63 قىستاقتان 143 مىڭ ادام يگىلىككە كەنەلدى
ءتىلشىمىز ۋاڭ گاۋشىڭ حابارلايدى. 10 - ايدىڭ 20 -كۇنى ايماقتىق سۋ يگىلىگى مەكەمەسىنەن ۇعىسۋعا قاراعاندا، بيىل ايماقتىڭ اۋىل -قىستاق اۋىز سۋ قۇرىلىستارىن جوندەۋ، كۇتىمدەۋ نىساندارىنىڭ جۇمىسى تولىق اياقتالىپ ءارى پايدالانۋعا بەرىلىپ، جالپى 63 قىستاقتان 143 مىڭ ادام يگىلىككە كەنەلگەن.
بيىل شيحۋ قالاسى اۋىل -قىستاق اۋىز سۋ قۇرىلىستارىن جوندەۋ، كۇتىمدەۋ نىسانىنا جالپى 25 ميلليون 89 مىڭ 800 يۋان قارجى قوسىپ، شيداگۋ قالاشىعى، گانحىزى قالاشىعى جانە بايچۋان قالاشىعى سياقتى 3 اۋىل -قالاشىقتىڭ جالپى 30 قىستاعىنداعى 9.85 كيلومەترلىك اۋىل -قىستاق اۋىز سۋ ترۋبا جولىن جوندەپ، كۇتىمدەگەن. مۇنىڭ ىشىندە، 14 ترۋبا جەلىسىنىڭ قۇرىلىمىن جاڭالاۋ، 9.85 كيلومەترلىك كونە ترۋبا جەلىسىن الماستىرۋ سياقتى جۇمىستار ىستەلدى. سونىمەن بىرگە، شيحۋ قالاسىنىڭ قالا - اۋىلدى ءبىر تۇلعالاندىرىپ سۋمەن قامداۋدى ينفورماتسيالاندىرىپ باسقارۋ تۇعىرى جاڭادان قۇرىلدى. نىسان قۇرىلىسى 4 -ايدا باستالىپ، 8 -ايدىڭ اياق شەنىندە اياقتالدى ءارى پايدالانۋعا بەرىلدى.
شيحۋ قالاسىنىڭ اۋىل - قىستاق اۋىز سۋ قۇرىلىستارىن جوندەۋ، كۇتىمدەۋ نىسانىنىڭ جاۋاپتىسى ليۋ يۇنيۇڭ: ”بۇل قۇرىلىس بۇرىنعى ترۋبا جەلىسى كونەرۋ، سۋمەن قامداۋعا كەپىلدىك ەتۋ مولشەرى تومەن بولۋ ماسەلەلەرىن تۇبەگەيلى شەشىپ، 74 مىڭ ادام يگىلىككە كەنەلدى“ دەدى.
بيىل ايماق اۋىل -قىستاق اۋىز سۋ قۇرىلىستارىن قۋزاۋ - تەكسەرۋدى جانە قۋزاۋ - جەتەكشىلىك ەتۋدى كۇشەيتىپ، حالىق تۇرمىسىنا قاتىستى وسى نىساننىڭ ەرتە جۇمىس باستاۋىنا، ەرتە سالىنۋىنا، ەرتە ونىمدىلىك كورسەتۋىنە شىنايى كەپىلدىك ەتىپ، قىستاق تۇرعىندارىنىڭ تۇرمىس ساپاسىن جوعارىلاتىپ، اۋىل - قىستاقتى گۇلدەندىرۋ اياق الىسىن جەدەلدەتىپ،”تەڭ يگىلىككە كەنەلۋدى“ جۇزەگە اسىردى.
شاعانتوعاي اۋدانىنىڭ اۋىل-قىستاق اۋىز سۋ قۇرىلىستارىن جوندەۋ، كۇتىمدەۋ نىسانىنا جالپى 2 ميلليون يۋان قارجى قوسىلىپ، 2 اۋىل، ءبىر قالاشىقتاعى 17 قىستاقتىڭ شوعىرلى سۋمەن قامداۋ قۇدىعى، تەكسەرۋ قۇدىعى، زارارسىزداندىرۋ جابدىقتارى، سۋ ترۋبالارى جوندەلىپ، كۇتىمدەلگەن.
شاعانتوعاي اۋدانىنىڭ اۋىل -قىستاق اۋىز سۋ قۇرىلىستارىن جوندەۋ، كۇتىمدەۋ نىسانى قۇرىلىسى 4 -ايدا باستالىپ، ىلگەرىندى -كەيىندى 126 شوعىرلى سۋمەن قامداۋ قۇدىعى مەن 14 تەكسەرۋ قۇدىعىن جوندەۋ، 14 قىستاقتىڭ 2218 دانا زەردەلى سۋ ساعاتىن ورناتۋ - جاڭالاۋ، 4 توسپانىڭ كلاپانىن الماستىرۋ، 39 سۋ ۇلەستىرۋ اسپابىن جاڭالاۋ سياقتى مىندەتتەردى ورىنداپ، 7 - ايدىڭ اياق شەنىندە قۇرىلىس جۇمىستارى تۇگەلدەي اياقتالىپ، پايدالانۋعا بەرىلدى.
شاعانتوعاي اۋداندىق سۋ يگىلىگى مەكەمەسى پارتيا باسشىلىق گرۋپپاسىنىڭ شۋجيى، ورىنباسار مەكەمە باستىعى لي چيڭ - ۋ: ”اۋىل -قىستاق اۋىز سۋ قۇرىلىستارىن جوندەۋ، كۇتىمدەۋ شاعىن نىسان بولعانىمەن، ۇلكەن حالىق تۇرمىسىن ايگىلەيدى. الداعى جەردە بار كۇشپەن ويداعىداي كۇتىمدەپ، ويداعىداي باسقارىپ، ويداعىداي قىزمەت وتەپ، بۇقاراعا باقىت جاراتامىز“ دەدى.
ۇعىسۋعا قاراعاندا، ايماق اتقارعان شيحۋ قالاسىنىڭ، ساۋان قالاسىنىڭ، شاعانتوعاي اۋدانىنىڭ 2023 -جىلعى اۋىل - قىستاق اۋىز سۋ قۇرىلىستارىن جوندەۋ، كۇتىمدەۋ نىسانىنا جالپى 29 ميلليون 89 مىڭ 800 يۋان قارجى قوسىلىپ، 37 ورىن جوندەلىپ، كۇتىمدەلىپ، ورىندالۋ مولشەرى ％100 كە جەتكەن.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى