ەرىكتى ءتىلشى ىلەس حابارلايدى. ”وتباسىمىزداعى 4 جاننىڭ ەكەۋى مۇگەدەك، ەڭبەككۇشىمىز جوق“ دەدى جۋىقتا تولى اۋدانى وشەتى اۋىلى جىڭىشكەسۋ قىستاعىنىڭ تۇرعىنى جاسار احىمەت.
8-ايدىڭ اياق شەنىنەن باستاپ ەكىنشى شابىن جوڭىشقا ورىلا باستادى، ءاسىلى بۇل قۋانارلىق ءىس بولسادا، الايدا، جاسار تايلانعان شوپتەرىنە قاراپ تۇرىپ قاراداي ۋايىمعا باتتى.
”قىستاعىمىز جاساردىڭ جاعدايىنان حابار تاپقاننان كەيىن، كەلىپ كومەكتەسىپ جاتىرمىز“ دەدى جىڭىشكەسۋ قىستاعى پارتيا ياچەيكاسىنىڭ ورىنباسار شۋجيى، قىستاق كوميتەتىنىڭ مەڭگەرۋشىسى عاريپوللا مۇرال.
نەبارى جارىم كۇندە جاساردىڭ اتىزىنداعى جوڭىشقا تۇگەلدەي ۇيىنە جەتكىزىلىپ بولدى. قىزمەت اترەتىندەگىلەردىڭ ۇلكەن كومەك كورسەتكەندىگىن كورگەن جاسار: “قىستاق كادرلارى مەن قىزمەت اترەتىندەگىلەر ۇنەمى ءبىزدىڭ قامىمىزدى جەيدى، قانداي ءىس بولسىن الدىمەن كەلىپ قولعابىس ەتەدى، ولارعا ايرىقشا العىس ايتامىن” دەدى.
بىرنەشە كۇننەن بەرى جىڭىشكەسۋ قىستاعى پارتيا ياچەيكاسى قىستاق كادرلارىن، قىزمەت اترەتىنىڭ مۇشەلەرى مەن پارتيا مۇشەلەرىن ۇيىمداستىرىپ، ”وندىرىسكە كەپىلدىك ەتۋ“ قوسىنىن قۇرىپ، جيىن -تەرىنگە كومەكتەسۋ قيمىلىن ورىستەتىپ، اۋا رايى اشىق كەزدە ورىپ، تايلاپ، ەكىنشى شابىن جوڭىشقانىڭ تولىق جينالۋىنا كەپىلدىك ەتتى.
اتىز باسىندا ماشينالار گۇرىلدەپ، ادامدار قايشالىسىپ، ءشوپ شاباتىن ماشينالار اتىزدا ارلى-بەرلى جۇيتكىپ،”وندىرىسكە كەپىلدىك ەتۋ“ قوسىنى قولدارىنداعى ايىرلارىمەن شابىلعان جوڭىشقانى اۋدارىستىرىپ جەل قاقتىرىپ، قاۋىرت ەڭبەك ناۋقانى كوتەرىلدى. بۇل جوڭىشقالار ورىلىپ، كەپتىرىلىپ، تايلانعاننان كەيىن، باعىمشى وتباسىلارىنا جەتكىزىپ، مالدىڭ قىسقى”ازىعىنا“ دايىندالادى.
عاريپوللا: ”قازىر كۇزگى جيىن - تەرىن باستالدى، قىستاق تۇرعىندارىنىڭ جۇمىسىن ءوز جۇمىسىمىزداي كورىپ، جالعاستى قىستاق كادرلارى مەن قىزمەت اترەتىنىڭ مۇشەلەرىن ۇيىمداستىرىپ، حالىق ءۇشىن قىزمەت وتەپ، بيىلعى كۇزگى جيىن-تەرىن قىزمەتىنىڭ ءساتتى ورىستەتىلۋىنە شىنايى كەپىلدىك ەتەمىز“ دەدى.
ۇعىسۋعا قاراعاندا، كۇلگىن گۇلدى جوڭىشقانىڭ ءونىم مولشەرى جوعارى، بەلوك قۇرامى مول بولىپ،”ءشوپ پاتشاسى“ دەپ اتالادى ەكەن، مالدىڭ تابىلماس جەم -ءشوبى بولىپ قالماستان، ەگىمشىلىك ۇسىنىلىمى از، باپتاپ-باسقارۋعا قولايلى، ونىمدىلىگى جوعارى بولعاندىقتان، جىڭىشكەسۋ قىستاعى 1800 مۋ جەرگە جوڭىشقا ەككەن.
رەداكتورى : ارداق كامالقان قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى