مەملەكەتتىك كومانداداعى سپورتشىلار مەملەكەتتىك گيمناستيكا جۇلدەلى جارىسىندا باسىم ورىندى يەلەدى. 11-مامىرداعى مەملەكەتتىك جۇلدەگەرلىككە تالاسۋ جارىسىنىڭ جەكە ادامدىق شەشۋشى جارىسىندا گۇيجوۋلىق دىڭ شۋدي مەن ليۋ رۇڭبيڭ ءبىرىنشى، ەكىنشىلىكتى ەنشىلەسە؛ فۋجياندىق سپورتشى ياۋ جيننان ايەلدەردىڭ جەكە ادامدىق ءتۇرىنىڭ اعا جۇلدەگەرلىگىن قانجىعاسىنا بايلادى.
دىڭ شۋدي مەن ليۋ رۇڭبيڭ كىشكەنتاي كەزدەرىنەن گۇيجوۋدا بىرگە وسكەن مەملەكەتتىك كومانداداعى جاس ساڭلاقتار، 10-مامىرداعى تولىمدىلىق الۋ جارىسىندا ولار جەكە ادامدىق تۇردەن الدىڭعى ەكى ورىندى يەلەگەن، شەشۋشى جارىستا دۇنيە جۇزىلىك جۇلدەگەرلىككە تالاسۋ جارىسىنىڭ اعا جۇلدەگەرى لين چاۋپاندا سايىسقا ءتۇستى، الدىڭعى ءۇش جارىس تۇرىندە ليۋ رۇڭبيڭ مەن دىڭ شۋدي الدىن بەرمەدى، ءتورتىنشى كەزەكتەگى اعاش اتتان سەكىرۋ تۇرىنەن كەيىن، بەلگيا دۇنيە جۇزىلىك جۇلدەگەرلىككە تالاسۋ جارىسى قوس تۋرنيك ءتۇرىنىڭ اعا جۇلدەگەرى لين چاۋپان 15.1 ۇپايلىق تاماشا ناتيجەمەن ليۋ رۇڭبيڭدى باسىپ وزىپ، ەكىنشى بولىپ، ليۋ رۇڭبيڭ ءۇشىنشى ورىنعا ءتۇستى. ءۇش مىقتى اراسىنداعى باسەكە ەڭ سوڭعى كەزەكتەگى جالاڭ تۋرنيككە جالعاستى، ەڭ الدىمەن مايدانعا شىققان لين چاۋپاننىڭ تۋرنيكتەگى ارەكەتى ايتارلىقتاي بولعانىمەن، جەرگە تۇسكەندە ەكى قولىمەن جەر تىرەپ قالۋداي اعاتتىق جىبەرگەندىكتەن، ليۋ رۇڭبيڭ وسى ورايدا باسىپ وزىپ، ەكىنشى بولدى، دىڭ شۋدي اعا جۇلدەگەر بولدى.
اعا جۇلدەگەر بولعان دىڭ شۋدي جارىستان كەيىن قۋانىشتى تۇردە: «وسىدان بۇرىن قاتىناسقان مەملەكەتتىك سپورت جارىسى مەن شىعىس ازيا سپورت جارىسىنىڭ جالپىلىق جارىس تۇرىندە ەكىنشى، ءۇشىنشى بولعانمىن، بۇل رەت اعا جۇلدەگەر بولعانىما وتە قۋانىشتامىن » دەدى. بۇل رەتكى اعا جۇلدەگەر بولۋ دىڭ شۋدي جونىنەن وتە ماڭىزدى، ياڭ ۋي، چىن يبيڭ قاتارلى ۇزدىك سپورتشىلار ارت-ارتىنان شەگىنگەننەن كەيىن، ەلىمىز گيمناستيكا كومانداسىنىڭ جاعدايى قيىن-قىستاۋ كۇيگە ءتۇستى، ال بۇل دىڭ شۋديدىڭ مەملەكەتتىك كومانداداعى قيان-كەسكى باسەكەدە ءوز ورنىن جوعارىلاتۋىنا ءتيىمدى ەكەنى داۋسىز.
مەملەكەتتىك گيمناستيكا كومانداسىنىڭ جەتەكشىسى يە جىننان سپورتشىلاردى باعالاعاندا: « دىڭ شۋديدىڭ ءار جاقتاعى كۇش- قۋاتى ورتاشا دەڭگەيدەگى سپورتشى، العا ىلگەرىلەۋى ءبىرشاما تەز، الداعى جەردە ورىنداۋ شەبەرلىگىن ارتتىرۋ جاعىنا كۇش سالۋ كەرەك. بۇل جاعىندا لين چاۋپاننىڭ ارەكەت ريتىمى ءبىرشاما جاقسى، اسىرەسە قوس تۋرنيكتە ارەكەتتى ورىنداۋ شەبەرلىگى وتە جوعارى. ليۋ رۇڭبيڭنىڭ دەنە ساپاسى دىڭ شۋدي مەن لين چاۋپانعا جەتپەگەنىمەن، جارىستا جەڭىسكە جەتۋ سالىستىرماسى نەداۋىر جوعارى» دەدى.
مۇنان تىس، ەرلەر كومانداسىنان جەكە تۇردەن ءبىرشاما ەرەكشەلىگى بار سپورتشىلار جارىققا شىقتى، ماسەلەن، اسپا شىعىرىق تۇرىنەن ليۋ ياڭ، اعاش اتتان سەكىرۋ تۇرىنەن ۋاڭ بو، ەركىن گيمناستيكا تۇرىنەن ۋاڭ حاۋران سياقتىلار. يە جىننان الداعى جەردە جالپىلىق سايىس ءتۇرى مەن جەكە ءتۇر جاعىندا كوبىرەك ىزدەنىس جاساپ، جارىس تاكتيكاسى نەگىزىندە قۇرىلىمى ۇيلەسىمدى كوماندا قۇرىپ، ريو-دە-جانە-يرودا وتكىزىلەتىن وليمپيادا سپورت جارىسىنا دايىندالاتىندىقتارىن ايتتى.
ايەلدەر جاعىندا ياۋ جينناننىڭ ناتيجەسى كورنەكتى بولىپ، 4 تۇردەگى جارىستا باستان-اياق باسىم ورىندى يەلەپ، ەڭ سوڭىندا 59.4 نومىرلىك ناتيجەمەن ايەلدەردىڭ جالپىلىق جارىس تۇرىنەن اعا جۇلدەگەرلىكتى ەنشىلەدى. جارىستان ىلگەرى ياۋ جينناننىڭ ەڭ مىقتى قارسىلاسى سانالعان شاڭ چۇنسۇڭ تەڭگەرمە اعاش ويىنى مەن ەركىن گيمناستيكا تۇرىندە ءوز رولىن ايتارلىقتاي ساۋلەلەندىردى، الايدا اعاش اتتان سەكىرۋ تۇرىندە اعاتتىق تۋىلعاندىقتان سوڭىندا ەكىنشى بولدى.
يە جىننان: « ەگەر سپورتشىلارعا توقتالار بولساق، ياۋ جينناننىڭ جالپىلىق قۋاتى مىعىم، شاڭ چۇنسۇڭدە اعاش اتتان سەكىرۋدە ءالى دە ولقىلىقتار بار، تان جياشين تەڭگەرىلمەلى اعاش پەن ەركىن گيمناستيكا تۇرىنە ەندى ۇيىرلەسۋدە، ول بۇرىن ولكەدە اعاش اتتان سەكىرۋ مەن باسپالداقشا تورنيك تۇرىنە عانا جاتتىققان » دەدى. چىڭ في قاتارلى ساقا سپورتشىلار جارىس مايدانىنان شەگىنگەننەن كەيىن قازىرگى ايەلدەر كومانداسىنداعى باستى ماسەلە دارىندىلاردىڭ كەمشىلدىگى ەكەن.
بۇرىنعى جاتتىعۋ بارىسىندا سپورتشىلاردىڭ ارەكەتىنىڭ قيىندىق دارەجەسى بارعان سايىن ارتىپ، جارالانۋ، سىرقاتتانۋ سياقتىلاردى كەلتىرىپ شىعارعان. ياۋ جيننان وسى جولى اۋرۋ بولا تۇرسادا، جارىسقا قاتىناسقان. ياۋ جينناننىڭ جاتتىقتىرۋشىسى ۋاڭ چۇنسى جارىستان كەيىن بۇل رەتكى جارىستا جاعدايدى وڭاۋ نەگىز ەتىلگەندىكتەن، ارەكەتتىڭ قيىندىق دارەجەسىنىڭ ءسال تومەندەگەندىگىن ايتتى.
رەداكتورى: ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.