ۇسىنىس ەتىلگەن ءتىلشى سۋ گاڭۋي
ءبىرىن – ءبىرى مۇلدە تانىمايتىن ەكى ازامات توراپحانانىڭ تازالىق ۇيىندە ءبىر اۋىز سوزگە بولا ەرەگەسىپ، سوڭى قاندى دەلوعا اينالىپ قانا قالماستان، ءوزىن دە، وزگەنى دە سورلاتتى.
جۋىقتا ساۋان اۋدانىنىڭ تۇرعىنى 20 جاستاعى ليۋ جۇن (جاناما اتى)، 19 جاستاعى لي چياڭ (جاناما اتى) جانە 19 جاستاعى جوۋ لەي (جاناما اتى)جەرگىلىكتى ورىنداعى سوت مەكەمەسى جاعىنان قاساقانا كىسى زاقىمداۋ قىلمىسىمەن مەرزىمدى قاماق جازاسىنا ۇكىم ەتىلدى.
2014-جىلى مامىردىڭ باسىنداعى ءبىر كۇنى كەشتە توراپحانادا تورعا شىعىپ وتىرعان ليۋ جۇن ارالىقتا تازالىق ۇيىنە بارادى، وسى كەزدە سىرتتان بىرەۋ كەلىپ ەسىكتى قاتتى قاعادى، سونىمەن ول: « بۇل قايسى ەسەرسوق، ىشىندە ادامنىڭ بار ەكەنىن بىلمەيمىسىڭ » دەپ قويىپ قالادى، مۇنى ەستىگەن سىرتتا تۇرعان ياڭ دۇڭ اشۋعا بۋلىعىپ، ونى ياناتتاي جونەلەدى.
ليۋ جۇن تازالىق ۇيىنەن شىققان سوڭ، ونى توسىپ تۇرعان ياڭ دۇڭنىڭ وزىنەن الدەقايدا دەنەلى ەكەندىگىن كورىپ، جەكپە-جەككە شىقسا شاماسى جەتپەيتىندىگىن بىلگەن ول: « تۇراتۇر بالەم، كورگىلىگىڭدى كورەسىڭ » دەيدى دە كەتىپ قالادى.
ليۋ جۇن ءوزىن باسقالاردىڭ باسىنعانىنا ىشتەي قاتتى نازالانادى. سونىمەن توراپحانانىڭ الدىنا شىعىپ، دوستارىنا تەلەفون بەرىپ شاقىرىپ، ياڭ دۇڭنىڭ سازايىن تارتقىزباقشى بولادى. ون نەشە مينۋتتان كەيىن لي چياڭ مەن جوۋ لەي ليۋ جۇننىڭ شاقىرتۋىمەن توراپحانانىڭ الدىنا جەتەدى، لي چياڭ قوينىنان ءبىر ۇزىن پىشاق الىپ شىعادى، جوۋ لەي دە سول ماڭايدان ءبىر كەسەك تاس تاۋىپ الادى، ليۋ جۇن توراپحاناداعى ەدەن جۋعىشتىڭ سابىن جۇلىپ الىپ ۇشەۋى توراپحانادان ويىننىڭ قىزىعىنا باتىپ وتىرعان ياڭ دۇڭدى ىزدەپ تابادى دا، ليۋ جۇن قولىنداعى تاياقپەن ياڭ دۇڭنىڭ توبەسىنەن پەرىپ قالادى. ياڭ دۇڭ بۇرىلىپ الگىندە تازالىق ۇيىندە كەركىلدەسىپ قالعان ادام ەكەندىگىن كورەدى دە « قايتپەكسىڭ ؟ » دەي بەرگەندە، لي چياڭ مەن جوۋ لەي ورىندىقتان ءالى تۇرماعان ياڭ دۇڭدى قاۋمالاپ سويىلعا جىعادى.
ياڭ دۇڭنىڭ باسى، بىلەگى كوپ جەردەن جارالانىپ، سارالاۋ ارقىلى ءبىرشاما اۋىر جارالانعاندىعى انىقتالادى، ال قاساقانا كىسى زاقىمداۋشى ليۋ جۇن، لي چياڭ جانە جوۋ لەي زاڭ بويىنشا قولعا الىنادى.
تەرگەۋ بارىسىندا ليۋ جۇن: «ءبارى دە ءوزىمىنىڭ وركەۋدەلىگىمنەن بولدى، تۇيمەدەي ءىستى تۇيەدەي قىلدىم، ياڭ دۇڭدى زاقىمداپ قانا قالماستان، ەكى دوسىمدى دا سورلاتتىم » دەدى.
بيىل شىلدەنىڭ ورتا شەنىندە ساۋان اۋداندىق حالىق سوتى مەكەمەسى تەكسەرۋ ارقىلى ايىپكەر ليۋ جۇن، لي چياڭ جانە جوۋ لەي قاساقانا كىسى زاقىمداپ ءبىرشاما اۋىر دارەجەدە جارالاعاندىعى سەبەپتى زاقىمداۋ قىلمىسىن قالىپتاستىرعان دەپ قارادى. ءۇش ايىپكەردىڭ زياندالۋشىنىڭ ەمدەۋ قاراجاتى سياقتى ەكونوميكالىق شىعىنىن بەلسەنە ۇستىلەرىنە العاندىعىنا جانە قىلمىستارىن تانىعاندارىنا قاراتا، سوت مەكەمەسى ەڭ سوڭىندا ايىپكەر ليۋ جۇن، لي چياڭ جانە جوۋ لەيگە جەكە – جەكە ءبىر جىل توعىز ايلىق قاماق جازاسىن ءۇش جىل كەشىكتىرىپ اتقارۋ، ءبىر جىل التى ايلىق قاماق جازاسىن ءۇش جىل كەشىكتىرىپ اتقارۋ جانە ءبىر جىل ءۇش ايلىق قاماق جازاسىن ەكى جىل كەشىكتىرىپ اتقارۋ جونىندە ۇكىم شىعاردى.
اۋدارعان-احات سانياز ۇلى
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.