شي جينپيڭ گرەتسيا زۇڭليى ميتسوتاكيسپەن كەزدەستى

　11 - ايدىڭ 3 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارلاي كەلگەن گرەتسيا زۇڭليى ميتسوتاكيسپەن كەزدەستى.
 

　　□سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
 

　　شينحۋا اگەنتتىگىنىڭ 11 - ايدىڭ 3 - كۇنى بەيجيڭنەن بەرگەن حابارى (ءتىلشى ياڭ يجۇن). 11 - ايدىڭ 3 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارلاي كەلگەن گرەتسيا زۇڭليى ميتسوتاكيسپەن كەزدەستى.
 

　　شي جينپيڭ بىلاي دەپ اتاپ كورسەتتى: جۇڭگو مەن گرەتسيا ”ءبىر بەلدەۋ، ءبىر جولدى“ بىرگە قۇرۋداعى جانە وركەنيەتتەردىڭ اۋىس - كۇيىس جاساپ، ءوزار ۇلگى الۋىنداعى سەرىكتەر. ەكى ەل ديپلوماتيالىق قارىم - قاتىناس ورناتقان جارتى عاسىردان استام ۋاقىتتان بەرى جۇڭگو مەن گرەتسيا قارىم - قاتىناسى باستان - اياق اقاۋسىز دامىپ، ۋاقىت وتكەن سايىن جاڭاردى. جۇڭگو جاق گرەتسيامەن ءداستۇرلى دوستىقتى قاستەرلەيدى، گرەتسيا جاقپەن بىرگە ستراتەگيالىق جەتەكشىلىككە تاباندى بولىپ، ەسىك اشۋعا، سەلبەستىككە تاباندى بولىپ، جۇڭگو − گرەتسيا جان - جاقتى ستراتەگيالىق سەرىكتەستىك قارىم - قاتىناسىنىڭ جاڭا ءداۋىر شۇعىلاسىن شاشۋىن ىلگەرىلەتۋدى قالايدى.
 

　　شي جينپيڭ بىلاي دەپ باسا دارىپتەدى: ءوزارا پايدا جەتكىزۋ سەلبەستىگى جانە وركەنيەتتەر اۋىس - كۇيىسى − جۇڭگو − گرەتسيا قارىم - قاتىناسىنىڭ ەكى ۇلكەن دانەكەرى. جۋىقتا گرەتسيا ۇكىمەتىنىڭ جوعارى دارەجەلى ۋاكىلدەردى 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنە قاتىناسۋعا جىبەرۋى ”ءبىر بەلدەۋ، ءبىر جولدى“ بىرگە قۇرۋ سەلبەستىگىن قولدايتىندىعىن ايگىلەدى. جۇڭگو جاق گرەتسيا جاقپەن دامۋ ستراتەگياسىن ءتۇيىلىستىرۋدى كۇشەيتىپ، قاتىناس، كەمەشىلىك، ەنەرگيا، حابارلاسۋ، فينانس سياقتى سالالارداعى سەلبەستىكتى تەرەڭدەتىپ، جاسىل ەكونوميكا، سيفرلى ەكونوميكا، عىلىم - تەحنيكادا جاڭالىق اشۋ سەلبەستىگى ورايىن كەڭەيتىپ، ”ءبىر بەلدەۋ، ءبىر جولدى“ جوعارى ساپادا بىرگە قۇرۋدى ىلگەرىلەتىپ، پيراۋس پورتىنىڭ ۇزاق ۋاقىت، ورنىقتى، باياندى دامۋىن ىلگەرىلەتۋدى قالايدى. جۇڭگو جاق جۇڭگو كاسىپورىندارىن گرەتسياعا بارىپ قارجى قوسىپ، شارۋاشىلىعىن شالقىتۋعا شابىتتاندىرادى، گرەتسيا كاسىپورىندارىنىڭ جۇڭگو − ورتا، شىعىس ەۆروپا ەلدەرى سەلبەستىگىنە ات سالىسۋىن قارسى الادى، گرەتسيانىڭ اناعۇرلىم كوپ ساپالى ونىمدەرىنىڭ جۇڭگو بازارىنا كىرۋىن قارسى الادى. جۇڭگو جاق جۇڭگو − گرەتسيا وركەنيەتتەر ءوزارا ۇلگى الۋ ورتالىعى، وركەنيەتتى بايىرعى ەلدەر تالقى مىنبەرى سياقتى گۋمانيتارلىق مەحانيزمدى قولدايدى، گرەتسيا جاقپەن وقۋ - اعارتۋ، مادەنيەت، عىلمي زەرتتەۋ، ساياحات، جاستار سياقتى سالالاردا اۋىس - كۇيىستى، سەلبەستىكتى تەرەڭدەتىپ، ەكى ەلدىڭ مادەنيەت مايەگى باسىمدىعىن ساۋلەلەندىرىپ، وركەنيەتتەردىڭ اۋىس - كۇيىسىن، ءوزارا ۇلگى الۋىن ىلگەرىلەتىپ، حالىقارالىق بايلانىستى، ىستەستىكتى كۇشەيتىپ، ناعىز كوپ جاقتىلىقتى دارىپتەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە اقىل - پاراسات جانە كۇش - قۋات ارناۋدى قالايدى.
 

　　شي جينپيڭ بىلاي دەپ اتاپ كورسەتتى: بيىل جۇڭگو مەن ەۆروپا وداعىنىڭ جان - جاقتى ستراتەگيالىق سەرىكتەستىك قارىم - قاتىناس ورناتقاندىعىنىڭ 20 جىلدىعى. جۇڭگو − ەۆروپا قارىم - قاتىناسى جۇڭگو − ەۆروپا حالقىنىڭ قۇت - ىرىسىنا سايادى، دۇنيە ءجۇزىنىڭ بەيبىتشىلىگىنە، ورنىقتىلىعىنا، گۇلدەنۋىنە سايادى. جۇڭگو − ەۆروپا قارىم - قاتىناسىنىڭ تاماشا دامۋىن دەربەس، وزىنە ءوزى قوجايىن بولۋدان، ءوزارا قۇرمەت ەتۋدەن، ءوزارا پايدا جەتكىزۋ سەلبەستىگىنەن بولە قاراۋعا بولمايدى. جۇڭگو جاق ەۆروپا جاقپەن بىرگە ءبىر - ءبىرىن دۇرىس تانۋعا تاباندى بولىپ، نازاردى ورتاق تانىمعا شوعىرلاندىرىپ، بەتالىستى يگەرىپ، ءتۇرلى سالاداعى ءوزارا پايدا جەتكىزۋ سەلبەستىگىن جاپپاي جانداندىرۋدى قالايدى. گرەتسيانىڭ وسىعان بايلانىستى ۇزدىكسىز سىندارلى رول ساۋلەلەندىرۋىن ءۇمىت ەتەمىن.
 

　　ميتسوتاكيس مىنالاردى ءبىلدىردى: ءتوراعا شي جينپيڭنىڭ 2019 - جىلى گرەتسيادا تابىستى مەملەكەتتىك ساپاردا بولعاندىعى گرەتسيا حالقىنىڭ ءالى ەسىندە. سودان باستاپ گرەتسيا − جۇڭگو ەكى ەل قارىم - قاتىناسى كۇشتى دامۋ ارىنىن ساقتادى. ەكى ەلدىڭ ەكونوميكالىق سەلبەستىك جەتىستىكتەرى كورنەكتى بولىپ، پيراۋس پورتى نىسانى گرەتسيا − جۇڭگو سەلبەستىگىندە ءوزارا پايدا جەتكىزىپ، تەڭ يگىلىككە كەنەلۋدىڭ، ەكى ەل حالقىن باقىتقا كەنەلتۋدىڭ تابىستى ۇلگىسىنە اينالدى. گرەتسيا جاق جۇڭگو جاقپەن ”ءبىر بەلدەۋ، ءبىر جولدى“ جوعارى ساپادا بىرگە قۇرۋدى ۇزدىكسىز ىلگەرىلەتىپ، كومەسكى كۇشتەردى اناعۇرلىم اشىپ، كەمەشىلىك، تەڭىز تاسىمالى، تازا ەنەرگيا سياقتى سالالارداعى ءوزارا پايدا جەتكىزۋ سەلبەستىگىن كەڭەيتۋدى قالايدى، گرەتسيانىڭ اناعۇرلىم كوپ ونىمدەرىنىڭ جۇڭگو بازارىنا كىرۋىن ءۇمىت ەتەدى، اناعۇرلىم كوپ جۇڭگولىق ساياحاتشىلاردىڭ گرەتسياعا بارىپ ساياحاتتاۋىن قارسى الادى. گرەتسيا مەن جۇڭگو ەكەۋى دە وركەنيەتتى بايىرعى ەلدەر، گرەتسيا جاق جۇڭگو جاقپەن ادامداردىڭ بارىس - كەلىسىن كۇشەيتۋدى، گۋمانيتارلىق اۋىس - كۇيىستى تەرەڭدەتۋدى، گرەتسيا − جۇڭگو وركەنيەتتەر ءوزارا ۇلگى الۋ ورتالىعىن بىرگە ويداعىداي باسقارۋدى، ءوزارا ۇيرەنۋدى، ءبىر - بىرىنەن ۇلگى الۋدى دارىپتەۋدى، اناعۇرلىم جاراسىمدى، تەپە - تەڭ حالىقارالىق قارىم - قاتىناس ورناتۋدى ىلگەرىلەتۋدى قالايدى. گرەتسيا جاق ءبىر جۇڭگو ساياساتىن باتىل اتقارادى، جۇڭگو جاقتىڭ حالىقارالىق، وڭىرلىك ىستەردە ۇستانعان ءادىل تۇرعىسىن بارىنشا القايدى، جۇڭگو جاقپەن كوپ جاقتى ىستەستىكتى جيىلەتۋدى قالايدى. گرەتسيا ەۆروپا − جۇڭگو سەلبەستىگىنىڭ كوپىرىنە اينالۋدى قالايدى. ەۆروپا وداعى مەن جۇڭگونىڭ تەرەزەسى تەڭ جانە ءوزارا قۇرمەت ەتۋ رۋحى بويىنشا قول ۇستاسا سەلبەستىك جاساسۋىنا ابدەن بولادى، گرەتسيا ەۆروپا − جۇڭگو قارىم - قاتىناسىنىڭ اقاۋسىز دامۋىن ۇزدىكسىز بەلسەندى ىلگەرىلەتۋدى قالايدى.
 

　　ۋاڭ ي كەزدەسۋگە قاتىناستى.

 

ەسكەرتۋ:

تورابىمىزداعى مازمۇنداردى پايدالانۋعا تۋرا كەلگەندە، ءسوزسىز جازباشا رۇقساتقا يە بولۋ كەرەك. مازمۇنداردى رۇقساتسىز جالعاپ تاراتۋعا، كەسىپ رەداكسيالاۋعا، وزگەرتۋگە، قىسقارتىپ قۇراستىرۋعا، باسقا ورىنعا كوشىرۋگە نەمەسە باسقا تاسىلدەرمەن كوبەيتۋگە ءارى تاراتۋعا بولمايدى، قايشى كەلگەندەردىڭ زاڭدىق جاۋاپكەرشىلىگى زاڭ بويىنشا قۋزاستىرىلادى.