چيڭداۋدا وتكىزىلگەن مەملەكەتتىك مالتاۋ جۇلدەلى جارىسى جانە ازيا سپورت جارىسىنىڭ سارالاۋ جارىسىندا لوندون وليمپيادا سپورت جارىسىنىڭ اعا جۇلدەگەرى سۇن ياڭ «تيىم بۇيرىعى كۇشىنەن قالعاننان» كەيىنگى قاتىناسقان تۇڭعىش مايدانعى جارىستىڭ جەڭىسىنە قول جەتكىزىپ، ەرلەردىڭ 200 مەترلىك ارالىققا ەركىن مالتاۋ جارىسىندا ءبىر مينۋت 46 سەكۋند 04 تاقىلدىق ناتيجەمەن اعا جۇلدەگەرلىكتى ەنشىلەپ، ناتيجەسى بيىلعى دۇنيە جۇزىلىك قاتارعا تۇرعىزۋدا 5 –ورىندا بولىپ، وڭتۇستىك كورەيا سپورتشىسى پياۋ تايحىڭنىڭ بيىلعى ەڭ جاقسى ناتيجەسىنەن 0.01 سەكۋند تەز بولعان.
سۇن ياڭ دايىندىق جارىستا بىرىنشىلىكتى يەلەۋدەي ناتيجەسىمەن شەشۋشى جارىسقا كىرىپ، العاشقى 50 مەتردەن كەيىن اعالاپ العا شىعىپ، قارسىلاستارىن شاڭ قاپتىردى، ەكىنشى بولعان حىنان كومانداسىنداعى لي يۇنچيدان 1.7 سەكۋند بۇرىن كەلدى، جىجياڭ كومانداسىنداعى ماۋ فيليان ءبىر مينۋت 48 سەكۋند 60 تاقىلدىق ناتيجەمەن ءۇشىنشى بولدى.
سۇن ياڭ: «كوڭىل كۇيىم وتە جاقسى، ويتكەنى قالىپقا ءتۇسۋ ۋاقىتى ءبىرشاما قىسقا بولعاندىقتان، ءوزىمنىڭ بۇل ناتيجەمە كوڭىلىم تولادى» دەدى. ول بىلتىر قاراشا ايىندا كۋالىكسىز اۆتوكولىك ايداۋ سەبەبىنەن مەملەكەتتىك كوماندا مەن جىجياڭ دەنە تاربيە ينستيتۋتى جاتتىعۋعا، جارىسقا، بارلىق قوعامدىق ساۋدا سيپاتىندىق قيمىلدارعا قاتىناسۋىنا تيىم سالۋ بۇيرىعىن شىعارعان بولاتىن، بيىل ساۋىردە «تيىم بۇيرىعى كۇشىنەن قالدىرىلعان»، ال ونىڭ باس جاتتىقتىرۋشىسى جۋ جىگىن دەنساۋلىق سەبەبىنەن قىزمەتتەن شەگىنگەندىكتەن، قازىر ول مەملەكەتتىك مالتاۋ كومانداسىنىڭ بۇرىنعى باس جاتتىقتىرۋشىسى جاڭ يادۇڭعا ىلەسىپ جاتتىعۋ جاساۋدا.
سۇن ياڭ: « ەكى رەت (باقايقۇرت) وپەراتسيا جاساتقاننان بەرى دەنساۋلىعىمنىڭ قالپىنا كەلۋى وتە باياۋ بولدى، قالىپتى ادامدار 10 كۇن دە ءبىر اپتا ىشىندە وپەراتسيا ءجىبىن العىزسا، ال ماعان ءبىر اي ۋاقىت كەتىپ، جاتتىعۋعا قاتىناسۋ ۋاقىتىمدى كەشىكتىرىپ الدىم. قازىر جاتتىقتىرۋشىمەن بىرگە ماشىقتانىپ، دەنساۋلىعىمدى تەز ارادا قالپىنا كەلتىرگەنىمە وتە قۋانىشتامىن، ازيا سپورت جارىسىنا بولعان سەنىمىم دە ارتا ءتۇستى» دەدى. ول الداعى جەردە 400 مەترلىك جانە ءبىر مىڭ 500 مەترلىك ەركىن مالتاۋ جارىسىنا قاتىناسپاقشى.
سول كۇنى ەرلەردىڭ 100 مەترلىك ارالىققا شالقالاپ مالتاۋ جارىسىنىڭ دۇنيە جۇزىلىك رەكوردىن جىجياڭ كومانداسىنان كەلگەن جاس ساڭلاق شۇي جيايۇي 52 سەكۋند 34 تاقىلدىق ناتيجەمەن جاڭالادى ءارى وسى ناتيجەسىن بيىلعى دۇنيە جۇزىلىك قاتارعا تۇرعىزۋدا 1-ورىنعا قويۋعا بولادى، ونىڭ ۇستىنە، جاپونيانىڭ ايگىلى سپورتشىسى رۋجياڭ ليڭجيەنىڭ 52 سەكۋند 57 تاقىلدىق ناتيجەسىنەن اسىپ ءتۇستى. بەيجيڭ كومانداسىنداعى جاڭ يۇي 54 سەكۋند 93 تاقىلدىق ناتيجەمەن ەكىنشىلىكتى، سىچۋان كومانداسىنداعى جين يان 55 سەكۋند 52 تاقىلدىق ناتيجەمەن ۇشىنشىلىكتى ەنشىلەدى.
جارىستان كەيىن شۇي جيايۇي: «وسنداي ناتيجەگە قول جەتكىزەمىن دەپ ويلاماپپىن، بارلىعى جاپالى ماشىقتانۋدىڭ ارقاسى بولار. بۇل مەنىڭ ازيا سپورت جارىسىنا قاتىناسۋعا بولعان سەنىمىمدى ارتتىردى. ازيا سپورت جارىسىنداعى ەڭ مىقتى قارسىلاسىم رۋجياڭ ليڭجيە» دەدى.
ايەلدەردىڭ 400 مەترگە ەركىن مالتاۋ شەشۋشى جارىسىندا جىجياڭ كومانداسىنان بي يرۇڭ 4 مينۋت 6 سەكۋند 18 تاقىلدىق ناتيجەمەن اعا جۇلدەگەر بولىپ، ناتيجەسىن بيىلعى دۇنيە جۇزىلىك قاتارعا تۇرعىزۋدا 10 -ورىنعا قويۋعا بولادى. ازاتتىق ارميا كومانداسىنان جاڭ يۇيحان مەن شاندۇڭ كومانداسىنان شين شين جەكە-جەكە ەكىنشىلىكتى جانە ۇشىنشىلىكتى ەنشىلەدى. ايەلدەردىڭ 100 مەترلىك ارالىققا باقاشا مالتاۋ جارىسىنىڭ اعا جۇلدەگەرلىگىن جياڭسۋ كومانداسىنان كەلگەن شى جيڭلين ءبىر مينۋت 7 سەكۋند 16 تاقىلدىق ناتيجەمەن ەنشىلەپ، ناتيجەسى بيىلعى دۇنيە جۇزىلىك قاتارعا تۇرعىزۋدا 9 -ورىندا. شانشي كومانداسىنان حى يۇن مەن حىنان كومانداسىنان جاڭ شينيۇي ەكىنشىلىكتى جانە ۇشىنشىلىكتى ەنشىلەدى.
سول كۇنى ەرلەردىڭ 200 مەترلىك ارالىققا كەۋدەمەن مالتاۋ شەشۋشى جارىسى دا وتكىزىلىپ، تەڭىز ارمياسى كومانداسىنان ۋاڭ پۋدۇڭ ءبىر مينۋت 57 سەكۋند 33 تاقىلدىق ناتيجەمەن باس جۇلدەنى جەڭىپ السا، حىبەي كومانداسىنىڭ ايگىلى ساڭلاعى حاۋ يۇن 0.02 سەكۋندتىق بولماشى پارىقپەن ەكىنشىلىكتى، ۇشىنشىلىكتى شاندۇڭ كومانداسىنان كەلگەن جاڭ چيبيڭ ەنشىلەدى. بۇدان سىرت، ايەلدەردىڭ 100×4 مەترلىك ارالىققا كۇش جالعاپ ەركىن مالتاۋ جارىسىندا تاڭ ي باستاعان شاڭحاي كومانداسى 3 مينۋت 40 سەكۋند 45 داقىلدىق ناتيجەمەن اعا جۇلدەگەر بولسا، لياۋنيڭ كومانداسى مەن جياڭسۋ كومانداسى جەكە-جەكە ەكىنشىلىكتى جانە ۇشىنشىلىكتى ەنشىلەدى.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.