وتان نامىسىن قورعاۋ ازاماتتىق بورىشىم

جولدانعان ۋاقىتى : 2023/11/16 12:42:13

□ قولا مەدال العان بايقونىس شينجياڭ بوكس كومانداسىنداعى جاتتىقتىرۋشىسى ابدۇشۇكۇر ميجيتپەن سۋرەتكە ءتۇسىپ، ەستەلىك قالدىرۋدا.   (گازەتىمىزدىڭ  ماتەريال سۋرەتى)

وتان نامىسىن قورعاۋ ازاماتتىق بورىشىم

ــــ 19 -كەزەكتى ازيا سپورت جارىسىندا ەرلەر بوكسىنىڭ 92 كيلوگرامنان جوعارىلاردىڭ شەشۋشى جارىسىندا قولا مەدال العان بايقونىس دانابەك جايلى   (ٴتىلشى ەستەلىگى)

 

□ ادال اعىباي ۇلى، داۋرەن سەرىك ۇلى، سۇبىھي
 
ەڭبەك باقتان ەمەس باپتان كەلەدى

شاۋەشەك قالالىق 6 - ورتا مەكتەپتىڭ دەنە تاربيە مۇعالىمى قاسىمبەك ٴداۋىتقان ۇلى كاسىپتەن سىرت بوكسكە وقۋشى تاربيەلەگەنىنە 18 جىل بولعان. 2008 - جىلى جازعىتۇرىم، جاتتىعۋ مايدانىندا وقۋشىلارىمەن بىرگە ارەكەت جاساپ جۇرگەنىندە جانىنا ەرتكەن بالاسى بار بەلدەمشە تولىق قارا جىگىت قاسىمبەكتى ىزدەپ كەلەدى، قۇلاعى قالقيعان قارا تورى، سۇڭعاق، ۇياڭ  ۇلدى 13 ـ 14 جاس مولشەرىندە بولار دەپ مولشەرلەگەن مۇعالىم اكەسى 11 گە كەلدى دەپ تانىستىرعاندا بالانىڭ بىتىمىنە قايتا كوز جۇگىرتتى. ”تۇلپار بولار جىلقىنى مۇشەسىنەن، ادام بولار بالانى كىسەسىنەن تانيسىڭ“ دەمەكشى، قىراعى جەتەكشى انتەك نازارى اۋا  قالعانى بار ەدى، سونىمەن سىرىقتاي ۇلدى سىناپ كورمەككە ٴسوز بەردى.”ٴاسىلى جاس بويىنشا وزىمەن قارايلاس بالالارمەن جۇپتاپ جاتتىعۋ جاساتۋ كەرەك ەدى، بوي تۇرقى ۇزىن بولعاندىقتان، ەرەسەك بالالارعا قوسىپ قويدىم، قالايدا ٴبىر كويلەك بۇرىن توزدىرعان قۋلار وڭاشادا تىرناقتارىن باتىرىپ جىبەرگەن سەكىلدى، كوپ   وتپەي كەتىپ قالدى، تاعى ٴبىر كۇنى اپاسى قولىنان جەتەكتەگەن بەتى مەنىڭ الدىما اكەلىپ، سوقساڭ دا، الداساڭ دا وسى بالانى ساعان تاپسىردىم، بىرەر ونەر ۇيرەنسىن دەپ قويار دا قويماي تاپسىرىپ كەتىپ قالدى. وسى تۇرعاننان تابانى كۇرەكتەي 6 جىل تاباندىلىق تانىتقان بالا جىگىت 2014 -جىلى شينجياڭ بوكس كومانداسىنان ءبىر-اق شىقتى“ دەدى جىنتىكتى جاتتىقتىرۋشىسى اسا ماقتانىشپەن. قاسىمبەك مۇعالىمنىڭ تانىستىرۋىنا قاراعاندا، كاسىپتەن سىرتقى بوكسكە تاربيەلەۋ كۋرسى اشىلعاننان قازىرگە دەيىن، شينجياڭ بويىنشا وتكىزىلەتىن وسپىرىمدەردىڭ بوكس جارىسىندا وسى گرۋپپاداعىلار 23 التىن مەدال السا، ەرەسەكتەر گرۋپپاسىنداعىلار مەملەكەتتىك جارىستاردان 5 التىن مەدال العان ەكەن. 

ايماقتىق ٴناسىلدى سيىر فەرماسى مالشى وتباسىندا دۇنيە ەسىگىن اشقان، بۇگىنگى كۇنى ەلىمىزدىڭ حاڭجوۋ قالاسىندا وتكىزىلگەن 19 - كەزەكتى ازيا سپورت جارىسىندا ەرلەر بوكسىنىڭ 92 كيلوگرامنان جوعارىلاردىڭ شەشۋشى جارىسىندا قولا مەدالدى الىپ ورالعان بايقونىس دانابەك ۇلى ٴناسىلدى سيىر فەرماسى ٴدام قىستاعىنىڭ ٴتولى. ول شاۋەشەك قالالىق 8 -باستاۋىش مەكتەپتە وقىپ جۇرگەن كەزىندە، اكەسى قويار دا قويماي ساباقتان سىرتقى بوكس كلاسىنا تىزىمدەتكەن ەكەن.  بالالىق شاعىن ەسكە العان گەرويىمىز: ”العاشىندا وزىمنەن ەرەسەك تالاي ساپتاسىمنان تاياق جەدىم، جاتتىعۋعا قاتىناسپاي قاشقان كەزدەرىم دە بولدى، ۇيدەگىلەر قويار دا قويماي قايتادان كىرگىزىپ قويدى، بىرتىندەپ ۇيىرلەسە باستادىم. سونىمەن العاش رەت 2011 - جىلى 14 جاستاعى كەزىم تۇڭعىش رەت شينجياڭ جاس وسپىرىمدەر جۇدىرىقشىلىق (11 جاستان 13جاس ارالىعىنداعى بالالاردى قامتىعان) A گرۋپپا جارىسىنا قاتىناسىپ ەكىنشى بولدىم. شينجياڭ كولەمىندەگى بۇل جارىس شاۋەشەك قالاسى دەنە تاربيە زالىندا بولدى، ٴارقايسى وبلىس، ايماق، اۋدان، قالالاردان نەشە ٴتۇرلى ساڭلاقتار كەلدى، مەن 54 كيلوگرامدىق سالماقتا جارىسقا قاتىناستىم، العاشقى جارىستا التايلىق ازاماتپەن ٴتۇستىم، ونى لەزدە جەڭىپ، كەلەسى كەزەكتە اتۇشتىق قارسىلاسىم بولدى، ونى دا ىقسىرىپ، شەشۋشى جارىسقا قاتىناسۋ ورايىنا يە بولعان ەدىم، ويلاماعان جەردەن قاشقارلىق قارسىلاسىم زور شىعىپ، جەڭىلىپ قالدىم. وسىدان باستاپ بوكسكە دەگەن ماحابباتىم ويانعانداي بولدى، - دەپ ٴسوزىن ارى قاراي جالعاپ، - سوسىن كەلەسى جىلى بۇكىل شينجياڭ كولەمىندەگى جۇدىرىقشىلىق B  (14 جاستان 21 جاس ارالىعىنداعى بالالاردى قامتىعان) گرۋپپا جارىسى ىلە وبلىسىنىڭ قورعاس اۋدانىندا بولدى، مۇندا 60 كيلوگرامدىق سالماقتا جارىسقا قاتىناسىپ، تاعى دا ەكىنشى بولدىم. جالپى مەنىڭ وسى سپورتشىلىق ساپارىمدا ەنشىمە ەكىنشىلىك جازعان سەكىلدى. 2016 -جىلى ۇرىمجىدە وتكىزىلگەن جاس وسپىرىمدەردىڭ جۇدىرىقشىلىق B (14 جاستان 21 جاس ارالىعىنداعى بالالار) گرۋپپا  جارىسىندا 75 كيلوگرامدىق سالماقتا تاعى ەكىنشى بولدىم“دەدى. جىل وتكەن سايىن توسەلە تۇسكەن بالا جىگىت جانىعان سايىن جارقىراي تۇسكەن بولات قانجار ىسپەتتى، سالعان جەرىنەن شىعىپ وتىردى. جەتەكشىسى قاسىمبەك: ”كەيىنگى كەزدە ول شىنداپ بەرىلدى، بالكىم، مايدان كورگەندىكى بولار، ٴوزىم دە قايران قالدىم، 40 كيلوگرامنان جوعارعى قۇم قالتالاردى ۇرعاندا سەكىرتىپ جىبەرگەنىن كورىپ، مىنا جىگىت كۇش - قايراتى تولىپ، بابىنا كەلگەن ەكەن دەپ ٴتۇيدىم ىشتەي“ دەدى. ايتسا ايتقانداي، 2018 -جىلى 4 جىلدا ٴبىر كەلەتىن    اۆتونوميالى رايوندىق دەنە تاربيە سپورت جارىسى قارامايلى قالاسىندا بولدى، وسىندا 81 كيلوگرامدىق سالماقتا جارىسقا قاتىناسىپ ٴۇشىنشى بولدى، الايدا، سول جولى ول وزىنە   توتەنشە ريزا بولعان، ويتكەنى ٴوز ونەرىن تولىق ساۋلەلەندىرگەن سەكىلدى. وسى جارىس بارىسىندا اۆتونوميالى رايوندىق دەنە تاربيە مەكەمەسى بوكس قيمىلىن باسقارۋ ورتالىعىنداعى جاتتىقتىرۋشىلاردىڭ نازارىنا ىلىنسە كەرەك، شينجياڭ بوكس كومانداسىنا شۇعىل شاقىرىلدى. سونىمەن وسىدان باستاپ داڭقتى دا جاپالى قوسىنعا ٴبىرجولاتا قوسىلىپ كەتە باردى. وسى كەز ونىڭ  تولىق ورتا مەكتەپتى ٴبىتىرىپ جوعارىلاپ وقۋ ەمتيحانىن تاپسىرىپ قويعان مەزگىل. ەش ءارى  -ءسارى بولماستان، بوكسەرلىك كاسىپكە يدەياسى ٴبىرجولاتا تۇراقتاپ العان ەدى.
 

