادا سپورت جارىسىنا دا از قالدى، ريو - دە - جانە - يرو وليمپياداسىنا قاتىناسۋ تولىمدىلىعىنا جەتۋ ءۇشىن كەيبىر جارىس تۇرلەرى 2015 - جىلى وتكىزىلەدى، بىلاي بولعاندا 2015 - جىلى كوپتەگەن جارىستاردان كوزايىم بولامىز.
ازيا فۋتبول ساۋىتىنا تالاسۋ جارىسى «جىل باسىنداعى دۋمان تويعا» اينالماق
2015 - جىلى 9 - قاڭتاردان 31 - قاڭتارعا دەيىن ازيانىڭ ەڭ جوعارى ورەدەگى 16 مەملەكەت قۇراماسى اۆستراليادا الا دوپ اۋەسكەرلەرىنىڭ دەلەبەسىن قوزدىراتىن، تارتىمدى دا تاماشا جارىس وتكىزەدى. بۇل 2015 - جىلداعى تۇڭعىش ءىرى جارىس ءتۇرى، ازيا فۋتبول ساۋىتىنا تالاسۋ جارىسىن «جىل باسىنداعى دۋمان توي» دەۋ ارتىق كەتپەيدى.
ازيا فۋتبولىنىڭ جالپى ورەسى وتە جوعارى بولماعانىمەن، ازياداعى ەڭ جوعارى دەڭگەيدەگى جارىس بولعاندىقتان، بۇرىننان فۋتبول جان كۇيەرلەرىن باۋراپ كەلدى.
بۇگىنگى كۇنى ازياداعى مىقتىلاردىڭ قاتارىنا كوز جىبەرسەك، اۆستراليا، جاپونيا، كورەيا جانە يران قۇرامالارىنىڭ باس جۇلدەگەر بولۋ مۇمكىندىگى ەرەكشە كۇشتى. وتاعاسى ەل اۆستراليا باس جۇلدەدەن ەڭ سالىمدى، قانشا دەگەنمەن ءوز جەرىندە تۇڭعىش رەت ازيا فۋتبول ساۋىتىنا تالاسۋ جارىسىن وتكىزگەن اۆستراليانىڭ باس جۇلدەدەن ايرىلىپ قالۋعا قاقىسى جوق.
ازيا فۋتبول ساۋىتىنا تالاسۋ جارىسى مەن ءار ەلدىڭ كلوبتار ارا جارىسىنان جانە ەۆروپا چەمپيوندىعىنا تالاسۋ جارىسى سياقتى تۇراقتى جارىستاردان سىرت، 2015 - جىلى ماۋسىم ايىندا ىركەس - تىركەس وتكىزىلەتىن 2 جارىس تا جۇرت نازارىن ەرەكشە اۋدارادى. ونىڭ ءبىرى، 6 - ماۋسىمنان 5 - شىلدەگە دەيىن كانادادا وتكىزىلەتىن ايەلدەردىڭ دۇنيە جۇزىلىك فۋتبول ساۋىتىنا تالاسۋ جارىسى، ەندى ءبىرى، 11 - ماۋسىمنان 4 - شىلدەگە دەيىن چيليدە وتكىزىلەتىن امەريكا ساۋىتىنا تالاسۋ جارىسى.
مەملەكەتتىك قاۋىرسىن دوپ قۇراماسىنىڭ ماقساتى «6 - رەت باس جۇلدەگەر» بولۋ
2015 - جىلى 10 - مامىردان 17-مامىرعا دەيىن 14 - كەزەكتى سۋديرمان قاۋىرسىن دوپ ساۋىتىنا تالاسۋ جارىسى دۇڭگۋاندا وتكىزىلەدى. « 5 رەتكى كەلەلى جەڭىسكە» قول جەتكىزگەن جۇڭگو قۇراماسىنىڭ ماقساتى، ارينە، «6 - رەت باس جۇلدەگەر» بولىپ، قاۋىرسىن دوپ الاڭىنداعى ۇستەم ورىندى ساقتاپ قالۋ.
حالىقارالىق سۋ ءجۇزۋ جارىسى قيان - كەسكى وتكىزىلەدى
2015 - جىلى 24 - شىلدەدەن 9 -تامىزعا دەيىن 16 - كەزەكتى حالىقارالىق سۋ ءجۇزۋ جارىسى رەسەيدىڭ قازان قالاسىندا وتكىزىلەدى، بۇل ريو - دە - جانە - يرو وليمپياداسىنان بۇرىن وتكىزىلەتىن ەڭ سوڭعى ءبىر رەتكى سۋ ءجۇزۋ جارىسى، سوندىقتان دا وسى كەزەكتى جارىس ءار ەل سپورتشىلارىنىڭ ريو - دە - جانە - يرو وليمپياداسىنا دايىندالۋ جاعدايىن بايقاۋعا بولاتىن ماڭىزدى جارىس. مۇنان سىرت، وسى كەزەكتى جارىستا اعالاپ العا شىققان سپورتشىنىڭ ريو - دە - جانە - يرو وليمپياداسىندا ەل نازارىن اۋداراتىن سپورتشىعا اينالۋى ابدەن مۇمكىن.
حالىقارالىق سۋ ءجۇزۋ جارىسىنان تىس، 2015 - جىلى 22 - تامىزدان 23 - تامىزعا دەيىن وتكىزىلەتىن ريو - دە - جانە - يرو وليمپياداسىنىڭ سۋ جۇزۋدەن سىناق جارىسى دا جۇرت نازارىن ەرەكشە اۋدارادى. وسى جارىستاردى كورۋ ارقىلى كورەرمەندەر ريو - دە - جانە - يرو وليمپياداسىنىڭ سۋ ءجۇزۋ جارىسى وتكىزىلەتىن سپورت سارايىن الدىن الا كورە الادى.
بەيجيڭ تۇڭعىش رەت حالىقارالىق جەڭىل اتلەتيكا جارىسىن وتكىزەدى
حالىقارالىق سۋ ءجۇزۋ جارىسى اياقتاسىمەن 2015 - جىلى 22 - تامىزدان 30 - تامىزعا دەيىن حالىقارالىق جەڭىل اتلەتيكا جارىسىنىڭ شىمىلدىعى اشىلادى. تىلگە تيەك ەتپەكشى بولعانىمىز، وسى جولعى جارىس بەيجيڭدە وتكىزىلەدى، بۇل حالىقارالىق جەڭىل اتلەتيكا جارىسىنىڭ تۇڭعىش رەت جۇڭگودا وتكىزىلۋى.
حالىقارالىق گيمناستيكا جارىسى
2015 - جىلى 24 - قازاننان 1 - قاراشاعا دەيىن حالىقارالىق گيمناستيكا جارىسى ۇلى بريتانيانىڭ گلاسكوۋ قالاسىندا وتكىزىلەدى. بۇل جارىس ريو - دە - جانە - يرو وليمپياداسىنىڭ گيمناستيكا جارىسىنداعى دارەجەگە ايىرۋعا دا قاتىستى، ءار ەل قۇرامالارى وزدەرىنىڭ ەڭ مىقتى سپورتشىلارىن شىعارىپ، ەڭ جاقسى ناتيجەگە قول جەتكىزۋگە قارمانادى، بۇل وسى رەتكى حالىقارالىق گيمناستيكا جارىسىنىڭ الدىڭعى 2 كەزەكتى جارىسقا قاراعاندا قىزىقتى بولاتىندىعىن مەڭزەيدى.
ءتىپتى دە كوپ جارىستار نازار اۋدارۋعا تاتيدى
جوعارىدا ايتىلعاندار تەك 2015 - جىلى ەڭ نازار اۋدارۋعا تاتيتىن جارىستار، مۇنان سىرت، 2015 - جىلى وتكىزىلەتىن باسقا جارىس تۇرلەرىنىڭ دە قىزىعى مول.
2015 - جىلى بيلياردتان سنوكەر جارىسى 18 - ساۋىردەن 4 - مامىرعا دەيىن وتكىزىلەدى. ايەلدەردىڭ جانە ەرلەردىڭ ۆولەيبولدان دۇنيە جۇزىلىك ساۋىتىنا تالاسۋ جارىسى جەكە - جەكە 22 - تامىز جانە 8 - قىركۇيەكتە باستالادى، جۇڭگونىڭ ەرلەر جانە ايەلدەر ۆولەيبول قۇراماسى الدىڭعى 2 مىقتىنىڭ ورنىنا شىعىپ، ريو - دە - جانە - يرو وليمپياداسىنىڭ شەشۋشى جارىسىنا جولداما الا الاما؟ 2015 - جىلى 23 - قىركۇيەكتە چاڭشادا وتكىزىلەتىن ەرلەردىڭ باسكەتبولدان ازيا بىرىنشىلىگىنە تالاسۋ جارىسىندا جۇڭگو قۇراماسى وتكەندەگىدەي كەسەك تابىسقا قول جەتكىزە الا ما؟
فرانسيانى اينالۋ ۆەلوسيپەد جارىسى 2015 - جىلى 4 - شىلدەدە باستالادى. سوڭعى جىلدارى قوزدىرعىش ءدارى تۇتىنۋ ماسقارا حابارىنىڭ تاۋقىمەتىن ابدەن تارتقان وسى جارىس دۇنيە جۇزىندەگى ۆەلوسيپەد اۋەسكەرلەرىنە «ءمىنسىز» جارىستى سيلاي الا ما؟
«شينجياڭ گازەتى سايتىنان»
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.