ەرىكتى ءتىلشى يۇي بيڭ
31 جاسقا كەلگەن م xx ءوزىن ساقشىمىن دەپ، توراپتا « ماحابباتتاسىپ »، « نەكەلەنۋدى » جەلەۋ ەتىپ، 3 ازاماتتىڭ 180 مىڭ يۋان اقشاسىن الداپ اكەتكەن. كەزەكتە، قىلمىس كۇماندىسى م xx ءدوربىلجىن اۋداندىق قوعام حاۋىپسىزدىگى مەكەمەسى جاعىنان زاڭ بويىنشا قولعا الىندى.
2011-جىلى شىلدەدە التاي ايماعىنىڭ شىڭگىل اۋدانىندا تۇراتىن م xx « توراپ ارقىلى تابىسۋ » الدامكوستىگىمەن شۇعىلدانعاندىعى سەبەپتى جەرگىلىكتى ورىنداعى قوعام حاۋىپسىزدىگى ورگانى جاعىنان قاماۋعا الىنعان ەدى. ەكى جىلدان كەيىن ول ءدوربىلجىن اۋدانىنا كەلىپ، تىڭ تىرشىلىگىن باستاماقشى بولعان. الايدا، جۇمىس ىستەپ تاپقان ماردىمسىز اقشاسىنا قاناعات قىلماعان ونىڭ ارام نيەتى اسقىنىپ، ۇيرەنشىكتى كاسىبىن قولعا الىپ، توراپقا شىعىپ تۇزاق قۇرىپ، « ماحابباتتاسىپ نەكەلەنۋدى » جەلەۋ ەتىپ، قارسى جاقتىڭ اقشاسىن الداۋمەن اينالىسادى.
2013-جىلدىڭ سوڭىندا م xx قىزمەتىنەن باس تارتىپ، « توراپتا ماحابباتتاسۋ » كاسىبىنە دەن قويا كىرىسەدى. ول ىرىقتىلىقپەن 30 دا 40 جاس ارالىعىنداعى ەرلەردى كوكەگىنە قوسىپ، ولارمەن اڭگىمەلەسەدى، ءوزىن ايەل ساقشى اتاپ، تاعى كوپتەگەن تۋىستارىنىڭ ساۋدامەن جانە اكىمشىلىكپەن اينالىساتىنعىن ايتادى ءارى توراپتان سۇلۋ بويجەتكەندەردىڭ سۋرەتىن ءتۇسىرىپ، تانىسقان ەر توراپتاستارىنا جولدايدى.
ونىڭ ازعىرۋىندا تەز ارادا قىران اتتى ءبىر ەر توراپتاسى ونىمەن ماحابباتتاسۋ ويىن بىلدىرەدى. قىراننىڭ سەنىمىنە يە بولعان سوڭ، ول ىلگەرىندى-كەيىندى اكە-شەشەسىن ەمدەتۋ، وعان قىزمەت تاۋىپ بەرۋ، ءۇي ساتىپ الۋعا تولەنەتىن العاشقى سومانى تاپسىرۋ، توي جاساۋعا قاجەتتى بۇيىمداردى ساتىپ الۋ سياقتى سىلتاۋلارمەن قىراننان اقشا سۇرايدى، قىران ونىڭ ويدان قۇراستىرعان وتىرىكتەرىنە مەيلىنشە سەنىپ، 4 ايدىڭ ىشىندە وعان ىلگەرىندى – كەيىندى 80 مىڭ يۋاننان ارتىق اقشا جولداپ بەرەدى.
وسى بارىستا قىران تالاي رەت ونىمەن كەزدەسۋدى ورتاعا قويادى. الايدا، م xx قىزمەتتىڭ قاربالاستىعى مەن ءىس ساپارعا شىعۋدى سىلتاۋراتىپ، كەزدەسۋدىڭ ۋاقىتىن كەشەۋىلدەتە بەرەدى، كەيىن كەلە مۇندا ءبىر سىردىڭ بارلىعىن بايقاعان قىران ءدوربىلجىن اۋدانىنا كەلىپ، وعان تەلەفون بەرسە، تەلەفونىن قابىلدامايدى ءارى ونىڭ دەرەگىن دە تابا المايدى، سونىمەن قىران دەرەۋ ءدوربىلجىن اۋداندىق قوعام حاۋىپسىزدىگى مەكەمەسىنە دەلو مالىمدەيدى. ونى قايران قالدىرعانى، م xx وسىنداي تاسىلمەن تاعى ىلەدەگى ەكى ەر توراپتاسىنىڭ 100 مىڭ يۋانىن الداپ اكەتكەن ەكەن.
الدامكوستىگىنىڭ اشكەرەلەنىپ قالعاندىعىن سەزگەن م xx ءدوربىلجىن اۋدانىنداعى مايعا العان ءۇيىن دەرەۋ قايتارىپ، قولفون ءنومىرىن اۋىستىرىپ، الداپ العان اقشاسىن شەشەسىنىڭ بانكە كارتۋچكاسىنا كىرگىزىپ، بيڭتۋان اۋىل شارۋاشىلىق 9-ديۆيزياسىنىڭ ىنتىماق ەگىس الاڭىنا بارىپ جاسىرىنىپ الادى. الايدا، ءوزىن ەشكىم دە تابا المايدى دەپ ويلاعان م xx ءۇش كۇننەن كەيىن ساقشىلاردىڭ جەتىپ كەلەرىن قايدان ءبىلسىن.
21-ساۋىردە حالىق ساقشىلارى قىلمىس كۇماندىسى م xx تى مايعا العان ۇيىنەن قولعا الىپ، الداپ اكەتكەن 160 مىڭ يۋان اقشانى قايتارىپ الادى.
كەزەكتە بۇل دەلو ىشكەرىلەي تەكسەرىلۋ ۇستىندە.
اۋدارعان-احات سانياز ۇلى
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز ، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مسالى: «تارباعاتاي اقپارات تورابىنان» الىندى.