و. بلاير (يرلانديا)
سۇيىكتى ۇلىم:
وسى بىرنەشە جول ءسوز ارقىلى، اۋەلى، امان-ەسەن ءجۇرىپ جاتقاندىعىمدى ايتا كەتەيىن. سەنىڭ تەز وقي المايتىنىڭدى ويلاپ، حاتتى ادەمىلەپ، اسىقپاي جازدىم.
ءبىز بارلىعىمىز وتە جاقسى تۇرىپ جاتىرمىز. ەندى كەلگەنىڭدە ءۇيىمىزدى تانىماي قالۋىڭ دا مۇمكىن، ويتكەنى ءبىز قونىس جاڭالادىق.
اكەڭ گازەتتەن كورگەندەگىدەي ءبىزدىڭ ءۇيدىڭ ماڭايىندا ءبىراز ىستەر تۋىلعاندىقتان، كوشىپ كەتپەسىمىزگە بولمادى. ەندىگى جەردە دە پايدالانا بەرۋ ءۇشىن، وسى ۇيدە بۇرىن وتىرعان يرلانديالىق كوشىپ كەتەرىندە، ءۇيدىڭ ەسىك ءنومىرىن الىپ كەتكەندىكتەن، جاڭا قونىسىمىزدىڭ تولىق ءادىرىسىن وزىڭە جولداپ بەرۋگە امالسىز قالىپ وتىرمىن.
بۇل قونىسىمىز دا جامان بولعان جوق. كىر جۋعىش ماشينامىز دا بار. ءبىراق ونىڭ دۇرىس ىستەيتىن-ىستەمەيتىندىگىنە ءجىپ تاعا الماي قالدىم. الدىڭعى اپتادا ءۇش-ءتورت جەيدەنى سالىپ جىبەرىپ، ارتىنان قاراسام زىم-زيا جوق بولىپ شىقتى.
اكەڭ كوپ-كورىم جۇمىس تاپتى. ءتىپتى، ءبىر ءوزى بەس جۇزدەن استام ادام جەرلەنگەن قابىرلىقتىڭ ءشوبىن وتايدى. ال اپەكەڭ مارري بۇگىن تاڭەرتەڭ بوسانىپتى. بالانىڭ قويشى نە جىلقىشى ەكەندىگىنەن حابارىمىز بولماعاندىقتان، كەيىن ءوزىڭدى نە دەپ شاقىراتىنىن دا بىلە الماي وتىرمىن.
اعاڭ تومدى اسكەردە ءبىر مەزگىل تۇرعىزعان سوڭ، اسكەري سوتقا جوتكەپ جىبەرىپتى. اعايىڭ پاتريك وتكەن اپتادا بەرلين اراق زاۆودىنداعى ۆيسكي تولتىرىلعان كۇبىگە ءتۇسىپ كەتكەن ەكەن، كاسىپتەستەرى قۇتقارۋعا بارسا جانىنا جولاتپاي قۋالاپ، اقىرى سونىڭ ىشىندە تۇنشىعىپ جان ءۇزىپتى. ولار ونىڭ ءمايىتىن ورتەتكەندە، تۇپ-تۋرا ءۇش كۇن جانىپ تۇرىپ الىپ ازەر ءوشىپتى. تاعى ءبىر جايسىز حابار: وتكەن اپتادا نەمەرەلەس اعاڭ سميس كولىكپەن كەتىپ بارا جاتىپ، ساقشىلار جاعىنان تۇتقىندالىپتى. ولار ونى ۋلى شەگىمدىك الىپ-ساتارلىعىمەن شۇعىلدانىپتى دەپ ايىپتاپ وتىر.
سەيسەنبى كۇنى اكەڭدى ەرتىپ شيپاحاناعا تەكسەرىلۋگە باردىم. شيپاگەر ون مينۋتقا دەيىن جاق كىرىسىمدى اشپاۋىمدى تاپسىرىپ، اۋزىما تۇتىكشە سالىپ ەدى، اكەڭ ونىڭ اقىسىن تولەپ، ساتىپ الۋعا ءماجبۇر بولدى. بۇل ارانىڭ اۋا رايى ءبىراز كورىم ەكەن. وسى اپتادا ەكى رەت جاڭبىر جاۋىپ، ءبىر رەتكىسى ءۇش كۇنگە، ەندى ءبىر رەتكىسى ءتورت كۇنگە دەيىن سوزىلدى. دۇيسەنبى كۇنگى سوققان بوران ەرەكشە قاتتى بولدى. ءبىر مەكيەنىمىز نەشە كۇن كۇرىك بولىپ ءجۇرىپ، ازەر جۇمىرتقا باستى.
جەرلەۋ مەكەمەسىنەن كەلگەن ءبىر پارشا حات تاپسىرىپ الدىق. وندا ءبىر جەتىنىڭ ىشىندە اجەڭ جەرلەنگەن جەر اقىسىن تولىق تاپسىرىپ بولماساق، اجەڭنىڭ سۇيەگىن شىعارىپ تاستايمىز دەپتى. ستانلي اعايىڭ اۋىر تارتادى دەگەن سوڭ، وزىڭە جولداعان بۇل پالتونىڭ تۇيمەلەرىن الىپ، قالتاسىنا سالىپ جىبەرگەنمىن. كەشە يۋەحان كىلتىن اۆتوكولىگىنىڭ ىشىنە ۇمىت قالدىرىپتى دا ءبىرتالاي اۋرەگە تۇستىك. ەكى ساعات جانتالاسىپ ءجۇرىپ، اكەڭ ەكەۋىمىزدى كولىك ىشىنەن ازەر شىعارىپ الدى. كولىك ءىشى وتە تىمىرسىق ەكەن.
سەنىڭ ءۇش دوسىڭ ءبىر جۇك اۆتوموبيلىمەن كەلە جاتىپ، كوپىردەن وتەردە سۋعا قۇلاپ كەتىپتى. كولىك جۇرگىزۋشى رالف كابينكەدەن سەكىرىپ كەتىپ، ءولىپ-تالىپ ءجۇرىپ جاعاعا جەتىپتى دە اجالدان امان قالىپتى. ءبىراق ارتقى ورىندىقتا وتىرعان ەكى دوسىڭ شىعا الماي قالىپ، قازا بولىپتى.
باسقا ايتارىم قالمادى. جۇمىس بولىپ جاتسا وزىڭە تاعى دا حات جازىپ حابارلاسامىن!
ءوزىڭدى جانىنداي كورەتىن: اناڭ
ەسكەرتۋ: ساعان ءبىراز اقشا سالىپ جىبەرەيىن دەپ ەدىم، ءبىراق بۇل جولى ۇلگىرە المادىم.
اۋدارعان-ريشات سابىرباي ۇلى
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.