بەيجيڭ قىسقى وليمپيادا سپورت جارىسىن وتكىزۋگە ءوتىنىش بەرۋ كوميتەتى 12-قاڭتاردا حالىقارالىق وليمپيادا سپورت كوميتەتىنە تاپسىرعان « جارىس وتكىزۋگە ءوتىنىش بەرۋ دوكلاتىن » جاريالادى، بەيجيڭنىڭ بىردەن –ءبىر باسەكەلەسى بولعان قازاقستاننىڭ الماتى قالاسى دا ۇكىمەت تورابىندا « جارىس وتكىزۋگە ءوتىنىش بەرۋ دوكلاتىن » جاريالادى.
الماتى قالاسىنىڭ « جارىس وتكىزۋگە ءوتىنىش بەرۋ دوكلاتى » اعىلشىن جانە فرانسۋز تىلىندە بولىپ، 115 بەت كولەمىندەگى جۇزدەن ارتىق سۋرەت، قاريتا، سحەما، ەلىكتەمەلى سۋرەت سياقتىلاردان قۇرالعان ماتەريالدار ارقىلى الماتى قالاسىنىڭ قىسقى وليمپيادا سپورت جارىسى مەن قىسقى مۇگەدەكتەر وليمپيادا سپورت جارىسىن وتكىزۋگە بولعان دايىندىق جاعدايى مەن ابزالدىلىقتارىن تانىستىرعان. بۇل دوكلات جيىنى 3 ءبولىم، 14 نەگىزگى تاقىرىپتان قۇرالعان بولىپ، حالىقارالىق وليمپيادا سپورت كوميتەتىنىڭ ورتاعا قويعان ءتۇرلى سۇراۋلارىنا جاۋاپ بەرگەن.
دوكلاتتا الماتى قالاسى 2022-جىلعى قىسقى وليمپيادا سپورت جارىسىن وتكىزۋگە 14 جارىس الاڭىن پايدالاناتىندىعىن، كەزەكتە 8 الاڭ پايدالانۋ ۇستىندە ەكەندىگىن، مۇنان باسقا 3 جارىس الاڭىنىڭ تەك قىسقى وليمپيادا سپورت جارىسىن وتكىزۋگە بولا سالىنباعاندىعىن، سوندىقتان قىسقى وليمپيادا سپورت جارىسىن وتكىزۋگە تەك 3 جارىس الاڭىن ارناۋلى سالۋ كەرەكتىگىن، جوبا بويىنشا جاڭا وليمپيك قالاسىندا قوناقجاي، جينالىس ورتالىعى، تۇرعىندار رايونى جانە الەۋمەتتىك قاتىناس جۇيەسى سياقتىلار ورنالاستىرىلاتىندىعىن ايتقان.
2022-جىلعى قىسقى وليمپيادا سپورت جارىسى مەن قىسقى مۇگەدەكتەر وليمپيادا سپورت جارىسىن ءساتتى وتكىزۋ ءۇشىن الماتى قىسقى وليمپيادا سپورت جارىسىن وتكىزۋگە ءوتىنىش بەرۋ كوميتەتى كەزەكتە ءبىر ميلليارد 859 ميلليون دولارىندىق ( حالىق اقشاسىمەن 11 ميلليارد 500 ميلليون يۋان ) مەجە ەسەپ جاساعان. سونىمەن بىرگە، قازاقستان ۇكىمەتى الماتى قالاسىنىڭ قىسقى وليمپيادا سپورت جارىسى مەن قىسقى مۇگەدەكتەر وليمپيادا سپورت جارىسىنا دايىندىق كورۋ جانە وتكىزۋ بارىسىندا تۋىلۋ مۇمكىندىگى بولعان ءارقانداي قارجى جەتىسپەۋ ماسەلەسىن شەشىم ەتەتىندىگى جونىندە ۋادە بەرگەن.
ۇعىسۋعا قاراعاندا، ەگەر الماتى قالاسىنىڭ قىسقى وليمپيادا سپورت جارىسىنا ءوتىنىش بەرۋى ءساتتى بولسا، 2022-جىلى 4-اقپاندا (جۇما) باستالۋ سالتىن، 20-اقپاندا (جەكسەنبى) جابىلۋ سالتىن وتكىزىپ، 17 كۇن ۋاقىتپەن جارىس وتكىزۋدى؛ قىسقى مۇگەدەكتەر وليمپيادا سپورت جارىسىن 4-ناۋرىزدا (جۇما) باستالۋ سالتىن، 13-ناۋرىزدا (جەكسەنبى) جابىلۋ سالتىن وتكىزىپ، 10 كۇن ۋاقىتپەن وتكىزۋدى جوسپارلاعان، بۇل بەيجيڭنىڭ ءوتىنىش بەرگەندەگى ۋاقىتىمەن ۇقساس بولعان ەكەن.
2014-جىلى 14-ناۋرىزدا حالىقارالىق وليمپيادا سپورت كوميتەتى ەلىمىزدىڭ استاناسى بەيجيڭ قالاسى، پولشانىڭ كراكوۆ قالاسى، نورۆەگيانىڭ وسلو قالاسى، قازاقستاننىڭ الماتى قالاسى جانە ۋكراينانىڭ لۆو قالاسى سىندى بەس قالانىڭ 2022-جىلعى قىسقى وليمپيادا سپورت جارىسىن وتكىزۋگە ءوتىنىش بەرگەندىگىن جاريالادى. سول جىلى 1-قازاندا نورۆەگيانىڭ وسلو قالاسىنىڭ جارىستى وتكىزۋدەن باس تارتۋىنا ىلەسە كانديدات قالالاردان تەك بەيجيڭ قالاسى مەن الماتى قالاسى عانا قالعان.
الايدا، قىسقى وليمپيادا سپورت جارىسىن وتكىزۋ الاڭىن سالۋدىڭ ەكولوگيالىق ورتانى ءبۇلدىرۋى مەن قوماقتى قارجىنىڭ مەملەكەت قازىناسىنا سالماق سالۋىنان الاڭداعان ءبىر ءبولىم قازاقستاندىقتار الماتى قالاسىنىڭ قىسقى وليمپيادا سپورت جارىسىن وتكىزۋىنە قارسىلىق بىلدىرگەن ءارى توراپتا قارسىلىق بىلدىرۋشىلەردىڭ ەسىمدىگىن جيناقتاعان ەكەن.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.