نانجيڭ جاستار وليمپيادا سپورت جارىسىن ۇيىمداستىرۋ كوميتەتى 22-شىلدەدە نانجيڭنىڭ لۇيبويۋان باقشاسىندا جاستار وليمپيادا سپورت جارىسىنىڭ اشىلۋ سالتى جونىندەگى قاتىستى دايىندىق قىزمەتى جاعدايىن جاريالاپ، نانجيڭ جاستار وليمپيادا سپورت جارىسىنىڭ اشىلۋ سالتى ۇنەمشىلدىكتى دارىپتەپ، قوسىلاتىن قارجىسى ەلىمىزدىڭ دۇنيە جۇزىلىك جوعارى دارەجەلى اشىلۋ جانە جابىلۋ سالتىن وتكىزۋگە جۇمساعان قارجىلارىنىڭ ىشىندەگى ەڭ از ءبىر رەتكى اشىلۋ جانە جابىلۋ سالتىنا اينالاتىندىعىن ءبىلدىردى.
نانجيڭ جاستار وليمپيادا سپورت جارىسى اشىلۋ جانە جابىلۋ سالتىنىڭ باس رەجيسسەرى چىن ۋييا احپار جاريالاۋ ماجىلىسىندە وسى كەزەكتى جاستار وليمپيادا سپورت جارىسىنىڭ اشىلۋ سالتى ۇنەمشىلدىك، جاستىق داۋرەن جانە نانجيڭ قالاسىن بارىنشا كورنەكتىلەندىرۋ ەكەندىگىن ايتتى. ول: « وسى رەتكى اشىلۋ سالتىنداعى ونەرپازداردىڭ 90 پايىزىنان ارتىعى جاس وسپىرىمدەر بولىپ، اشىلۋ سالتى شامامەن 90 مينۋت وتكىزىلىپ، جۇمسالاتىن قارجىسى ون نەشە جىلدان بەرگى دۇنيە جۇزىلىك جوعارى دارەجەلى اشىلۋ سالتىنا جۇمسالعان قارجىلاردىڭ ىشىندەگى ەڭ ازى بولماق » دەدى.
چىن ۋييا: « نانجيڭ جاستار وليمپيادا سپورت جارىسى دۇنيە جۇزىندەگى جاستارعا دەنە تاربيە مەن مادەنيەت جاعىنان قارىم – قاتىناس ورناتۋدىڭ تاماشا ورتاسىن جاراتىپ، اشىلۋ جانە جابىلۋ سالتىندا حالىقارالىق دەڭگەيدى جانە جاستاردىڭ ومىرشەڭدىك قۋاتىن ايگىلەۋمەن بىرگە، جۇڭگو تاريحى مەن نانجيڭ كەشىرمەلەرىن تولىق بايىمداۋ كەرەك. نانجيڭ التى پاتشالىقتىڭ بايىرعى استاناسى بولعاندىقتان، مادەنيەت، كوركەمونەر جانە تاريحي فاكتورلارى ءبىرشاما مول، اشىلۋ سالتىن جوبالاۋدان بۇرىن قاتىستى قىزمەتكەرلەردىڭ بارلىعى زجينشانداعى استرونوميالىق وپسەرۆاتورياسى جانە يۇنميان مۋزەيحاناسى سياقتى ورىندارعا بارىپ ارناۋلى تەكسەرۋ-زەرتتەۋ جۇرگىزدى. جاستار وليمپيادا سپورت جارىسى وليمپيادا سپورت جارىسىنان پارىقتى بولاتىندىقتان، اشىلۋ جانە جابىلۋ سالتىنا قاتىناساتىن ونەرپازدار جاس وسپىرىمدەردى نەگىز ەتىپ، جۇڭگو ارمانىن تولىق ايگىلەۋ وزەك ەتىلدى » دەدى.
اشىلۋ جانە جابىلۋ سالتىن باسقارۋ تاراۋىنىڭ كومەكشى باستىعى شۇي جۇن : « نانجيڭ جاستار وليمپيادا سپورت جارىسىنىڭ اشىلۋ سالتى قوناق قابىلداۋ جانە كوركەمونەر ءنومىرىن قويۋ سىندى ەكى بولىمنەن قۇرالادى، كەزەكتە بارلىق قىزمەت ‹ تارتىمدى دا ۇنەمشىل بولۋدى دارىپتەپ، جۇڭگو ەرەكشەلىگىن ايگىلەۋ › نىساناسىن توڭىرەكتەي جۇرگىزىلۋدە. ويىن نومىرلەرىن كورسەتۋدە جاستاردىڭ اقىل – پاراساتى، ءتىلى جانە ءتاسىلى ارقىلى بەينەلەنىپ، جاستار وليمپيادا سپورت جارىسىنىڭ توركىنى مەن جاستىق داۋرەندەرى تولىق توعىستىرىلىپ، ‹ جۇڭگو ارمانى › تاقىرىبى كورنەكتىلەندىرىلىپ، جۇڭگو ارمانى مەن دۇنيە ءجۇزىنىڭ ارمانى جانە جۇڭحۋا مادەنيەتى مەن دۇنيە ءجۇزىنىڭ مادەنيەتى توعىستىرىلماقشى » دەدى.
نانجيڭ جاستار وليمپيادا سپورت جارىسىنىڭ اشىلۋ سالتى بەيجيڭ ۋاقىتى بويىنشا 2014-جىلى 16-تامىز ساعات 20 دا نانجيڭ وليمپيك دەنە تاربيە ورتالىعىنىڭ دەنە تاربيە الاڭىندا وتكىزىلمەكشى. سول كەزدە ەلىمىزدىڭ ءىشى – سىرتىنان كەلگەن ساياسي قايراتكەرلەر، حالىقارالىق وليمپيادا سپورت كوميتەتىنىڭ مۇشەلەرى، شەتەلدىك قۇرمەتتى قوناقتار جانە دۇنيەنىڭ جەر-جەرىنەن كەلگەن 6 مىڭعا جۋىق سپورتشى، سونداي -اق كومانداعا ىلەسە كەلگەن قىزمەتكەرلەر مەن ناق مايدانداعى كورەرمەندەر بولىپ، شامامەن 60 مىڭعا جۋىق ادام اشىلۋ سالتىن تاماشالايدى ەكەن.
ۇعىسۋعا قاراعاندا، اشىلۋ سالتىنداعى الاۋ جەتكىزۋشىلەر، تۋ ۇستاۋشىلار، سەرت بەرۋشىلەر بەكىتىلىپ بولىپتى، اشىلۋ سالتىنداعى الاۋدى تۇتاندىرۋشىعا ءبىر جاس سپورتشىنى ورنالاستىرعان ەكەن.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.