ءتىلشىمىز ۋاڭ گاۋشىڭ حابارلايدى. جاقىندا جۇڭگو گۋاڭدۇڭ يادرو ەلەكتر تولى شەكتى سەرىكتەستىگىنىڭ تارباعاتاي سارعۇسىن جەل ەلەكتر نىسانىنىڭ جۇمىس مايدانىندا، 80 نەشە مەتر ۇزىندىقتاعى گەنەراتور قالاقشالارىنىڭ كەيبىرى مايدانعا تاسىمالدانىپ، كەيبىرى كرانمەن قۇراستىرىلىپ، جۇمىس مايدانى قاربالاس كۇيگە ءتۇستى.
جۇڭگو گۋاڭدۇڭ يادرو ەلەكتر توبى شەكتى سەرىكتەستىگىنىڭ تارباعاتاي سارعۇسىن جەل ەلەكتر نىسانى جالعاستى سالىناتىن نىسان، بۇعان جالپى ءبىر ميلليارد 637 ميلليون يۋان قارجى قوسىلىپ، گەنەراتور اگراگاتتار سيىمدىلىعى 300 مىڭ كيلوۆات بولىپ، جاڭادان 110 كيلوۆولتتىق كەرنەۋ ارتتىرۋ پۋنكتى، سايكەستى 75 مىڭ كيلوۆات / 300 مىڭ كيلوۆات ساعاتتىق ەنەرگيا ساقتاۋ جۇيەسى سالىنادى.
قازىر كەرنەۋ ارتتىرۋ پۋنكتى، جەل ەلەكتر گەنەراتورىنىڭ نەگىزدىك قۇرىلعىلارى تۇگەلدەي سالىنىپ بولىپ، مۇنىڭ ىشىندە، 30 گەنەراتور اگراگاتتارى كرانمەن قۇراستىرىلىپ بولدى، قالعان 18 گەنەراتور اگراگاتتارى 8 -ايدىڭ سوڭىندا تۇگەلدەي ورناتىلىپ بولادى ەكەن. بۇل نىسان بىلتىر 9-ايدىڭ 15-كۇنى قۇرىلىس باستاپ، بيىل 9-ايدىڭ 15-كۇنى جەلىگە قوسىلىپ ەلەكتر تاراتادى ەكەن.
مەجەگە قاراعاندا، نىسان سالىنىپ بولىپ، ىسكە قوسىلعاننان كەيىن، جىلىنا 888 ميلليون كيلوۆات-ساعات تازا ەلەكتر ەنەرگياسىمەن قامداپ، كومىر جاعاتىن ەلەكتر ستانسياسىمەن سالىستىرعاندا، شامامەن 268 مىڭ توننا ولشەمدى كومىر ۇنەمدەپ، كۇكىرت قوس توتىعىنىڭ شىعارىلۋ مولشەرىن شامامەن 89.7 توننا، كومىرتەگى قوس توتىعىنىڭ شىعارىلۋ مولشەرىن 735 مىڭ توننا، ازوت توتىعىنىڭ شىعارىلۋ مولشەرىن 134 توننا ازايتادى ەكەن.
نىسان ديرەكتورى يۇي بياۋ: ”جەل ەلەكتر نىسانى جەلىگە قوسىلىپ ەلەكتر تاراتقاننان كەيىن، جىلدىق ءوندىرىس قۇنى 192 ميلليون يۋان اينالاسىندا بولىپ، جىلىنا 22 ميلليون يۋان پايدا سالىعىن جوعارىعا تاپسىرىپ، جەرگىلىكتى ورىن ەكونوميكاسىنىڭ جوعارى ساپالى دامۋىنا دەم بەرۋمەن بىرگە، قورشاعان ورتانى قورعاۋ ىستەرىنە دە تيەسىلى ۇلەسىن قوسادى“ دەدى.
حۋانىڭ شينجياڭ ەنەرگيا اشۋ شەكتى سەرىكتەستىگى تارباعاتاي سارعۇسىن جەل ەلەكتر نىسانى 6-ايدىڭ 23-كۇنى جەلىگە قوسىلىپ ەلەكتر تاراتتى، بۇل نىسانعا جالپى 340 ميلليون يۋان قارجى قوسىلىپ، جالپى كولەمى 3×240 مەگاۆات امپەر 220 كيلوۆولتتىق توپتاۋ پۋنكتى سالىندى، گەنەراتور اگراگاتتارىنىڭ سيىمدىلىعى 50 مىڭ كيلوۆات بولىپ، 6.25 مەگاۆاتتىق 8 جەكە گەنەراتور اگراگاتى سالىنادى.
نىسان ىسكە قوسىلعاننان كەيىن، مەجەمەن جىلدىق ءوندىرىس قۇنى 35 ميلليون يۋان اينالاسىندا بولىپ، 5 ميلليون يۋانعا جۋىق پايدا سالىعىن تاپسىرادى ەكەن. جىلىنا ورتا ەسەپپەن جەلىگە شىعاراتىن ەلەكتر مولشەرى 135 ميلليون كيلوۆات ساعاتقا جەتىپ، ۇقساس كولەمدەگى كومىر ەلەكتر ستانسياسىمەن سالىستىرعاندا، جىلىنا 41 مىڭ 400 توننا ولشەمدى كومىر ۇنەمدەپ، كومىرتەگى قوس توتىعىنىڭ شىعارىلۋ مولشەرىن شامامەن 113 مىڭ توننا، كۇكىرت قوس توتىعىنىڭ شىعارىلۋ مولشەرىن شامامەن 21 توننا، ازوت توتىعىنىڭ شىعارىلۋ مولشەرىن شامامەن 24 توننا، ىس-تۇتەك شىعارىلۋ مولشەرىن شامامەن 4.34 توننا ازايتادى ەكەن.
جاقىنعى جىلداردان بەرى تولى اۋدانى مول جەل ەنەرگياسى بايلىعى باسىمدىعىنان تولىق پايدالانىپ، شارۋاشىلىق-ساۋدا ورتاسىن ۇزدىكسىز ساپالىلاندىرىپ، جەل ەلەكتر نىساندارىن سوڭىنا ءتۇسىپ ءبىتىرۋ تەبىنىن ۇزدىكسىز ارتتىرىپ، نىسانداردىڭ ىرگە تەۋىپ، سالىنۋىنا قىزمەت وتەۋ قىزمەتىن شىنايى ويداعىداي ىستەپ، بايلىق باسىمدىعىن ەكونوميكالىق باسىمدىققا اينالدىرۋعا كۇش سالىپ، جەرگىلىكتى ورىن ەكونوميكاسىنىڭ جوعارى ساپالى دامۋىنا قوزعاۋشى قۋات ۇستەدى.
رەداكتورى :الماگۇل اقاتبەك قىزى
تورابىمىزدان ماقالا كوشىرەتىن بولساڭىز، توراپ اتىن بەرىپ قويۋدى ۇمىتپاڭىز، بولماسا زاڭدىق جاۋاپكەرلىگىن قۋزاستىرامىز.
مىسالى: «تارباعاتاي اقپارات تورابىنان» الىندى