28-شىلدە كەشتە 12-كەزەكتى مەملەكەتتىك وقۋشىلار دەنە تاربيە جارىسى شاڭحايدىڭ دۇڭفاڭ دەنە تاربيە ورتالىعىندا شىمىلدىعىن اشتى. ج ك پ ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى ليۋ ياندۇڭ دەنە تاربيە جارىسىنىڭ باستالعاندىعىن جاريالادى.
وسى كەزەكتى مەملەكەتتىك وقۋشىلار دەنە تاربيە جارىسىن وقۋ-اعارتۋ مينيسترلىگى، مەملەكەتتىك دەنە تاربيە باس مەكەمەسى، كوممۋنيستىك جاستار وداعى ورتالىعىنىڭ ۇيىمداستىرۋىندا شاڭحاي قالالىق ۇكىمەت وتكىزگەن بۇرىنعى مەملەكەتتىك ستۋدەنتتەر دەنە تاربيە جارىسى مەن مەملەكەتتىك ورتا مەكتەپ وقۋشىلارى دەنە تاربيە جارىسىن بىرلەستىرگەننەن كەيىنگى تۇڭعىش كەزەكتى مەملەكەتتىك وقۋشىلار دەنە تاربيە جارىسى. وسى كەزەكتى دەنە تاربيە جارىسى «ىنتىماقتاسۋ، اتويلاپ العا ۇمتىلۋ، مادەنيەتتى بولۋ، دارىندى تاربيەلەۋدى» ماقسات ەتىپ، «سپورتپەن شۇعىلدانىپ، اقاۋسىز ەرجەتۋ» تانىمىن ورناتىپ، دەنساۋلىقتىڭ ماڭىزدىلىعىن كۇش سالا دارىپتەپ، وقۋشىلاردى دەنە تاربيە قيمىلىنىڭ ىشكەرىلەي ورىستەتىلۋىن جەبەپ، ەلىمىز وقۋشىلارىنىڭ قۇلشىنا العا ىلگەرىلەپ، ەرلىكپەن سايىساتىن جاستىق كەلبەتى مەن رۋحاني بەت-بەينەسىن ايگىلەدى.
بەيجيڭ ۋاقىتى كەشكى ساعات 8 دە دەنە تاربيە جارىسىنىڭ اشىلۋ سالتى سان مىڭداعان كورەرمەننىڭ ىنتىعا كۇتۋىندە باستالدى. الاڭعا كىرۋ مۇراسىمى مەن تۋ شىعارۋ مۇراسىمى اقىرلاسقاننان كەيىن وقۋ –اعارتۋ مينيسترى يۋان گۇيرىن مەن شاڭحاي قالاسىنىڭ قالا باستىعى ياڭ شيۇڭ جەكە-جەكە قۇتتىقتاۋ ءسوزىن سويلەدى.
اشىلۋ مۇراسىمى «ءتىلسىم شاڭحاي»، «ومىرشەڭدىك كۇشكە يە مەكتەپ»، «جالىندى جاستار»، «كورىكتى جۇڭگو» سىندى 4 بولەككە ءبولىنىپ وتكىزىلدى.
شاڭحايداعى جوعارى، ورتا، باستاۋىش مەكتەپتەردەن كەلگەن 5 مىڭنان استام وقۋشى اشىلۋ سالتىنىڭ باس كەيىپكەرى بولدى. ولاردىڭ سۇيىسپەنشىلىككە تولى تارتىمدى نومىرلەرى وسى كەزەكتى دەنە تاربيە جارىسىنا مىعىم نەگىز قالادى.
ۇعىسۋعا قاراعاندا، وسى كەزەكتى دەنە تاربيە جارىسىندا جەڭىل اتلەتيكا، مالتاۋ، باسكەتبول، ۆولەيبول، فۋتبول، سايىسكەرلىك، سىمبات گيمناستيكاسى، تاق-تۇق دوپ سياقتى 8 ءتۇرلى جارىس ءتۇرى ورنالاستىرىلۋدان سىرت، بريدج ويىنى سياقتى دوستىق جارىستار قوسىلعان. ءارقايسى ولكە، اۆتونوميالى رايون، توتە قاراستى قالا، شينجياڭ ءوندىرىس-قۇرىلىس بيڭتۋانى جانە شياڭگاڭ، اۋمىن سياقتى ەرەكشە اكىمشىلىك رايونداردان كەلگەن 34 ۋاكىلدەر ۇيىرمەسى جانە جارىسقا قاتىناسقان سپورتشىلار، جاتتىقتىرۋشى، تورەشىلەردەن 6 مىڭنان استام ادام دەنە تاربيە جارىسىنا قاتىناسقان.
جانە ءبىر حابارعا قاراعاندا، دەنە تاربيە جارىسى مەزگىلىندە مەكتەپتەردىڭ دەنە تاربيە عىلىمى ديسسەرتاتسياسىنان دوكلات بەرۋ ءماجىلىسى، جاستار مەن جاس وسپىرىمدەردىڭ سپورت جارىسىنا جاتپايتىن تۇرلەردى باعالاۋ، مەملەكەت دارەجەلى دەنە تاربيە ءداستۇرلى جارىس تۇرىندەگى مەكتەپتەردى باعالاۋ، مەملەكەت دارەجەلى 100 دەنە تاربيە ءداستۇرلى مەكتەبىن سيلاپ-ماداقتاۋ، مەكتەپتەردىڭ دەنەتاربيە حالىقارالىق تالقى ءماجىلىسى سياقتى قيمىلداردى ورىستەتىپ، وقۋشىلار دەنە تاربيە جارىسىنىڭ ءمانى مەن رولىن بارىنشا ساۋلەلەندىرەدى ەكەن.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.