داڭقپەن اۋىلدارىنا ورالىپ، ءۇمىت ارقالاپ قايتا جورىققا اتتانباقشى

جولدانعان ۋاقىتى : 2023/10/13 11:20:28

□ بايقونىس پەن كابيران تىلشىلىكتى قابىلداۋدا.
 

□ قىزۋ قارسى الىپ، ىستىق ىقىلاسپەن قول الىستى.
 

□ بايقونىس وتباسىنداعىلارمەن بىرگە سۋرەتكە تۇسۋدە.

 

□ تۋىس - تۋعان، دوس - جاراندارى سپورت ساڭلاقتارىنىڭ جەڭىسپەن  ورالعاندىعىن ءان - كۇيمەن قارسى الدى.
 

 □ سالماقتى قولا مەدال.
 

تىلشىلەرىمىز داي جياۋمەي، ۋاڭ ياجۇن حابارلايدى.” كوپشىلىكتىڭ ىستىق ىقىلاسپەن قارسى العاندىعىنا راقىمەت، وتە قۋانىشتامىز، ەرەكشە تەبىرەندىم، ءتىپتى دە جاقسى ناتيجەلەرگە قول جەتكىزۋ ءۇشىن بارىنشا قۇلشىنامىز“. 10-   ايدىڭ 10 -كۇنى حاڭجوۋ 19 -كەزەكتى ازيا سپورت جارىسىندا ەرلەر بوكسىنىڭ 92 كيلوگرامنان جوعارىلاردىڭ شەشۋشى جارىسىندا قولا مەدال العان بايقونىس دانابەكتىڭ قىسقا دا قاراپايىم بىرنەشە اۋىز ءسوزى ونىڭ تەبىرەنگەن كوڭىل كۇيى مەن وتانعا، اتا مەكەنىنە داڭق اپەرۋ سەنىمى مەن بەكىمىن اڭعارتتى.
 
سول كۇنى ساعات 21 دە ۇشاقتىڭ جەرگە قونۋىمەن، ازيا سپورت جارىسىندا مەدال العان سپورتشىلار بايقونىس دانابەك پەن كابيران ءابۋشايمان شاۋەشەك مىڭبۇلاق اۋەجايىنىڭ ۇلكەن زالىنا كىردى، قىزۋ شاپالاق ءۇنى، ىستىق ىقىلاستى سالەمدەسۋ، تەبىرەنگەن كوز جاسى بۇكىل زالدى كەرنەدى،  باسشىلار، تۋىس -تۋعان، دوس جاراندارى، كاسىپتەستەرى اۋىلداستارعا ءتان ىستىق ىقىلاسپەن سپورت  ساڭلاقتارىنىڭ  جەڭىسپەن  ورالعاندىعىن قارسى الدى.
 
بايقونىستىڭ كىشى اكەسى قانات ابەن ۇستىنە ۇلتتىق كيىم كيىپ، وتباسىنداعىلاردى ەرتىپ، قولدارىنا گۇل الىپ ەرتەمەن اۋەجايعا بالاسىن قارسى الا كەلگەن.
 
قانات: ” وسى رەت حاڭجوۋعا بارىپ ازيا سپورت جارىسىن ناق مايداننان كوردىم، ۇلىم جارىستا قولا مەدال الۋداي جاقسى ناتيجەگە قول جەتكىزدى، ەرەكشە قۋانىشتامىن، پارتيا مەن ۇكىمەتكە راقىمەت، بالامنىڭ جاتتىقتىرۋشىلارىنا راقىمەت“دەدى.  
 
حاڭجوۋ 19 -كەزەكتى ازيا سپورت جارىسىنىڭ ەرلەر ەركىن كۇرەسىنىڭ 97 كيلوگرامدىق جارىسىندا قولا مەدال العان،  كۇرەس سپورتشىسى كابيران تۋىس - تۋعاندارىمەن قۇشاقتاسىپ، قۇشاعى گۇلگە تولىپ اسەرلەنگەنىنەن كوزىنە جاس الدى. ” مەن بۇگىن ەرەكشە تەبىرەنىپ تۇرمىن، مەملەكەتىمىزدىڭ باۋلىعانىنا العىس ايتامىن، باسشىمىزعا، جاتتىقتىرۋشىعا، قىزمەتكەرلەرگە جانە اۋىلداستارعا، تۋىس - تۋعاندارىما العىس ايتامىن. تالاي جىلدان بەرى كوپشىلىك باستان - اياق مەنى قولداپ، ماعان شابىت بەرىپ كەلدى، مەن، ءسوزسىز، كۇش ۇستىنە كۇش قوسىپ، كوپشىلىكتىڭ كۇتكەن ءۇمىتىن جەردە قالدىرماي اتا مەكەنىمىزدىڭ دەنە تاربيە ىستەرىنە كۇش - قۋاتىمدى ارنايمىن“ دەدى كابيران.

ايماقتىق كاسىپتەن سىرتقى دەنە تاربيە مەكتەبىنىڭ باستىعى شى جۋ جانە مەدالعا يە بولعان ەكى سپورتشىنىڭ كەزىندەگى جاتتىقتىرۋشىلارى دا اۋەجايعا كەلىپ وقۋشىلارىن قارسى الدى.
 
شى جۋ: ” بۇگىن اۋەجايعا كەلىپ ايماقتىق كاسىپتەن سىرتقى دەنە تاربيە مەكتەبى باۋلىعان ەكى ۇزدىك سپورتشىنىڭ داڭقپەن ورالعاندىعىن قارسى العاندىعىما توتەنشە قۋانىشتامىن، ولار حاڭجوۋ 19- كەزەكتى ازيا سپورت جارىسىندا ەكى قولا مەدالعا يە بولدى، بۇل جاقىنعى جىلداردان بەرى تارباعاتايلىق سپورتشىلاردىڭ دۇنيە جۇزىلىك ءىرى جارىستاردا قول جەتكىزگەن ەڭ تاماشا ناتيجەسى، سپورت شەبەر دارىندىلاردى باۋليتىن بەسىك رەتىندە، دەنە تاربيە مەكتەبىنىڭ الداعى قىزمەت بارىسىندا وسىلار سياقتى ءتىپتى دە ۇزدىك دەنە تاربيە دارىندىلارىن باۋلىپ شىعۋعا سەنىمى بار“دەدى.
 
ۇعىسۋعا قاراعاندا، ەكى سپورتشى اۋىلدارىندا ءبىر اپتا دەمالعاننان كەيىن، مەملەكەت كومانداسىنا قايتىپ، جاتتىعۋعا قاتىناسىپ، 2024 -جىلعى پاريج وليمپيادا سپورت جارىسىنىڭ تولىمدىلىعىن الۋعا دايىندالادى ەكەن.
 

(بۇل بەتتەگى سۋرەتتەردى ءتىلشىمىز داي جياۋمەي تۇسىرگەن)

رەداكتورى : اراي ەركىن قىزى

 
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى