ءتىلشىمىز فۋ جياندۇڭ، ەرىكتى ءتىلشى سۋ مانيۇي حابارلايدى.”بۇل جول جوندەلىپ بولعاننان كەيىن، اۆتوكولىك تە، موتوتسيكل دە جۇرە الاتىن بولدى. قاباعات قۋاندىق“ دەدى جۋىقتا ءدوربىلجىن اۋدانى كۇرە اۋىلى مايتاس قىستاعىنىڭ مالشىسى تۇرسىن ماكەن.
كۇرە اۋىلىنىڭ ماڭىنداعى كوكتەۋلىك پەن كۇزەۋلىكتە قورا -قورا سيىر - قوي كوك جاساڭدا جايىلىپ ءجۇر، كوك اسپاندا اقشا بۇلتتار قالىقتايدى، ساحارا -وزەن كوسىلىپ، يرەلەڭدەگەن كوش جولى الىسقا سوزىلىپ جاتىر. شينجياڭعا كومەكتەسۋ كوش جولى كوكتەۋلىك پەن كۇزەۋلىكتى تۇتاستىراتىن دانەكەرگە اينالعان.
مايتاس قىستاعىندا كوش جولى سالىنۋدان بۇرىن، مالشىلاردىڭ كوشى - قون جۇمىسى ۇلكەن ماسەلەگە اينالعان. تاۋ جولى كۇدىر بولعاندىقتان، اۆتوكولىك قاتىناي الماي، مالشىلار ات -تۇيەمەن مالىن ايداپ كوشەتىن، ناشار اۋا رايىنا جولىققاندا، اۋەلى مالى تاۋدان قۇلاپ، شىعىن بولاتىن - دى.
مالشىلاردىڭ ءوندىرىس، تۇرمىستاعى ءىس جۇزىندىك قيىنشىلىعىن شەشۋ ءۇشىن، ءدوربىلجىن اۋداندىق قاتىناس - تاسىمال مەكەمەسى 10 ميلليون يۋان لياۋنيڭنىڭ شينجياڭعا كومەكتەسۋ قارجىسىن ءوتىنىش ەتىپ، كوش جولىن قايتا سالدى.
ۇعىسۋعا قاراعاندا، ءدوربىلجىن اۋدانىنىڭ كوكتەۋلىگى مەن كۇزەۋلىگىنە باراتىن كوش جولى 2021 -جىلدان باستاپ سالىنعان، 2022 - جىلى رەسمي پايدالانۋعا بەرىلگەن. جالپى ۇزىندىعى 11 كيلومەتر، جوباداعى قاتىناۋ قارقىنى ساعاتىنا 20 كيلومەتر، جول تاعانىنىڭ كەڭدىگى 4.5 مەتر، جول بەتىنىڭ كەڭدىگى 4.5 مەتر بولىپ، 5 جەردەگى اعاردان وتەتىن 60 مەتر جول بولىگى قامتىلعان، 4 بولات قۇرىلىمدى كوپىر سالىنىپ، جول بەتى قاراپايىم شاعىل توسەلگەن. 10 ميلليون يۋان شينجياڭعا كومەكتەسۋ قارجىسى قوسىلعان كۇرە اۋىلى، كۇرتى اۋىلى سياقتى 7 اۋىل ـ قالاشىق، فەرمانى قامتىپ، قالىڭ مالشىلاردى يگىلىككە كەنەلتىپ، مال شارۋاشىلىعىندا اپاتتان ساقتانۋ، اپاتقا قارسى اتتانۋ قابىلەتىن نەگىزىنەن جوعارىلاتقان.
”شينجياڭعا كومەكتەسۋ كوش جولى سالىنۋدان بۇرىن، مالشىلار كوشكەندە مىڭبۇلاقتان اينالىپ ءوتىپ، 100 كيلومەتردەن استام جول باساتىن دا، ۋاقىت، كۇش سارىپ بولاتىن. جول سالىنىپ بولعاننان كەيىن ، مالشىلاردىڭ كوشى - قون ۋاقىتى مەن كوشۋ ارالىعى قىسقارىپ، مالشىلار مەن مالدىڭ حاۋىپسىزدىگى ءونىمدى قورعالىپ، جاراتىلىستىق اپاتقا توتەپ بەرۋ قابىلەتىن جوعارىلاتىپ، مال شارۋاشىلىعىنىڭ دامۋىن جەبەپ، مالشىلار كىرىسىنىڭ ارتۋىن جۇزەگە اسىردى“دەدى ءدوربىلجىن اۋداندىق قاتىناس ـ تاسىمال مەكەمەسى نىسان كەڭسەسىنىڭ قىزمەتكەرى ياۋ ۋانساي.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى