قوعام حاۋىپسىزدىگى مينيسترلىگىنەن ۇعىسۋىمىزشا، قوعام حاۋىپسىزدىگى مينيسترلىگى جۋىقتا نوپوس ءبىتىرۋ ونىمدىلىگىن جوعارىلاتۋ، شەكارادان كىرىپ-شىعۋ كۋالىگىن ينتەرنەتتە الدىن الا كەلىسىپ ءبىتىرۋ، موتورلى كولىكتەردى ولكە ىشىندەگى وزگە ايماق، قالالاردا تەكسەرۋ سياقتى حالىققا قولايلىلىق جاساۋدىڭ 16 ءتۇرلى شاراسىن اتقارۋدى العا قويىپ، حالىق بۇقاراسىنا ءتىپتى دە كوپ، ءتىپتى ويداعىداي قىزمەت وتەۋدى ۇيعاردى.
1. نوپوس ءبىتىرۋ ونىمدىلىگى جوعارىلاتىلادى
نوپوس بىتىرۋدە تەرەزەلىك قىزمەت وتەۋدىڭ العاشقى جاۋاپكەرلىك ءتۇزىمى اتقارىلىپ، ساقشىلاردىڭ نوپوس ءبىتىرۋ جاۋاپكەرلىگى باستان-اياق قۋزاستىرىلادى. نوپوس جانە ازاماتتىق كۋالىك بىتىرۋدە ساياساتقا، بەلگىلەمەگە ساي كەلگەنىمەن، ماتەريالدارى تولىق بولماعان حالىق بۇقاراسىنا جازباشا انىقتاما جازىپ بەرىپ، تولىقتاۋعا ءتيىستى ماتەريالدار تۇگەلدەي ۇقتىرىلادى. نوپوسىن تىزىمگە الدىرۋدى ءوتىنىش ەتۋدە تىزىمگە الدىرۋ ينفورماتسياسىندا ايقىن اعاتتىق بولسا، ءىس جۇزىندىك جاعدايىنا قاراي دەرەۋ وزگەرتىلەدى؛ تەكسەرىپ انىقتاۋعا تيىستىلەرى 10 كۇن ىشىندە تەكسەرىلىپ انىقتالادى، جاعدايى شىندىققا ۇيلەسپەيتىندەرىنە نوپوسىن وزگەرتپەۋدەگى سەبەپ اشالاپ تۇسىندىرىلەدى.
2. نوپوس ءبىتىرۋدى باقىلاۋ ارناسى ىركىلىسسىزدەندىرىلەدى
قوعام حاۋىپسىزدىگى مينيسترلىگى، سونداي-اق ولكەلىك، اۆتونوميالى رايوندىق، قالالىق قوعام حاۋىپسىزدىگى مەڭگەرمەلەرى، مەكەمەلەرى سىندى 2 دارەجەلى نوپوس باسقارۋ (قوعام حاۋىپسىزدىگى) تاراۋى ارناۋلى باقىلاۋ، اشكەرەلەۋ تەلەفونىن ورناتادى، بۇقارانىڭ نوپوس جونىندەگى ارىز-ارمانىن جانە اشكەرەلەۋ تەلەفونىن قابىلداعاننان كەيىن 15 كۇن ىشىندە باستاپقى تەكسەرۋ، ءبىر جايلى ەتۋ ناتيجەسى بۇقاراعا ۇقتىرىلادى.
3. جاس كۇيىندە ساقتالاتىن ونىمدەردى الدىمەن تەكسەرۋ ءتۇزىمى اتقارىلادى
قۇرلىقتىق شەكارا وتكەلدەرىندەگى تەكسەرۋ پۋنكتتەرى سۋ ونىمدەرى، كوكونىس، جەمىس - جيدەك تيەلگەن شەكارادان كىرىپ-شىعاتىن اۆتوكولىكتەرگە ىركىلىسسىز ارنا اشادى، ولاردى الدىمەن تەكسەرىپ، تەكسەرۋدى كۇتۋ ۋاقىتىن قىسقارتادى.
4. شەكارا اتتاپ وقيتىن وقۋشىلارعا شەكارالىق تەكسەرۋ بويىنشا ارناۋلى وتكەل اشىلادى
ءار كۇنى ساباققا باراتىن، ساباقتان قايتاتىن قاربالاس مەزگىلدە بيرما، لاوس سياقتى كورشى ەلدەردەن شەكارا اتتاپ وقۋعا كەلەتىن نەمەسە ەلىمىزدە ۋاقىتشا تۇراتىن شەتەل ازاماتتارىنىڭ بالالارىنا شەكارالىق تەكسەرۋ بويىنشا ارناۋلى وتكەل اشىلىپ، قولايلىلىق جاراتىلادى.
5. كەمەجاي وتكەلدەرىندە «شەكارالىق تەكسەرۋ كۋالىگىن ءبىتىرۋدى ۇقتىرۋ قاعازى» ءتۇزىمى اتقارىلادى
ءوتىنىش ەتۋشى كەمەجاي وتكەلدەرىندە شەكارالىق تەكسەرۋ پۋنكتىنەن قاتىستى كۋالىكتەردى ءوتىنىش ەتۋدە ماتەريالدارى تولىق بولماعان جاعدايدا، شەكارالىق تەكسەرۋ پۋنكتىندەگى مىندەت وتەۋشى قىزمەتكەرلەر «شەكارالىق تەكسەرۋ كۋالىگىن ءبىتىرۋدى ۇقتىرۋ قاعازى» كەستەسىن تولتىرىپ بەرىپ، كەم ماتەريالدارىنىڭ اتى سياقتى ينفورماتسيالاردى نەمەسە كۋالىكتىڭ تاراتىلماۋ سەبەبىن اشالاپ تۇسىندىرەدى.
6. ينتەرنەتتە شەكارادان كىرىپ-شىعۋ كۋالىگىن الدىن الا كەلىسۋ جونىندە قىزمەت وتەلەدى
ءوتىنىش ەتۋشى قوعام حاۋىپسىزدىگى تاراۋلارىنىڭ شەكارادان كىرىپ - شىعۋ راسمياتىن ينتەرنەتتە ءبىتىرۋ تەكشەسى ارقىلى ازاماتتىق ينفورماتسياسىن جانە كورسەتۋگە ءتيىستى كۋالىك تۇرلەرىن قاتىستى كەستەگە تولتىرادى، سونداي- اق ۋاعدالى ۋاقىتتا شەكارادان كىرىپ - شىققانداردى قابىلداۋ ورنىنداعى بەلگىلەنگەن جەردە قاتىستى كۋالىكتەردى بىتىرەدى.
7. شەكارادان كىرىپ-شىعۋ كۋالىگىن بىتىرۋدە «ىركىلىسسىز ارنا» اشىلادى
ءولىم-ءجىتىم، سالماقتى ناۋقاستاردى شۇعىل قۇتقارۋ، حال ۇستىندە جاتقانداردان حال سۇراۋ، سونداي-اق شەكارا سىرتىندا تۋىلعان توسىن وقيعالاردى ءبىر جايلى ەتۋ سياقتى ەرەكشە جۇمىس بابىمەن شۇعىل شەكارادان وتۋگە تۋرا كەلگەندە، قوعام حاۋىپسىزدىگى تاراۋلارىنىڭ شەكارادان كىرىپ-شىعۋ كۋالىگىن بىتىرۋدەگى «ىركىلىسسىز ارناسى» ارقىلى شەكارادان شۇعىل كىرىپ - شىعۋ كۋالىگىن الۋعا بولادى.
8. شەكارادان كىرىپ - شىعۋ كۋالىگىن ءبىتىرۋ ۋاقىتى اناعۇرلىم قىسقارادى
جاي پاسپورت جاساتاتىنداردىڭ، شياڭگاڭ، اۋمىن رايوندارىنا كىرىپ-شىعۋ جولحاتىن الاتىن نەمەسە وعان تاڭبا باستىراتىنداردىڭ، تايۋانعا باراتىن جولحاتىن الاتىن نەمەسە وعان تاڭبا باستىراتىنداردىڭ شەكارادان كىرىپ - شىعۋ كۋالىگىن جاساتۋ ۋاقىتى مىناداي: ادەتتەگى جاعدايدا جاي پاسپورت جاساتاتىندار، شياڭگاڭ، اۋمىن رايوندارىنا كىرىپ - شىعاتىن جولحاتىن، تايۋانعا باراتىن جولحاتىن الاتىنداردىڭ ءوتىنىشى قابىلدانعان سوڭ 10 كۇن ىشىندە قولىنا تيەدى؛ شياڭگاڭ، اۋمىن رايوندارىنا كىرىپ-شىعاتىن جولحاتى نەمەسە تايۋانعا باراتىن جولحاتى بارلاردىڭ شياڭگاڭ، اۋمىن، تايۋان رايوندارىنا باراتىن جولحاتىنا تاڭبا باستىرۋ ءوتىنىشى قابىلدانعان سوڭ 7 كۇن ىشىندە قولىنا تيەدى.
9. شەكارادان كىرىپ - شىعۋ كۋالىگىن ءوتىنىش ەتۋ كەستەسى ىقشامدالادى
جاي پاسپورت جاساتاتىندار، شياڭگاڭ، اۋمىن رايوندارىنا كىرىپ-شىعاتىن جولحات الاتىن نەمەسە وعان تاڭبا باستىراتىن جانە تايۋانعا باراتىن جولحاتىن الاتىن نەمەسە وعان تاڭبا باستىراتىنداردىڭ شەكارادان كىرىپ - شىعۋ ءوتىنىش كەستەسى بىرىكتىرىلىپ، «جۇڭگو ازاماتتارىنىڭ شەكارادان كىرىپ - شىعۋ كۋالىگىن ءوتىنىش ەتۋ كەستەسى» دەلىنەدى، ماتەريالدارى تولىق بولعاندارىنىڭ كەستەنى ءبىر جولدا تولتىرۋىنا، سونداي-اق ءبىر جولدىڭ وزىندە جوعارىداعى 3 ءتۇرلى كۋالىكتى ءوتىنىش ەتۋىنە بولادى.
10. شەكارادان كىرىپ - شىعۋ كۋالىگىندەگى سۋرەتتى ءبىر جىل ىشىندە قايتالاي ىستەتۋگە بولادى
16 جاستان جوعارعىلار (16 جاستى دا قامتيدى) پاسپورت جاساتقاندا، شياڭگاڭ، اۋمىن رايوندارىنا كىرىپ - شىعاتىن جولحات الۋدا جانە تايۋانعا باراتىن جولحاتىن الۋدا تالاپ بويىنشا كۋالىكتىڭ ەلەكتروندى نۇسقاسىنداعى سۋرەتىن جولداعاندار ءبىر جىل ىشىندە شەكارادان كىرىپ - شىعۋ ءوتىنىشىن قايتالاي ءوتىنىش ەتكەندە، كۋالىكتىڭ ەلەكتروندى نۇسقاسىنا قايتالاي سۋرەت بەرمەسە دە بولادى.
11. شەكارالىق تەكسەرۋدە ءوزى سەلبەسىپ تەكسەرۋ وتكەلىنىڭ قولدانىلۋ اياسى كەڭەيتىلەدى
تومەندەگى 5 ءتۇرلى ادامنىڭ ءوزى سەلبەسىپ تەكسەرۋ ارنالى وتكەلىنەن وتۋىنە بولادى: (1) ساۋساق تابى ينفورماتسياسى تۇسىرىلگەن ەلەكتروندى جاي پاسپورتپەن شەكارادان كىرگەن جۇڭگولىق ازاماتتار؛ (2) ساۋساق تابى ينفورماتسياسى تۇسىرىلگەن شياڭگاڭ، اۋمىن رايوندارىنا كىرىپ-شىعاتىن ەلەكتروندى جولحاتى بار نەمەسە وعان تاڭبا باستىرىپ العان ۇلى قۇرلىق تۇرعىندارى؛ (3) تايۋاندىق تۇرعىنداردىڭ ۇلى قۇرلىققا ساپارلاي كەلۋ جولحاتى جانە ءبىر جىلدان استام (ءبىر جىلدى قامتيدى) ۋاقىت ىشىندە ۇلى قۇرلىققا كوپ مارتە كەلىپ-كەتۋ جولحاتى بار نەمەسە وعان تاڭبا باستىرىپ العان تايۋاندىق تۇرعىندار؛ (4) شەتەل پاسپورتى بارلار جانە جۇڭگودا ماڭگىلىك قونىستانۋ كۋالىگىن العان شەتەلدىكتەر؛ (5) حالىقارالىق مەرزىمدى كەزەكشى ۇشاقتا قىزمەت وتەيتىن جۇڭگولىق ۇشاق قىزمەتكەرلەرى جانە شەكارادان ۋيزاسىز وتۋىنە بولاتىن نەمەسە ءبىر جىلدان استام ۋاقىت كۇشكە يە (ءبىر جىلدى قامتيدى) (C) جانە (Z) قىزمەت وتەۋ كۋالىگى بارلار نەمەسە قونىستانۋ كۋالىگى بار شەتەلدىك ۇشاق قىزمەتكەرلەرى.
12. ءوندىرىس حاۋىپسىزدىگىندەگى ۇنامسىز ارەكەتتەردى قوعامعا اشىق جاريالاۋ ءتۇزىمى اتقارىلادى
قۇرىلىس سالۋ، جوبالاۋ، قۇرىلىس جۇرگىزۋ جانە باقىلاۋ، ءبىر جايلى ەتۋ ورىندارى، باسقا دا قوعامدىق مەكەمە-ورىندارىنىڭ نەمەسە جەكەلەردىڭ ورتتەن ساقتانۋ حاۋىپسىزدىگىندەگى زاڭعا قايشى ارەكەتتەرى، ورتتەن ساقتانۋ تەحنيكاسىن تەكسەرەتىن قۇرىلىس چەرتوجىن تەكسەرۋ قۇرىلىمدارى، سونداي-اق ورتتەن ساقتانۋ قۇرىلعىلارىن قورعاۋ، جوندەۋ ىستەرىن تەكسەرەتىن، ورتتەن ساقتانۋ حاۋىپسىزدىگىن باعالايتىن، ورتتەن ساقتانۋ تەحنيكاسى جونىندە قىزمەت وتەيتىن قۇرىلىمداردىڭ زاڭ جانە بەلگىلەمەگە قايشى ارەكەتتەرىن قوعام حاۋىپسىزدىگى تاراۋلارى ينتەرنەتتە اشىق جاريالايدى، سونىمەن بىرگە، ول ونەركاسىپ جانە ينفورماتسيالاندىرۋ، تۇرعىن ءۇي جانە قالا - اۋىل قۇرىلىسى مينيسترلىگى، ونەركاسىپ - ساۋدا، بانكە، قامسىزداندىرۋ سياقتى تاراۋلار مەن مەكەمە- ورىندارىنا ۇقتىرىلىپ، قوعامدىق سەنىمدىلىك جۇيەسىنە ەنگىزىلەدى.
13. ينفورماتسيا حاۋىپسىزدىگى ونىمدەرىن ساتۋعا رۇقسات ەتۋ ىستەرىن باسقارۋ شارالارى كەمەلدەندىرىلەدى
«كومپيۋتەردىڭ ينفورماتسيا جۇيەسى حاۋىپسىزدىگىن ساقتاۋ ونىمدەرىن ساتۋعا رۇقسات ەتۋ كۋالىگى ينفورماتسياسىن باسقارۋ تەكشەسى» كەمەلدەندىرىلەدى، ينفورماتسيا حاۋىپسىزدىگىن ساقتاۋ ونىمدەرىن ءوندىرۋ ورىندارى ساتۋعا رۇقسات ەتۋ كۋالىگىن الۋعا ءوتىنىش بەرسە، ولارعا ينتەرنەتتە تەكسەرۋ، اقىل - كەڭەس بەرۋ، جەتەكشىلىك ەتۋ جونىندە قىزمەت كورسەتىلەدى، سونداي-اق ساتىپ الۋشى ساۋداگەرلەر مەن تۇتىنۋشى قاريدارلاردىڭ ءونىم جاعدايىن بىلۋىنە قولايلىلىق جاراتىلادى.
14. باقىلاۋعا الىنعان ادامدارعا زاڭ جاعىنان قىزمەت كورسەتىلەدى
شارت-جاعدايى بار ءىرى، ورتاشا قالالارداعى تۇرمەلەردە زاڭدىق كومەك بەرۋ ورتالىعى قۇرىلىپ، باقىلاۋعا الىنعاندار مەن ولاردىڭ وتباسىنداعىلارعا زاڭ جاعىنان كومەك كورسەتىلىپ، زاڭدىق كەڭەس بەرىلەدى.
15. موتورلى كولىكتەردى ولكەدەگى وزگە ايماق، قالالاردا تەكسەرۋ جۇزەگە اسىرىلادى
بۇكىل ولكە بويىنشا ءبىر تۇتاس تەكسەرۋ، باقىلاپ - باسقارۋ تەكشەسى ورناتىلعان ولكە، اۆتونوميالى رايون، قالالاردا ۇلكەن جولاۋشىلار اۆتوبۋزى جانە مەكتەپ اۆتوبۋزىنان سىرت، باسقا موتورلى اۆتوكولىكتەردى بۇكىل ولكە اياسىندا ءوڭىر اتتاپ تەكسەرتۋگە بولادى، تەكسەرۋ راسمياتىن مىندەتتەۋدىڭ قاجەتى جوق. شارت - جاعدايى بار ءىرى، ورتاشا قالالار سىناق تۇيىندەرىندە موتورلى كولىكتەردى تەكسەرۋگە الدىن الا كەلىسۋگە بولادى، موتورلى كولىك يەسىنىڭ ينتەرنەت نەمەسە تەلەفون ارقىلى اۆتوكولىكتەردى تەكسەرتۋگە الدىن الا كەلىسۋىنە بولادى.
16. شوفەرلەردىڭ ءبىر ولكەدەگى وزگە ايماق، قالالاردا ەمتيحانعا قاتىناسۋىنا بولادى
شوفەرلىك ەمتيحان بەرەتىندەر تىم كوپ بولىپ كەتكەن جەرلەردە ءبىر ولكەدەگى وزگە ايماق، قالاعا بارىپ ەمتيحانعا قاتىناسۋ سىناق رەتىندە اتقارىلادى، ەمتيحان شارت -جاعدايىن ازىرلەگەنىمەن، 2 ايعا دەيىن ەمتيحان بەرۋگە الدىن الا كەلىسە الماعاندار سول ولكەدەگى، رايونداعى، قالاداعى ولكە دارەجەلى قوعام حاۋىپسىزدىگى قاتىناس - تاسىمال ىستەرىن باسقارۋ تاراۋلارى بەلگىلەگەن وزگە جەردەگى ەمتيحان مايدانىنا بارىپ، 2 - نەمەسە 3 - ساباق تۇرىندەگى اۆتوكولىك جۇرگىزۋ قابىلەتىن سىناۋ ەمتيحانىنا قاتىناسۋىنا بولادى.
«شينجياڭ گازەتىنەن»