□ بايقونىس ءوسپىرىم كەزىندەگى جاتتىقتىرۋشىسى قاسىمبەكپەن بىرگە.

ۇلى شەشەسى نۇرعايشا اپامىز قارا كۇشتىڭ ادامى دەسەدى، وعان ەرتەرەكتە كورشىلەرىنىڭ تايىنشاسى قۇيعا باتىپ قالىپ كومەك سۇراي كەلگەندە اعاسى قارىنداسى نۇرعايشانى جۇمسايدى، مۇنى الىمسىنباعان كورشىسى مىناۋ قاي مازاعىڭ دەگەندەي شىعىپ كەتسە كەرەك، ارتىنان ىلە -شالا بارعان  نۇرعايشا قۇيلاپ قالعان تايىنشانى ەكى مۇيىزىنەن تىك كوتەرىپ، قۇيدان سۋىرىپ العاندا ماڭايىنداعىلاردىڭ تۇگەل تاڭىرقاعانىن كۇنى بۇگىنگە دەيىن اڭىز ەتىسەدى ەكەن. تاعى ٴبىر جولى كوللەكتيۆ ەڭبەك كەزى بولسا كەرەك، دۇيدەن بالا -شاعاسىنىڭ قامى ٴۇشىن استىق سۇراي بارسا، قۇرداستارى قامباعا كىرگىزىپ جاتقان قاپتالعان ٴبيدايدى كورسەتىپ، كوتەرە الساڭ اكەتە بەر دەپتى، سوندا تىك كوتەرىپ، انداي   تۇرعان اتىنىڭ ساۋىرىنا وڭگەرگەندە اتى دا قايقاڭداپ كەتتى دەسەدى. بۇل اڭىزداردىڭ شىعۋى تەگىن ەمەس  سەكىلدى، بۇگىن مىنە ۇرپاعى ٴوز قيمىلى ارقىلى دالەلدەپ وتىرماي ما.

ناعىز سەمسەر شىڭ توستە شىڭدالادى

ەندىگى تالاپ تىپتەن اۋىرلاي ٴتۇستى، شينجياڭ بوكس كومانداسىنىڭ رەسمي مۇشەسى بولدى. عىلمي جۇيەلى جاتتىعۋ باسقىشى ٴسال قيناعان بولسا دا ٴبىر بيىكتەن كورىنۋدى بالا كۇننەن ارمانداعان گەرويىمىزٴارقانداي  قيىنشىلىق الدىندا مويىعان ەمەس. دەسەدە العاش بارعاندا ارنايى كاسىپتىك مەكتەپتە تاربيە كورە الماعاندىقتان، اۋىلداعى قاراپايىم جاتتىعۋمەن بارعان بالا جىگىتتىڭ شەكەسىنەن تەر شىقتى، مۇنداعى جاتتىعۋ ٴۇش دارەجەگە  بولىنگەن، ورەندەر گرۋپپاسى، جاستار گرۋپپاسى، ەرەسەكتەر گرۋپپاسى. العاشىندا جاتتىعۋعا ىلەسە الماي ورەندەر گرۋپپاسىندا بولىپ، جارىم جىلدان سوڭ جاستار گرۋپپاسىنا كەلىپ قوسىلعان. مىنەكي ٴبىر جىل جاپالى جاتتىعۋدان سوڭ، 2015 -جىلى حىبەي ولكەسىنىڭ چينحۋاڭداۋ قالاسىندا وتەتىن مەملەكەتتىك ەرلەر بوكس جارىسىنا جول الدى. 30 نەشە ولكەدەن ساقاداي سايلانىپ كەلگەن سايدىڭ تاسىنداي  اپايتوس، تەك بوكستىڭ وزىنەن 20 نىڭ ۇستىندەگى وڭشەڭ قۇرىشتان قۇيعانداي شىمىر ازاماتتار، وسى جارىستا 91 كيلوگرامدىق سالماقتا جارىسقا قاتىناسىپ، قيان -كەسكى جارىس مايدانىندا ۇشىنشىلىكتى جەڭىپ الدى، بۇل ونىڭ العاش مەملەكەتتىك جارىسقا قاتىناسۋى ەدى. وسى مايداندا شەشۋشى جارىستا حىناندىق سپورتشىدان اياماي جەڭىلگەن - دى. ول ٴوزىنىڭ ٴار جاقتىلى جەتەرسىزدىگىن انىق اڭعاردى. سوسىن اراعا ٴبىر جىل سالىپ، 2016 -جىلى ىشكى موڭعۇلدىڭ ۇلانشاپ دەگەن جەرىندە وتكىزىلگەن 19 جاستان 23 جاس ارالىعىنداعى ەرلەردىڭ مەملەكەتتىك بوكس جارىسى بولدى، مۇندا 91  كيلوگرامدىق سالماقتا ٴبىرىنشى  دارەجەلى سيلىقتى ەنشىلەدى. وسى جىلدىڭ اياعىندا تۇڭعىش رەت ەل اتتاپ جارىسقا قاتىناستى. مۇندا،   قازاقستاننىڭ ۇسىنىسىمەن رەسەي، موڭعۇليا، تايلانت، قىرعىزستان،  ءۇندىستان قاتارلى 7 مەملەكەتتىڭ حالىقارالىق ۇسىنىس جارىسى ٴوتتى، مۇندادا ٴۇشىنشى بولعان. 2017 -جىلى تيانجين قالاسىندا وتكەن ەرلەردىڭ 18 دەن 22 جاس ارالىعىنداعى بوكس  جارىسىندا ءۇشىنشى بولعان. توقتاۋسىز جارىسقا قاتىناسۋدا وڭاي تۇسپەدى. دەسەدە قاجىرىن جاني تۇسكەن ازامات سول جىلى مەملەكەتتىك ەرلەر   بوكس جارىسىنا دايىندالدى، جالپى 2015 -جىلدان 2022 - جىلعا دەيىن ىلگەرىندى - كەيىندى حالىقارالىق جارىستارعا 8 رەت قاتىسىپ، ٴار رەت گەرويىمىز ەكىنشى، ٴۇشىنشى سيلىقتاردى ەنشىلەگەن. ايتا كەتەتىن تاعى ٴبىر ءجايت، 2019 -جىلى وتكىزىلگەن بۇكىل مەملەكەتتىك 91 كيلوگرامنان  جوعارى سالماقتاعىلاردىڭ تاڭداۋ جارىس تۇرىندە جانە بۇكىل مەملەكەتتىك  بوكس جارىسىندا ەكىنشى بولىپ ەرەكشە كوزگە ءتۇسىپ،  حالىقارالىق بوكس جارىسىنا تالدانادى. بايقونىس:”بۇل مەن ٴۇشىن تاعى ٴبىر زور سايىس بولدى. بۇل جارىس رەسەيدىڭ ەكنتينابۋرك دەگەن قالاسىندا ٴوتتى، وكىنىشكە وراي ٴبىرىنشى كەزدەسۋدە ازەربايجاندىق جۇدىرىقشىدان ۇتىلىپ قالدىم. الايدا، مەن ٴۇشىن ۇلكەن  ۇيرەنۋ بولدى، سول جەردە وليمپيادا چەمپيوندەرىمەن كەزدەستىم، ولارمەن جاتتىعۋ جونىندە پىكىر الماستىرىپ، بىرگە جاتتىعۋ جاساپ، كوپتەگەن تاجىريبە قابىلدادىم“ دەدى. جارىس بولعان سوڭ كەيدە ۇتىس، كەيدە ۇتىلىس بولۋ قالىپتى قۇبىلىس، قۋانارلىق ٴجايت، 2021 -جىلى مەملەكەتتىك   ەرلەر بوكسىنىڭ چەمپيوندىققا تالاسۋ جارىسىندا بىرىنشىلىكتى جەڭىپ، 2022 - جىلى مەملەكەتتىك بوكس  كومانداسىنا تاڭدالىپ، جاپالى جاتتىعۋ جۇرگىزەدى، سونىمەن 2023 -جىلى  بۇكىل مەملەكەتتىك 92 كيلوگرام سالماقتان جوعارىلاردى تاڭداۋ جارىسىندا  تاعى دا بىرىنشىلىكتى جەڭىپ الدى.

حاڭجوۋدان كەلگەن قۋانىش

ازيا سپورت جارىسىنا بەيجيڭ   قالاسىندا جاتتىعۋ جاسالدى. قاتاڭ جاتتىعۋدا كەيدە جارالانىپ، كەيدە   اۋاسىنا، كەيدە تاماعىنا ۇيلەسپەۋ  جاعدايلارى ٴجۇز بەرىپ كەلدى.

بۇل رەتكى حاڭجوۋ ازيا سپورت  جارىسىندا ول العاش مايداندا موڭعۇليانىڭ سپورتشىسىن جەڭۋ ارقىلى جارتىلاي شەشۋشى جارىسقا جولداما الدى، جارتىلاي شەشۋشى جارىستا 120  كيلوگرامنان جوعارى سالماقتاعى، ەكى دۇركىن الەم چەمپيوندىعىنا تالاسۋ  جارىسىنا قاتىناسقان، مۇنان سىرت،   كاسىپتىك بوكس جارىسىندا ءۇرتىس 13 مايدان قاتىناسىپ، بارلىعىندا ۇزدىك ناتيجە جاراتقان وزبەكستاندىق سپورتشىمەن سايىسقا تۇسەدى. قارسىلاسىن جەڭۋ ءۇشىن بار كۇشىن سالسا دا،  ەڭ سوڭىندا تاجىريبەلى، ۇلكەن مايدان كورگەن باتىرعا جول بەرمەسكە   شاراسىز قالعان سەكىلدى.

ازيا حالىقارالىق جارىس ول ٴۇشىن تاعى ٴبىر مايدان ساباق بولعان، الايدا وسى ناتيجەگە قاناعات ەتەتىنىن       جاسىرعان جوق باكەڭ باتىر. ۇعىسۋعا قاراعاندا، الدا، ياعني 2024 -جىلى 2 - ايدا يتاليادا وليمپياداعا تاڭداۋ جارىسى بولادى ەكەن، ەندىگى جەردە سوعان دايىندىق ىستەۋ باسقىشىندا. دايىندىعى ويداعىداي بولىپ، قاتىستى سىناقتان سۇرىنبەي وتەر بولسا پاريجداعى وليمپياداعا قاتىسۋ جولداماسىن الۋ ەڭ ۇلكەن ارمانى. ونىڭ 19 -كەزەكتى ازيا سپورت جارىسىنا جولداما الۋىنا سەبەپ وزبەكستانداعى دۇنيە جۇزىلىك ەرلەر بوكس چەمپيوندىعىنا تالاسۋ بارىسىنداعى ناتيجەسى، مۇندا ول قاتارىنان ٴۇش قارسىلاسىن وماقاستىرىپ، شەشۋشى جارىسقا جولداما العان.

بايقونىس: ”بوكسپەن اينالىسقانىما 15 جىل بولدى، دەسەدە قارسىلاسىڭا بەتپە -بەت كەلگەندە، ارينە، قوبالجۋ، توسىلۋ، قورقۋ بولادى، ەگەر ءون بويىڭدى مۇنداي كوڭىل كۇي بيلەيتىن بولسا، قارسىلاسىڭا ۇتىلعانىڭ سول، ونداي كەزدە كوڭىل كۇيدى دەر كەزىندە تەڭشەۋ كەرەك، ويتكەنى ول قىراعىلىقتى ارتتىرادى“ دەدى.

شينجياڭ بوكس كومانداسى 1994 -جىلى قۇرىلعان، ەڭ العاشقى حالىقارالىق جاقسى ناتيجەنى 1999 –جىلى   وزبەكستاندا وتكىزىلگەن ازيا سپورت جارىسىندا چەمپيون بولعان التايلىق ابدىراقىمان دەگەن ازامات العان، كەيىنگى جالعاسىندا تالاي سپورتشىلار جارىق كورىپتى.

سپورتشىنىڭ ەڭ قيىن قيىنشىلىعى جاراقات، الايدا بۇعان دا كونىپ كەتكەن كورىنەدى، قاباق جارىلۋ، قابىرعا مايىسۋ ۇنەمى كەزدەسسە دە، جاعى  شىعىپ كەتۋ، سىنىپ كەتۋ باكەڭنىڭ باسىندا كەزدەسپەگەن الىمدى سايىسكەر. ٴسوز اراسىندا:”مەن بالا كۇنىمنەن بوكسپەن اينالىسىپ كەلەمىن، شەشىنگەن سۋدان تايىنبايدى. ەل ىشىندەگى  بوكس جارىستارىندا الدىڭعى قاتاردان ورىن الۋدى ويلاساڭ، حالىقارالىق    جارىستاردا، ەڭ اۋەلى، وتانعا داڭق اپەرۋدى ويلايسىڭ، ويتكەنى وتان نامىسى بويىڭدى بيلەيدى ەكەن، سوسىن قايدا جۇرسەم دە ەكى قولىما سۇيەنىپ، وتان نامىسىن قورعاۋ ەڭ اۋەلگى ازاماتتىق بورىشىم“ دەگەندە باتىردىڭ جانارىنان وت ۇشقىنى شاشىراپ كەتكەندەي بولدى. ٴسوز ارەدىگىندە   جارىس مايدانىندا باستان -اياق بىرگە  بولعان اكەسى قاناتبەك: “ٴبىز شينجياڭ دەنە تاربيە كومانداسىنىڭ ۇسىنىسىمەن  وسى رەتكى جارىستىڭ كورەرمەنى   بولىپ قاتىناسقانىمىزعا ەرەكشە العىس، بالامىزدىڭ ناق مايدان جارىسىن كورگەندە ٴبىر جاعىنان، تەبىرەنسەك،  ەندى ٴبىر جاعىنان، قورقىنىشتان جۇرەگىمىز اۋزىمىزعا تىعىلدى، سوڭىندا جەڭىس بىزگە ٴتان بولدى” دەيدى قۋانىشىن جاسىرا الماي. ٴومىرى تاۋ جاستانىپ، مال سوڭىندا جۇرگەن قاراپايىم مالشى وتباسىنىڭ ايروپلانمەن ۇشىپ بارىپ، ازيا سپورت جارىسىنان ٴبىر -اق شىعۋى ولار ٴۇشىن، شىنىندا، قۋانارلىق، ماقتانارلىق ءجايت.  

ايتا كەتەتىن تاعى ٴبىر ءجايت، وسى جولى 80 كيلوگرامدىق سالماقتا التىن وردەننىڭ يەگەرى بولعان توقتاربەك پەن بايقونىستىڭ اكە -شەشەسىن اۆتونوميالى رايوندىق دەنە تاربيە مەكەمەسى بوكس قيمىلىن باسقارۋ ورتالىعى جاعىنان وسى جارىسقا قوناق رەتىندە شاقىرعانى توتەنشە اسەرلى بولعان، ول كىسىلەردىڭ قۋانعانى سونشالىق، بالالارى سيلىق ساحناسىنا كوتەرىلگەندە اكە - شەشەلەرى اسپانداتىپ قۋانىشتىڭ شاشۋىن شاشىپ جاتتى. ٴيا، جەڭىستىڭ شاشۋى اسپانداي بەرسىن، سەندەردەي وتان ٴۇشىن داڭق اپەرۋگە بارىن ارناعان ۇلانداردىڭ ونەرى ۇستەم بولسىن دەگەن تىلەكتەمىز. بۇل جەڭىستىڭ شاشۋى!  

جارىستا شەكارا بولمايدى، حاڭجوۋ ازيا سپورت جارىسى جەڭىسپەن اياقتادى. الدا، ياعني 2024 - جىلى 2 - ايدا وليمپيادا جارىسىنىڭ سارالاۋ جارىسى يتاليادا وتكىزىلمەكشى، ەندىگى نىسانا پاريج وليمپيادا سپورت جارىسى!  دايىنسىڭ با ازامات؟


 

رەداكتورى : ارداق كامالقان قىزى
 

 
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
​
مىسالى: «تارباعاتاي اقپارات تورابىنان» الىندى