11 -ايدىڭ 13 –كۇنى شاۋەشەك قالاسىنىڭ تۇرعىنى ليۋ مىرزا گازەتىمىزدىڭ اقپارات ىستىق لەنياسىنا تەلەفون جالعاپ، ءار كۇنى گۋاڭميڭ جولىنان 2 - جول الەۋمەتتىك اۆتوبۋزىنا وتىرىپ قىزمەتكە شىعاتىنىن، قاۋىرت مەزگىلدە الەۋمەتتىك اۆتوبۋز ءبىرشاما جاي كەلىپ، تاڭەرتەڭگى قىزمەتكە ىقپال تيگىزگەنىن ايتىپ، الەۋمەتتىك قاتىناس –تاسىمال سەرىكتەستىگىنىڭ قاۋىرت مەزگىلدەگى الەۋمەتتىك اۆتوبۋزدىڭ كەزەك سانىن كوبەيتۋىن ۇسىنىس ەتتى.
بۇقارانىڭ تەلەفونىن قابىلداعاننان كەيىن، ءتىلشى گۋاڭميڭ جولى حۋايۋان كوشەسىندەگى الەۋمەتتىك اۆتوبۋز بەكەتىنە بارىپ، ناق مايداندا ۋاقىتىن ولشەۋ ارقىلى ىلگەرىندى ـ كەيىندى كەلگەن ەكى الەۋمەتتىك اۆتوبۋزدىڭ ارالىق ۋاقىتى 8 مينۋت اينالاسىندا ەكەنىن بايقايدى. بۇل جونىندە ۇنەمى 2 - جول الەۋمەتتىك اۆتوبۋزىنا وتىرىپ جۇرگەن كەيبىر قالا تۇرعىندارىنىڭ پىكىرى بار ەكەن.
جاقىنعى جىلداردان بەرى، 2 - جول الەۋمەتتىك اۆتوبۋز لەنياسى ۇزارىپ، الەۋمەتتىك اۆتوبۋزعا وتىراتىن ادام سانى كورنەكتى كوبەيدى، قازىرگى اۆتوبۋزدىڭ كەزەك سانى ەرتەلى – كەش جۇمىسقا شىعاتىن جانە جۇمىستان تۇسەتىن ادامداردىڭ قاجەتىن قاناعاتتاندىرا المايدى، قاتىستى تاراۋلاردىڭ ءمان بەرىپ، قالا تۇرعىندارىنىڭ ءجۇرىس -تۇرىسى قيىن بولۋ ماسەلەسىن شەشىم ەتۋىن ءۇمىت ەتەمىز.
شاۋەشەك قالالىق الەۋمەتتىك اۆتوبۋزعا قىزمەت وتەۋ شەكتى سەرىكتەستىگىنەن ۇعىسۋعا قاراعاندا، قازىر 2 ـ جول الەۋمەتتىك قاتىناس لەنياسىنا 9 الەۋمەتتىك اۆتوبۋز ورنالاستىرىلعان، 19 ايالداماسى بار، دۇيسەنبىدەن جۇماعا دەيىن قالىپتى قىزمەت كۇنىندە ساعات 8 دەن 30 مينۋت وتكەندە ءجۇرىپ، ساعات 20 دان 30 مينۋت وتكەندە توقتايدى. قاۋىرت مەزگىلدە 8 ــ 9 مينۋتتا ءبىر اۆتوبۋز قاتىناسا، قاۋىرت مەزگىلدەن كەيىن 9 ــ 10 مينۋتتا ءبىر اۆتوبۋز قاتىنايدى. سەنبى، جەكسەنبى كۇندەرى جانە مەرەكە دەمالىس كۇندەرىندە ساعات 9 دان 30 مينۋت وتكەندە ءجۇرىپ، ساعات 20 دا توقتايدى ەكەن.
شاۋەشەك قالالىق الەۋمەتتىك اۆتوبۋزعا قىزمەت وتەۋ شەكتى سەرىكتەستىگى كەڭسەسىنىڭ مەڭگەرۋشىسى لي شياۋدۇڭ:”بۇقارا اڭىس ەتكەن 2 -جول الەۋمەتتىك قاتىناس جەلىسىندە قاتىنايتىن اۆتوبۋزدىڭ كەزەك سانىن كوبەيتۋ ماسەلەسىنە قاراتا، سەرىكتەستىك كەزەكتە تيجارات قيىنشىلىعىنا تاپ بولعاندىقتان، اۆتوبۋز سانىن ارتتىرسا وزىندىك قۇنى ارتىپ، زيان تارتۋ دارەجەسى ارتا تۇسەدى. قازىر سەرىكتەستىك ءىس جۇزىندىك جاعدايعا قاراي ۋاقىتشا اۆتوبۋز سانىن كوبەيتۋگە شاراسىز، قالىڭ قالا تۇرعىندارىنىڭ ءتۇسىنۋىن ءۇمىت ەتەمىز. بۇدان سىرت، قىس ماۋسىمى تاياپ قالدى، الەۋمەتتىك اۆتوبۋزداردىڭ قاتىناۋىندا جول جاعدايى سياقتى سەبەپتەردەن تۇراقسىزدىق ساقتالۋدا، كوپشىلىكتىڭ جۇمىسقا شىققاندا الدىن الا جولعا شىعۋىن ۇسىنىس ەتەمىز“ دەدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى