تىلشىلەرىمىز ۋاڭ گاۋشىڭ، ۋاڭ تيڭ، ۋاڭ چۋانميڭ، سارا شايسۇلتان حابارلايدى. ” دۇنيەدە تەگىن اس قايدان بولسىن“ دەگەن ءتامسىل بار. الايدا بۇگىنگى كۇندە شاۋەشەك قالاسى ابدىرا اۋىلى تيرمەن قىستاعىنداعى قارتتار تۇسكى اسپەن قوسا كەشكى استان دا تەگىن يگىلىكتەنە الاتىن بولدى.
10 - ايدىڭ 8 - كۇنى تۇستە تيرمەن قىستاعىنداعى اقىسىز اسحاناعا بارىپ، تەگىن تۇسكى اس كەزىندەگى جاراسىمدى ورتانى سەزىندىك.
تيرمەن قىستاعى ەگىنشىلىك قىستاق. جۋىق جىلداردان بەرى قىستاق تۇرعىندارى لۇيحى جالپىلىق كاسىپتىك سەلبەستىك كووپەراتيۆىنە ” جەردى اماناتتاپ“بەرىپ، تاماشا تۇرمىسقا كەنەلدى. 2022 - جىلى قىستاق بويىنشا جان باسىندىق جىلدىق كىرىس 45 مىڭ 600 يۋان بولسا، قىستاق كوللەكتيۆىنىڭ كىرىسى 800 مىڭ يۋانعا جەتكەن.
قىستاق پارتيا ياچەيكاسىنىڭ ورىنباسار شۋجيى، اسحانانىڭ جاۋاپتىسى زوۋ يۇيجيننىڭ تانىستىرۋىنشا، جەردى اماناتتاپ بەرگەننەن كەيىن، قولى بوساعان ارتىق ەڭبەككۇشتەر ماڭايداعى اۋىل - قالاشىقتارعا كوتەرمە جۇمىس ىستەپ كەتىپتى دە، قىستاقتا نەگىزىنەن قارتتار قالعان ەكەن.
بيىل اۋىلدىق پارتكومنىڭ بار كۇشپەن قولداۋىندا قىستاقتاعى تەگىن اسحانا ىسكە ءتۇسىپ، قىستاقتاعى 60 جاستان اسقان قارتتار ” دايىن استان تاماقتاناتىن“ قام - قايعىسىز تۇرمىسقا كەنەلگەن.
قىستاق تۇرعىنى جين ميڭحۋا بيىل 76 جاستا، بالالارى سىرت جەردە بولعاندىقتان، ول ءار كۇنى اسحانادان تاماقتانىپ تۇرادى. ” اسحانادان ءبىر اپتا تاماقتانعانعا ەكى كيلو سالماق قوسىپ الدىم، اسحانانىڭ تۇيىرتپەك كوجەسى سونداي ءدامدى، ءبىر شىنىسىنىڭ ءوزى ازدىق ەتەدى“ دەدى ول كۇلىپ.
50 جىل قىستاق شيپاگەرى بولعان جاۋ رۇڭ بيىل 71 جاستا، جۇبايى راك اۋرۋىنا شالدىعىپ ۇلكەن وپەراتسيا جاساتقاندىقتان، ءجۇرىپ -تۇرۋى قولايسىز بولاتىن، قىستاقتاعى اسحانا ونى ۋايىمنان ارىلتتى.
جاۋ رۇڭ: ” مەن تاماق ىستەي المايمىن، ەكەۋىمىز ماندىتىپ تاماق تا جەي المايمىز، كۇندەلىكتى تاماق ماسەلەسىن ەپتەپ - سەپتەپ شەشىپ جۇرگەن ەدىك، قىستاق اسحاناسىنىڭ اشىلعانى مەنىڭ اۋىرتپالىعىمدى جەڭىلدەتتى“ دەدى.
92 جاستاعى قىستاق تۇرعىنى تاڭ جىگۇي اجەي كونەكوز اپەكە - سىڭلىلەرىمەن بىرگە تاماق ءىشىپ، شۇيىركەلەسىپ قايتۋ ءۇشىن اسحاناعا بارىپ تاماقتانادى.
اسحانانىڭ ورنى بۇرىن قىستاقتا تۇرعان قىزمەت اترەتى پايدالانعان 200 نەشە شارشى مەترلىك جاتاقحانا بولاتىن.
بيىل 8 - ايدىڭ باسىندا قىستاق ” ەكى كوميتەتى“ اقىلداسۋ ارقىلى كادرلار جاتاقحاناسىن اسحانا ەتىپ وزگەرتۋ بەكىمىنە كەلدى. باستاپقى مەرزىمدە قىستاق كوللەكتيۆى 50 مىڭ يۋان قارجى شىعارىپ، اسحاناعا قاجەتتى جابدىقتاردى ساتىپ الىپ، قىستاق تۇرعىندارىن اسپازدىققا ىستەتتى. مەجەمەن قىستاق كوللەكتيۆى جىلىنا 200 مىڭ يۋان قارجى شىعارسا اسحانانىڭ قالىپتى جۇمىس جۇرگىزۋىنە كەپىلدىك ەتە الادى ەكەن.
قازىر اسحانا تۇسكى جانە كەشكى اسپەن قامدايدى. ءار كۇنى 35 قارت وسىندا كەلىپ تاماقتانادى، ولاردىڭ جاسى ەڭ ۇلكەنى 92 دە، ەڭ جاسى 70 جاستا.
اۋىلدىق پارتكومنىڭ شۋجيى سۇن جيان: ”’ قارتتار مەن بالالارعا‘ كوڭىل ءبولۋ، قامقورلىق جاساۋ مەملەكەتتىڭ كەلەلى ءىسى، اۋىلدىق پارتكوم شارت - جاعدايى جاقسى قىستاق - دۇيلەردى جەرگىلىكتى جاعدايعا نەگىزدەلە وتىرىپ قارتتارعا ارناپ اقىسىز اسحانا اشۋعا بەلسەنە ىنتالاندىرىپ جانە بار كۇشپەن قولداۋ كورسەتىپ، ءتىپتى دە كوپ قارتتارعا پارتيانىڭ قامقورلىعىن سەزىندىرىپ، رەفورما جاساپ، ەسىك اشۋدىڭ تيىمدىلىگىنەن يگىلىكتەندىرىپ، جاڭا داۋىردەگى جاڭاشا اۋىل - قىستاقتىڭ تىڭ وزگەرىستەرىن سەزىندىردى“ دەدى.
رەداكتورى : اراي ەركىن قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى