ەرىكتى تىلشىلەر جياڭ نان، سۇڭ جيايىن، لو ليڭلان حابارلايدى. 9-ايدىڭ 19-كۇنى لياۋنيڭ جينجوۋ مەديتسينا داشۋەسى كوز اۋرۋلار ورتالىعىنىڭ شينجياڭعا كومەكتەسۋ بويىنشا ”جارىق سيلاۋ ارەكەتى“ ۇيىرمەسىندەگىلەر تاعى دا شاعانتوعاي اۋدانىنا كەلىپ، ءار ۇلت بۇقاراسىنىڭ شەل اۋرۋى سياقتى كوز اۋرۋلارىن سارالاپ تەكسەردى ءارى 60 ناۋقاسقا اقىسىز وپەراتسيا جاسادى.
قارتتار ــ شەل اۋرۋىنا ءجيى شالدىعاتىن قاۋىم. جاستىڭ ۇلعايۋى سەبەبىنەن تىس، ۋلترا كۇلگىن ساۋلەسىمەن ۇزاق ۋاقىت جۇعىسۋ، سىرتقى جاراقات، سونداي-اق قانتتى نەسەپ اۋرۋى سياقتى بۇكىل دەنەلىك نەگىزدىك اۋرۋلار دا كوز بۇرشاعىنىڭ بۇلدىراۋىنا اپارىپ سوعىپ، شەل اۋرۋىنا دۋشار ەتەدى. حالىق ءۇشىن ناقتى ءىس ىستەۋ قيمىلىنىڭ ءبىر شاراسى رەتىندە، شاعانتوعاي اۋداندىق حالىق شيپاحاناسى جينجوۋ مەديتسينا داشۋەسىمەن بەلسەنە تىعىز سەلبەسىپ، سۇرانىسى بار ءارى ەمدەۋ شارتىنا ۇيلەسەتىن شەل اۋرۋىنا شالدىققان ناۋقاستاردى سارالاپ جاساندى كوز بۇرشاعىمەن اقىسىز قامداپ، شەلدى اسىرە دىبىستى ەمۋلگاتسيالاۋ وپەراتسياسىن جاساپ، ءتىپتى دە كوپ بۇقارانىڭ جارىق دۇنيەمەن قايتا قاۋىشۋىنا كومەكتەستى.
تۇرعىن ما شيۋجىن:”بۇگىن قايتالاي تەكسەرىلۋگە كەلدىم. بۇرىن كوزىم كورمەي قالعان، شينجياڭعا كومەككە كەلگەن شيپاگەرلەر ەمدەپ جازىپ بەردى، ولاردىڭ قامقورلىعى مەن قولداۋىنا راقىمەت“ دەدى.
”بىلتىر لياۋنيڭنان كەلگەن ماماندار وڭ كوزىمە وپەراتسيا جاساعان، قالپىنا كەلۋى جاقسى. ەندى سول كوزىمە شەل ءتۇستى، بۇگىن تۇستەن كەيىن وسىندا وپەراتسيا جاساتامىن. جينجوۋدىڭ ماماندارى بىزگە ىزگى ىستەر بەردى، ولار جاپا شەكتى“ دەدى تۇرعىن گو رىنشان.
2019 -جىلى جينجوۋ مەديتسينا داشۋەسىنىڭ كوز اۋرۋلار ورتالىعى شاعانتوعاي اۋداندىق حالىق شيپاحاناسىمەن بىرلەسىپ شينجياڭعا كومەكتەسۋ بويىنشا ”جارىق سيلاۋ ارەكەتى“قيمىلىن ورىستەتكەننەن بەرى شاعانتوعاي اۋدانىنان جينجوۋ مەديتسينا داشۋەشى كوز اۋرۋلار ورتالىعىنىڭ بولىمشە ورتالىعى اشىلىپ، جىل سايىن كاسىپتىك ەمدەۋ ۇيىرمەسىن ”ەمدەۋ جاعىنان شاعانتوعايعا كومەكتەسۋ“ قىزمەتىن ورىستەتۋگە ۇيىمداستىرىپ تۇرادى. قازىرگە دەيىن، شاعانتوعاي اۋدانىنداعى كوز اۋرۋىنا شالدىققان جيىنى 100 ناۋقاسقا اقىسىز وپەراتسيا جاسالدى.
جينجوۋ مەديتسينا داشۋەسى كوز اۋرۋلار ورتالىعىنىڭ باس شيپاگەرى ۋي داحىڭ: ”جالپى 5 رەت ’جارىق سيلاۋ ارەكەتى‘ قيمىلىن ورىستەتتىك، وسى جولعى ’جارىق سيلاۋ ارەكەتى‘ قيمىلى بيىلعى 2 -رەتكى قيمىل. جالپى 60 ادامعا وپەراتسيا جاسادىق، وپەراتسيا وتە ءساتتى بولدى، ءونىمى دە ەرەكشە جاقسى. الداعى جەردە جالعاستى باعىتتامالى ەمدەۋ جاعىنان كومەكتەسۋ - سۇيەمەلدەۋ جۇرگىزىپ، شاعانتوعاي اۋدانىنىڭ كوز اۋرۋلارىن ەمدەۋ ورەسىن تەز ارادا تىڭ ساتىعا كوتەرۋگە قۇلشىنامىز“ دەدى.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى