شي جينپيڭ قىزىل كرەست حالىقارالىق كوميتەتىنىڭ ءتوراعاسى سپولياريچپەن كەزدەستى

شينحۋا اگەنتتىگىنىڭ 9 - ايدىڭ 5 - كۇنى بەيجيڭنەن بەرگەن حابارى. 9 - ايدىڭ 5 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا قىزىل كرەست حالىقارالىق كوميتەتىنىڭ ءتوراعاسى سپولياريچپەن كەزدەستى.
 

     شي جينپيڭ قىزىل كرەست حالىقارالىق كوميتەتى قۇرىلعان 160 جىلدان بەرگى حالىقارالىق ادامگەرشىلىك جاعىندا ورىستەتكەن ناتيجەلى قىزمەتىن اسا جوعارى باعالاپ، قىزىل كرەست حالىقارالىق كوميتەتىنىڭ دۇنيە ءجۇزىنىڭ بەيبىتشىلىگى مەن العا باسۋىنا قوسقان ماڭىزدى ۇلەسىن القادى.
 

　　شي جينپيڭ بىلاي دەپ اتاپ كورسەتتى: بۇگىنگى تاڭداعى دۇنيە ءجۇزى 100 جىلدا بولماعان زور وزگەرىستى باستان كەشىرۋدە، ادامزات قوعامى كوپتەگەن سىن - سايىسقا ءدوپ كەلۋدە، كەيبىرەۋى بۇرىننان تانىس، كەيبىرەۋى جاڭا سىن - سايىس. وسىنداي جاعدايدا جۇڭگو قارا باسىنىڭ عانا قامىن كۇيتتەمەي، قايتا دۇنيە جۇزىندەگى ءار ەلمەن سەلبەستىكتى كۇشەيتىپ، شەشۋ جولىن بىرگە قاراستىرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتتى. مەنىڭ ”ءبىر بەلدەۋ، ءبىر جولدى“ بىرگە قۇرۋ باستاماسىن، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن العا قويۋدا دۇنيە جۇزىندەگى ءار ەلمەن بىرگە ەكونوميكانىڭ دامۋىن جۇزەگە اسىرىپ، حالىق تۇرمىسىن جاقسارتىپ، ءوزارا تيىمدىلىك جەتكىزىپ تەڭ يگىلىككە كەنەلىپ، الەمدىك باسقارۋدى جانە ادامگەرشىلىك ماسەلەلەرىن باسقارۋدى كۇشەيتۋگە جۇڭگو ۇستانىمىن، جۇڭگو جوباسىن ازىرلەۋدى ءۇمىت ەتتىم.
 

　　شي جينپيڭ بىلاي دەپ باسا دارىپتەدى: ادامگەرشىلىك − تۇرلىشە وركەنيەتتەردى ۇيىستىراتىن ەڭ ۇلكەن ورتاق تانىم. جۇڭحۋانىڭ ءداستۇرلى مادەنيەتىندە قامتىلعان ”ادامدارعا مەيىرىمدى بول“، ”وزىڭە تىلەمەگەندى وزگەگە دە تىلەمە“ دەگەن سياقتى يدەيالار حالىقارالىق قىزىل كرەست قوزعالىسىنىڭ باس ماقساتىمەن توعىسىپ جاتادى. جۇڭگو حالىقتى بارىنەن جوعارى قويۋ ۇستانىمىن ۇستانىپ، ادامزات تاريحىنداعى كولەمى ەڭ ۇلكەن كەدەيلىكتەن ارىلتۋدان قامال الۋ شايقاسىنىڭ جەڭىسىنە قول جەتكىزىپ، جاڭا تيپتى ايدارشا ۆيرۋس ىندەتى الدىندا ءوز ەل حالقىنىڭ ءومىرىنىڭ حاۋىپسىزدىگى مەن دەنساۋلىعىن قورعاپ قانا قويماي، ونىڭ ۇستىنە تاريحتاعى كولەمى ەڭ ۇلكەن دۇنيە جۇزىلىك ادامگەرشىلىك كومەك بەرۋ قيمىلىن ورىستەتتى. فاكتتەر جۇڭگونىڭ حالىقارالىق ادامگەرشىلىك ىستەرىنىڭ بەلسەندى قولداۋشىسى، قاتىناسۋشىسى جانە ۇلەس قوسۋشىسى ەكەندىگىن دالەلدەدى. جۇڭگو جاق قىزىل كرەست حالىقارالىق كوميتەتىمەن اناعۇرلىم تىعىز سەلبەسىپ، ادامزاتتىڭ بەيبىتشىلىگى مەن العا باسۋ ىستەرىن جەبەۋ ءۇشىن ماڭىزدى ۇلەس قوسۋدى قالايدى.
 

　　سپولياريچ مىنالاردى ءبىلدىردى: جۇڭگونىڭ 49 - كەزەكتى نايتيگەيل سيلىعىنا يە بولعان ادام سانى ەڭ كوپ مەملەكەت بولعاندىعىن قۇتتىقتايمىن، بۇل قىزىل كرەست حالىقارالىق كوميتەتى مەن حالىقارالىق قوعامنىڭ جۇڭگونىڭ ادامگەرشىلىك ىستەرىنىڭ دامۋ تابىستارىن بارىنشا مويىندايتىندىعىن بەينەلەيدى. جۇڭگو حالىقارالىق ادامگەرشىلىك زاڭىنا باستان - اياق قۇرمەت ەتتى جانە ونى اتقاردى. ”ءبىر بەلدەۋ، ءبىر جولدى“ بىرگە قۇرۋ دۇنيە ءجۇزىنىڭ دامۋىن جەبەپ، دۇنيە ءجۇزىنىڭ ادامگەرشىلىك ىستەرىنە دەم بەردى. قىزىل كرەست حالىقارالىق كوميتەتى جۇڭگو جاقتىڭ حالىقارالىق ادامگەرشىلىك ىستەرى ءۇشىن ساۋلەلەندىرگەن بەلسەندى رولى مەن قوسقان ماڭىزدى ۇلەسىن ايرىقشا القايدى، جۇڭگو جاقپەن سەلبەستىكتى ونان ارى تەرەڭدەتىپ، دۇنيە ءجۇزىنىڭ بەيبىت دامۋىن، سونداي - اق حالىقارالىق ادامگەرشىلىك ىستەرىن جەبەۋگە تىڭ ۇلەس قوسۋدى ءۇمىت ەتەدى.
 

　　ۋاڭ ي كەزدەسۋگە قاتىناستى.