ايماعىمىز ەرەكشە ءىرى جەلىلەس الدامكوستىك دەلوسىن تەكسەرىپ انىقتادى

 ءتىلشىمىز جاڭ چينياۋ،ەرىكتى ءتىلشى شۇي يانحۇڭ

  جۋىقتا شاۋەشەك قالالىق قوعام حاۋىپسىزدىگى مەكەمەسى تولى اۋداندىق قوعام حاۋىپسىزدىگى مەكەمەسىمەن سايكەسىپ، تايىردىڭ ( بالاما ات ) « شوفەرلىك ەمتيحانىنان وتكىزىپ بەرۋگە كەپىلدىك ەتۋ » اتىنداعى جەلىلەس الدامكوستىك دەلوسىن تەكسەرىپ انىقتادى. دەلوعا قاتىستى سوما 400 مىڭ يۋاننان اساتىن بولىپ، كەزەكتە تايىر قولعا الىندى.

  زيانكەستىككە ۇشىراۋشىلاردىڭ دەلو مالىمدەۋى

  22-قاڭتاردا زيانكەستىككە ۇشىراۋشى سۋ xx شاۋەشەك قالالىق قوعام حاۋىپسىزدىگى مەكەمەسىنىڭ قىلمىستىق ىستەر ۇلكەن اترەتىنە تايىردىڭ 16 مىڭ يۋان اقشاسىن الداپ اكەتكەندىگى جونىندە دەلو مالىمدەيدى.

  2013-جىلى ناۋرىزدا سۋ xx باسقالار ارقىلى تايىرمەن تانىسقاندىعىن، تايىردىڭ وعان B2      دارەجەلى شوفەرلىك كۋالىگىن   ءبىتىرىپ بەرمەكشى بولعاندىعىن، تايىر 2013-جىلى 20-تامىزدا شوفەرلىك كۋالىكتى قولىنا  تيگىزۋگە ۋادە بەرگەندىگىن، الايدا سودان كەيىن تايىر ءىز-توزسىز كەتىپ، ەش حابار بولماعاننان كەيىن عانا ءوزىنىڭ الدانىپ قالعاندىعىن بىلگەندىگىن ايتادى.

   سۋ xx حالىق ساقشىلارىنا ءوزى بىلەتىن زيانكەستىككە   ۇشىرۋاشىلاردىڭ 40 تان اساتىندىعىن ايتقان.

  دەلو جاعدايىنا توقتالعاندا

  تايىر تولى اۋدانىنىڭ ادامى، 1999-جىلى باسقىنشىلىق جاساۋ قىلمىسىمەن 10 جىلدىق مەرزىمدى قاماق جازاسىنا ۇكىم ەتىلىپ، 2007-جىلى جازا مەرزىمى تولىپ بوساتىلعان.

  تايىر تۇرمەدەن شىققان سوڭ كاسىپ تابا الماي، قوعامدا سەندەلىپ قالادى. اقشانىڭ جوقتىعىنان، زاتتىق تۇرمىسىنىڭ قاجەتىن قاناعاتتاندىرا الماعان ول « شوفەرلىك ەمتيحانىنان وتكىزىپ بەرۋگە كەپىلدىك ەتۋ » اتىمەن الدامكوستىك ىستەۋ ارام  نيەتىنە كەلەدى.

  2010-جىلى تايىر باسقالارعا ءوزىنىڭ شوفەرلىك كۋالىك   بىتىرە الاتىندىعىن،  اعاسىنىڭ شيحۋ قالالىق اۆتوموبيل باسقارۋ بولىمشەسىنىڭ ەكىنشى باستىعى ەكەندىگىن، اۆتوموبيل ۇيرەنبەي، ەمتيحان بەرمەي-اق B2 دارەجەلى شوفەرلىك كۋالىگىن ءبىتىرىپ بەرە الاتىندىعىن ايتىپ لەپىرەدى.

  تايىر الدامكوستىك ىستەۋ ءۇشىن، تولىق دايىندىق كورەدى. ول باسقالاردىڭ شوفەرلىك كۋالىگىن الۋعا بولعان ىنتىزارلىعىنان پايدالانىپ، زاڭدىق ساۋاتى تومەن شارۋالاردى الداۋ وبيەكتىسى ەتەدى.

  سەنىمدىلىگىن ارتتىرۋ    ءۇشىن، ول زيانكەستىككە ۇشىراۋشىلاردىڭ بارلىعىن ناقتىلى شوفەرلىككە تاربيەلەۋ مەكتەبىنە تىزىمگە الدىرادى ءارى ولارمەن توقتامداسىپ، ەگەر كۋالىكتى بىتىرە الماسا، اقشانى تولىعىمەن قايتارىپ بەرۋگە كەلىسەدى.
تايىر ءارقايسى زيانكەستىككە ۇشىراۋشىدان ورتا ەسەپپەن 11 مىڭ يۋاننان اقشا العان، تىزىمگە الدىرۋ اقىسىنا 3 مىڭ 500 يۋانىن شىعارىپ تاستاعاندا، قالعان 7 مىڭ 500 يۋانىن ءوزى قىمقىرىپ قالادى.

  تايىر كۇيىنىڭ كەلىسىنشە ايلاسىن اسىرا تۇسەدى. ول شوفەر ما xx پەن ءتىل بىرىكتىرىپ، زيانكەستىككە ۇشىراۋشىلاردى تەك ما xx تىڭ اۆتوموبيلىنە  وتىرىپ، شيحۋ قالاسىنا بارىپ ەمتيحان بەرۋگە بولاتىندىعىن، ءار رەتىندە ءار ادامنان 350 دە 500 يۋان اقى الىناتىندىعىن ايتادى ءارى بەلگىلەنگەن مەيمانحانادا جاتۋدى تاپسىرادى. ول قولفونىمەن زيانكەستىككە ۇشىراۋشىلاردى سۋرەتكە تارتىپ، ەمتيحاندا پايدالاناتىندىعىن ايتىپ، ءاربىر ادامنان تاعى 20 دا 50 يۋان  جيناعان.

  قولعا ءتۇسىرۋ

  2014-جىلى 18-اقپاندا شاۋەشەك قالالىق قوعام حاۋىپسىزدىگى مەكەمەسى تولى اۋداندىق قوعام حاۋىپسىزدىگى مەكەمەسىنىڭ سەلبەسۋىندە، قىلمىس كۇماندىسىن ءساتتى قولعا تۇسىرەدى.

  شاۋەشەك قالالىق قوعام حاۋىپسىزدىگى مەكەمەسى ەكونوميكالىق بارلاۋ ۇلكەن اترەتىنىڭ جەتەكشىسى، ۇلكەن اترەت باستىعى گو جى-ۋ العاشقى دەلو مالىمدەۋ تەلەفونىن قابىلداعان سوڭ ىلگەرىندى – كەيىندى  تاعى 10 عا جۋىق ادام تايىرعا الدانعاندىعى جونىندە دەلو مالىمدەگەندىگىن، سوندىقتان ولار دەلونى ءوزارا بىرىكتىرىپ، دەلو تۇرعىزىپ تەكسەرۋ جۇرگىزگەندىگىن، ءبىراق، تايىر الدامكوستىك ىستەۋ بارىسىندا وتىرىك ات پەن جالعان تەلەفون نومىرىنەن پايدالانعاندىعىن، سوڭىندا تەحنيكالىق جانە مالىمەت تاراۋلارىنىڭ قولداۋىندا تايىردىڭ ناقتىلى دەرەگىنە يە بولعاندىعىن ايتادى.

  دەلو تەكسەرۋشىلەردىڭ تانىستىرۋىنا نەگىزدەلگەندە، كوپتەگەن زيانكەستىككە ۇشىراۋشى كومپيۋتەر ىستەتۋ تۇرماق ءوز   اتىن دا جازا المايتىن بولىپ، ولار اۆتوموبيل ايداي العان كۇندە دە شوفەرلىك ەمتيحاننان وتە الماعان، مىنە وسىنداي قاجەتتىلىكتىڭ سالدارىنان تايىردىڭ تۇزاعىنا تۇسكەن ەكەن.

  گو جى-ۋ: « قىلمىس كۇماندىسى قولعا تۇسكەن بولسا دا،  كوپتەگەن زيانكەستىككە ۇشىراۋشى وزدەرىنىڭ الدانىپ قالعانىنا سەنبەدى، اۋەلى، مەكەمەمىزگە كەلىپ مويىنداما بەرۋدى دە قالامادى، ءتىپتى كەيبىرەۋلەرى تارتقان زيانىن قۋزاستىرعىسى دا كەلمەدى » دەدى.

  ساقشىلار قالا تۇرعىندارىنا شوفەرلىك كۋالىكتىڭ، ءسوزسىز، قوعام حاۋىپسىزدىگى مەكەمەسى قاتىناس ساقشى ۇلكەن اترەتىنىڭ اۆتوموبيل باسقارۋ بولىمشەسى ەمتيحان الۋ ارقىلى تولىمدى بولعاننان كەيىن عانا تەكسەرىپ بارىپ تاراتىلاتىندىعىن، ءارقانداي ورىن مەن جەكەنىڭ تاراتۋ ۇقىعى بولمايتىندىعىن، استە وسەك-اياڭعا سەنبەۋىن ەسكەرتەدى.

  كەزەكتە قوعام حاۋىپسىزدىگى تاراۋلارى تايىردىڭ تاپسىرۋى بويىنشا، 12 زيانكەستىككە ۇشىراۋشىنى ىزدەپ تاۋىپ، 30 مىڭ يۋان زيانىن قايتارىپ بەردى.  بۇل دەلو قازىر ىشكەرىلەي تەكسەرىلۋ ۇستىندە.