تىلشىلەرىمىز ۋاڭ چۋانميڭ، اسقات قايرات حابارلايدى. جاقىندا شاۋەشەك قالاسى ارگۇڭ قالاشىعى تومەنگى ارگۇڭ قالاشىعىنىڭ تۇرعىنى ما جۇييىڭنىڭ قاۋىن اتىزىنا بارعانىمىزدا شارۋالار قاۋىندى جيناپ ءارى اۆتوكولىككە تيەپ، اتىز باسى مول ءونىم قاربالاستىعىنا تۇسكەنىن كوردىك.
قالا تۇرعىنى جاڭ گوپيڭ: ” بۇل شاۋەشەك قالاسىنىڭ جەرگىلىكتى قاۋىنى، مەملەكەت جولى 219 - لەنياسىنىڭ سول جاعىندا، قالا رايونىنا دا جاقىن. جاڭا بىرەۋىن ساتىپ الىپ، ءدامىن تاتىپ كورىپ ەدىم وتە ءدامدى ەكەن، تۋىس - تۋعان، دوس - جاراندارىما بەرەيىن دەپ ءبىر قانشاسىن ساتىپ الدىم“ دەدى.
” وسى جولى ارنايى قاۋىن ساتىپ الۋعا كەلدىم، اتىز باسىنان قاۋىن تەرىپ كورسىن دەپ بالامدى دا ەرتە كەلدىم“ دەدى قالا تۇرعىنى ما يانجۇن.
جاقىنعى جىلداردان بەرى ارگۇڭ قالاشىعى دامۋ وي جەلىسىن جاڭالاپ، ءارقايسى قىستاقتىڭ سۋ، توپىراق، كۇن نۇرى سىندى بايلىقتارى مەن وڭىرلىك ورىن باسىمدىعىن تياناق ەتە وتىرىپ، كاسىپ قۇرىلىمىن رەتتەۋدى باستى تۇتقا ەتىپ، ەرەكشەلىككە يە كاسىپ سالالارىنىڭ دامۋىن ىلگەرىلەتىپ، اۋىل - قىستاقتىڭ گۇلدەنۋىن ىلگەرىلەتۋگە پارمەندى قوزعاۋشى كۇش ۇستەدى.
” بيىل 18 مۋ جەرگە قاۋىن جانە 22 مۋ جەرگە قاربىز ەكتىك، قازىر كۇنىنە ءبىر توننا شاماسىندا قاۋىن ساتامىز. تەرىپ العاننان كەيىن، قالا تۇرعىندارى مەن ساۋداگەرلەر كەلىپ ساتىپ الادى. قاۋىن قاتارىنىڭ اراسىنداعى 7 مۋ جەرگە جەر جاڭعاعىن ەككەنبىز، مۋ باسىنان 150 كيلوگرام شاماسىندا جاس جەر جاڭعاعى ءدانى تۇسەتىندىگى مەجەلەنۋدە“ دەدى ما جۇييىڭ.
رەداكتورى : اراي ەركىن قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى